Tɔnɔ kʋlʋ Pooli na pʋpʋnɩ o pa
TESALONIKI TIINƎ
o kɩ bɩle tɩn
Tɔnɔ kʋlʋ Pooli na pʋpʋnɩ o pa Tesaloniki tiinǝ o kɩ bɩle tɩn na brɩ dɩbam kʋlʋ tɩn mʋ tɩntʋ
Maŋa kam Pooli na pʋpʋnɩ tɔnɔ kʋm kʋntʋ o pa Wɛ nɔɔna balʋ na wʋ Tesaloniki nɩ tɩn, ba daa ta wʋ lwarɩ Zezi tum dɩm na lagɩ dɩ kɩ te tɩn fasɩ. Kʋntʋ ŋwaanɩ mʋ pɛ vuvugǝ jǝni ba kɔgɔ kʋm wʋnɩ. Nɔɔna badonnǝ dɛɛn bʋŋɩ nɩ Zezi tum dɩm maŋɩ dɩ ba dɩ kɛ mʋ. Badaara dɩ maa vɩn sɩ ba ta tʋŋɩ tɩtʋŋa Zezi tum dɩm na twɛ tɩn ŋwaanɩ, yɩ ba laan daarɩ ba kwe ba tɩtɩ ba palɩ nɔɔna badonnǝ baŋa nɩ. Pooli laan ma pʋpʋnɩ tɔnɔ kʋm kʋntʋ o pa-ba sɩ o maa kwe-ba.
O dɛ yigǝ o kɩ Wɛ le ba na jɩgɩ wʋ-dɩdʋa dɩ Wɛ yɩ ba jɩgɩ sono tɩn ŋwaanɩ, yɩ o loori Wɛ sɩ ba zɩgɩ kǝŋkǝŋ Wɛ tɩtʋŋa yam wʋnɩ (pɔɔrɩm 1).
O laan ma kwe-ba Zezi Krisi tum laŋa nɩ, o brɩ-ba nɩ wʋlʋ ba na bǝ nɩ kǝm-balwaarʋ tu tɩn maŋɩ sɩ o da yigǝ o ba mʋ, sɩ Krisi laan ba (2:1-12).
Pooli nan kwe Wɛ nɔɔna bam sɩ ba zɩgɩ kǝŋkǝŋ Wɛ cwǝŋǝ kam wʋnɩ, dɩ lwarɩm na maŋɩ dɩ puli zanzan yɩ cam yi-ba te tɩn dɩ, sɩ ba daarɩ ba taa warɩ Wɛ (2:13—3:5).
O ma kaanɩ yawɔrɩ-nyɩna bam sɩ ba taa tʋŋɩ ba ma naɩ ba ni-wʋdiu, nɩ Pooli dɩ balʋ dɛɛn na tɔgɩ dɩd-o ba tʋŋɩ Wɛ tɩtʋŋa yam tɩn na tʋŋɩ te tɩn (3:6-15).
1
1 Amʋ Pooli dɩdaanɩ Silasɩ dɩ Timoti mʋ pʋpʋnɩ tɔnɔ kʋntʋ sɩ dɩ́ pa abam Wɛ nɔɔna balʋ na wʋ Tesaloniki nɩ yɩ á yɩ dɩ́ Ko Baŋa-Wɛ dɩ dɩ́ Yuutu Zezi Krisi nɔɔna tɩn.
2 Dɩ́ Ko Wɛ dɩ dɩ́ Yuutu Zezi Krisi wʋ́ pa abam yazurǝ dɩ yu-yoŋo.
Tesaloniki tiinǝ na tɔgɩ Wɛ te tɩn
3 Dɩ́ ko-biǝ-ba, dɩ́ maŋɩ sɩ dɩ́ kɩ Wɛ le maŋa maama abam ŋwaanɩ nɩnɛɛnɩ kʋ na maŋɩ te tɩn, bɛŋwaanɩ á kɩ á wʋ-dɩdʋa dɩ Zezi kʋ ja gaalɩ, yɩ á maama tiini á soe daanɩ lanyɩranɩ, yɩ á sono kʋm wʋra kʋ puli zanzan. 4 Kʋntʋ ŋwaanɩ mʋ dɩ́ yǝni dɩ́ tɛ á taanɩ dɩ́ brɩ Zezi kɔgɔ kʋm na wʋ jǝgǝ kalʋ maama nɩ tɩn, yɩ dɩ́ jɩgɩ wʋpolo abam ŋwaanɩ. Dɩ́ tɛ dɩ ba nɩ, nɔɔna bɛɛsɩ abam yɩ ba yaarɩ abam zanzan, yɩ á daa ta zɩgɩ lanyɩranɩ dɩ pu-dɩa, yɩ á kwǝri á tɔgɩ Zezi dɩ wʋ-dɩdʋa.
