118
Laguna Kasukuru Roonamo Takana
118:1-29
1 118:1 Zab. 100:4-5.Sukurumo i KAWASANA OPU roonamo Incia amalape,
kaasina molagina abakaa saʼumurua.
2 Taroakamo miana Israel apogau,
"Kaasina molagina abakaa saʼumurua."
3 Taroakamo siwuluna Harun apogau,
"Kaasina molagina abakaa saʼumurua."
4 Taroakamo bhari-bharia mia momaekana i KAWASANA OPU apogau,
"Kaasina molagina abakaa saʼumurua."
5 I nuncana kaseke iaku kugora i KAWASANA OPU,
KAWASANA OPU alawaniaku tee apekalalesaia o ngangarandaku.
6 Iaku inda bhekumaeka roonamo KAWASANA OPU apoose tee iaku;
maanusia inda amembali apewau opeopea tee iaku.
7 KAWASANA OPU apoose tee iaku to atulungiaku,
iaku bhekukamata manga mia mobanciaku atotalo.
8 Salabhina kupeulu i KAWASANA OPU,
tee kuparacaea i maanusia.
9 Salabhina kupeulu i KAWASANA OPU,
tee kuparacaea i manga kaogesa.
10 Bhari-bharia lipu alibuaku,
maka tee kuasana KAWASANA OPU, manga incia kutaloa!
11 Manga incia alibuaku; umbe, manga incia alibuaku minaaka i bhari-bharia rope,
maka tee kuasana KAWASANA OPU, manga incia kutaloa!
12 Manga incia alibuaku mboomo uwani,
maka manga incia atopekatalo i nuncana sakija mata mboomo waa motununa rumpu mokorui-rui.
Tee kuasana KAWASANA OPU, manga incia kutaloa!
13 Iaku amakaa kutojumpuraka sabutuna saidhepo kumandawu,
maka o Kawasana Opu atulungiaku.
14 118:14 Limb. 15:2; Yes. 12:2. KAWASANA OPU o kakaaku tee kapujiaku.
Incia amembalimo kasalaamatiku.
15 Dhaangia o suarana sambo-sambo tee kamangantalo
i nuncana kemana manga mia mobanara,
"Lima kaanana KAWASANA OPU apewau manga giu momaoge!
16 Lima kaanana KAWASANA OPU atopekalanga!
Lima kaanana KAWASANA OPU apewau manga giu momaoge!"
17 Iaku inda bhekumate, maka kudhadhi
tee kupakoleleaka manga pewauna KAWASANA OPU.
18 KAWASANA OPU padhamo ahukumuaku pekakaa,
maka Incia inda apasaraakaaku i mate.
19 Bungkaleakaaku manga bhambana lawana kabanara,
mamudhaakana iaku bhekupesua tee kusukuru i KAWASANA OPU.
20 Siimo bhambana lawana KAWASANA OPU,
manga mia mobanara bheapesuaikia alaloia.
21 Iaku bhekusukuru tee Ingkoo, roonamo Ingkoo padhamo ulawani doʼaku,
tee umembalimo mopasalaamatiaku.
22 118:22-23 Mat. 21:42; Mrk. 12:10-11; Luk. 20:17; Tul. 4:11; 1Ptr. 2:7.Bhatu ibhanakana manga pandena bhanua
amembalimo bhatu parapuu mobhaa-bhaana.
23 Siimo pewauna KAWASANA OPU,
inda amentela i matata.
24 Siimo o eo ipadhaangiana KAWASANA OPU,
maimo tasambo-sambo tee takaunde-unde rampaakanamo Incia.
25 E KAWASANA OPU, manga pasalaamatimo!
E KAWASANA OPU, manga dhawumo kamangantalo!
26 118:26 Mat. 21:9; 23:39; Mrk. 11:9; Luk. 13:35; 19:38; Yah. 12:13.Atobarakatimo incia moumbana i nuncana sarona KAWASANA OPU!
Ingkami taemaniakako barakati minaaka i nuncana Baitullana KAWASANA OPU.
27 KAWASANA OPU o Aulataʼala,
tee Incia manga suluwina.
118:27 Limb. 27:1-2.Bhokemea o kurubanina raraea sumai tee rabuta
i manga tanduna singkuna tampana tunuana kurubanina KAWASANA OPU.
28 Ingkoomo o Aulataʼalaku, iaku bhekusukuru tee Ingkoo;
Ingkoomo o Aulataʼalaku, iaku bhekumuliangiko!
29 Sukurumo i KAWASANA OPU roonamo Incia amalape
tee kaasina molagina abakaa saʼumurua.