69
Doʼa i Wakutuuna Kaseke
69:1-37
1 To kapalana molaguna. Aose lagu: Kamba-kamba Bakung. Zaburuna Daud.
2 Pasalaamatiaku, e Aulataʼala,
roonamo o uwe akawamo i bhorokoku.
3 Iaku kutondu i nuncana tomba momandala,
inda dhaangia o tampana polandakaku.
Iaku kukotibu i uwe momandala,
tee o mawa apaampeaku.
4 Iaku kumangule kugora kuemani tulungi;
goncoku amatuu.
Mataku amalau kuantagi Aulataʼalaku.
5 69:5 Zab. 35:19; Yah. 15:25.Mia mobanciaku inda akoʼalasa,
alabhi o kabharina minaaka i bulua i bhaaku.
Manga mia mogauna mopabinasaaku abhari mpuu;
manga incia amembali musuku inda akosababu.
Iaku apakisaaku kubholosi
harataa inda irampasiku.
6 E Aulataʼala, Ingkoo umataua o kabhongo-bhongoku,
manga kasalahaku inda atobuniaka minaaka i Ingkoo.
7 Bholi utaroakea manga mia motangkaakako
apotibhaaka kaea roonamo iaku, e KAWASANA OPU, Aulataʼalana saangua alamu!
Bholi utaroakea manga mia mopeeloko
apotibhaaka aebu roonamo iaku, e Aulataʼala isombana miana Israel!
8 Rampaakanamo Ingkoo iaku kutohina,
tee o kae atutubhi rouku.
9 Iaku mboomo dhaga to manga witinaiku,
tee bhari-bharia witinaiku aabhiaku mia moumba.
10 69:10 Yah. 2:17; Rom. 15:3.Ngangarandaku akarore-rore to kuewaaka bhanuamu, sabutuna apekangauaku,
tee o kahinana manga mia mohinako akangkanaiaku.
11 Wakutuuna kupaporitambe karoku tee kupoasa,
iaku kumembali kahinana mia.
12 Wakutuuna kupake kae kadhu to tandana kusukara,
rampaakanamo sumai manga incia apotawaikiaku.
13 Iaku kumembali giu ipogauakana manga mia mouncurana i bhambana lawana kota
tee apamembaliaku lagu kaele-elena manga pande sumpu.
14 Maka kudoʼa i Ingkoo, e KAWASANA OPU,
e Aulataʼala, lawaniaku i wakutuu momalape;
lawaniaku roonamo kaasimu molagina motaralabhi-labhi
tee roonamo katulungimu momembalina iparacaeaku.
15 Pasalaamatiaku minaaka i nuncana tomba,
tee bholi utaroakaaku kutondu.
Rambasakaaku minaaka i manga mia mobanciaku
tee minaaka i uwe momandala.
16 Bholi utaroakaaku apaampeaku mawa,
atawa kutondu i tawo momandala.
Bholi utaroakaaku kutokoburu i nuncana bhalo.
17 E KAWASANA OPU, maasangia ulawaniaku roonamo kaasimu molagina amalape,
poilimo tee urangoaku rampaakanamo rahumatimu momaoge.
18 Bholi ubuniaka roumu minaaka i bhatuamu
roonamo iaku kunarakaa, lawaniakumo pekadhei.
19 Umbamo pasalaamatiaku,
pabebasiaku minaaka i manga musuku.
20 Ingkoo umataua tuaapa o musuku aele-eleaku, apekaeaaku tee ahinaaku.
Ingkoo ukamatea bhari-bharia musuku.
21 Kahinana sumai apahancuru incaku,
sabutuna amate o akalaku.
Iaku kuharapu kaasina mia, maka inda dhaangia;
iaku kupeelo mia mohiburuaku, maka inda kupotibhaakea.
22 69:22 Mat. 27:48; Mrk. 15:36; Yah. 19:28-29.Sampe manga incia uka adhawuaku racu to kukandea,
tee wakutuuna amatuu bhorokoku, adhawuaku cuka to kusumpua.
23 69:23-24 Rom. 11:9-10.Taroakamo kinande i aroana manga incia amembali katapu to karona,
tee amembali kapetambo to manga sabhangkana.
24 Taroakamo matana manga incia amarawu mamudhaakana inda amembali apokamata,
tee taroakamo o tangana manga incia sadia arengku.
25 Palimbamea pamurumu to manga incia,
tee taroakamo o amaramu mokarore-rorena akangkanai manga incia.
26 69:26 Tul. 1:20.Taroakamo pokemaana manga incia amembali amalino,
tee taroakamo inda samia uka momboorena i kemana manga incia.
27 Roonamo manga incia apajere manga mia mopadhana ibhebhemu,
tee apetulatulaaka o kanarakaana manga mia mopadhana ipekambelamu.
28 Taroakamo urangania kabharina kasalahana manga incia,
tee manga incia bholi upabanarea.
29 69:29 Limb. 32:32; Wah. 3:5; 13:8; 17:8.Taroakamo o sarona manga incia uhapusua minaaka i nuncana boku mokoantoakana manga sarona mia momalape,
tee o sarona manga incia bholi upapesuaia i nuncana daftarana mia mobanara.
30 Maka iaku sii kunarakaa tee kumapii.
E Aulataʼala, tulungiaku
tee ujaganiaku.
31 Iaku bhekulagu to kupuji sarona Aulataʼala,
tee kusukuru tee kumuliangia.
32 Giu incia sumai alabhi alaenga i matana KAWASANA OPU minaaka i binata pasombaa,
tee minaaka i sapi umane maoge mokotandu tee mokokonuku mopoweta.
33 Manga mia monarakaa bheakamatea tee akaunde-unde.
Taroakamo incamiu adhadhi pendua, e ingkomiu mopeelona Aulataʼala!
34 KAWASANA OPU aperangoi mia misikini,
tee Incia inda apandaʼente uumatina modhaangiana i nuncana katorongku.
35 Taroakamo Incia apujia bhari-bharia modhaangiana i laiana tee i dunia,
i tawo tee bhari-bharia mahaluku modhadhina i nuncana tawo
36 roonamo Aulataʼala bheapasalaamati Kota Sion,
tee apendua abhangu manga kota i Tana Yuda
mamudhaakana manga bhatuana amboore tee akotanaaka lipu incia sumai saʼumurua.
37 Siwuluna minaaka i manga bhatuana bhemokotinaurakaakea,
tee manga mia momaasiakana Kawasana Opu bheamboore i nuncana.