48
Sion, Kotana Aulataʼala
48:1-15
1 Zaburuna miana Korah to lagu.
2 Tapanamo kaoge o KAWASANA OPU tee alaenga mpuu atopuji
i kotana Aulataʼalata, i gununa momangkilo.
3 48:3 Mat. 5:35.Amakesa amalanga, apasanaa mia i saangua alamu,
siitumo o gunu Sion i weta i napa,
kotana Raja Maoge!
4 I nuncana manga bentena
Aulataʼala padhamo apatiumbaaka ande karona satotuuna o bente momakaa.
5 Kamatea, manga raja aporomusaka,
manga incia amaju apobhawa-bhawa.
6 Sakamatana kotana Sion, manga incia amente;
manga raja atokidha tee apalai roonamo amaeka.
7 Iwe sumai manga incia arengku roonamo amaeka,
tee anamisi kapii mboomo bhawine bhemopalaahirina.
8 Tee garura
Ingkoo upahancuru manga kapala maoge minaaka i Tarsis.
9 Mboomo mopadhana irangota, mboo siitumo uka ikamatata,
i kotana KAWASANA OPUNA saangua alamu,
i kotana Aulataʼalata,
ipekatangkana Aulataʼala to saʼumurua.
Sela
10 E Aulataʼala, ingkami taudhania o kaasimu molagina
i nuncana Baitullamu momangkilo.
11 Mboomo saromu, e Aulataʼala,
mboo siitumo o mia i saangua alamu amuliangiko.
Ingkoo ukokuasa tee uʼadili.
12 Taroakamo raʼeatina Sion akaunde-unde,
tee taroakamo manga anana bhawine Yuda asambo-sambo
roonamo sadia uʼadili i wakutuuna uhaakimu mia.
13 Lingkamo uumatina Aulataʼala, tiingia o Sion, tee ubulilingia,
tee ugagaria manga munarana.
14 Tilikia manga rindina,
kamatea o bentena,
mamudhaakana amembali upetulatulaakea i manga siwulumu.
15 Satotuuna o siimo Aulataʼala, Aulataʼalata abakaa;
Incia bhemokapalaikina ingkita saʼumurua!