2
Maruka muwa narringi, barrinani narri ngakinmuku bayamuku. Yarrijba ngayu nayinda jangkurr najana narringi, milidimbikanyi narrinya. Miku nurrimi nulijba narringi barimbikanyi yuwa Kudkanyi. Miku. Kud, ngindu nyulu muwa jala narri yabimba balki yaji. Ngindu nyulu muwa kudanyu barri. Ngala jaliyi narri yabimba balki yaji, baki Jisus Krayiswanyi jala narrinya kandimba, janyulu ngajaka Buwakanya narringi. Janyulu ngajaka Buwakanya, nyulu manjamanjambiji nanda balki yaji narringi. Nanda Jisus Krayis, nyulu jungkuka kunyba, yurlurrmba yurrngumba barri. Baki janyulu ngajaka Kud, nyulu manjamanjambiji nanda balki yaji narringi, jala narri ngindu nanankanyi balkinyi yajinyi. Jala ngambala barimba yuwa Kudkanyi, baki janyulu manjamanjamba ngambalangi balki yaji Kudwanyi. Nanda Jisus, janyba nangki kurndana. Langandaba yali Jisus kurndana, barrinani yalili langandaba nanamuku jalili yabimba balki yaji, barrinani yalili langandaba maninjaku, baki nanda kurdanbawarr. Nani yali langandaba Jisus. Ngala miku nyuliyanyi barimba yuwa Kudkanyi. Miku nyuliyanyi yabimba balki yaji. Miku yingamali. Barriwa. Jala ngambala yabimba balki yaji, baki mardakimi yanyba Kud ngambalangi, marda ngambalakimi janyba. Ngala miku. Miku nyulimi yanyba nani ngambalangi, janybangangi nangki Jisus Krayis nanankanyi yajinyi balkinyi, jala ngambala yabimba. Baki janyulu manjamanjamba nanda ngambalangi balki yaji Kudwanyi, jaliyi ngambala ngindu muwa nanankanyi balkinyi yajinyi. Baki Jisus Krayiswanyi, janyulu ngajaka Kud manjamanjambiji nanda balki yaji, janybangangi nangki Jisus Krayis ngambalanginkanyi balkinyi yajinyi. Janyba nangki Jisus Krayis ngambalanginkanyi balkinyi yajinyi, baki yalunginkanyi balkinyi yajinyi, bukambijuyngka wandijiyana. Janyba nangki bukambijuyngka. Nani barri manjamanjambaja balki yaji bukambijuyngka Kudwanyi, jala nyulu ngajaka Kud Jisus Krayiswanyi. Jaliyi ngambala ngayangayijba nanankanyi yuwanyi jali jirrinyba ngambalanya Kudwanyi, baki ngambala jingkijba Kud. Jingkijba ngambala Kud, jaliyi ngambala ngayangayijba nanganginkanyi jangkurranyi. Jaliyi yanyba nganinyi, “Yi. Ngayu jingkijba Kud.” Jaliyi nyulu yanyba nani, ngala miku nyulimi ngayangayijba nanankanyi jangkurranyi Kudkanyi, baki jujijbangka nyulu. Miku nyulimi yanyba duja jangkurr. Miku nyulimi jingkijba Kud. 5-6 Ngala nanda nganinyi jala yanyba nyulu jingkijba Kud, jaliyi nyulu ngayangayijba jangkurranyi Kudkanyi, baki nyulu marukangka muwa Kudkanyi. Nanda jala ngayangayijba jangkurranyi Kudkanyi, kudanyu nyulu marukangka muwa Kudkanyi barri. Baki nani barri ngambala jingkijba Kud, nyulu jungkuka ngambalandu kurduluna. Jaliyi ngambala yanyba, jungkuka Kud ngambalandu kurduluna, baki marda ngambalimi jungku kunybana yuwana Kudkanyi. Marda ngambalimi jungku kunyba nanganginyina yuwana, barrinani Jisus Krayis, barrinani nyuli jungku kunybana yuwana Kudkanyi. Barriwa.
