9
Paul ko gue suan Israel alo nunga gomang batagam
1 Ani Kristus ningi den nunguning balsam, ani me kawelasam, se Bur Laili aninga angamang motam sokel tuso se ani ko ikisam ani den nunguning la balsam: 2 Ani angamang motam biyala batagoso se ikup yaman ago lagasam. 3 Kristus betera ale bataga maga namara mu ani me ta ko kuesam nunguningkiri. Bare uwuta bitirik se agata aga gue suan Israel alo te Kaem ko ningo arigimonko agi mu, ani am uwutata bitirikko. 4 Nunanta nu noko kuriang ko nunga giam; nunanta noko sokel nikinang mu arigiman, se den nongorak kaolam, ale law nungaram. Nunanta temple ningi kagin betera mu nunga kausam, ale nunga saonga den aora nunga maonam. 5 Nunanta nunga taleng girigir alo nunga gue te tairam tai Messiah aratam. Nu Messiah, nu Kaem, mel suen la pulawuram, se nup pempem patawu se laganakko!*Bala bo mu iwita: Nononga gue te Messiah aratam. Nu mel suen la pulawuram. Se ana pempem Kaem nup patawu se laganakko! Se bala bo tala mu iwita: Nononga gue te Messiah aratam. Se ana Kaem mel suen la pulawuram wore pempem nup patawu se laganakko! Nunguning.
Kaem kota ko ikia te kariimet noko ma nunga balso ale nunga giso
6 Bare ani balsam ale Kaem ko den mu yam balu te kolaram iwita me balsam, mena. Mu awuk, nup Israel kariimet mu nup biya, bare ningi mu saki la Israel kariimet nunguning. 7 Nuna Abraham ko gue te ko kariimet arataman, bare mu saki la Abraham ko gue nunguning. Mu awuk, girakala Kaem iwita Abraham maonam; “Isaac ko tuagu te, aninga kariimet gue nunga balem mu aratamonko,” mam.†Mu Abraham ko kuriang Ishmael ko gue te mena: Genesis 21:8-12. 8 Buta se Abraham Sarah ilak nongota nunga ikia te kuriang bilangaram mu ko gue te mu Kaem ko kariimet iwita me nunga balsan; bare den Kaem Abraham ilak kaolam mu, gue noko namar Isaac tuagu te wore ko iki se balam. 9 Kaem ko den Abraham ilak kaolam mu iwita: “Tom ani agata balem mu te diram pelerik tairik mu, Sarah kuriang kari iluwok ilak bagaruk se ani tairikko,” mam.‡Isaac se Ishmael: Genesis 18:10,14. Israel kariimet nunguning: Romans 2:28; Galatians 4:23. Nangamang ningi nunguning alo: Romans 4:13,16,20-21.
10 Ale umu la mena. Rebekah ko kuriang ilagala nunga nonet suanta, anananga girigir Isaac. 11 Bare kuriang singisik ilagala umu me bilangaman ale munan ningo agi memek me betera la, Kaem ko munan kota kariimet noko ma nunga balso wore te beteram. 12 Noko munan kari ko betera kaora te ari se me aura, mu te Rebekah maonam, “Kuriang laun mu kuriang uria umu ko kari dungan bagarukko,” mam.§Genesis 25:23. 13 Batoga bo te baluwoso iwita, “Ani Jacob angamang tuem, bare Esau mu ani abiring tuem.”*Jacob se Esau: Genesis 25:21-34; Malachi 1:2-3.
14 Se umu ana awuk ko balnakko? Kaem munan diram me beteram manak e? Mena biya! 15 Nu Moses iwita maonam,
“Ani awiriya angamang tuekko mu ani angamang tusam,
ani awiriya sangikko mu sangorsam.ӠExodus 33:19. Kaem kari gomang tuso ale noko ma balso: Ephesians 2:8.
16 Bore te se, ana wetang te ariginakko, umu kari ko gomang te agi ko ura kowar te mena, mu Kaem kota ko gomang kari tuso ale uwutata beteso. 17 Batoga te Pharaoh maonam iwita, “Ani ni king ko ka beterem mu ko duap mu, ani ni kimik te aga sokel wetang te bitirik se, ali lilim la arigimon ale aga aip biya ko balmonko, uwuta ka beterem.”‡Exodus 9:16. Pharaoh ko gomang aora biya. 18 Bore te se, Kaem awiriya gomang tuokko, mu nu gomang tuso, ale awiriya ko gomang kaloso, mu nu ta ko gomang kaloso.
