3
Jɔnn u muini binib nnyun ni na aah moon Uwumbɔr aabɔr pu na
(Matiu 3.1-12; Mak 1.1-8; Jɔnn 1.19-28)
1 Buyoonn Ubɔrkpaan Tiberius Siisa nan jin waanaan ŋibin kipiik ni ŋiŋmu ni, aan Pontius Pailat mu ye Judea aatiŋ aaninkpel, Herod mu ye Galilee aabɔr, aan unaal Filip mu ye Iturea aatiŋ, ni Trakonitis aatiŋ aabɔr, Lisanius mu ye Abilene aatiŋ aabɔr, 2 aan Anas ni Kayafas mu ye Uwumbɔr aatotoorninkpiib na, n‑yoonn ngbaan le Jɔnn u ye Sekaria aajapɔɔn na nan bi nteersakpiin ni. Le Uwumbɔr len u chee tibɔr nima. 3 Le u bɔ dii Jɔɔdann aamɔɔl aatingbaan ni, ki mooni ke, “Kpeln nimi aabimbin man, aan m muin nimi nnyun ni, le Uwumbɔr ga di cha nimi aatunwanbir pinn nimi.” 4 Waah ŋa kina na, le ni gbiin Uwumbɔr aabɔnabr Aisaya aah nan ŋmee pu Uwumbɔr Aagbaŋ ni na ke,
“Unii ubaa bi nteersakpiin ni ki tar,
‘Toor Uwumbɔr aasan man
ki ŋa waasan mu li tok ki tii u.
5 Bi ga di titan gbiin tifatann mɔmɔk,
ki ber ŋijoo ni ŋigongon mɔmɔk lii taab,
ki naar isan imɔk gɔr na,
ki ŋa isan imɔk kaa joon na, i li joon tii u.
6 Binib mɔmɔk ga kan Uwumbɔr aah ga gaa bi lii pu na.’ ”*: Lik Aisaya 40.3-5.
7 Le kinipaak nan dan Jɔnn chee, ki ban ke u muin bi nnyun ni. Le u baa bi, “Nimi ijagen aabim, ŋma sur nimi ke ni nya ntafadaan mu choo na ni? 8 Ni li tun lituln li ga mɔk ke ni sil kpeln nimi aabimbin na, ki taa bui ke niyaaja aah ye Abraham na, nima le ga cha ni nyan ntafadaan ni. M tuk nimi la, Uwumbɔr ga ŋmaa di ŋitakpal ŋimina kpaln Abraham aayaabitiib. 9 Dandana wee Uwumbɔr toor kichɔk ke u ti gaa isui imɔk kaa lu ŋisubil ŋi ŋan na, ki di ŋa mmii ni.”
10 Le kinipaak ngbaan baa u, “Kina kan, ti ga ŋa kinye?”
11 Le u bui bi, “Unii u kpa ŋibɔkul ŋilee na, u tii unii u kaa kpa libaa na. Unii u mu kpa tijikaar na, u yakr tii unii u kaa kpa na.”
12 Bilampoogaab mu nan dan u chee, ki ban ke u muin bi nnyun ni, le ki baa u, “Umɔmɔkr, ti mu ga ŋa kinye?”
13 Le u bui bi, “Ni taa gaa ŋimombil ki jer baah siin nimi pu na.”
14 Le butɔb aajab mu baa u, “Ti mu ga ŋa kinye?”
Le u bui bi, “Ni taa gaa unii ubaa aamombil mpɔɔn man, ki taa galn unii u kaa kpa taani na. Cha ninimbil gbiin nimi aapal.”
15 Jɔnn pu, le binib aalandak fii. Bi mɔmɔk baa bisui ni ke, “U ye Kristo u ga gaa timi lii na aan waa ye?” 16 Le Jɔnn bui bi mɔmɔk, “Mma muin nimi nnyun ni la. Tɔ, unii u jer mi na mu choo. Maa ŋeer ke m gbiln waanaatak aaŋmin ki tii u. Uma le ga muin nimi Uwumbɔr Aafuur Nyaan, ni mmii ni. 17 U joo waayikpimbik uŋaal ni, u ti chaar waajikaar, ki di njikaabim ŋa lipil ni, ki di tigbengbir see mmii mu kaan junn na ni.”
18 Kina le Jɔnn nan sur binib ngbaan, ki di ŋimɔbon aabɔŋ kpee ki sur bi, ki mooni tibɔnyaan ngbaan. 19 U nan sur Ubɔr Herod mu. Herod nan gaa unaal aapuu Herodias, ki ki tun titunwanbir sakpen ki kpee. Nima le cha Jɔnn nan sur u. 20 Le Herod ki tun titunwanbir tiken ki kpee, ki chuu Jɔnn laŋ kiyondiik ni.
