8
Kaem nup biya mu kari nup biya tuam
(David ko wur)
1 O Yawe, anananga Biya,
nika nip biya ali lilim iramuram!
Se taiti gomang lilim te nika nip biya wetang awurem.
2 Ni kuriang gotektek nuguring te nup biya tasam,
ale mu nika sokel aora garagar mu wetang saposo,
se kariimet ni kerak barimawara mu nuguring menaso.
3 Tom ani taiti gomang te loagasam
ale nika kiting kiwol sige se baras nunga kuwim kuwim te nunga awurem mu arigisam,
mu ani ikia tasam:
4 Bare ana kariimet mu anape mel nunguningkiri se
ni ana mel biya ko nanga betesam, ale ninguru nanga bitarsam?
5 Ni keta nimi ari se nanga nungem,
ale am nika*Hebrew den te elohim “gods, God”. Greek den te mu iwita guruguman se aniso: engel alo nobowa ningi. bowa ningi nunguningkiri nanga awurem,
ale nikim se nup biya nangarem.
6 Ni mel suen la ana nabowa ningi awurem,
ale ana bitarnakko balem:
7 sipsip se bulmakau,
se giarum ningi ko melmasak,
8 se inangnang binga geragasan,
se wal se mel suen la gagi ningi geragasan,
mu bitaru sapanakko balem.†Genesis 1:28.
9 O Yawe, anananga Biya,
nika nip biya ali lilim iramuram!
*8:5: Hebrew den te elohim “gods, God”. Greek den te mu iwita guruguman se aniso: engel alo nobowa ningi.