71
Doʼa Emaniana Peulusa i Wakutuu Tamancuana
71:1-24
1 E KAWASANA OPU, Ingkoomo o peulusaku,
bholi sampeampearo kutopekaea.
2 Rambasakaaku, tee upabebasiaku roonamo Ingkoo ubanara;
perangoiaku tee upasalaamatiaku.
3 Membalimo gunu bhatu to tampana mbooresaku
sadia momembalina iumbatiku.
Ingkoo padhamo udhawu parinta mamudhaakana kutopasalaamati
roonamo Ingkoomo gunu bhatu mojaganiaku tee bente potaangiaku.
4 E Aulataʼalaku, pasalaamatiaku minaaka i limana mia madhaki,
minaaka i kuasana mia inda moʼadili tee mia masega.
5 Ingkoomo iharapuku, e KAWASANA OPU Aulataʼala,
Ingkoomo iparacaeaku minaaka dhaangia kumangura.
6 Ingkoomo o tampana kupasande minaaka i nuncana kadhuma;
Ingkoomo mopalimbaaku minaaka i kompona inaku,
sumaimo iaku sadia kupujiko.
7 Iaku kumembali mboomo mia ipeelona manga pande pana,
maka Ingkoomo o tampana peulusaku momakaa.
8 Ngangaku sadia apujiko,
saeoa iaku kumuliangiko.
9 Bholi ubhanakaaku i wakutuuna kumancuana,
tee bholi ubholiaku ande atopadhamo kakaaku.
10 Sababuna manga musuku apogauakaaku,
tee manga mia mogauna mopekamateaku asahimuakaaku.
11 Pogauna manga incia, "Aulataʼala padhamo abholi incia!
Pajeremea tee urakomea roonamo inda dhaangia bhemorambasakea!"
12 E Aulataʼala, bholi umaridho minaaka i iaku,
e Aulataʼalaku, tulungiaku pekadhei!
13 Taroakamo mia moraeakaaku
apotibhaaka kaea tee abinasa.
Taroakamo manga mia mogauna mopacilakaaku
abukeaka kahina tee aebu.
14 Maka sadia kuharapu,
tee iaku ahandamo bhekupujiko.
15 Ngangaku saeoa bhekupetulatulaaka manga pewaumu mobanara,
tee kasalaamati inda motolentu minaaka i Ingkoo.
16 Iaku bhekuumba tee kupuji pewauna momakaana KAWASANA OPU Aulataʼala.
Iaku bhekumuliangiakea tangkanamo kaʼadilina Karomu samia.
17 E Aulataʼala, minaaka kumangura Ingkoo moadhariaku,
tee sakawana sii-sii iaku kupetulatulaaka pewaumu inda momentela.
18 Sampe sakawana kumancuana tee kukouwa uka,
e Aulataʼala, bholi ubholiaku,
mamudhaakana kumembali kupakoleleaka kuasamu i siwulu sii-sii,
tee kaogesamu i bhari-bharia mia bhemoumbana naile itu.
19 E Aulataʼala, kuasamu tee kabanaramu akawea i laiana!
Ingkoo padhamo upewau manga giu momaoge,
e Aulataʼala, incema mopokanana tee Ingkoo?
20 Ingkoo padhamo utaroakaaku kunamisi bhari kanarakaa tee balaa,
Ingkoo uka bheupadhadhiaku pendua.
Minaaka i nuncana koburu
Ingkoo bheuangkaaku pendua.
21 Ingkoo bheupamembaliaku ajulu kutohoromati,
tee uhiburuaku pendua.
22 Iaku bhekupujiko tee gambusu
roonamo umembali utoparacaea, e Aulataʼalaku.
Tee kecapi Iaku bhekulaguaka lagu kapujia to Ingkoo,
e Momangkilona, Aulataʼala isombana miana Israel!
23 Bhiwiku bheasambo-sambo
wakutuuna kulaguaka lagu kapujia to Ingkoo,
apokana uka mboomo inyawaku mopadhana itolosimu.
24 Dhelaku bheapakoleleaka
katulungimu mobanara saeoa,
roonamo manga mia mopadhana moʼusahana to mopacilakaaku
amembali amaea tee amajule.