19 Se bo ta baluk: “Kaem kota kari kiti guruguso se nu karo tuiwoso,” mauk, “ale awuk se kari umu aking den te atumuso?” ma balukko. 20 Bare ni kari duap awuk wore Kaem ko munan umu ko ilak balsam? Agi “kuar kisi beteman umu giris palaguk ale kari nu kisi beteram mu manuk ale, ‘Ni anape ko ani iwita aga kisi beterem mauk i?’ ” Mena. §Kiwol betera ko den: Isaiah 29:16; 45:9-10; Jeremiah 18:6. 21 Kuar kisira ko kari mu, kuring suen la mu noko te la aniso. Noko gomang te tam luan suanta mu te kuar balayam kisirokko agi, am ta kuar bo kisirokko mu noko te la.
22 Kaem ko gomang magara mu wetang te bitiruk se kariimet ko sokel arigimon ale ko ikimonko gomang agi wore, nu kariimet nunga maguwurokko mu nunga gomang biyala kua kaparuk se aking to iluwok, mu ana awuk ko balnakko? 23 Agi nu kariimet ulengkala noko ma nunga balam ale gomang nungaram, ale noko nikinang biya umu ningi bagamonko balam wore te ari ikimonko uwuta beteram agi mu, ana awuk ko balnakko? 24 Kariimet noko ma nunga balam mu anangata, Juda la mena, sor saki ko kariimet agotala. 25 Nu Hosea ko batoga te iwita balam:
“Kariimet aninga kariimet mena mu ani nunga balik ‘aninga kariimet’ maikko;
nuna aninga angamang motam mena,
bare ani nunga balik ‘nuna aninga angamang motam’ maikko.”*Hosea 2:23. 26 Ale,
“Kuwim te nuna den taman,
‘Nina aninga kariimet mena’,
mu aking yam kuwim koma suanta nung te tala,
‘nina Kaem marak pempem bagoso wore ko kuriang alo,’ ko bala umu aking tamonko.”†Hosea 1:10.
27 Se Isaiah Israel ko iwita airam balam:
“Israel ko kariimet gue mu suen biya langi saun iwita mu nunguning,
bare mu awilaya gotek mu la saonga arigimonko.
28 Mu awuk, Kari Biya ko tutera ura mu
sokel ago se tairatela, ali imi te bita saparukko.”‡Isaiah 10:22-23.
29 Ota, Isaiah giram balu beteram iwita:
“Bare Kari Biya Sokel Garagar mu anananga kariimet gue sang
me gomang nungaram se tai aitak ana bagasan le mu,
ana aitak Sodom agi Gomorrah alo iwita mena sapaman le.ӤIsaiah 1:9.
Israel alo nongomang ningi me nunguning akaso
30 Buta se ana awuk balnakko? Sor saki ko kariimet mu munan ningo diram mu ko me sail tagikasan, bare nunga nongomang ningi nunguning te kariimet ningo diram ko arataman. 31 Bare Israel alo mu munan ningo diram ko law mu karo tumonko ninguru sail tagikasan, bare kariimet ningo diram ko me arataman. 32 Mu awuk se? Mu ko duap iwita: nuna nongomang ningi nunguning te kariimet ningo diram ko aratamonko me sail tagikasan; nuna nunga ura kowar te tamonko iwita bitakasan. Ale “manga te nusuwik atumumon ale dagulamonko” mu te nusuwik atumuman ale dagulaman. 33 Batoga te aniso iwitata:
“Arigalko! Ani manga bo Zion betesam,
manga umu kariimet nusuwik te atumumonko;
nuna manga umu nusuwik te atumumon ale dagulamonkowo.
Bare awiriya nu te ira sanami
lagasan mu me te dagulomon ale dolomonko.”*Isaiah 8:14; 28:16. Manga umutang Jesus: Matthew 21:42; 1 Peter 2:6,8.
*9:5: Bala bo mu iwita: Nononga gue te Messiah aratam. Nu mel suen la pulawuram. Se ana pempem Kaem nup patawu se laganakko! Se bala bo tala mu iwita: Nononga gue te Messiah aratam. Se ana Kaem mel suen la pulawuram wore pempem nup patawu se laganakko!
†9:7: Mu Abraham ko kuriang Ishmael ko gue te mena: Genesis 21:8-12.
‡9:9: Isaac se Ishmael: Genesis 18:10,14. Israel kariimet nunguning: Romans 2:28; Galatians 4:23. Nangamang ningi nunguning alo: Romans 4:13,16,20-21.
*9:13: Jacob se Esau: Genesis 25:21-34; Malachi 1:2-3.
†9:15: Exodus 33:19. Kaem kari gomang tuso ale noko ma balso: Ephesians 2:8.
‡9:17: Exodus 9:16. Pharaoh ko gomang aora biya.
§9:20: Kiwol betera ko den: Isaiah 29:16; 45:9-10; Jeremiah 18:6.
*9:25: Hosea 2:23.
†9:26: Hosea 1:10.
*9:33: Isaiah 8:14; 28:16. Manga umutang Jesus: Matthew 21:42; 1 Peter 2:6,8.