74
Kariimet lilim maga kuenesan wore ko saonga ko aira
(Asaph wur imi batogam)
1 O Kaem, ni awuk, nanga mera biya nanga merem e?
Awuk se nika gemang memek ka sor wolong yawara ewere ko sipsip nunga maguwuwoso?
2 Ni kariimet imi, girakala ni keta nunga
sangaru taem, mu nunga kamin ares maukko.
Kariimet gue imi nika ma balem, ni keta nunga bataguru giem.
Duruk Zion nika bagara kuwim wore ko ago me kamili saparukko.
3 Melmasak suen biya magara biya maga
kuena saparam ewere kema gurugu ale arikko;
kager kari memek nika kuwim laili imi maguwu sapaman.*Yia tom 586 B.C. mu te Babylon alo taiman ale Jerusalem se ko temple maguwuman: 2 Kings 25.
4 Nika kager kari memek alo ngata te
kuwim laili ni te nanga biguwukasam mu ningi kapaman;
nuna nunga guang kiwol ago balayam wore ningi awu karogo namaman.
5 Nuna burir te tam kaura ko kari nunga kiwem beteman.
6 Nuna kiwol anapeya ningi mu burir
manga barasam se te pakakumu maguwu sapaman.
7 Nuna nika bagara kuwim laili mu kaiman se kani malilaram;
nika bagara kuwim nika nip biya karogo
mu kiwem duap duap te karur tuguman.
8 Nuna nunumi manorman, “Ana aitakta
nunga moa parusuwura biya parusuwunakko!” maman;
uwuta balu se biguwura kuwim suen la
Kaem te nup patawukasan mu kai sapaman.
9 Ana aitak Kaem ko kiwem bibiya duap duap bo ta me arigisan;
Kaem ilak tuatara ko kari bo me ta bagoso;
se kiwem imi tom amaruya menarukko mu ana bo yam ta me ko ikisan.
10 O Kaem, tom awila nunguningkiri
kager kari memek ewere nika gusirmonko?
Nuna butata nika nip maguwu se lagamonko e?
11 Ni awuk se kiting kalem, kiting sokel garagar wore awuk se kalem?
Kiting kalem wore apur ale nunga maguwurko!
12 Bare O Kaem, ni aninga king, ni girakala la wore bagasam;
ni keta ali imi lilim sangaru tasam.
13 Ni keta ka sokel aora biya wore te gagi pagaru ilagala awurem;
ale gagi ko mel memek bibiya mu nusupuling ita pakakumurem.
14 Ni keta gagi ko mel memek
Leviathan†Leviathan ko dora te baluwoso mu kiwem memek ko balso, ko sokel mu Kaem menawu saparam. mu supuling suen la ita parusuwurem ale
sor merang mu ko buruk kausik se
inangnang anapeya namonko nungarem.
15 Ni keta yu tingawara mu se, yu palenga
namawara mu nunga barukem se naguwasan;
ni tala balem se yu bibiya nungumik maraka mena mu maraka namaman.
16 Woremkalal se tirom mu am nika la;
ni worem se sige nuguwim nungarem.
17 Ni keta ali imi lilim ko tom bita bita karogo namerem;
ni worem ko tom se tuwik ko tom nungem.
18 O Yawe, kager kari memek nika gusiman wore ko kamin ares mauk,
se kariimet ikia ningo mena, nika nip balu maguwuman wore ko ikiko.
19 Nika inangnang biton yawara mu, mel
diwang memek nuguting te me bitarko;‡Inangnang biton ko bala mu Israel nunga balso.
nika kariimet, ikup memek giman mu, nunga kamili me sapa se lagarukko.
20 Nika den kalem mu ko kamili me saparukko,
mu awuk, tiromorom ko kari memek alo
kager daong ko ali sor ira sapaman.
21 Buta se kariimet nunga bita maguwuman mu nungarkiwer se me dola namamonko, mena;
nuna kituwura guat se nungumik mel
mena bare nunga sangaru se nika nip patawumonko.
22 O Kaem, bares ale ni keta ka kiwem
ningo diram wore te sokel ago anirukko ko baluko;
kariimet memek ni ko ko den alel balu lagasan wore ko ikia toko.
23 Kari memek nunga ngata nirung kawel
pempem bita lagasan mu ko kamili me saparukko.