LELE MALAPE
IPAKAWAAKANA
MARKUS
POGAU BHAA-BHAANA
Boku Lele Malape ipakawaakana Markus apepuua tee pogau bhaa-bhaana, "Siimo Lele Malape to Isa Al Masi, o Anana Aulataʼala." I nuncana Lele Malape sumai o Isa atopatiumba amembali samia mobharina ipewauna tee atokailiili. Kakidhana atokamata i nuncana carana Incia aadhari, i nuncana kuasana to apadhencu manga seetani, tee i nuncana aʼamponi dosa. Isa apatiumba karona amembali Anana Maanusia modhawuakana inyawana mamudhaakana o maanusia atopabebasi minaaka i dosa.
Tulatulana Isa i nuncana boku incia sii atopakawaaka lausaka tee kajujuru. Markus agambaraaka opea ipewauna Isa alabhi abhari minaaka i opea ipogauakana tee iadhariakana. Sapadhana pogau bhaa-bhaana ipekampodho to Yahya mopapebhahona tee hali papebhahoana Isa tee kapancoba to karona, bokuna Markus sii alausaka apetulatulaaka kalaianina Isa, siitumo tulatulana wakutuuna apaunto kapiina manga mia tee manga kaadharina. Manga pasala kapadhaa o antona siitumo o tulatulana manga kajadia momembalina i minggu kapadhaa i nuncana dhadhina i dunia sii, tee mohususuna mpuu o tulatulana Incia atoloe i kau salib tee tulatulana Incia adhadhi pendua minaaka i mate.
I rua weta kapadhaa minaaka i bokuna Markus motopapesuana i nuncana tanda kurung maoge, abhari o mia moabhia mencuana kaburina mia moburina bokuna Markus, maka o mia mosagaanana.
Antona
Bhaa-bhaana 1:1-13
Isa Alaiani i Tanga-tangana Raʼeatina Poropinsi Galilea 1:14--9:50
Isa Aadhari tee Apewau Manga Muuzizati i Poropinsi Yudea 10:1-52
Ahadi Kapadhaa i Yerusalem tee i Saripina 11:1--15:47
Isa Adhadhi Pendua Minaaka i Mate 16:1-8
Isa Atopatiumba tee Atoangka i Sorogaa 16:9-20
1
Hotubaana Yahya Mopapebhahona
1:1-8
(Mat. 3:1-12; Luk. 3:1-18; Yah. 1:19-28)
1 Siimo kapepuuna Lele Malape to Isa Al Masi, Anana Aulataʼala, 2 1:2 Mal. 3:1. mboomo mopadhana motoburi i nuncana kitabina Nabii Yesaya,
"Kamatea, Iaku kutumpu ilambokoku to aporikanaakako;
incia bhemopasiapuakana dhala to Ingkoo.
3 1:3 Yes. 40:3. Dhaangia o suara mokagora-gorana i tana matuu,
'Pasiapuakea o dhala to Kawasana Opu! Pekakateakea manga dhalana!' "
4 Nabii Yahya*1:4 Nabii Yahya: Yahya iwe sii satotuuna o mia mopapebhahona manga mia motoba. Dhaangia o kananea mosarongiakea samia nabii, tee Isa uka asarongiakea alabhi minaaka i nabii (kamata Mat. 11:9). aumba i tana matuu to apamondo firimani incia sii. Incia apapebhaho mia tee apakoleleaka kapebhahoka sumai to tandana patobaa to kaʼamponiana dosa. 5 Kasiimpo aposaumbamo manga mia minaaka i saangua lipu Yudea tee bhari-bharia raʼeatina Yerusalem to apokawaakea. Manga incia apapebhahoa Yahya i Umala Yordan apoose aʼakui dosana manga incia samia-samia. 6 1:6 2Ra. 1:8. Pakeana Yahya atokarajaa minaaka i buluna unta tee o kamandana minaaka i kuli, sainamo kinandena o kabhoro tee golana uwani. 7 Incia apakawaaka lele incia sii, "Sapadhana iaku, bheaumba samia molabhina kuasana minaaka i iaku. Moomini kuʼungko to kubungkale kabhokena sandalina, iaku inda kulaenga. 8 Iaku kupapebhahokomiu tee uwe, maka Incia bheapapebhahokomiu tee Rohina Aulataʼala Momangkilo."†1:8 Incia bheapapebhahokomiu tee Rohina Aulataʼala Momangkilo: Maʼanana Isa bheadhawuaka Rohina Aulataʼala i manga mia moosea.
