64
Kahukumuna Aulataʼala to Mia Madhaki
64:1-11
1 To kapalana molaguna. Zaburuna Daud.
2 E Aulataʼala, maasangia urango doʼaku i wakutuuna kupeenci,
pasalaamatia inyawaku minaaka i kasegana musu.
3 Jaganiaku minaaka i haejati irahasiaakana manga mia madhaki,
tee minaaka i isikadina manga mia mopewauna kadhaki.
4 Pogauna manga amatadha mboomo hancu,
tee pogau ibhoasakana amapii mboomo anana pana.
5 Manga incia apana manga mia inda mosala minaaka i tampana opoana,
sumaimo alausaka apanea inda tee kaekana.
6 Manga incia sadia ahaejatiaka momadhakina,
apomufakati to ataa katapu tee apobuniaka,
tee apogau i nuncana ngangarandana, "Inda dhaangia manga kamatana!"
7 Manga incia ahaejatiaka kadhaki tee apogau,
"Ihaejatiakamami amondomo!"
Manga incia abuniaka opea ihaejatiakana,
roonamo ngangarandana maanusia inda amembali amataua mia mosagaanana.
8 Maka Aulataʼala apana manga incia
tee saanampuu manga incia amambela.
9 Aulataʼala bheapasindoli manga incia rampaakanamo dhelana;
bhari-bharia mia mokamatea bhearengku tee abhibhi.
10 Bhari-bharia mia bheamaeka;
manga incia bheapetulatulaaka opea mopadhana ipewauna Aulataʼala,
tee bheafikiri opea mopadhana ipewauna.
11 Taroakamo mia mobanara akaunde-unde roonamo KAWASANA OPU
tee apeulu i Incia.
Taroakamo bhari-bharia mia momakatena incana bheabangga tee Incia!