LELE MALAPE
IPAKAWAAKANA
MATIUS
Pogau Bhaa-bhaana
Boku Matius apakawaaka i ingkita Lele Malape ande Isa satotuuna Raja mopasalaamatina ijanjiakana Aulataʼala. Alaloi Isa sumaimo Aulataʼala apamondoa opea mopadhana ijanjiakana i nuncana Pojanjia Mangenge i uumatina. Moomini Isa alaahiri minaaka i miana Israel tee adhadhi mboo miana Israel, maka Lele Malape sumai inda soo to miana Israel maka to saangua dunia.
Boku Matius sii atotapi malape, pepuu i laahiriana Isa, kasiimpo to kapebhahoana tee kapancoba inamisina, kasiimpo to ipewauna i Galilea. Iwe sumai incia ahotubaa, aadhari tee alancau mia. Sapadhana sumai boku incia sii apetulatulaaka lingkaana Isa minaaka i Galilea sakawana i Yerusalem, tee opea momembalina tee Isa i manga eo kapadhaana dhadhina i dunia sii motokamatana mpuu i eona matena tee i eona bhanguana.
Sala saangu ipekatamoakana Matius ande Isa satotuuna Guru momaoge, moadharina ande Aulataʼala aparintangi mboomo Raja. Isa uka atokailiili apogauaka maʼana minaaka i Hukumuna Aulataʼala. Abhari minaaka i manga kaadharina Isa sumai akalompoa mboomo motopadhana motosau-sauna malape. Dhaangia lima kolompo: (1) Hotubaa i kogunuana mokokaitana tee iwaajibuaka, manga hakuna, tee haejati dhadhina manga uumatina Aulataʼala (pasala 5-7); (2) apomasusuakea i sapulu rua mia murina Isa to akarajaa tugasina (pasala 10); (3) manga ibarati to kadhaangiana Aulataʼala wakutuuna Aulataʼala aparintangi mboomo Raja (pasala 13); (4) kaadharina to maʼanana mboomo murina Isa (pasala 18); tee (5) kaadhari to aahiri zamani tee o umbaana Anana Maanusia (pasala 24-25).
Antona
Kaburina siwuluna Isa Al Masi tee laahiriana 1:1--2:23
Karajaana Yahya apapebhaho 3:1-12
Papebhahona tee kawuju to Isa 3:13--4:11
Kalaianina Isa i tanga-tangana raʼeatina Galilea 4:12--18:35
Minaaka i Galilea sakawana i Yerusalem 19:1--20:34
I eo-eo kapadhaa i Yerusalem 21:1--27:66
Bhanguana Isa tee patiumbana karona 28:1-20
1
Manga Sarona Opuana Isa Al Masi
1:1-17
(Luk. 3:23-38)
1 Siimo manga opuana Isa Al Masi, siwuluna Daud, siwuluna Ibrahim. Minaaka i Ibrahim sakawana i Daud, manga sarona opuana Isa sumai mboomo sii: 2 Ibrahim akoanaakamo Ishak, Ishak akoanaakamo Yakub, Yakub akoanaakamo Yuda tee manga witinaina, 3 Yuda akoanaakamo Peres tee Zerah. Inana Peres tee Zerah isarongiaka Tamar. Peres akoanaakamo Hezron, Hezron akoanaakamo Ram, 4 Ram akoanaakamo Aminadab, Aminadab akoanaakamo Nahason, Nahason akoanaakamo Salmon, 5 Salmon akoanaakamo Boas. Inana Boas isarongiaka Rahab. Boas akoanaakamo Obed. Inana Obed isarongiaka Rut. Obed akoanaakamo Isai, 6 Isai akoanaakamo Raja Daud, Raja Daud akoanaakamo Sulaiman minaaka i iaiarona Uria; 7 Sulaiman akoanaakamo Rehabeam, Rehabeam akoanaakamo Abia, Abia akoanaakamo Asa, 8 Asa akoanaakamo Yosafat, Yosafat akoanaakamo Yoram, Yoram akoanaakamo Uzia, 9 Uzia akoanaakamo Yotam, Yotam akoanaakamo Ahas, Ahas akoanaakamo Hizkia. 