Zaburu
Pogau bhaa-bhaana
Boku Zaburu satotuuna sagaa minaaka i Kitabi Momangkilo momembalina boku lagu-lagu tee boku doʼa. Boku incia sii aburia manga pande burina puisii i nuncana wakutuu momangengena mpuu. Manga lagu tee manga doʼa sii arombusakea miana Israel tee apakea i nuncana sambaheana manga, kasiimpo apapesuaia i nuncana Kitabi Momangkilo. Manga kabhantina agama sii apegiu-giu: dhaangia lagu kapujia tee dhaangia lagu to tasomba Aulataʼala; dhaangia o doʼa taemani tulungi, peulusa tee kasalaamati; doʼa taemani amponi; lagu kasukuru roonamo barakatina Aulataʼala, tee doʼa mamudhaakana o musuna atohukumu. Manga doʼa incia sii dhaangia mokosifatuna to karota samia, dhaangia uka mokosifatuna to saangua lipu. Pia-pia giu minaaka i doʼa sumai aʼibaratiaka namisina samia-samia i nuncana ngangarandana, sainamo mosagaanana apogauaka ifaraluuna tee namisina bhari-bharia uumatina Aulataʼala. Manga Zaburu apakea Isa, aalea minaaka i manga pande buri Pojanjia Bhaau, tee apamembalia boku sambahea aharagaangia mpuu i Gareja Karasiteni minaaka i auwalina.
Antona
I - 150 Zaburu abagea i nuncana lima kolompo atawa o boku, mboomo incia sii:
Boku bhaa-bhaana: Zaburu 1--41
Boku i rua anguna: Zaburu 42--72
Boku i talu anguna: Zaburu 73--89
Boku i pata anguna: Zaburu 90--106
Boku i lima anguna: Zaburu 107--150
BOKU BHAA-BHAANA:
1
ZABURU 1--41
Kasanaa Saʼumurua
1:1-6
1 Amasanaamo mia
inda moosena kaadharina mia madhaki,
inda aose mia mokodosa
tee inda aposabhangka tee manga mia pande pogauakana mia,
2 maka mopeeluna moosena hukumuna KAWASANA OPU,
tee audhania malo tee eo.
3 1:3 Yer. 17:8.Mia incia sumai bheakohasili i nuncana opeapo ikarajaana.
Incia mboomo puuna kau ipombula i bhiwina uwe mosiwulu,
akobhake wakutuuna akawa bulaana,
tee o tawana inda amalau.
4 Maka o mia madhaki inda mboo sumai.
Manga incia mboomo kulina bhae ipolakaakana ngalu.
5 Sababuna sumai o mia madhaki bheahukumua Aulataʼala wakutuuna atoʼadili,
mboomo uka o mia mokodosa inda bheapapesuaia i nuncana uumatina mobanara.
6 Sababuna o KAWASANA OPU ajagani mia mobanara,
maka o mia madhaki bheabinasa.