SURANA PAUL
TO JAMAʼA I
FILIPI
POGAU BHAA-BHAANA
Jamaʼa i Filipi satotuuna o jamaʼa mobhaa-bhaana ipakarona Paul i Eropa. Tampana Kota Filipi adhaangia i Makedonia, saangu poropinsi i nuncana pamarintana Roma. Surana Paul To Jamaʼa i Filipi sii atoburi wakutuuna o Paul tangasaana atotorongku. Tee namisina Paul tangasaana amarewu incana roonamo dhaangia tee miana Karasiteni mobhalia. Tee uka roonamo i nuncana jamaʼa i Filipi sumai dhaangia tee manga mia moadhariakana manga kaadhari mosaladhala. Maka moomini mboo sumai o antona surana Paul sii akoantoaka manga bhoasaka mokaunde-unde tee mobukeakana kaharapu. Opea o sababuna mbakana mboo sumai? Atantumo inda tee mosagaanana soo rampaakana o Paul aparacaea mpuu tee Al Masi.
Paul aburi sura incia sii roonamo bhaa-bhaana incia gauna apotarimakaasi tee manga jamaʼa i Filipi to kadhawu mopadhana itarimana minaaka i manga incia wakutuuna o Paul adhaangia i nuncana kasukara. Tee i nuncana kalalesana aburi sura incia sii o Paul uka gauna apayaakini manga jamaʼa i Filipi mamudhaakana abarani tee asabara aaro kasukara. Paul aemani mpuu mamudhaakana manga incia apaporitambe karona mboomo Isa, tee inda akuasaia inca mosombo tee soo aose kapeeluana karona. Paul audhaniaka manga incia uka ande soo rampaakanamo rahumatina Aulataʼala momembalina mopaposaanguna manga incia tee Al Masi mboo opea o kaparacaeana manga incia tee Isa, mencuana roonamo manga incia ataʼati apewaua manga tutura itantuaka i nuncana agamana miana Yahudi. Sapadhana incia sumai, Paul aburi uka pokaina tee giuna kaunde-unde tee dhadhi malape idhawuakana Aulataʼala to manga mia modhadhina moposaanguna tee Al Masi.
Posalana sura incia sii tee sura mosagaanana satotuuna o sura incia sii ahususuaka kaunde-unde, pekatangkaana inca, posaangua, tee kasabarana miana Karasiteni wakutuuna apotaangiaka kaparacaeana tee Al Masi tee tuaapa tadhadhi tamembali miana Karasiteni. Sura incia sii asusuaka uka tuaapa o kamaasiakana Paul tee jamaʼa i Filipi sumai.
Antona
Porikanaana pogau 1:1-11
Kadhaangiana Paul 1:12-26
Dhadhina miana Karasiteni 1:27--2:18
Haejati to Timotius tee Epafroditus 2:19-30
Kaudhaniaka tee manga musu mominaakana i sambali tee mominaakana i nunca 3:1--4:9
Paul tee manga sabhangkana i Filipi 4:10-20
Kapadhaana pogau 4:21-23
1
Salamu
1:1-2
1 1:1 Tul. 16:12. Minaaka i Paul tee Timotius, manga bhatuana Isa Al Masi. To bhari-bharia mia mosaalihi i nuncana sarona Isa Al Masi i Kota Filipi tee manga kapalana jamaʼa tee manga mia molaianina uumati.
2 Rahumati tee dhadhi pomalape minaaka i Aulataʼala, Amata, tee minaaka i Isa Al Masi, Oputa Momalanga, apoose tee ingkomiu.
Emaniana Sukuru tee Doʼa
1:3-11
3 Iaku kuemani sukuru i Aulataʼala gagari kuudhanikomiu. 4 Gagari kuemaniakakomiu doʼa, iaku sadia kupewaua tee kaunde-unde. 5 Iaku kupotarimakaasi tee Aulataʼala roonamo minaaka i eo bhaa-bhaana tee sakawana sii-sii ingkomiu umembali sabhangkaku sakarajaa to tapakawaaka Lele Malape. 6 Rampaakanamo sumai kuyaakini ande o Aulataʼala mopepuungina karajaa momalape i tanga-tangamiu, bheapatorosua sakawana o karajaana sumai amondo i eona Isa Al Masi ambuli pendua.
7 Inciamo alaenga ande kufikiriakakomiu mboo sumai, roonamo bhari-bharikomiu kudhikakomiu i nuncana ngangarandaku. Tee uka roonamo ingkomiu upoose upobhawa-bhawa tee iaku wakutuuna kutarima rahumati idhawuakana Aulataʼala, malape iaku dhaangiapo i nuncana katorongku atawa wakutuuna kudhaangiapo i sambali to kuewaaka tee kupotaangiaka ande o Lele Malape sumai abanara. 8 Aulataʼala o sakusiiku ande iaku kupemeliliakakomiu tee kaasina incana Isa Al Masi.
9 Siimo doʼaku to ingkomiu: maasangia ingkomiu uhanda umaasiaka Aulataʼala tee uhanda upomaamaasiaka podho-podho ingkomiu. Iaku uka kudoʼa maasangia o kaasimiu ahanda ajulu i nuncana katau mobanara tee uka umembali mia mokofikirina moʼaarifu, 10 sabutuna ingkomiu umembali upili momalapena mpuu. Tee mboo sumai, wakutuuna umbaana Al Masi o dhadhimiu amangkilo tee inda upewau kasalaha, 11 abukeaka tee bhakena kabanara ikarajaana Isa Al Masi to amuliangiaka tee apuji Aulataʼala.