5 Kʋntʋ mʋ pɛ dɩ́ lwarɩ jaja nɩ, Wɛ wʋ́ di nabiinǝ sarɩya dɩ cɩga mʋ. DƖ wʋ́ pa á na cɩga, yɩ á maŋɩ sɩ á tɔgɩ á wǝli DƖ paarɩ dɩm wʋnɩ, bɛŋwaanɩ abam sɩɩnɩ á na yaara Wɛ paarɩ dɩm kʋntʋ ŋwaanɩ. 6 Wɛ nan wʋ́ kɩ abam cɩga, yɩ DƖ wʋ́ pa balʋ na yaarɩ abam tɩn joori ba na cam. 7 DƖ ma wʋ́ daarɩ DƖ pa abam balʋ na yaarɩ tɩn dɩ dɩbam maama na siun, maŋa kalʋ dɩ́ Yuutu Zezi na wʋ́ joori o ba sɩ nabiinǝ maama na-o tɩn. Wʋntʋ wʋ́ nuŋi Wɛ-sɔŋɔ dɩ o malɛsɩ dɩdɛɛra bam, 8 yɩ min-vwɩ zaŋɩ sɩ kaagɩ-ba. Dɩ́ Yuutu Zezi wʋ́ pa balʋ na vɩn Wɛ yɩ ba wʋ sɛ wʋm kwǝr-ywǝŋǝ kam tɩn na cam. 9 Nɔɔna bam kʋntʋ wʋ́ na cam nɩ kʋ na maŋɩ dɩ ba te tɩn. Baá na lɛɛrʋ tɩlʋ na ba ti tɩn. Baá pɔɔrɩ-ba ba yɩra, yɩ ba taa baŋwɛ dɩ dɩ́ Yuutu wʋm, yɩ ba daa bá na o paarɩ dam-fɔrɔ zulǝ yam. 10 Kʋntʋ maama wʋ́ ba kʋ kɩ maŋa kalʋ dɩ́ Yuutu Zezi na wʋ́ joori o ba tɩn. Dɛ dɩm kʋntʋ nɩ, oó na zulǝ o tɩtɩ nɔɔna bam tee nɩ. Balʋ maama na kɩ ba wʋ-dɩdʋa dɩd-o tɩn wʋ́ pa-o tiǝ zanzan. Abam nan wʋ́ ta wʋ bantʋ wʋnɩ dɩ á na sɛ Wɛ cɩga kalʋ dɩ́ na brɩ abam tɩn ŋwaanɩ.
11 Kʋ yɩ kʋntʋ ŋwaanɩ mʋ dɩ́ yǝni dɩ́ loori dɩ́ Tu Wɛ maŋa maama dɩ́ pa abam, sɩ DƖ pa á maŋɩ dɩ DƖ cwǝŋǝ kam tɔgɩm, nɩ DƖ na kuri abam sɩ á taá yɩ te tɩn. Dɩ́ loori-DƖ sɩ DƖ pa abam dam, sɩ á wanɩ á kɩ lanyɩranɩ nɩnɛɛnɩ á wʋbʋŋa na lagɩ te tɩn maama, sɩ á taá kɩ tɩtʋŋa yalʋ maama na lana tɩn, á na kɩ á wʋ-dɩdʋa dɩ DƖ tɩn ŋwaanɩ. 12 Kʋntʋ mʋ wʋ́ pa dɩ́ Yuutu Zezi taa naɩ zulǝ abam tee nɩ, yɩ abam dɩ wʋ́ na zulǝ, dɩ́ Tu Baŋa-Wɛ dɩ dɩ́ Yuutu Zezi Krisi na pɛ abam yu-yoŋo tɩn ŋwaanɩ.