Kitabi Momangkilona Wolio ZABURU 92

Kawasana Opu o Haakimu Moʼadili

92:1-16

1 Zaburuna saangu lagu to eona Saputuu.*

2 Tapanamo kalape tasukuru i KAWASANA OPU

tee talaguaka manga lagu kapujia to saromu, e KAWASANA OPU Momalanga;

3 to tapakoleleaka kaasimu molagina i wakutuu saeona

tee tuaapa Ingkoo ukeniaka pojanjiamu inda momabhotu i wakutuu malo,

4 poose tatiki gitari sapulu taliana,

tee taoseakea gambusu tee kecapi.

5 Roonamo Ingkoo, e KAWASANA OPU, upaunde-undeaku tee opea mopadhana ipewaumu;

iaku kusambo-sambo tee opea mopadhana ikarajaamu.

6 Amaoge mpuu bhari-bharia ipewaumu, e KAWASANA OPU,

amandala mpuu o fikirimu tee amarasai to tamaʼanaia!

7 Mia mokabhongo-bhongo inda bheamembali amataua,

mia mokurana fikirina inda bheamaʼanaia o giu incia sumai:

8 Moomini manga mia madhaki atuwu mboomo rumpu,

tee o mia madhaki ahandamo abhari,

maka manga incia sadhaadhaa bheatopabinasa saʼumurua.

9 Maka Ingkoo i tampa momalanga saʼumurua e KAWASANA OPU.

10 Roonamo manga musumu, e KAWASANA OPU,

roonamo manga musumu bheabinasa;

tee bhari-bharia mia madhaki bheupapogaa-gaaia.

11 Maka upamembaliaku kumakaa mboomo karambau,

tee ulaliakaaku mina bhaau to ubarakatiaku.

12 Mataku akamatamo kandawuna manga musuku,

tee o talingaku arangomo katalona manga mia madhaki mobhaliaku.

13 Mia mobanara bheatuwu tee akobhake torosu mboomo puuna horomaa,

tee incia bheamaoge mboomo puuna aras i Libanon.

14 Manga incia mboomo puuna kau ipombula i aroana Bhanuana KAWASANA OPU,

tee ajulu o kaogena i aroana Bhanuana Aulataʼalata.

15 Moomini akoʼumurumo dhaangiapo uka akobhake,

tee asadhaadhaa asuburu tee amaijo o tawana,

16 manga miana mobanara sumai apakoleleaka ande o KAWASANA OPU sumai abanara.

Incia o gunu bhatuku, tee sadia apewau moʼadili.

*92:1 92:1 Saputuu: Eo pitu eona (Saputuu) ipepaliakana manga miana Israel minaaka i parintana Aulataʼala to eo to poniuntoa tee ibaadati.