HEBREWS
Juda alo borta aking nunga balsan Hebrew alo ma nunga balsan. Nunga usir nup Eber: Genesis 10, Luke 3:35. Nuna suen biya nunga wonong ali te bagakasan, bare suen biya tala mu parasaman ale sor sor nunga ningi bagakasan. Ale suen biya tala Jesus mu Messiah nuna ko kimi bita loaga lagakasan iwita ikiman, ale ko nongomang ningi nunguning aram, se ko nup biya ko ikup yaman ninguru gikasan. Ale nunga ningi saki bita tamon pelemonko nongomang ikia bitakasan. Se awiriya tam gawa imi batogam mu nuna sangam sokel nungarukko tam gawa imi batogam. Nu nunga manarso, Kristus mu Kaem ko Namar, se nu girakala ko prophet alo, agi engel alo, agi Moses se girakala ko priest alo mu suen la nunga ilu kiaram ale kualala biya Nuet ko kuting sengam mu te dagiwoso.
Awiriya tam gawa imi batogam mu ko den bo wetang te me aniso se ana me ko ikisan tala. Bare nu tam gawa imi bataguru kariimet umu nunga taleng girigir alo Abraham ariwiri nunga nongomang ningi nunguning owore arigimon ale nomolak la karomonko nunga kiti guruguso. Nuna nunga nomotam mu Jesus te la betemonko, nu nononga nongomang ningi nunguning ko duap se nu kota tala nuna nongorak nukum awurokko.
1
Aitak Kaem ko Namar te nangarak munakawoso
1 Girakala mu Kaem tom suen biya te se lage suen biya te, prophet alo nuguring te, anananga taleng girigir alo nongorak munakakaso. 2 Bare aitak tom nukum aram taiso imi te mu, nu ko Namar te nangarak munakaram ale am munakawoso. Kaem nu te ali mel suen la nungam, ale nu la melmasak suen la umu kotam awurok ale bituokko balam. 3 Noko Namar umu noko koma motam kumik lilim to kuliram nunguningkiri, ale nuet ko nikim biya wore wetang saparam. Ale melmasak suen la mu noko den sokel aora biya mu te ilukuawuram se sokel ago la aniso. Nu anananga memek siwurokko kueram, ale aitak mu Kaem Sokel Karogo mu ko kuting sengam mu te duruk wonong te dagiwoso.*Jesus: John 1:3; 2 Corinthians 4:4,6; Colossians 1:15-17. 4 Nu nup biya nunguningkiri, engel alo nunga nunup mu kia saparam mu aitak tam ale, nu nunga kia saparam ale nup biya kualala biya bagoso.
Kaem ko Namar mu engel alo nunga kiaram ale kualala biya bagoso
5 Se engel alo nunga ningi engel awuk wore Kaem ko balam ale mam:
“Ni mu aninga Namar;
se aitak mu ani nika Niet”?
Agi mam:
“Aitak mu ani noko Nuet,
se nu mu aitak aninga Namar”?†Psalm 2:7; 2 Samuel 7:14.
6 Ale aking Kaem ko Namar suanta mu bitiruk se ali imi te tai kaparukko mu nu mam,
“Kaem ko engel alo suen la nubugura
kulukurmon ale nup biya tumonko.”‡Deuteronomy 32:43.
7 Bare nu ko engel alo nunga mu iwita balam:
“Nu ko ura kari engel alo mu marir iwita
nunga beteso se taisan, tama kuamili iwita tai kapasan.ӤPsalm 104:4.
8 Bare noko Namar ko mu iwita balam:
“O Kaem, nika king ko bagara mu pempem la butata bagerko,
se munan ningo diram mu nika king ko
tam iwita, nika kingdom te bitaruko.
9 Ni munan ningo diram mu kua tuem ale,
munan memek mu biring tuem;
bore te se, ani Kaem, nika Kaem, mu
amilmil oil sipiling te warem,
ale ka saki alo nunga ningi ni kualala biya ka beterem se bagasam.”*Psalm 45:6-7.
10 Ale nu akingtala iwita balam:
“O Kari Biya, duap te nunguningkiri
girakala biya, ni ali imi ko nukuri yager beterem,
se taiti gomang kualala mu nika kiting kiwol.
11 Melmasak suen la umu mena namamonko,
bare ni mu butata baga se lagerko;
melmasak suen la umu guang iwita nama gigira amonko.
12 Ni guang maiya bo moa patungursan
iwita nunga moa patunguruko;
guang iwita to sapar ale iru kuwim te bitarko.
Bare ni mu koma suanta uwutata
pempem baga se lagerko, ni kimik ka menara ko tom mena.ӠPsalm 102:25-27.
13 Se Kaem engel alo awuk wore bo maonam ale mam:
“Ni kuwim nup ago agiting sengam mu te
bager se ani kari memek nunga
menawu siwik duap ningi nunga awurekko”?‡Psalm 110:1.
14 Se engel alo suen la mu noko ura kari la, nu kariimet nunga sangaru taukko balam se bagasan wore nunga ningi ura betemonko nunga beteso se namasan.