Kitabi Momangkilona Wolio ZABURU 106

106

Kaasina Molagina Kawasana Opu tee Kakaana Incana Miana Israel

106:1-48

1 Pujimea o KAWASANA OPU!

Sukurumo i KAWASANA OPU, roonamo Incia amalape,

kaasina molagina abakaa saʼumurua.

2 Incema momembalina mopetulatulaakana giu maoge mopadhana ipewauna KAWASANA OPU,

atawa apaperangoiakea sagala kapujia to Incia?

3 Amasanaamo manga mia mopewauna kaʼadili,

tee modhadhina i nuncana kabanara.

4 E KAWASANA OPU, udhaniaku wakutuuna upewau malape i uumatimu;

bholi umalinguakaaku wakutuuna upasalaamati manga incia.

5 Mamudhaakana amembali kukamata kalapena dhadhina manga mia ipilimu,

mamudhaakana amembali kumasanaa i nuncana kaunde-undena manga miana lipumu,

tee mamudhaakana amembali kupujiko kupobhawa-bhawa tee uumati momembalina tinaurakamu.

6 Ingkami padhamo tapewau dosa mboomo opu-opuamami;

ingkami padhamo tapewau kasalaha tee tadorohaka.

7 Wakutuuna i Mesir,

opu-opuamami inda amaʼanaia manga giu inda momentela ipewaumu;

manga incia inda audhania o kaasimu molagina motaralabhi-labhi sumai,

maka manga incia adorohaka i Aulataʼala Momalanga i bhiwina Tawo Towu Lambe.

8 Maka o Kawasana Opu apasalaamati manga incia to ajagani sarona karona,

mamudhaakana amataua o kaogena kuasana.

9 Incia agorampangi Tawo Towu Lambe sabutuna amatuumo o tawo sumai,

kasiimpo abhawa manga incia apolimba i tawo mboomo adhala i tana matuu.

10 Jadi o Kawasana Opu apasalaamati manga incia minaaka i kuasana manga mia mobancia,

tee arambasakea manga minaaka i limana musu.

11 Uwena tawo apatondu bhalina manga incia;

inda samia uka mosalaamatina.

12 I wakutuu incia sumai manga incia aparacaeamo tee opea ifirimaniakana,

tee alaguaka manga kapujia to Incia.

13 Maka manga incia amasimba mpuu amalinguaka opea ipewauna Kawasana Opu,

tee inda aantagi to arango opea ihaejatiakana to manga incia.

14 Manga incia akuasaia nawusuu to akande i tampa momalino,

tee auji Aulataʼala mamudhaakana abukutiiakea o kuasana i tana matuu.

15 Kawasana Opu adhawuakea opea iemanina manga incia,

maka apoose alambokoakea tee panyaki imembaliakana manga incia amangkuru.

16 Wakutuuna i pokemaa manga incia amapii incana tee Musa,

tee amapii incana uka tee Harun, mia momangkilo ipilina KAWASANA OPU.

17 Alamu apoweta kasiimpo adhoku Datan,

tee o tana atutubhi manga moosena Abiram.*

18 Waa uka arore i tanga-tangana manga incia,

rorena waa apekangau manga mia madhaki.

19 Manga incia akarajaa patu anana sapi i Horeb,

kasiimpo asomba patu motorabu sumai.

20 Tee mboo sumai, manga incia padhamo abholosi kamuliangina Aulataʼala

tee patuna sapi mokandena rumpu.

21 Manga incia amalinguaka Aulataʼala mopasalaamatina manga incia,

mopadhana mopewauna manga giu momaoge i Mesir.

22 Siitumo Incia apewau manga giu inda momentela i Tana Ham,

tee manga giu motomaeka i bhiwina Tawo Towu Lambe.

23 Siitumo sababuna o Kawasana Opu afirimani ande bheapabinasa manga incia

maka ataangia Musa, mia ipilina.

Musa ataangi pamuruna Kawasana Opu to manga incia,

sabutuna amarana auntomo tee inda apabinasea.

24 Kasiimpo manga incia amendeu apesua i lipu momangada sumai,

tee inda aparacaea firimanina.

25 Manga incia akamburu-mburu i nuncana kemana,

tee inda aperangoi firimanina KAWASANA OPU.

