21
Kapujiana to Kamangantalona Raja
21:1-14
1 To kapalana molaguna. Zaburuna Daud.
2 E KAWASANA OPU, raja akaunde-unde roonamo kuasamu
tee amaoge mpuu o undena roonamo kasalaamati minaaka i Ingkoo!
3 Ingkoo udhawua opea ipeeluna,
tee Ingkoo uundapia iemanina.
Sela
4 Satotuuna, Ingkoo upepago incia tee barakati motaralabhi-labhi,
Ingkoo upasaakea mahakota minaaka i bulawa asilii i bhaana.
5 Incia aemani dhadhi i karomu, tee Ingkoo udhawuakea
umuru marambe to saʼumurua.
6 Amaoge o kamuliangina roonamo kasalaamati minaaka i karomu,
kaogesa tee kuasa udhawuakea to incia.
7 Ingkoo udhawuakea barakati to incia saʼumurua,
tee upaunde-undea namisina i aroamu.
8 Raja aparacaea i KAWASANA OPU,
tee roonamo kaasina molagina Aulataʼala Momalanga, incia inda bheasindoli.
9 Tee kuasamu bheurako bhari-bharia musumu,
tee kuasamu karomu bheurako manga mia mobanciko.
10 Ingkoo bheupamembali manga incia mboomo waa mokarore-rore
wakutuuna upatiumba karomu.
Roonamo tee pamuruna KAWASANA OPU, manga incia bheatopepadhai,
tee manga incia bheakandea waa.
11 Bhari-bharia anana tee opuopuana manga incia bheupabinasea minaaka i bhawona alamu,
tee o siwuluna manga incia uka minaaka i tanga-tangana anana maanusia.
12 Moomini manga incia ahaejati madhaki to Ingkoo,
tee ahaejati bheatipuko, manga incia inda bheamembali.
13 Ingkoo bheupewau manga incia apalaiaka karona
wakutuuna uhela matana panamu tee upatotoaka rouna manga incia.
14 E KAWASANA OPU, taroakamo utopekalanga i nuncana kuasamu!
Ingkami bhetalaguaka lagu kapujia to kaogesamu.