10 Hizkia akoanaakamo Manasye, Manasye akoanaakamo Amon, Amon akoanaakamo Yosia, 11 1:11 2Ra. 24:14-15; 2Taw. 36:10; Yer. 27:20.Yosia akoanaakamo Yekhonya tee manga witinaina wakutuuna miana Israel atobhanaka i tana Babel, 12 Yekhonya akoanaakamo Sealtiel sapadhana miana Israel atobhanaka i tana Babel. Sealtiel akoanaakamo Zerubabel, 13 Zerubabel akoanaakamo Abihud, Abihud akoanaakamo Elyakim, Elyakim akoanaakamo Azor, 14 Azor akoanaakamo Zadok, Zadok akoanaakamo Akhim, Akhim akoanaakamo Eliud, 15 Eliud akoanaakamo Eleazar, Eleazar akoanaakamo Matan, Matan akoanaakamo Yakub, 16 Yakub akoanaakamo Yusuf, Yusuf sumai umanena Siti Mariam, minaaka i Siti Mariam sumai apalaahirimo Isa Al Masi. Maʼanana Al Masi "Raja ipilina Aulataʼala to apasalaamatiaka uumatina."
17 Jadi bhari-bharia siwuluna apepuu minaaka i Nabii Ibrahim sakawana i Raja Daud dhaangia sapulu pata siwulu, tee apepuu minaaka i Raja Daud sakawana wakutuuna miana Israel atobhanaka i tana Babel siwuluna dhaangia sapulu pata mia uka, tee mboo sumai uka minaaka i wakutuuna miana Israel atobhanaka i tana Babel sakawana Al Masi dhaangia sapulu pata mia siwuluna.
Laahiriana Isa Al Masi
1:18-25
(Luk. 2:1-7)
18 1:18 Luk. 1:27.Mboo siimo tulatulana laahiriana Isa Al Masi. Inana siitumo Siti Mariam, apoporae tee Yusuf. Maka indapo manga incia akawi, garaaka Siti Mariam abhawa-bhawamo. (Yusuf inda amataua ande Siti Mariam abhawa-bhawa roonamo kuasana Rohina Aulataʼala). 19 Yusuf poraena sii mia mobanara, jadi bheahaejatimo abhotuki Siti Mariam, maka inda amarobhoakea, mamudhaakana Siti Mariam inda amaea i aroana mia bhari. 20 Maka tangasaana afikiri giu incia sumai, malaaʼekatina Kawasana Opu apatiumba karona i nuncana pongipina tee apogau, "E Yusuf, anana Daud, bholi umaeka utarima Siti Mariam amembali bhawinemu roonamo o anaana ibhawa-bhawana itu minaaka i Rohina Aulataʼala Momangkilo. 21 1:21 Luk. 1:31.Incia bheapalaahiri anaana umane tee ingkoo usarongiakea Isa,*1:21 Isa: Maʼanana Isa pogauna Ibrani, "Kawasana Opu apasalaamatiaka." roonamo Inciamo mopasalaamatina uumatina minaaka i dosana manga." 22 Bhari-bharia sumai amembali mamudhaakana apamondoa Firimanina Kawasana Opu ipakawaakana i nabiina,
23 1:23 Yes. 7:14."Kamatea! Samia kabuabua bheabhawa-bhawa tee apalaahiri samia Anaana umane tee manga mia bheasarongiakea Imanuel,"
(maʼanana, "Aulataʼala apobhawa tee ingkita.") 24 Sabhanguna Yusuf minaaka i koleana, incia apewaumo opea iparintangiakana malaaʼekatina Kawasana Opu. Incia atarimamea Siti Mariam to amembali bhawinena. 25 1:25 Luk. 2:21.Moomini mboo sumai, incia sadhaadhaa inda aporomuakea sakawana Siti Mariam apalaahiri anaana sumai. Salaahirina Anaana sumai, Yusuf asarongiakamea Isa.