Ngakinmuku mungkijimuku. Miku ngayimi yarrijba buyingkinyi yuwa narringi. Miku. Ngala ngayu yarrijba nanamannga yuwa, manku jali narri wabula. Manku narri nanamannga yuwa wabula, nanamanji jali narri kuyu nangangi jangkurr Jisus Krayiskanyi. Yarrijba ngayu nanamannga yuwa, karu jali nurrunya Jisus Krayiswanyi. Nayinda nangangi yuwa, marda ngambalakimi maruka muwa, barrinani nyulu marukangka muwa ngambalangi. Manku narri nanda nangangi yuwa wabulinyi. 8-11 Ngala mili ngayu karungka narrinya nanamannga yuwanyi jala duja. Nyulu marukangka muwa ngambalangi Jisus Krayis, baki karu nyulu ngambalangi, marda ngambalaka maruka muwa bukambiju. Nanda jala maruka muwa nanganginkanyi mungkijinyi, nyulu durrijbangka nanda yuwa yurlurrmba Jisus Krayiskanyi. Nanda barrinani nyulu jilajbangka kambana yajina. Nanangini mirnbiwanyi minimbaka yaji, baki mikuwali damalijba kambana yajina. Jisus Krayis, nyulu barrinani kamba. Nyulu minimbaka ngambalanya nanankanyi yuwanyi yurlurrmba, jilaykanyi yurlurrmba. Nyulu minimbaka ngambalanya, ngambala marukankanyi muwa yingkamukuyngka. Barriwa.
Nanda jala yanyba, nyulu jilajbangka kambana yajina, jala yanyba nyulu durrijbangka yuwa Jisus Krayiskanyi, ngala nyulu ngirrangka nangangi mungkiji, miku nyulimi durrijba yuwa Jisus Krayiskanyi. Nyulu jilajbangka barrinani mungana yajina. Miku nyulimi jingkijba wanjawa nyulu jilajbangka. Miku nyulimi minimba nanganginkanyi yuwanyi Jisus Krayiswanyi. Baki mikukimi nanangini durrijba yuwa yurlurrmba Jisus Krayiskanyi. Nanda jala ngirra nangangi mungkiji, nyulu barrinani nanda nganinyi jala mikukimi durrijba yubarl mungana yajina. Barriwa.
12-14 Yarrijba ngayu nayinda jangkurr narringi, jungku jali Krisjinmuku wulaninyi. Jungku narri barrinani bayamuku nangangi Kudkanyi. Ngala nanijba narri jingkijba Kud, nyulu ngambalangi Buwakanya. Manjamanjamba nyuli narringi balki yaji, Kudwanyi. Manjamanjambayi narringi balki yaji, kuyungangi narri jangkurr nangangi Jisus Krayiskanyi. Barriwa. Yarrijba ngayu nayinda jangkurr narringi, jungku jali Krisjinmuku yurrngumba wabulinyi. Jungku narri barrinani nganinymuku nangangi Kudkanyi, jingkijbangangi narri Kud yurrngumba wabulinyi. Kudanyu narri jingkijba Kud, jungkungangi narri Krisjinmuku yurrngumba wabulinyi. Barriwa. Yarrijba ngayu nayinda jangkurr narringi, jungku jali Krisjinmuku yurrngumba wujininyi. Jungku narri barrinani kaburrwaburr nangangi Kudkanyi. Manjamanjambayi narringi balki yaji Kudwanyi, baki narri durrijba nangangi jangkurr wujininyi yurrngumba barri. Jungku narri ngiruka Kudkanyi. Balanja nyuli narrinya nanangini mambukawanyi Sayidinwanyi. Nulijba nyulu narringi yabimbikanyi balki yaji, ngala narri yurlwa nangangi. Daba narri wakara. Yurlwa narri nangangi. Durrijba narri nangangi jangkurr Kudkanyi yurrngumba barri. Jungku narri ngiruka, jingkijbangangi narri nangangi jangkurr Kudkanyi. Barriwa.
