6
1 Sambi, tankukola kazi na Paulu, tukutafadalini musipokerere rehema ya Mwenyezimungu kwa namuna saifãi. 2 Konta iye akwamba:
“Paufikire wakati maalumu, omi nukusikira.
Suku yakuvushiwa, uwe nukusaidiya.”
Onani, epa sambi ndi wakati maalumu, epa rero ndi suku yakuvushiwa.
Tafauti za Paulu ndi ushahidi wa kauli yake
3 Tisinziwiye munu na kinu kimojawapo ipate kazi yetu yakutumika isilaumiwe. 4 Kwasa javyo, kwa piya vyatitenda, tankolota kuwa tankuntumika Mwenyezimungu: tankuhitamili pakulu, titabika, titowiwa, tipita tafauti za piya namuna‑zi, tiibiwa, 5 tifungiwa nkalaboshu, watilavira vurumãi, tikola kazi pakulu, tihitamili suku nyingi satilala au satírya kinu. 6 Tolota uswafi wetu, werevu, imani, wema, roho ya utakatifu, pamoja na pendo rakweli. 7 Titangaza usowezi wakweli julu ya uwezo wa Mwenyezimungu, kwa kutumira sulaha za shariya upande wa nkono sonto na nkono nriro. 8 Tintumika Mwenyezimungu wanu wakitisifu, wengine watifezeyi. Wakitisowerera vibaya, wengine vyema. Watita walongo ingawa tanawo ukweli. 9 Titafitiwa kamba wanu satijiwikana ingawa tikwijiwikana sana-sana. Tiinshi na kifo nlukombe fala ona, tingari kuinshi. Tihukumiwa fala atiulaiwe. 10 Tiuzunika fala daima tiwa radi. Titafitiwa kamba masikini, fala tiwatenza wanu wengi utajiri. Titafitiwa kamba satina kinu, fala tiri nawo vinu piya.*Ona 1 waKorintiyu 1:5.
11 Wanduzangu waKorintiyu, tukwambirani kweli, myoyo yetu tukufungurirani. 12 Atukufungirani myoyo, ila umwe ndi mutifungira myoyo pakulu ofwe. 13 Basi, ludisani kwa kadiri yamupewa, nisowera namwe kamba wanangu: “Tifungurireni nfululu myoyo yenu.”
Katalani kusanganyika na wanu sawamini
14 Musisanganyike na ware sawankubali Insa. Namunani kinu ca shariya vyaciwa pamoja na sacina shariya? Namunani vyavikidirika kuwa pamoja nuru na kisi? 15 Ndi kupatanani kuripo kati ya Almasihi na Ibilisi†Kigeregu: “Beliar”. Beliar ndi zina rengine ra Ibilisi.? Au ankubáli Insa namunani vyaalungana na munu saankubali Insa? 16 Umojani uripo kati ya nyumba takatifu ya Mwenyezimungu na milungu sairi ya ukweli? Kamana ofwe ndi nyumba takatifu ya Nlungu ari hai. Kamba vyaambire Mwenyezimungu‡Ona waLawi 26:12.:
“Omi nukwikala kati yawo, na nukwenenda kati yawo.
Nikuwa Nlungu wawo, ewo wakuwa wanu wangu.
17 Ndimana, lawani kati yawo§“Yawo” ndi ware awankubali Insa.,
watanukeni (amba ndi Mola),
na kinu kicafu musikumbure.
Na omi nukupokererani kwa radi.
18 Basi, kwenu umwe nukuwa Baba,
na umwe kwangu omi mukuwa wanangu walume na waka (amba ndi Mola, Mwenyé uwezo piya).”