Isa Apapebhahoa Nabii Yahya
1:9-11
(Mat. 3:13-17; Luk. 3:21-22; Yah. 1:32-34)
9 I wakutuu incia sumai aumbamo Isa minaaka i kampo Nazaret modhaangiana i Poropinsi Galilea, kasiimpo Incia uka apapebhahoa Yahya i Umala Yordan. 10 Wakutuuna Isa alimba minaaka i uwe, Incia akamatamo laiana apowetamo tee o Rohina Aulataʼala asapo mboomo sambaa manu-manu jarajara i bhawona. 11 1:11 Bhaa. 22:2; Zab. 2:7; Yes. 42:1; Mat. 3:17; 12:18; Mrk. 9:7; Luk. 3:22. Kasiimpo atorangomo suara minaaka i sorogaa, "Ingkoomo o Anaku imaasiakaku, tee Ingkoomo mopasanaana incaku."
Isa Acobaia i Tana Matuu
1:12-13
(Mat. 4:1-11; Luk. 4:1-13)
12 Sapadhana incia sumai, Rohina Aulataʼala alausakamo abhawa Isa i tana matuu. 13 I tampa incia sumai Incia amboore pata pulu eo acobaia Ibilisi‡1:13 Ibilisi: Kapalana manga seetani.. Incia amboore apobhawa-bhawa tee manga binata maila, tee manga malaaʼekati molaiania.
Isa Aumba i Poropinsi Galilea
1:14-15
(Mat. 4:12-17; Luk. 4:14-15)
14 Satorakona Nabii Yahya Mopapebhahona, Isa alingka i Galilea to apakoleleaka Lele Malape minaaka i Aulataʼala. 15 1:15 Mat. 3:2. Pogauna, "Wakutuuna akawamo tee o Pamarintana Aulataʼala amakasumo. Tobamo tee uparacaeamo i Lele Malape!"
Isa Akemba Manga Murina Mobhaa-bhaana
1:16-20
(Mat. 4:18-22; Luk. 5:1-11)
16 Wakutuuna Isa tangasaana adhala i bhiwina Tawona Galilea, Incia akamatamo rua mia andi tee aka, siitumo Simon tee Andreas. Manga incia tangasaana apejala i tawo sumai roonamo manga incia o pande jalana ikane. 17 Isa apogau tee manga incia, "Mai ose Iaku, tee bhekupamembalikomiu pande jalana maanusia." 18 Kasiimpo manga incia alausakamo abholia o jalana tee aosemo Isa. 19 Indapo amaridho o Isa alingka minaaka iwe sumai, Incia akamatamo uka rua mia andi tee aka siitumo Yakub bin Zabdi tee Yahya. Manga incia adhaangia i nuncana bhangka, tangasaana alape-lape jalana. 20 Isa alausakamo akemba Yakub tee Yahya, manga anana Zabdi sumai, kasiimpo manga incia abholi amana tee manga mia iponambona i nuncana bhangka tee alingka aose Isa.
Isa Aadhari i nuncana Tampana Ibaadati i Kapernaum
1:21-28
(Luk. 4:31-37)
21 Isa tee manga murina apesua i kota Kapernaum. I eona Saputuu Incia apesua i tampana ibaadatina miana Yahudi, kasiimpo aadhari. 22 1:22 Mat. 7:28-29. Manga mia aposamentemo arango kaadharina, roonamo Isa aadhari manga incia mboomo samia mobukeakana kuasa, inda mboo carana manga ahalii Hukumu Taurati. 23 I wakutuu incia sumai dhaangia samia ipesuaikina rohi madhaki i tampana ibaadati sumai. Rohi madhaki sumai apekee, 24 "Opea urusamu tee ingkami, e Isa miana Nazaret? Buaka Ingkoo uumba to upabinasa ingkami? Iaku kumatauko! Ingkoo satotuuna Momangkilona, moumbana minaaka i Aulataʼala!" 25 Maka o Isa agorampangia, "Untomo upogau! Limbamo minaaka i mia incia sii!" 26 Kasiimpo rohi madhaki sumai ahudha-hudhalimo mia incia sumai apoose apekee tee suara makaa tee alimbamo minaaka i mia incia sumai.
27 Bhari-bharia mia mokamatana kajadia incia sumai aposamentemo tee apogau podho-podho manga incia, "Opea sii? Saangu kaadhari mobhaau mobukeakana kuasa! Incia aparinta manga rohi madhaki, tee manga incia aose parintana." 28 Kasiimpo atorangomo o lelena Isa i saangua Poropinsi Galilea.
Isa Apaunto Kapiina Ina Maniana Petrus tee Manga Mia Mosagaanana
1:29-34
(Mat. 8:14-17; Luk. 4:38-41)
29 Salimbana minaaka i tampana ibaadati, Isa alingkamo i bhanuana Simon tee Andreas apobhawa-bhawa tee Yakub tee Yahya. 30 Ina maniana Simon tangasaana apotidhole roonamo amagari buluna. Manga incia alausakamo apaumbaakea o hali incia sumai i Isa. 31 Sumaimo Isa aumbatimo ina maniana Simon, kasiimpo akeni limana tee apabhangua, kasiimpo kagarina buluna ailamo tee o bhawine sumai alaianimo manga incia. 32 Sakawana malo, i wakutuuna matana eo asoomo, bhari-bharia manga mia momapii tee manga mia ipesuaikina seetani abhawea i Isa. 33 Bhari-bharia raʼeatina kampo sumai aporomusakamo i aroana bhamba. 34 Incia apaunto mia bhari monamisina pegiu-giuna panyaki tee apadhencu bhari seetani. Incia inda aundaakea manga seetani sumai to apogau, roonamo manga seetani sumai amataua incema o Isa satotuuna.