26 Siitumo sababuna Incia aposumpa

ande bheapekamate manga incia i tana matuu,

27 tee o siwuluna manga incia bheapapogaa-gaaia i tanga-tangana manga lipu,

tee apasaraakaakea i lipu mosagaanana.

28 Manga incia uka asomba dewa Baal i Gunu Peor,

tee akande manga kurubani isumbele to manga barahala inda modhadhi.

29 Manga giu incia sumai amapiiakea incana KAWASANA OPU,

sabutuna aumbamo o panyaki imateaka i tanga-tangana manga incia.

30 Maka o Pinehas aumba ahukumu manga mia mosala,

sabutuna auntomo o panyaki imateaka sumai.

31 Pewauna Pinehas sumai amembali saangu jasa tee giu mobanara to incia

sakawana saʼumurua zamani.

32 Manga incia apekapii incana KAWASANA OPU i saripina matana uwe i Meriba

sabutuna o Musa anarakaa roonamo pewauna manga incia,

33 sababuna manga incia apekarewu incana Musa,

sabutuna incia abhoasaka manga pogau inda ifikirina porikana.

34 Manga incia uka inda apabinasa manga lipu i Kanaan,

mboomo iparintaakana KAWASANA OPU to manga incia,

35 maka manga incia aporomu tee manga miana lipu incia sumai,

tee asiringi pewauna manga incia.

36 Miana Israel asomba manga barahalana miana Kanaan,

sabutuna o giu incia sumai amembali katapu to manga incia.

37 Manga incia apasombaakea o anana, malape o ana umane atawa o ana bhawine

amembali kurubani to manga seetani.

38 Manga incia apekamate manga mia inda mosala,

siitumo o raana anana manga incia,

ipasombaakana amembali kurubani to manga barahala i Kanaan,

sabutuna o lipu sumai amarombuaka raa.

39 Sumaimo manga incia apekarombu karona tee opea ipewauna,

tee o feʼelina mboomo bhawinena dhala.†

40 Siitumo sababuna o pamuruna KAWASANA OPU akarore-rore to uumatina,

tee amarika akamata lipuna uumatina karona.

41 Sumaimo Kawasana Opu apasarakaaka manga incia i manga lipu mosagaanana,

sabutuna manga incia akuasaia musuna.

42 Manga incia apisakia musuna,

sabutuna o miana Israel atokuasai tee atotalo.

43 Amenturu o Kawasana Opu atulungia,

maka manga incia sadia adorohaka tee opea ihaejatiakana,

sabutuna manga incia atondu i nuncana dosa.

44 Maka o Kawasana Opu akamatea o kanarakaana manga incia

wakutuuna arangoa o gorana.

45 Rampaakanamo Incia afaduli tee manga incia, Kawasana Opu audhanimea o pojanjiana,

tee amaasi akamata manga incia apokana tee kaasina molagina motaralabhi-labhi.

46 Rampaakanamo Kawasana Opu, manga incia apotibhaaka rahumati

sabutuna manga musuna amaasiakea.

47 Manga pasalaamatimo, e KAWASANA OPU, e Aulataʼalamami!

Manga romusakamo tee manga pambulimo minaaka i lipuna mia,

mamudhaakana ingkami tamembali tasukuru i saromu momangkilo

tee takaunde-unde wakutuuna tapuji-pujiko.

48 Atopujimo o KAWASANA OPU, Aulataʼala isombana miana Israel,

sii-sii tee saʼumurua!

Taroakamo bhari-bharia mia apogau, "Aamin!"

Pujimea o KAWASANA OPU!

106:1 106:1 Zab. 100:4-5.

106:7 106:7 Limb. 14:10-12.

106:9 106:9-12 Limb. 14:21-31.

*106:17 106:17 Datan...Abiram: Datan tee Abiram akapalai saangu rombongana miana Israel modorohakana i Harun tee Musa. Manga mia incia sumai akangkanaia hisabuna Kawasana Opu.

106:19 106:19 Limb. 32:1-14.

†106:39 106:39 Pokaiana Kawasana Opu tee Israel agambaraakea mboomo ibaratina umane tee bhawinena. Wakutuuna Israel asomba barahala sumai agambaraakea tee ibaratina Israel azina tee bhawinena dhala.