2 YOANE
Pepa Yoane iŋgere muli panzi kalo-tawana tamâta
Yesu ne pâri tamâta Yoane iŋgere ŋgua panzi kalo-tawana tamâta ŋgu (1Yoane), aku zo pinde ilâ lâ, ŋineŋga iŋgere ŋgua ŋine ŋana ileleanzi pananâŋa tamâta laŋeŋa pinde simo ŋgu ŋgininzi. Tiambo iŋgere ŋgua ŋine ilâ pa taine toŋge tâku isia ŋgua nâ ku iŋgere pa ŋgu toŋge tâ (1,4,5); ŋine kinda tasama tia. Yoane ne ŋgua ŋalae nde mine; kinda ma tapakatona sondo ŋananzi tamâta ŋinde situla ŋgua laŋeŋa ŋana Yesu Kirisi kâ, ku ma tapaveta kuku ŋgua mao ŋinde Yesu muŋga ipanananzi tamâta.
1
1 Naŋa amo kalo-tawana tamâta ŋgu nenzi katonâŋa. Naŋa aŋgere ŋgua lâ pepa ŋine tini imâ pa noko taine ŋalae tavanzi noko natu wukale. Maro Kindeni muŋgani ipateami tu ma kamo i ne ŋgu sondo. Naŋa aporo ŋgua mao nâ mine tu naŋa iloŋgu ndo keno pami. Andeta naŋa simboŋgu nâ iloŋgu keno mine, ande tia. Kinzi tamâta rârâni kala uru sipaveta kuku ŋgua mao, kinzi ŋinde kala ilonzi ndo keno pami. 2 Ŋgua mao ŋinde uru imo ku kinda, ma imo mine ku imo nâ. Mine nde maka iloma ndo keno pami. 3 Kinda uru tapaveta kuku ŋgua mao, aku uru tininda mwasa panzi tininda pinde tona. Mine kala Tamânda Maro Kindeni aŋga Yesu Kirisi, ina Tamânda Natu, kinzi rua nenzi wisi-wisi wa kalo-sukâŋa wa wisi-pisi wa imo ku kinda.
Ara ŋana kinda ma tapono muli pa tini-mwasa ne vetâŋa
4 Naŋa aloŋo noko natu pinde parinanzi tu kinzi uru sipono muli pa ŋgua mao, ikura kinda Tamânda muŋga iporo pa kinda tu ma taveta mine. Aku naŋa iloŋgu ndeka ndo ŋana ŋinde kâ. 5 Aku taine ŋalae, kala ŋine naŋa ano pano tu ma kupaveta kuku ŋgua tukuŋa ŋine; kinda rârâni taitu-taitu ma tininda mwasa ndo panzi tininda pinde. Naŋa aŋgere ŋgua tukuŋa wasaseki toŋge imâ pano, ande tia. Muŋgani, lâ nia ndoyo, kinda takai ŋgua tukuŋa ŋinde lâ. 6 Ambo tini-mwasa ne vetâŋa ŋinde ma ikeno kaika pa kinda, ande kinda ma tapono muli pa Maro Kindeni ne tukuŋa rârâni. Nia ndoyo, aku imâ lee ipâŋga lâ zo ŋine, ande miki kaloŋo i ne tukuŋa ndainani nâ tu kinda ma tininda mwasa ndo panzi tininda pinde.
Kinzi laŋeŋa tamâta nenzi mâsi kilala
7 Kinzi laŋeŋa tamwatanzi rârâ nde silâ sikura nia ndoni lâ tâno kulu, aku sitogo tu silaŋe kinda. Kinzi nenzi kalo-tawana nde ikeno mine; “Yesu Kirisi nde koroani nâ, i ŋandai tamâta mao ŋga.” Kinzi tamâta mine nde laŋeŋa tamwatanzi, aku simo Yesu Kirisi ne kazâŋa tamâta. 8 Mine nde miki kapakatona sondo ŋga. Tia ma wurâta ŋinde miki uru kamakâsa ŋana kaveta kâ, ande ma kanaŋo tia. Ambo miki ma kamandi kaika, ande muli Maro Kindeni ma kulu ŋalae ilami, ipakura kuku nemi wurâta ŋinde. 9 Ambo tamâta toŋge ŋandai ipaveta sondo kuku Yesu Kirisi ne ŋgua, aku isoŋga ilâ wa imâ wa ŋana ikai ŋgua pinde kâ, ande Maro Kindeni ipaipa kuku tamâta ŋinde, ande tia. Aŋga tamâta ea kinzi uru sipaveta sondo kuku Yesu Kirisi kawa ŋgua, ande kinda Tamânda ku Natu rua sipaipa kunzi tamâta ŋinde. 10 Ambo tamâta toŋge ma imâ pami ku ipananami ŋana ŋgua pinde kâ, andeta ŋgua ŋinde ikeno piti lâ Yesu Kirisi kawa ŋgua ŋinde, ande miki ma kawami “kari ara” pa tamâta ŋinde wa kakai imâ imo kumi lâ nemi luma ilo, mine ndimo. 11 Tamâta ea kawa “kari ara” pa tamâta mine, ande ŋinde itogo ivila i ŋana ne wurâta sakamao ŋinde kâ.
Katonâŋa ilo ndo tu ma imoranzi
12 Naŋa iloŋgu tu aŋgere ŋgua rârâ imâ pami, andeta naŋa tiniŋgu pwâka tu ao ŋgua ŋinde lâ pepa tini. Naŋa iloŋgu tu naŋa warakâŋgu ma amâ amora miki. Ŋineŋga kinda ma takura tu taporo wa tapaloŋo wa, aku nenda ndekâŋa ma ipâŋga ŋalae ndo. 13 Maro Kindeni muŋgani ipatea noko tua taine pa i tamwata. Aku noko tua ŋinde natu wukale kawanzi kari ara pano.