15 Durrijbakiyi nangangi yuwa Kudkanyi. Mikujiyi durrijba nanamuku jala miku yalimi durrijba yuwa Kudkanyi. Yalu jungku balkina yuwana Kudkanyi. Mikujiyi nani jungku, barrinani yalu. Jaliyi narri durrijba nanamuku, baki miku narrimi maruka muwa nangangi Buwakaya. Marda narrimi kunybijba nangangi Buwakaya yurrngumba barri. Yalu nulijba kajanyi yajinyi. Miku yalimi nulijba nangangi Kudkanyi. 16 Marda miku narrimi maruka muwa yajinyi, barrinani dungalanyi, barrinani yingkanyi nanganginkanyi kayikayinyi, barrinani yabimbikanyi balki yaji yingkamukuyngka. Marda miku narrimi maruka muwa nuliykanyi yajinyi jala miku narringinmirra yaji. Marda miku narringkimi barrarrakijba. Marda miku narringkimi mankumanku, narri jungku barrinani walkurra mambuka bukambijuyngka. Jaliyi narri yabimba yaji nani, baki miku narriyi durrijba nangangi yuwa Buwakaya. Nani barri yalu jungku, jala yalu miku marukankanyi muwa nangangi Buwakaya, ngala yalungka maruka muwa yalungi. 17 Marda miku narrimi jungku barrinani yalu, janybangangi jayalungka. Jayalungka janyba, ngala jaliyi narri durrijba nangangi yuwa nangangi Kudkanyi, baki janyulu wankamba narrinya mili Kudwanyi. Jaliyi narri maruka muwa Kudkanyi, baki durrijba nangangi yuwa, baki janarri jungku wanka nangandu Kudnyina yurrngumba barri. Barriwa.
18 Ngakinmuku mungkijimuku. Karu nyuli narrinya Jisus Krayiswanyi. Karuyi narrinya nanankanyi jujambawarrayngka, jalija badajba. Janyulu badajba nanda yingka, baki janangka yanyba nyulu Krayis. Ngala miku janyulu Krayis. Janyulu ngirrawarr nangangi Jisus Krayiskanyi. Nani barri karuyi narrinya Jisus Krayiswanyi, baki nurru marda, karu nurri narrinya nanankanyi ngirrawarrayngka. Kajamuku ngirrawarrmuku Jisus Krayiskanyi, yali badajba. Baki winyurru barri nanda yingka badajbaja, nanda walkurra ngirrawarr Jisus Krayiskanyi. Kaja ngirrawarrmuku yali badajba, baki ngambala jingkijba nanda walkurra ngirrawarr, janyulu badajba winyurru marda. 19 Wabula barri, nanamuku ngirrawarrmuku, yalili jungku ngambalandu Krisjinmukunyina, ngala yali barlba ngambalanbunanyi. Miku yaliyanyi duja Krisjinmuku, baki yali yingijba ngambalanya. Yingijbayi ngambalanya, mikungangi yalu duja Krisjinmuku. Jaliyanyi yalu jungku ngiruka nangangi Jisus Krayiskanyi, baki yaliyanyi yuwaji jungku ngiruka ngambalandu Krisjinmukunyina. Ngala yali yingijba ngambalanya, baki ngambala jingkijba yalunya, miku yalu duja Krisjinmuku.