Isa Aadhari i Kota-kota Mosagaanana
1:35-39
(Luk. 4:42-44)
35 Saeona mpuu, Isa abhangumo wakutuuna dhaangiapo araneeo mpuu. Kasiimpo Incia alingka i tampa momalino tee adoʼamo iwe sumai. 36 Maka o Simon tee manga sabhangkana alingkamo apeelo Isa. 37 Wakutuuna apokawaakea, manga incia apogaumo tee Isa, "E Opu, bhari-bharia mia apeeloko!"
38 Maka alawanimo o Isa, "Maimo talingkaaka i tampa mosagaanana, i kota-kota momakasuna mamudhaakana iwe sumai uka Iaku kumembali kupakawaaka Lele Malape, roonamo kuumba to giumo incia sumai." 39 1:39 Mat. 4:23; 9:35. Kasiimpo alingkamo o Isa apakawaaka Lele Malape i bhari-bharia tampana ibaadatina miana Yahudi i saangua Poropinsi Galilea tee apadhencu manga seetani.
Isa Apaunto Kapiina Samia Mokopanyakina Kulidhaa
1:40-45
(Mat. 8:1-4; Luk. 5:12-16)
40 Kasiimpo aumbamo samia mokopanyakina kulidhaa apokawa tee Isa. Apoose asuju incia aemani i Isa, "Ande uunda, Ingkoo umembali upaunto kapiiku." 41 Sumaimo o Isa amaasimo incana tee mia incia sumai. Isa apaulumo limana tee adhingkumo mia incia sumai, kasiimpo apogau, "Iaku kuunda kupaunto kapiimu!" 42 Wakutuu incia sumai uka ailamo panyaki kulidhaa inaajisiakana tee incia amangkilomo.§1:42 incia amangkilomo: I nuncana Hukumu Taurati, mia mokopanyakina kulidhaa atoabhi anaajisi tee tabeana adhadhi atogaati minaaka i raʼeati mosagaanana. Siitumo apokia o Isa apogau ande o mia sumai amangkilomo sauntona kapiina. 43 Isa audhaniakamo mia incia sumai, kasiimpo atumpua alingka. 44 1:44 Im. 14:1-32. Pogauna Isa i incia, "Udhania, bholi upetulatulaaka hali incia sii i incemapo uka, maka ulingkamo tee upakamataakea o karomu i manga imamu. Kasiimpo upasombaakea kurubanina pekangkiloamu roonamo auntomo minaaka i kapiimu mboomo iparintaakana Nabii Musa. Giu incia sumai bheamembali bukutii to manga incia ande auntomo kapiimu." 45 Maka o mia incia sumai alingkamo tee apepuumo apetulatulaakea o hali incia sumai tee apakoleleakea iapai-iapai uka, sabutuna o Isa indamo amembali apesua i nuncana kota tee apatiumba karona. Incia tangkanamo amboore i sambalina kota, i tampa-tampa momalino. Maka moomini mboo sumai manga mia mominaakana i sagala tampa asadhaadhaa aumbatia.
1:2 1:2 Mal. 3:1.
1:3 1:3 Yes. 40:3.
*1:4 1:4 Nabii Yahya: Yahya iwe sii satotuuna o mia mopapebhahona manga mia motoba. Dhaangia o kananea mosarongiakea samia nabii, tee Isa uka asarongiakea alabhi minaaka i nabii (kamata Mat. 11:9).
1:6 1:6 2Ra. 1:8.
†1:8 1:8 Incia bheapapebhahokomiu tee Rohina Aulataʼala Momangkilo: Maʼanana Isa bheadhawuaka Rohina Aulataʼala i manga mia moosea.
1:11 1:11 Bhaa. 22:2; Zab. 2:7; Yes. 42:1; Mat. 3:17; 12:18; Mrk. 9:7; Luk. 3:22.
‡1:13 1:13 Ibilisi: Kapalana manga seetani.
1:15 1:15 Mat. 3:2.
1:22 1:22 Mat. 7:28-29.
1:39 1:39 Mat. 4:23; 9:35.
§1:42 1:42 incia amangkilomo: I nuncana Hukumu Taurati, mia mokopanyakina kulidhaa atoabhi anaajisi tee tabeana adhadhi atogaati minaaka i raʼeati mosagaanana. Siitumo apokia o Isa apogau ande o mia sumai amangkilomo sauntona kapiina.
1:44 1:44 Im. 14:1-32.