5
1-2 Ngayu barri malbu jurjkanyi. Jungku ngayi nangandu Jisus Krayisnyina jali nyulu jungku jambana. Jilalajba ngayi nangandu. Najba ngayi jali yalu linjumba Jisus Krayis. Najba ngayi jali nangka janyba kurndana. Baki baku barri jangayu jungku nangandu jalija minimba yalunya nangangi Jisus Krayiskanyi Kudwanyi. Janyulu minimba yalunya nangangi Jisus Krayiskanyi, nyulu wirimalaru yalungi, barrinani Kud nyulu wirimalaru yalungi. Ngayu jala malbu jurjkanyi, kudanyu ngayu karungka narrinya malbumalbu jurjkanyi, marda narrimi lalanba yalunya krisjinmuku narringinyina jurjina. Marda narrimi mirnarrijba muwa jala narri lalanba yalunya. Nani barri nyulu nulijbangka Kud narringi lalanbikanyi yalunya. Marda narrimi waki nani nangangi, nulijbangkangangi narri nangangi wakinkanyi nangangi. Ngala marda narrimi miku waki nangangi, nulijbangkangangi narri wudumbikanyi kaja dungala yalunbunanyi krisjinmukunanyi. Marda narrimi miku waki nani barri, muningka nulijbangka dungalanyi. Marda narrimi miku ngirrwa yalungi jurjina. Marda narrimi miku ngirrwa yalungi barrinani walkurra mambuka ngirrwangka. Ngala marda narrimi lalanba yalunya, marukangangi narri muwa yalungi. Nani barri marda narrimi waki nangangi Kudkanyi. Jala yalu najba narrinya wakinkurri, marukangangi narri muwa yalungi, baki jayalu marda mirnarrijba muwa wakinkanyi nangangi Kudkanyi. Baki jalija nyulu wijba Jisus Krayis, nanda walkurra lalanbawarr, jalija nyulu wijba wayka nanginkurri jambarri, baki janyulu mirnarrijba muwa narringi. Janyulu mirnarrijba muwa narringi, jaliyi narri lalanba yalunya kudanyu barri, jaliyi narri maruka muwa yalungi. Baki nanankardi barri janyulu maruka muwa narringi marda, baki janyulu yabimba kunyba yaji narringi, janarri jungku kingkarri nangandu yurrngumba barri. Barriwa.
Baki narri nganinyimuku baki kaburrwaburr jurjina, marda narrimi jungku barrinani yalu jungku malbumalbu jurjina. Marda narrimi ngayangayijba yalunginkanyi jangkurranyi. Narri bukambiju marda narrimi miku barrarrakijba yajinyi. Marda narringkimi miku yarrijba walkurra yalungi yingkamukuyngka, ngala marda narrimi waki yalungi. Nanda jangkurr najana Kudkanyi yanybaka nayi barri, “Nangka yangkalambaka Kud yalunbunanyi jaliyi yalu barrakijarramuku, jaliyi yalungka walkurramba waluwa yingkamukuyngka. Ngala nangka yangkalambaka yalundurri, jala yalungka bayakardamba, jala yalu mirnarrijba muwa wakinkanyi yalungi yingkamukuyngka. Nyulu yabimbaka kunyba yaji yalungi barri.” Nani barri yanybaka jangkurr najana Kudkanyi. Marda narringkimi bayakardamba nangangi Kudkanyi. Nyulu ngiruka lalanbawarr. Jaliyi narri jungku bayakarda nani nangangi, baki baku barri janyulu walkurramba narrinya. Janarri mili walkurra yalungi, jala yalu nanijba yabimba kiji narringi. Marda narrimi miku balkijba muwa jala narri kijiyudi, ngala marda narrimi yanyba mududu nangangi Kudkanyi nanankanyi kijinyi, baki janyulu dulaba nanda kiji narrinbunanyi. Baki janarri jungku mardumardu muwa nanankanyi kijinyi, jingkijbangangi narri Kud, kudanyu nyulu lalanbaka narrinya yurrngumba barri. Barriwa.