Kasakusiina Paul i nuncana Katorongku
1:12-26
12 E manga witinaiku, iaku gauku ingkomiu umataua ande manga giu ipotibhaakaku tee inamisiku sakiaia sii siitumo imembaliakana sahandana abhari o mia morangona tee moparacaeana Lele Malape sumai. 13 1:13 Tul. 28:16. Aahirina sii-sii bhari-bharia pande jagana malige tee manga mia mosagaanana amataumea ande iaku kutotorongku tee rante ase rampaakanamo kulaiani Al Masi. 14 Tee rampaakanamo kutotorongku tee rante ase, alabhi o kabharina witinaita mohandana moyaakinina i nuncana sarona Kawasana Opu minaaka i pande jagana malige mosagaanana inda moparacaea, sabutuna manga incia ahanda abarani, tee inda anamisi kaeka wakutuuna apakawaaka firimanina Aulataʼala.
15 Inciamo dhaangia pia-pia mia mopakoleleakana Al Masi rampaakanamo agigibuluaku tee apeelu apotagali, maka dhaangia uka mopakoleleakana Al Masi tee neati momalape. 16 Manga mia mopakoleleakana Al Masi tee neati momalape sii apewaua rampaakanamo amaasiakaaku, roonamo manga incia atotuu-totuu amataua ande o Aulataʼala padhamo alambokoaku iwe sii mamudhaakana kubukutiiakea o Lele Malape sii abanara. 17 Sainamo manga incia mopakoleleakana Al Masi tee haejati inda moʼihilasi; giu incia sumai manga incia apewaua tangkanamo to aose kapeeluna karona tee mboo sumai aharapu amembali apajulu katamona kanarakaaku i nuncana katorongku.
18 Maka inda apokia! Roonamo moomini tuaapa, malape tee neati mobanara atawa tee neati mosala, dhaanamo sadhaadhaa o Al Masi atopakoleleaka uka. Hali incia sumai amasanaakea incaku, tee kukaunde-undeakea, 19 roonamo kumataua ande iaku bhekutopabebasi, rampaakanamo ingkomiu udoʼa to iaku tee kahamba minaaka i Rohina Isa Al Masi. 20 Giu ipemeliliakaku tee iharapuku satotuuna mamudhaakana bholi sampeampearo kutopekaea i nuncana tugasiku. Maka tee bhari-bharia kabaraniku, mboomo i wakutuu molapana tee uka i wakutuu sii-sii, Al Masi atomuliangi i nuncana karoku, malape alaloi dhadhiku atawa alaloi mateku. 21 Roonamo ifikiriku, maʼanana dhadhiku satotuuna o kalalesa to kulaiani Al Masi, tee o mate sumai satotuuna o laba to karoku. 22 Maka ande sadhaadhaana kudhadhi i dunia sii, iaku dhaangia kumembali kupewau giu mokoguna, sumaimo iaku inda kumataua iapai o giu bheipiliku sadhaadhaa bhekudhadhi atawa bhekumate, 23 roonamo dhaangia rua giu o hali mopajungkuaku. Iaku gauku mpuu kubholia o dunia sii to kulingka kumboore tee Al Masi, roonamo giumo incia sumai momalapena mpuu to iaku. 24 Maka, rampaakanamo ingkomiu, salabhina kusadhaadhaa kudhadhi i dunia sii mamudhaakana kutulungikomiu. 25 Rampaakanamo sumai, iaku kuyaakini ande bhekusadhaadhaa kudhadhi mamudhaakana kumembali kutulungikomiu umembaliaka uhanda umaju tee ukaunde-unde i nuncana iimanimiu. 26 Tee mboo sumai, alaloi umbaaku pendua i tanga-tangamiu, kaunde-undemiu i nuncana sarona Isa Al Masi ahanda ajulu rampaakanamo iaku.
Kaudhaniaka mamudhaakana Sadhaadhaa Upotaangi
1:27-30
27 Rampaakanamo sumai, giu mofaraluuna mpuu siitumo ande ingkomiu tabeana udhadhi upapokanea tee opea iadhariakana i nuncana Lele Malape pokaiana tee Al Masi. Iaku inda kumataua buakana naile itu bhekuumba tee kupokawa tee ingkomiu atawa inda. Maka, kuharapu iaku bhekurangoa ande ingkomiu sadhaadhaa udhaangia i nuncana saangu rohi tee saangu fikiri, upobhawa-bhawa uewaaka iimani mominaakana i Lele Malape, 28 tee ingkomiu bholi umaeka saidhe uka tee manga mia mobhalikomiu. Ingkomiu tabeana ubarani mamudhaakana manga incia amataua ande manga incia dhaanamo bheabinasa tee ingkomiu bheutopasalaamati alaloi Aulataʼala. 29 Rampaakanamo Al Masi, ingkomiu arahumatiakakomiu kalalesa mencuana tangkanamo to uparacaea tee Incia, maka unarakaa uka to Incia. 30 1:30 Tul. 16:19-40. Sii-sii ingkomiu upoosemo tee iaku i nuncana potimbea mopokana, siitumo mboomo opea mopadhana ikamatamiu ipotaangiakaku i piamo itu, tee dhaangiapo uka kupotaangiakea sakawana sii-sii, mboomo mopadhana irangomiu.