20 Ngala narri jingkijba nanda duja jangkurr, manjijbayingangi Jisus Krayiswanyi nanda Kunyba Ngarndu Kudkanyi narrindurri. Jungkuka nyulu narrindu mankanyina, nanda Kunyba Ngarndu Kudkanyi, baki nanijba barri narri jingkijba nanda jala duja. 21 Yarrijba ngayu nayinda jangkurr narringi, jingkijbangangi narri nanda jala duja. Miku nyulimi jujijbawarr Kud. Miku. Karungka nyulu duja jangkurr yurrngumba. Ngala nanda mambuka wuwarranyi, nyulu jujijbangka yurrngumba. Baki nyulu karungka yingkamuku, yalu jujambiji narrinya. 22 Wanyi nanda jujijbawarr, jala jujamba narrinya. Wanyi. Nyulu nanda jala karu narrinya Jisuskanyi, miku nyulimi Krayis. Nanda jala karu narrinya nani, nyulu jujijbawarr. Miku nangangi jangkurr duja. Nyulu ngirrawarr Krayiskanyi. Yangkalamba nangki bulanbunanyi Buwakanyananyi marda Jandanyinanyi. Miku nyulimi mili durrijba kunyba yuwa Kudkanyi. 23 Nanda jala miku nyulimi kuyu jangkurr Jandayngkanyi, baki miku nyulimi kuyu nangangi jangkurr Buwakayu. Ngala nanda jala kuyu jangkurr Jandayngkanyi, baki nyulu kuyu jangkurr Buwakaya marda. Jaliyi nyulu jingkijbangka Jandanyi, baki nyulu jingkijbangka Buwakaya marda. Barriwa.
24 Marda narringkimi yurrngumba mankumanku nanankanyi jangkurranyi, jali nurru karu narrinya wabula. Nurru, jali manjijba Jisus Krayiswanyi, nurru karu narrinya duja jangkurranyi Jisus Krayiskanyi. Jaliyi narringka mankumanku nanankanyi jangkurranyi, karu jali nurru narrinya wabula barri, jaliyi narringka mankumanku nanankanyi jangkurranyi, baki janarri jingkijba bulanya, Jandanyi marda Buwakanya, baki janarri jungku bulandu, janarri yanyba bulangi. 25 Jaliyi narri durrijba bulangi yuwa yurrngumba, baki janarri jungku bulandu yurrngumba. Janarri jungku wanka bulandu yurrngumba barri. Nani barri karuyi ngambalanya Jisus Krayiswanyi. 26 Yarrijba ngayu nayinda jangkurr narringi. Karu ngayu narrinya yalungi, nanamukuyngka jala nulijba jujambikanyi narrinya. Yalu ngirrawarrmuku Jisus Krayiskanyi. Nulijba yalu narringi jungunkanyi balkina yuwana Kudkanyi. Yarrijba ngayu nayinda jangkurr karunki narrinya yalungi. 27 Ngala nyuli yawumba nanda Kunyba Ngarndu Kudkanyi narrindurri mankanyiyurri Jisus Krayiswanyi. Wajba nyuli narrinya nanganginkanyi Kunybanyi Ngarndunyi. Ngala nangangi Ngarndu jungkuka narrindu, janyulu milidimba narrinya. Karu narrinya janyulu nanankanyi duja jangkurranyi. Jaliyi yingkamukunyi yalu jujamba narrinya, baki nanangini Ngarnduwanyi, janyulu karu narrinya duja jangkurranyi. Yurrngumba janyulu milidimba narrinya bukamba duja jangkurranyi. Miku nyulimi milidimba balkinyi jangkurranyi. Miku. Baki jaliyi narri ngayangayijba nanganginkanyi jangkurranyi, baki janarri jungku kandimuku Jisus Krayiskanyi yurrngumba barri. Barriwa.
28 Ngakinmuku mungkijimuku. Marda narrimi jungku kandimuku nangangi Jisus Krayiskanyi yurrngumba. Baki miku janarri marrala yajinyi jalija nyulu badajba wayka nanginkurri. Miku janarri manyirru nangangi, jungkukangangi narri kunyba nangangi. Janyulu mili wijba nanginkurri yajiyurri bayngkani baku. 29 Jingkijba narri Jisus Krayis, kunyba nyulu jungku, yurlurr yurrngumba barri. Jingkijba narri Jisus Krayis, baki marda narrimi jingkijba nayinda jangkurr marda. Jaliyi narri jungku kunybana yuwana Kudkanyi, baki janyulu maruka muwa narringi. Janarri jungku barrinani bayamuku nangangi Kudkanyi. Barriwa.