BOKU I RUA ANGUNA:
42
ZABURU 42--72
Pemelili to Aulataʼala, Haakimu Moʼadili
42:1--43:5
1 To kapalana molaguna. Lagu kaadharina miana Korah.*42:1 miana Korah: Kolompona molaguna minaaka i siwuluna Korah (kamata Kab. 26:10), siitumo o Heman tee manga anana. Nabii Daud apatugasiaka Heman to apakawaaka kasameana nabii aoseakea gambusu tee lagu i nuncana ibaadati i Baitulla.
2 Mboomo rusa apemeliliaka umala mokouwe,
mboo sumai uka iaku kupemeliliaka Ingkoo, e Aulataʼala.
3 Iaku kufaraluu mpuu Aulataʼala,
Aulataʼala modhadhi.
Naepia amembali kupoaro tee kukamata Aulataʼala?
4 Malo eona kutangi,
loluku amembali kinandeku.
Saeoa o musuku aele-eleaku tee apogau,
"Iapai o Aulataʼalamu?"
5 Giumo incia sii iudhaniku,
wakutuuna kupetulatulaaka o antona ngangarandaku:
Tuaapa i piamo itu kulingka kupobhawa tee mia bhari wakutuu taporope i bhanuana Aulataʼala,
kuporiaroaaka dhala
poose tasambo-sambo tee tasukuru
i nuncana kariaa sumai.
6 Pokia ingkoo umaasi e ngangarandaku,
tee ulilaho i nuncana badaku?
Harapumo i Aulataʼala roonamo iaku uka bhekupuji Incia
tee kasalaamati moumbana minaaka i aroana.
7 E Aulataʼalaku, ngangarandaku ahancuru i nuncana badaku,
rampaakanamo sumai iaku bhekuudhaniko
minaaka i lipuna Umala Yordan tee Gunu Hermon,
tee minaaka i Gunu Mizar.
8 Andalaoge alawani andalaoge mosagaanana
tee suarana momakaa o uwe momandawu minaaka i kalangaana.
Bhari-bharia ewo tee solomu
akangkanaiaku.
9 I wakutuuna aeo KAWASANA OPU aparintaaka kaasina molagina,
tee i wakutuuna amalo iaku kulagu,
siitumo saangu doʼa to Aulataʼala mopadhadhiaku.
10 Iaku kupogau tee Aulataʼala, gunu bhatuku,
"Pokia umalinguakaaku?
Pokia manga musuku apisakiaku
sabutuna iaku sadiamo kusukara?
11 Mboomo katobhoki imateaka i nuncana bukuku,
manga bhaliku aele-eleaku.
Manga incia saeoa aabha,
"Iapai o Aulataʼalamu?"
12 Pokia ingkoo umaasi, e ngangarandaku,
pokia ulilaho i nuncana badaku?
Harapumo i Aulataʼala roonamo iaku uka bhekupuji Incia,
Aulataʼalaku mopasalaamatiaku.
*42:1 42:1 miana Korah: Kolompona molaguna minaaka i siwuluna Korah (kamata Kab. 26:10), siitumo o Heman tee manga anana. Nabii Daud apatugasiaka Heman to apakawaaka kasameana nabii aoseakea gambusu tee lagu i nuncana ibaadati i Baitulla.