SURANA PAUL
TO
FILEMON
POGAU BHAA-BHAANA
Filemon satotuuna o miana Karasiteni motokailiili momembalina anggotana jamaʼa i kota Kolose. Incia dhaangia tee bhatuana mokosaroakana Onesimus. Bhatua sii apalai minaaka i Filemon opuna sumai, kasiimpo inda tee momataua tuaapa ipomatauakana tee Paul wakutuuna Paul dhaangiapo i nuncana katorongku. Onesimus aparacaea tee Isa roonamo kaadharina Paul.
I nuncanaSurana Paul To Filemon sii o Paul aemani mpuu mamudhaakana o Filemon aunda apomalape pendua tee Onesimus. Onesimus sii o bhatuana motangasaana mombulina roonamo Paul atumpua mboo sumai. Paul aemani mamudhaakana o Filemon aunda atarima pendua Onesimus, mencuana tangkanamo mboomo o bhatuana mopadhana imaʼafuaka, maka rampaakanamo Onesimus uka samia witinai saʼagama Karasiteni.
Antona
Porikanaana pogau 1-3
Kaasi tee iimanina Filemon 4-7
Iemanina mpuu to Onesimus 8-22
Katutubhi 23-25
1
Salamu
1-3
1 Minaaka i Paul, mia itorongku rampaakanamo Isa Al Masi, tee Timotius, witinaita saʼagama.
To Filemon imaasiakamami tee sabhangkamami takarajaa, 2 to Apfia, witinaita bhawine, 1:2 Kol. 4:17.to Arkhipus sabhangkata mopobhawa-bhawana tapoewangiaka bhari-bharia masaʼala, tee manga jamaʼa modhaangiana i bhanuamu.
3 Maasangia rahumati tee dhadhi malape minaaka i Aulataʼala, Amata, tee minaaka i Isa Al Masi Oputa Momalanga apobhawa tee ingkoo.
Kaasi tee Iimanina Filemon
4-7
4 Iaku sadia kusukuru i Aulataʼala wakutuuna kuudhani saromu i nuncana doʼaku, 5 roonamo kurangoa o lelemu atotuu-totuu uparacaea tee Isa Al Masi Oputa Momalanga, tee umaasiaka bhari-bharia mia mosaalihi. 6 Iaku kudoʼa maasangia o powitinaita i nuncana iimanita tee Isa bheakohasiliaka maʼana molabhina kaogena to bhari-bharia kabarakati momembalina pewauata roonamo taposaangu tee Al Masi. 7 E witinaiku, iaku kukaunde-unde mpuu roonamo kaasimu tee upekatangkaaku, roonamo padhamo uhiburu ngangarandana manga mia mosaalihi.
Iemanina Paul i Filemon Pokaiana tee Onesimus
8-22
8 I nuncana sarona Isa Al Masi, satotuuna iaku kubarani kudhawuakako parinta tee opea tabeana ipewaumu, 9 maka roonamo kuudhani kaasi, sumaimo iaku salabhina kuemani i ingkoo. Iaku o Paul, kukoʼumurumo tee sii-sii kutotorongku roonamo Isa Al Masi. 10 1:10 Kol. 4:9. Rampaakanamo sumai dhaangia tee iemaniku i ingkoo pokaiana tee Onesimus. Incia amembalimo mboomo anaku karoku, roonamo incia aparacaea tee Al Masi alaloi kaadhariku wakutuuna kutotorongku. 11 Wakutuuna incia dhaangiapo amembali bhatuamu, inciamo incia 'Inda Akoguna' to ingkoo, maka sii-sii incia 'Akogunamo' mpuu,*1:11 Inda Akoguna...Akogunamo: Saro Onesimus sii o maʼanana 'akoguna,' apokana mboomo sarona Gunawan i nuncana pogau Malau. I nuncana aeati incia sii, Paul apake ibarati, roonamo i piamo itu Onesimus sii o mia momangare, atawa roonamo incia apalaiaka karona minaaka i Filemon, sumaimo sarona alabhi acoco 'Inda akoguna.' Maka roonamo Onesimus amembalimo witinai saʼagama, sumaimo wakutuuna o Paul apogau to rua mpearona, sarona mobhaa-bhaana i saao acocomo pendua. Kamatea uka i aeati 20. malape to iaku atawa to ingkoo.
