Wahiyuu
To Yahya
POGAU BHAA-BHAANA
Wahiyuu to Yahya sii atoburi i zamanina manga miana Karasiteni atopisaki tee atosikisaa roonamo aparacaea Isa Al Masi sumai o Kawasana Opu. Ineatiakana mpuu o Yahya moburina boku incia sii satotuuna to adhawuaka kaharapu tee apekatangkaaka incana manga mia mobacea, tee mamudhaakana uka manga incia asadhaadhaa aparacaea wakutuuna atosikisaa tee atopisaki.
Sagaa minaaka i antona boku incia sii aminaaka i wahiyuu tee pokamata iburi tee oni tee tanda momembalina ifahamuna tee imaʼanaina manga miana Karasiteni i zamani incia sumai, maka amarasai amaʼanaia manga mia mosagaanana. Antona maʼana ipogauaka i nuncana boku incia sii apendupenduangia i nuncana pegiu-giu cara alaloi pegiu-giu pokamata. Moomini abhari o posalamaʼana pokaiana tee maʼana motoburina i nuncana boku incia sii, maka o antona maʼanana atinda, siitumo ande alaloi Al Masi, sabutuna o Aulataʼala bheapekatalo bhari-bharia musuna, atolentu uka tee Ibilisi. Tee sapadhana Incia apekatalo bhari-bharia musuna, Aulataʼala bheamangadhawuaka dunia mobhaau apamembalia hadia to uumatina motaʼatina.
Antona
Porikanaana pogau 1:1-8
Pokamata bhaa-bhaana tee sura-sura to pitu angu jamaʼana 1:9--3:22
Kalulungina boku tee pitu angu segele 4:1--8:1
Pitu angu sangkakala 8:2--11:9
Naga tee rua mbaa binata 12:1--13:18
Pegiu-giu pokamata 14:1--15:8
Pitu angu mangko mokoantoakana pamuruna Aulataʼala 16:1-21
Hancuruna Babel, katalona binata, nabii gau-gau tee Ibilisi 17:1--20:10
Kahukumu kapadhaa 20:11-15
Laiana bhaau, dunia bhaau, Yerusalem bhaau21:1--22:5
Kapadhaa 22:6-21
1
Pogau Bhaa-bhaana minaaka i Yahya
1:1-3
1 Siimo wahiyuu idhawuakana Aulataʼala to Isa Al Masi mamudhaakana asusuakea i manga bhatuana, siitumo manga parakara bhemomembalina i wakutuu inda momangenge. Kasiimpo Al Masi alamboko malaaʼekatina i Yahya o bhatuana to apajelasiaka manga parakara incia sumai. 2 Sumaimo Yahya uka apetulatulaaka bhari-bharia mopadhana ikamatana, siitumo firimanina Aulataʼala tee kasakusiina Isa Al Masi. 3 Amasanaamo mia mobacea tee suara momaoge tee moperangoina manga pogau kasameana Aulataʼala incia sii, tee moosena opea motoburina i nuncana, roonamo wakutuuna amakasumo akawa.
Salamu to Pitu Angu Jamaʼa
1:4-8
4 1:4 Limb. 3:14; Wah. 4:5.Minaaka i Yahya to pitu angu jamaʼa i Poropinsi Asia Maidhiidhi:*1:4 Poropinsi Asia Maidhiidhi: I zamani sii-sii o tana incia sii atosarongiaka Turki. To ingkomiu o rahumati tee kasanaa minaaka i Aulataʼala modhaangiana sii-sii, modhaangiana minaaka i zamani i piamo itu, tee modhaangiana i zamani bhemoumbana naile itu, minaaka i pitu angua o rohi modhaangiana i aroana kauncuramakana Aulataʼala; 5 1:5 Zab. 89:28.tee minaaka i Isa Al Masi, Sakusii momembalina motoparacaea, mobhaa-bhaana mobhanguna minaaka i tanga-tangana mia mate, tee mokuasaina bhari-bharia raja i dunia sii.
Incia mangamaasiaka tee padhamo mangarambasaka minaaka i manga dosata tee raana 6 1:6 Limb. 19:6; Wah. 5:10.tee ingkita mangapamembali saangu pamarinta tee uka mangapamembali imamu to Aulataʼala o Amana. To Inciamo o kamuliangi tee kuasa saʼumurua. Aamin.
7 1:7 Mat. 24:30; Mrk. 13:26; Luk. 21:27; Yah. 19:34; 19:37; 1Tes. 4:17. Kamatea, Incia aumba i nuncana manga taʼina ngalu!
Bhari-bharia mia bheakamatea,
moomini uka manga mia mopadhana motobhokia.†1:7 manga mia mopadhana motobhokia: Manga mia incia sumai o mia mohaejatiakana to apekamate Isa i kau salib, siitumo manga miana Yahudi tee miana Roma.
Bhari-bharia lipu i dunia sii bheamaasi roonamo Incia.
Mboomo sumai bhemomembalina. Aamin.
8 1:8 Limb. 3:14; Wah. 22:13."Iakumo Alif tee Ya, Mobhaa-bhaana tee Momembalina Kapadhaa,"‡1:8 Alif tee Ya: I kitabi asilii, atoburi i nuncana pogau Yunani: 'Alfa,' horofu bhaa-bhaana pogau Yunani, tee 'Omega,' horofu kapadhaa. Giu incia sii apokana dhaangia uka i Wah. 21:6; 22:13. mboo sumaimo firimanina Aulataʼala, Kawasana Opu modhaangiana sii-sii, modhaangiana minaaka i zamani i piamo itu, tee modhaangiana i zamani bhemoumbana naile itu, Iakumo Mokokuasana Mpuu.
