35
Doʼa Emaniana Tulungi to Tapoaro tee Musu
35:1-28
1 Zaburuna Daud.
E KAWASANA OPU, upobhaliakea manga mia mobhaliaku,
tee upotimbeakea manga mia mopotimbeakaaku.
2 Kenia o katangkesi maidhiidhi tee katangkesi maogemu,
tee ubhangumo utulungiaku!
3 Bhindumea o pandanga tee ndamumu
to uewangi manga mia mopajereaku!
Paumbaaku ande Ingkoomo
mopasalaamatiaku!
4 Taroakamo manga mia bhemopekamateaku
amaea tee apotibhaaka aebu.
Taroakamo manga mia mohaejatiakana kadhaki to iaku
asowo tee atopekaea.
5 Taroakamo manga incia mboo kulina bhae
ikamburakana ngalu.
Taroakamo manga incia
apajerea malaaʼekatina KAWASANA OPU.
6 Taroakamo dhalana manga incia amalalanda tee amararo,
tee manga incia apajerea malaaʼekatina KAWASANA OPU.
7 Roonamo manga incia ataa katapu to iaku inda tee alasana
tee manga incia aseli kabhalongko to arakoaku inda tee sababuna.
8 Taroakamo manga incia abinasa i wakutuu inda inamunamuna,
tee taroakamo manga incia apesua i nuncana katapu itaana karona.
Taroakamo manga incia akotibu tee abinasa i nuncana.
9 Sumaimo kusambo-sambo roonamo KAWASANA OPU
tee kukaunde-unde roonamo Incia apasalaamatiaku.
10 Tee mpuu-mpuuna incaku bhekupogau,
"E KAWASANA OPU, Ingkoo inda tee kadhimbamu!
Ingkoo upasalaamati manga mia malute
wakutuuna manga mia makaa apisaki manga incia,
Ingkoo ujagani manga mia malute tee momisikini
minaaka i limana manga mia morampasia."
11 Manga mia madhaki adhawu kasakusiina to abhaliaku,
tee araeakaaku kupewau manga giu inda imatauku.
12 Kalapeku manga incia abholosia tee kadhaki,
ngangarandaku amaasi tee amate o akalaku.
13 Garaaka, wakutuuna manga incia amapii,
iaku kupake kae kadhu to tandana ande incaku amaporo.
Kusikisaa karoku tee kupoasa,
tee kupatungku bhaaku wakutuuna kudoʼa.
14 Mboomo kudoʼaaka sabhangkaku atawa o witinaiku.
Iaku kutungku kutangisi manga incia,
mboomo mia mosukara motangisina mateana inana.
15 Maka wakutuuna kutosunu, manga incia amasanaa tee aele-eleaku.
Manga incia aporomusaka abhaliaku,
tee inda aunto-unto afitanaaku.
16 Mboomo manga mia munaafiki, manga incia aele-eleaku torosu
tee apakiri-kiriakaaku ngincina.*35:16 apakiri-kiriakaaku ngincina: Tandana o mia aʼamara tee abanci mia mosagaanana to miana Israel.
17 E Kawasana Opu, sakawana naepia Ingkoo soo utonto-tontoaku?
Pabebasia o inyawaku minaaka i kahumbunina manga incia,
rambasakaaku minaaka i manga musuku mohumbuniaku mboomo manga singa mangura sumai!
18 Sapadhana upasalaamatiaku, iaku bhekusukuru i Ingkoo
i tanga-tangana uumatimu,
tee bhekupujiko i tanga-tangana mia bhari.
19 35:19 Zab. 69:5; Yah. 15:25.Bholi utaroakea manga mia amusuiaku inda tee sababuna
akaunde-unde wakutuuna akamataaku kunarakaa,
tee bholi utaroakea manga mia abanciaku inda tee sababuna
tee apotawaikiaku wakutuuna kusukara.
20 Roonamo mencuana giu pomalape ipogauakana manga incia,
maka manga incia apogauaka haejatina to apekagau
to abhali manga mia mopomalapena i lipu sii.
21 Manga incia akakee-kee tee ahinaaku
kasiimpo apogau, "Atumpu incamu, ingkami takamatamea ipewaumu!"
22 E KAWASANA OPU Ingkoo padhamo ukamatea.
Bholimo soo utaroaka!
E Kawasana Opu, bholimo umaridho minaaka i iaku.
23 Bhangumo uewaaka hakuku,
tee parakaraku, e Aulataʼalaku Kawasana Opuku!
24 E KAWASANA OPU, e Aulataʼalaku, adiliaku upapokanea mboomo kabanaramu!
Bholi utaroakea manga incia akaunde-unde wakutuuna akamataaku kunarakaa.
25 Bholi utaroakea manga incia apogau i nuncana ngangarandana,
"Atumpu incamu, siitumo ipeelumami!"
Bholi utaroakea manga incia apogau, "Padhamo tapahancurua!"
26 Taroakamo manga mia mokaunde-undena mokamataaku wakutuuna kunarakaa
amembali amaea tee abingu.
Taroakamo manga mia mosomboakana karona
amaea tee apotibhaaka aebu.
27 Taroakamo asambo-sambo tee akaunde-unde
manga mia gauna bheakamataaku kutopabanara!
Taroakamo manga incia bheapogau, "Tapanamo kaoge o KAWASANA OPU!
Incia akaunde-unde ande akamata dhadhina bhatuana amasanaa tee inda akakurangaaka opeopea!"
28 Sumaimo iaku bhekupakoleleaka kabanaramu,
tee kupuji-pujiko saeoa.