12 Sii-sii o anaana imaasiakaku sii kutumpumea ambuli pendua tee ingkoo. 13 Satotuuna iaku gauku kutaangia to alaianiaka iaku to kupamembalia kabholosimu, wakutuuna iaku dhaangiapo i nuncana katorongku to Lele Malape minaaka i Aulataʼala. 14 Maka iaku kumendeu kupewau opeopea uka ande indapo usatujuia, roonamo kumendeu kupakisaako to upewau giu momalape, ande inda aminaaka i karelana totona incamu. 15 Aipomo siimo mbakana incia apapogaaia sabantara minaaka i ingkoo, mamudhaakana amembali utarimaia to saʼumurua. 16 Sii-sii, incia mencuana soo samia bhatua, maka amembalimo witinaita saʼagama. Ande iaku kumaasiakea, dhaanamo kamaasiakamu ahanda mpuu tee incia, roonamo incia o anggotana rumatanggamu tee uka ingkomiu uposaangumo i nuncana Kawasana Opu.
17 Rampaakanamo sumai, ande uabhiaku sabhangkamu saʼiimani, utarimamea incia mboomo utarima iaku. 18 Ande incia tee kasalahana atawa dhaangia tee dhosana i ingkoo, taroakamo iaku motanggoa bhari-bharia sumai. 19 Iaku o Paul, minaaka i kaburina limaku sii kujaminia: Iaku bhemopomeaia. Bholimo kuudhaniakako pokaiana dhosamu i iaku, siitumo dhadhimu abhaau umembali mia moparacaeana tee Isa. 20 E witinaiku, ingkita tamembalimo witinai roonamo Isa Al Masi, sabutuna i nuncana posaanguata tee Kawasana Opu, iaku kuemani mpuu upewaumea o iemaniku sumai, mamudhaakana o ngangarandaku atanangi.
21 Kuburia o sura sii to ingkoo roonamo kuyaakini tee kataʼatimu. Iaku kumatauko bheupewau alabhi minaaka iemaniku. 22 Tee uka, kuemani tulungi upasadiaakaaku kamara to iaku i bhanuamu, roonamo kuharapu i Aulataʼala rampaakana manga doʼamiu iaku bhekumbuli pendua tee ingkomiu.
Pogau Kapadhaa
23-25
23 1:23 Kol. 1:7; 4:12.Salamu to ingkoo minaaka i Epafras, sabhangkaku i nuncana katorongku roonamo sarona Isa Al Masi. 24 1:24 Tul. 12:12; 12:25; 13:13; 15:37-39; 19:29; 27:2; Kol. 4:10; 4:14; 2Tim. 4:10-11.Salamu to ingkoo uka minaaka i manga sabhangkamami sakarajaa mosagaanana siitumo, Markus, Aristarkhus, Demas, tee Lukas.
25 Rahumatina Isa Al Masi Oputa Momalanga apoose tee ingkomiu bhari-bharikomiu.
1:2 1:2 Kol. 4:17.
1:10 1:10 Kol. 4:9.
*1:11 1:11 Inda Akoguna...Akogunamo: Saro Onesimus sii o maʼanana 'akoguna,' apokana mboomo sarona Gunawan i nuncana pogau Malau. I nuncana aeati incia sii, Paul apake ibarati, roonamo i piamo itu Onesimus sii o mia momangare, atawa roonamo incia apalaiaka karona minaaka i Filemon, sumaimo sarona alabhi acoco 'Inda akoguna.' Maka roonamo Onesimus amembalimo witinai saʼagama, sumaimo wakutuuna o Paul apogau to rua mpearona, sarona mobhaa-bhaana i saao acocomo pendua. Kamatea uka i aeati 20.
1:23 1:23 Kol. 1:7; 4:12.
1:24 1:24 Tul. 12:12; 12:25; 13:13; 15:37-39; 19:29; 27:2; Kol. 4:10; 4:14; 2Tim. 4:10-11.