Jɔnn aah muin Yesu nnyun ni pu na
(Matiu 3.13-17; Mak 1.9-11)
21 Jɔnn aah nan muin binib nnyun ni na, le u muin Yesu mu nnyun ni. Le Yesu mee Uwumbɔr. Waah bi mee Uwumbɔr na, le kitaapaak chuu piir. 22 Le Uwumbɔr Aafuur Nyaan sunn ni, ki nan tɔŋ u pu, ki naahn linanjel. Le nneel nyan ni paacham ki len, “Aa ye Njapɔɔn u m gee si na la. Nnimbil gbiin si.”†: Lik Aisaya 42.1.
Yesu aayaajatiib ponn ni aayimbil
(Matiu 1.1-17)
23 Buyoonn Yesu naahn ke waah ŋa ŋibin piitaa aanii na, le u piin ki tuk binib Uwumbɔr aabɔr. Binib nan dak ke u ye Josef aajapɔɔn la.
Josef nan ye Heli aajapɔɔn,
24 Heli mu nan ye Matat aajapɔɔn, Matat mu nan ye Liifai aajapɔɔn,
Liifai mu nan ye Melki aajapɔɔn, Melki mu nan ye Janai aajapɔɔn,
Janai mu nan ye Josef aajapɔɔn,
25 Josef mu nan ye Matatias aajapɔɔn, Matatias mu nan ye Amos aajapɔɔn,
Amos mu nan ye Nahum aajapɔɔn, Nahum mu nan ye Esli aajapɔɔn,
Esli mu nan ye Nagai aajapɔɔn,
26 Nagai mu nan ye Maaf aajapɔɔn, Maaf mu nan ye Matatias aajapɔɔn,
Matatias mu nan ye Semeinn aajapɔɔn, Semeinn mu nan ye Josek aajapɔɔn,
Josek mu nan ye Joda aajapɔɔn,
27 Joda mu nan ye Joanann aajapɔɔn, Joanann mu nan ye Resa aajapɔɔn,
Resa mu nan ye Serubabel aajapɔɔn, Serubabel mu nan ye Sealtiel aajapɔɔn,
Sealtiel mu nan ye Neri aajapɔɔn,
28 Neri mu nan ye Melki aajapɔɔn, Melki mu nan ye Adi aajapɔɔn,
Adi mu nan ye Kosam aajapɔɔn, Kosam mu nan ye Elmadam aajapɔɔn,
Elmadam mu nan ye Er aajapɔɔn,
29 Er mu nan ye Josua aajapɔɔn, Josua mu nan ye Elieser aajapɔɔn,
Elieser mu nan ye Jorim aajapɔɔn, Jorim mu nan ye Matat aajapɔɔn,
Matat mu nan ye Liifai aajapɔɔn,
30 Liifai mu nan ye Simeonn aajapɔɔn, Simeonn mu nan ye Juda aajapɔɔn,
Juda mu nan ye Josef aajapɔɔn, Josef mu nan ye Jonam aajapɔɔn,
Jonam mu nan ye Eliakim aajapɔɔn,
31 Eliakim mu nan ye Melea aajapɔɔn, Melea mu nan ye Mena aajapɔɔn,
Mena mu nan ye Matata aajapɔɔn, Matata mu nan ye Natann aajapɔɔn,
Natann mu nan ye Ubɔr David aajapɔɔn,
32 Ubɔr David mu nan ye Jese aajapɔɔn, Jese mu nan ye Obed aajapɔɔn,
Obed mu nan ye Boas aajapɔɔn, Boas mu nan ye Salmonn aajapɔɔn,
Salmonn mu nan ye Nasonn aajapɔɔn,
33 Nasonn mu nan ye Aminadab aajapɔɔn, Aminadab mu nan ye Adminn aajapɔɔn,
Adminn mu nan ye Arni aajapɔɔn, Arni mu nan ye Hesronn aajapɔɔn,
Hesronn mu nan ye Peres aajapɔɔn, Peres mu nan ye Juda aajapɔɔn,
34 Juda mu nan ye Jakob aajapɔɔn, Jakob mu nan ye Aisak aajapɔɔn,
Aisak mu nan ye Abraham aajapɔɔn, Abraham mu nan ye Tera aajapɔɔn,
Tera mu nan ye Nahor aajapɔɔn,
35 Nahor mu nan ye Serug aajapɔɔn, Serug mu nan ye Reu aajapɔɔn,
Reu mu nan ye Peleg aajapɔɔn, Peleg mu nan ye Eber aajapɔɔn,
Eber mu nan ye Sela aajapɔɔn,
36 Sela mu nan ye Kainann aajapɔɔn, Kainann mu nan ye Afaksad aajapɔɔn,
Afaksad mu nan ye Sem aajapɔɔn, Sem mu nan ye Nowa aajapɔɔn,
Nowa mu nan ye Lamek aajapɔɔn,
37 Lamek mu nan ye Metusela aajapɔɔn, Metusela mu nan ye Enok aajapɔɔn,
Enok mu nan ye Jared aajapɔɔn, Jared mu nan ye Mahalaleel aajapɔɔn,
Mahalaleel mu nan ye Kenann aajapɔɔn,
38 Kenann mu nan ye Enos aajapɔɔn, Enos mu nan ye Sef aajapɔɔn,
Sef mu nan ye Adam aajapɔɔn, Uwumbɔr le nan naan Adam.