Yu so dla yu ilimale hamili
Hibulu
Hibulu buka ya꞉ dulu koko
Di podimalamana, Hibulu buka i ilimale oplamiye. Amasiyama yu ilimale iye Yu so mikadepe dle so dla ilipo hamiwapo. Epele dulu dla Yu so yia꞉ hi haleye Hibulu so demdepo. Oloma edla Yu sotapo God ya꞉ banakaka so mate epo Moses mate tlo patoto so demduwapo. Epapele tlope asiyama yu ilimale dulu hema atla kokota ma epo atlapo, hatlo Yesu tlo pato halapo. Adipalati, Yesutapo amko koko hampuwata takala koko Mosesta hampualeye tla꞉mtauwapo. Ame adipalati, takala koko dulu dla God ka꞉ epo opa ka꞉ duka dla ha꞉ha꞉lalo sotapo opa bobtalimale howahalowedeme alinepi omali mate ammduwapo. Amasiyama amko koko dulu dla Yesutapo God ka꞉ epo opa ka꞉ duka dla hallalo amko halapo. Adipalati, ya꞉tapo ya꞉ omali mate opa hapuloma yia꞉ bobtalimale howahalowe kokoye hampuwapo. Epapele koko tle takala koko dla ma itiyamale hale pe-elasema. Epedeme dita isikimi hatlo Yesu Kelisota di bobtalimale dla pomama ya꞉ omalitapo di bobtalimale howahapo hamastauwa dla mikadepe dlepiye, eta dia꞉ye God mila꞉pi tle ullu pa꞉talo so dlepe. Epame buka itapo ka꞉yapa ha꞉ha꞉uwa mikadepe dle kokalalimale so opa yia꞉ koko mape dia꞉ dla imapo. Epapedeme ditapo yia꞉ koko natipo dolumha꞉ha꞉mama wotiyalle koko dulu medla dita mikadepe dle mate kokalalipo ha꞉ha꞉lowepo.
1
God Yamitapo banakaka sota itiyamaleye tla꞉mtame halapo
Mo-powataliya Godtapo ya꞉ yu molo atlamalalo so tle di mamadulo dla api meyelope meyelope dle tle molo atlamhalemduwapo. Amasiyama wata mosukulu alila oloma hema ya꞉tapo ya꞉ yuye Yami tle dia꞉ dla yukamuwapo. Epedeme ya꞉tapo Yami tle alisisi hapulomaye mimita꞉pame Yamiye mo-sauwapo, ya꞉tapo alotle alisisi hapulomaye omhallepo depame. Epedeme Yamitapo Godta hela꞉dle hamhalemama God mila꞉pi ikadepe himhalapo. Epame ya꞉tapo ya꞉ yu itiyamale tle koko hapulomaye halopo hallalo halapo. Epedeme ya꞉tapo opa yia꞉ bobtalimaleye howahalopo gudepame Pepele dimo dla hetame pato God dowala tiyama dla polapo. Epapele dulu dla Yamitapo banakaka soye tla꞉mtame halapo. Epame Godtapo Yami watle hi hamiwatapo banakaka so dla hi halopiliye tla꞉mtame halapo. Ame adipalati, Godta ya꞉ banakaka oplami hale dla yu po-ipo atlana,
“Wa꞉ye na꞉ Maseyemalapo,
watapo na꞉ye wa꞉ A dlepo,” pe-epo atlana.
Epame Godtapo banakaka so hale dla ma yu hale po-ipo atlana,
“Na꞉tapo ya꞉ A dlepe,
epalati ya꞉tapo na꞉ Maseyemala dlepe,” pe-epo atlana.
Epame matle Godtapo Yami hatloye ta꞉lamo dla seme maluwa oloma edla, ya꞉tapo epo atluwapo,
“God ya꞉ banakaka so hapulomatapo hatlo Yami dla heodepame siyele hamilipe,” duwapo.
Amasiyama Godtapo ya꞉ banakaka so koko dla yu ipo atluwapo,
“Godtapo ya꞉ banakaka soye ya꞉ oko so depame mosisi some hallepo depame mimita꞉puwapo.
Epame dlapa teleka꞉le some hallepo depame mimita꞉puwapo.”
Amasiyama ya꞉tapo ya꞉ Maseyemala koko dla epo atluwapo,
“God, wa꞉ mo kokotapo kokó elepo ellepe.
Epame wa꞉tapo ka꞉dle api tle wa꞉ opaye woloma omhallepe.
Epame wa꞉ ka꞉dle koko tlo solotamama
asiyama batalimale koko tlo alimhalemduwapo.
Epapele koko tle wa꞉ Godtapo wa꞉ye ma-sepame
wa꞉ dla siyele hamiwapo.
Siyele wa꞉ dla hamiwa etapo wa꞉ amkadulo dla siyele hutiyeye tla꞉mtame halapo.”
10 Epame Godtapo matle epo atluwapo,
“Lod, wa꞉tapo kotiyamale sitali dla ta꞉lamoye wa꞉ta mita꞉puwapo.
Epame pepele di ma wa꞉ dota mimita꞉puwapo.
11 Epapele tlope ta꞉lamo mate epo pepele di mate pa꞉lepe.
Yia꞉tapo tluka takala some sosola꞉timelepe.
Amasiyama Lod, wa꞉ye kokó halepo hallepe.
12 Epame Lod, wa꞉tapo ta꞉lamo mate pepele di mate tluka takala some popolopo hamastlepe.
Epalati yia꞉tapo ma mila꞉pi meyelope dlepe.
Amasiyama Lod, wa꞉ye pomeyelope desemde.
Epame wa꞉ye sukulu pa꞉le hallalopo.”
13 Epapele dulu dla Godtapo banakaka oplami hale dla yu po-ipo atlana,
“Wa꞉ na꞉ dowala tiyama dla polane.
Wa꞉ pollati na꞉tapo wa꞉ watle opahale demha꞉ha꞉ soye wa꞉ hete sitali isili dla hatitimolowepo,” pe-epo atlana.
14 Amasiyama banakaka so hapulomaye isikimi God yu dla salladepo siyamalalo sokopo. Yia꞉ye Godtapo taiya duwapo, yia꞉tapo pasakalo gadle halowedeme ha꞉ha꞉ soye gadlepo depame.