Ngala marda narrimi najbawa nanda Sayidin. Marda narringkimi birrirrinja nangangi, baki miku nyuliyi yangkalamba narrinya nanganbunanyi Jisus Krayisnanyi. Nanangini Sayidinwanyi, nyulu yabimbaka kiji narringi. Nyulu yabimbaka yalunya yingkamuku linjumbikanyi narrinya. Nani barri nyulu yabimbaka kiji narringi. Nyulu nulijbangka yangkalambikanyi narrinya nanganbunanyi Jisus Krayisnanyi. Nyulu nulijbangka marrimbikanyi narrinya. Nyulu barrinani mardumbarra, marrimba jala yaji. Nyulu nulijbangka marrimbikanyi narrinya. Nanankardi barri marda narrimi najbawa nanda Sayidin. Jala nyulu yabimbaka kiji narringi, baki miku narriyi marrala nangangi, ngala janarri yurlwa nangangi. Janyulu balanja narrinya, ngala narringkaja yangkalamba nanganbunanyi Sayidinanyi. Janarri miku kuyu nangangi jujambawarr jangkurr, jingkijbangkangangi narri Kud, janyulu lalanba narrinya kudanyu barri. Baki narri jingkijbangka yalunya krisjinmuku jala yalu jungku yingkana yajina baki yingkana yajina wandijiyana. Narri jingkijbangka yalunya, yalu marda jungkuka kijiyudi, barrinani narri jungkuka kijiyudi. 10 Jayalu yabimba kiji narringi yingkamukunyi, jayalu linjumba narrinya, ngala marndakaja barri janyulu yabimba kunyba yaji narringi Kudwanyi. Nyulu ngambalangi wirimalaru, baki janyulu yabimba narrinya ngiruka nangangi. Baki miku narringkiyi yangkalamba nanganbunanyi. Nyuli yarrijba narrinya jungunkanyi kingkarri nangandu. Janarri jungku kingkarri nangandu, nyulungangi bababanyamba narrinya Jisus Krayiswanyi. 11 Ngambala wajbangka Kud ngamanginkanyi kunybanyi jangkurranyi, nyulungangi ngirukamirra, nyulungangi ngambalangi wirimalaru. Nyulu wirimalaru bukambijuyngka yajinyi yurrngumba barri. Duja barri nayinda jangkurr. Barriwa.
12 Ngawamba kujajarra jangkurr ngayu manjijbangka narrindurri. Nanangini Silaswanyi, nyulu yarrijbangka nayinda ngaki jangkurr najana. Nyulu kunyba nganinyi. Nyulu barrinani bababanyamba ngalingka. Ngayu jingkijbangka Silas, nyulu jungkuka yurlurrmba yurrngumba barri. Ngayu manjijbangka nayinda jangkurr narrindurri, nulijbangangi ngayu narringi, narri mirnarriykanyi muwa nangangi Kudkanyi. Nayinda duja jangkurr. Munyajbangka yalunya Kudwanyi, yalu yabimbiji kiji narringi, baki janarri jungku mili ngiruka nangangi. Nani barri nyulu yabimbaka kunyba yaji narringi Kudwanyi. Marda narrimi jungku ngiruka nangangi yurrngumba barri. 13 Nanamukunyi jalili yalu malumba jungku jurjina nananyina yajina niji Babilun, yalu manjijbangka jangkurr narrindurri. Yarrijbayi yalunya Krisjinmuku Kudwanyi, barrinani narrinya yarrijbayi Krisjinmuku Kudwanyi. Yalu barrinani mungkijimuku narringi. Baki nanangini yingkawanyi Makwanyi, nyulu marda manjijbangka jangkurr narrindurri. Kudanyu ngayu marukangka muwa nangangi. Nyulu barrinani jandanyi ngaki. 14 Jalija narri yidamba yalunya yingkamuku Krisjinmuku, baki marda narrimi minimba yalunya, narri marukangka muwa yalungi. Yanyba ngayu mududu nangangi Jisus Krayiskanyi, jala nyulu bababanyamba narrinya. Ngajaka ngayu Jisus Krayis, janyulu yabimba narrinya jungunkanyi mardumardu muwa. Barriwa barri. Bukamba nayinda jangkurr.