Pokamatana Yahya i Pulo Patmos
1:9-20
9 Iaku o Yahya, witinaimiu mopoosena mopobhawa-bhawana tee ingkomiu i nuncana kanarakaa mboomo inamisina bhari-bharia mia moosena Al Masi. Ingkita tapobhawa-bhawa tasabara tanarakaa wakutuuna tamembali uumatina i nuncana Pamarintana. Iaku kutobhanaka i Pulo Patmos roonamo iaku padhamo kupakoleleaka firimanina Aulataʼala tee kasakusiina Isa. 10 I eona ibaadati to Kawasana Opu, siitumo eona Ahadi, iaku akuasaiaku Rohi, tee i talikuku kurango suara momaoge mboomo onina sangkakala. 11 Onina sangkakala sumai apogau, "Burimea opea mopadhana ikamatamu sii i nuncana saangu kitabi, kasiimpo ulambokoa i pitu angua jamaʼa, siitumo jamaʼa i Efesus, Smirna, Pergamus, Tiatira, Sardis, Filadelfia, tee Laodikia."
12 Sabutuna kubhalilimo to kukamata suara mopogauna tee iaku sumai. Sabhaliliku kukamatamo pitu angu o aena padamara minaaka i bulawa. 13 1:13 Dan. 7:13.I tanga-tangana aena padamara sumai dhaangia samia motokamatana mboomo Anana Maanusia. Incia apake juba momaarate sakawana i aena, tee i badana apake salenda minaaka i bulawa. 14 Bhaana tee buluana amaputi, mboomo kaputina buluna dumba tee kaputina salju, sainamo matana mboomo rorena waa. 15 Aena akokila mboomo tambaga mokombena i nuncana rorena waana busoa,§1:15 busoa: Tampana waa mboomo dhalika momaoge mokorindi motopake to apekangkilo, atutu, tee akarajaa ase. tee o suarana mboomo ruuna mawa. 16 Lima kaanana akeni pitu angu kalipopo, tee minaaka i ngangana alimba samata hancu momatadha rua anguana matana. Rouna akokila mboomo matanaeo i wakutuuna pontanga eo.
17 1:17 Wah. 2:8; 22:13. Wakutuuna kukamatea, kusujumo i aena mboomo mia mate. Maka Incia adhika lima kaanana i bhaaku tee apogau, "Bholi umaeka! Iakumo Mobhaa-bhaana tee Momembalina Kapadhaa. 18 Iakumo modhadhina. Iaku kumatemo, maka kamatea, Iaku kudhadhi saʼumurua. Iaku mokenina manga kuncina mia mate tee duniana mia mate.*1:18 duniana mia mate: I fikirina manga mia i wakutuu incia sumai, mia momate adhaangia i tampa mokosaroakana Hades to aantagi eona aaherati. 19 Rampaakanamo sumai, burimea opea mopadhana ikamatamu, siitumo opea momembalina sii-sii tee opea bhemomembali naile itu. 20 Burimea uka o rahasia i pitu angu kalipopo mopadhana ikamatamu i lima kaanaku sii tee i pitu angu aena padamara minaaka i bulawa sumai. Pitu angu kalipopo sumai satotuuna manga malaaʼekatina pitu angu jamaʼa,†1:20 malaaʼekatina pitu angu jamaʼa: I nuncana pogau Yunani, malaaʼekati amembali uka akomaʼana "mobhawana kasamea." sainamo pitu angu aena padamara sumai satotuuna pitu angu jamaʼa."
1:4 1:4 Limb. 3:14; Wah. 4:5.
*1:4 1:4 Poropinsi Asia Maidhiidhi: I zamani sii-sii o tana incia sii atosarongiaka Turki.
1:5 1:5 Zab. 89:28.
1:6 1:6 Limb. 19:6; Wah. 5:10.
1:7 1:7 Mat. 24:30; Mrk. 13:26; Luk. 21:27; Yah. 19:34; 19:37; 1Tes. 4:17.
†1:7 1:7 manga mia mopadhana motobhokia: Manga mia incia sumai o mia mohaejatiakana to apekamate Isa i kau salib, siitumo manga miana Yahudi tee miana Roma.
1:8 1:8 Limb. 3:14; Wah. 22:13.
‡1:8 1:8 Alif tee Ya: I kitabi asilii, atoburi i nuncana pogau Yunani: 'Alfa,' horofu bhaa-bhaana pogau Yunani, tee 'Omega,' horofu kapadhaa. Giu incia sii apokana dhaangia uka i Wah. 21:6; 22:13.
1:13 1:13 Dan. 7:13.
§1:15 1:15 busoa: Tampana waa mboomo dhalika momaoge mokorindi motopake to apekangkilo, atutu, tee akarajaa ase.
1:17 1:17 Wah. 2:8; 22:13.
*1:18 1:18 duniana mia mate: I fikirina manga mia i wakutuu incia sumai, mia momate adhaangia i tampa mokosaroakana Hades to aantagi eona aaherati.
†1:20 1:20 malaaʼekatina pitu angu jamaʼa: I nuncana pogau Yunani, malaaʼekati amembali uka akomaʼana "mobhawana kasamea."