1 अच्‍युनुपतिवा, ख्‍यिराङ दी ताम्‍ङे ति नासाम तोङ! दाक्‍पी पगावा हङ्‍गावातिवाला कोन्‍छ्‍योककी मिश्र लुङ्‍बा नेसुर तेन्‍नी वुङ्‍गुप पेला तिवी गोमा गोमाला मुक्‍पा तङ्‍नी लाम छ्‍या तेन्‍सुङ। तिवा डोप पेला ग्‍येम्‍छो साङ फेका ङ्‍यी गल्‍नी तिवा डोप लाम पेतुप यिन। 2 तमा तिवा तेरी मोशाकी सिक्‍यावु खला ङ्‍येन्‍नी मुक्‍पा ताङ ग्‍येम्‍छो नाङ नेसुर युनी बप्‍तिस्‍मा च्‍युङ्‍सुङ। 3 ती पेला तिवा तेरीकी कोन्‍छ्‍योककी थु चाङ्‍मा नेमा नङ्‍गुप समा साङ च्‍यिक्‍पा राङ सोवु यिन। 4 तुक राङ क्‍यानी कोन्‍छ्‍योककी थु चाङ्‍मा नेमा नङ्‍गुप छ्‍यु साङ च्‍यिक्‍पा राङ थुसुङ। ती छ्‍यु ति दासा पाङ्‍थेरीकी लामला डोप पेला मुला राङ वोतुप कोन्‍छ्‍योककी थु चाङ्‍माकी दो ग्‍येर्पु नेमा थेन्‍दुप छ्‍यु यिन। ती छ्‍यु थेन्‍दुप दो ग्‍येर्पुकी तेन्‍दोक ति ख्रीष्‍ट यिन। 5 यिन्‍सिनाङ तिवी कोन्‍छ्‍योकला तेपा माक्‍यावु तप्‍की तिवा माङ्‍शोककी मुला खो गा माक्‍या। ती तप्‍की तिवा कनान लुङ्‍बा मालेपा क्‍यानी शिनी तिवी रोतिवा दासा पाङ्‍थेरीला थरा थुरा गाल्‍सुङ।

6 तीकी तेन्‍दोक ति तिवी दोके क्‍यानी दाक्‍पी साङ सेमला मेलोवा कितुप नासाम तोङ्‍गुप मेवी सिनी दाक्‍पी थोक्‍ला येन्‍देन बिन्‍दुप यिन। 7 तिवी पर्ला मिरा चोकी क्‍यावु दोके ख्‍यिराङ साङ कुला छ्‍यो मातोङ। कोन्‍छ्‍योककी सुङला दुक सिनी टि वे, “मीतिवा साप ताङ थुङ्‍गुपला देसुङ, तमा शम्‍डेन कितुप छाल्‍सुङ।”*१०:७ प्रस्‍थान ३२:६ 8 तिवी पर्ला मिरा चोकी शम्‍डेन क्‍यासुङ, यिने दाक्‍पु ति तुक कितुप मेवी। तिवी शम्‍डेन क्‍यावु तप्‍की ङ्‍यिमा च्‍यिकला राङ मिरा तोङ्‍डा खल ज्‍यिक ताङ सुम शिसुङ। 9 दाक्‍पी चोवो ख्रीष्‍टकी तेन्‍दोकला लङ्‍गुप मेङ्‍गिवी। तिवी पर्ला मिरा चोकी खोकी तेन्‍दोकला लावु तप्‍की रुलकी फेनी शिसुङ। 10 दाक्‍पु ति कोन्‍छ्‍योककी तेन्‍दोकला ङ्‍योशोक ङ्‍योशोक सिरुप मेङ्‍गिवी। तिवी पर्ला मिरा चोकी ङ्‍योशोक ङ्‍योशोक सिक्‍यावु तप्‍की कोन्‍छ्‍योककी देवाच्‍येनकी लेन क्‍योलुप थुतिवा ताङ्‍नी तिवाला ना तोङ च्‍यिसुङ। 11 तिवाला तुकै च्‍युङ्‍गुप ति दाक्‍पी थोक्‍ला येन्‍देन तेरुपला यिन। तमा ती ताम्‍ङेतिवा कोन्‍छ्‍योककी सुङला टिवु ति दाक्‍पुला च्‍याङ्‍से दे ज्‍यितुपला यिन। च्‍यिलासिसिन त याङ जम्‍बुलिङ ना डोप तुजे छे वे।

12 तुक क्‍यानी ख्‍यिराङ तेपा रम्‍बु वे सिनी सिरुपतिवा च्‍याङ्‍से क्‍यानी देता। मिसियाङ ख्‍यिराङ तला ग्‍यकितो। 13 ख्‍यिरा मिजीला खोक्‍पा ल्‍हाप ताम्‍ङेतिवा ख्‍येलुप पेला ती खोक्‍पा ल्‍हाप ताम्‍ङेतिवा ति मी यम्‍बाला साङ ख्‍येल्‍गिवी सिनी नासाम तोङ। कोन्‍छ्‍योक ति खोङ्‍तेर्मु वे, खोकी ख्‍यिराङला ख्‍यिरा अछ्‍योवु सिनाङ ल्‍हक्‍पा खोक्‍पा ल्‍हाप ताम्‍ङेला ख्‍येल मिज्‍यिवी। यिने खोक्‍पा ल्‍हाप ताम्‍ङे ख्‍येल वासिनाङ ती नेसुर थरुप लाम साङ नङ्‍गिवी। तुक क्‍यानी ख्‍यिराङ खोक्‍पा ल्‍हापला ख्‍येलुप पेला हम क्‍यानी दे थुप्‍किवी।

14 तुक क्‍यानी ङे ङ्‍यिङ्‍ज्‍येवु अच्‍युनुपतिवा, ख्‍यिराङ कुला छ्‍यो तोङ्‍गुप क्‍युर। 15 ख्‍यिराङ ति मी हाक्‍कोमु यिन। तुक क्‍यानी ख्‍यिराङ ङे सिक्‍यावु ताम्‍ङे ति यिन्‍दे मिन्‍दे सिनी ल्हो। 16 दाक्‍पु चोवोकी डेन साप पेला दाक्‍पुला मोलाम नङ्‍गुप कोरा नेमा थुनी ख्रीष्‍टकी दाक्‍पी थोक्‍ला तेन्‍दुप ठक नेसुर दाक्‍पु खो ताङ मुला तम्‍जी ल्‍यामु जोवु यिन। तमा शुब्‍ज्‍याङ च्‍याक्‍नी साप ति ख्रीष्‍टकी दाक्‍पी थोक्‍ला टुङ्‍गुप जु नेसुर दाक्‍पु खो ताङ मुला तम्‍जी ल्‍यामु जोवु तेन्‍दोक यिन। 17 दाक्‍पु बङी वोसिनाङ दाक्‍पी साप शुब्‍ज्‍याङ ति च्‍यिक राङ वोतुप तप्‍की दाक्‍पी जु ति च्‍यिक राङ यिन। च्‍यिलासिसिन दाक्‍पु तेरीकी शुब्‍ज्‍याङ च्‍यिक नेसुर मुला राङ सेवी।

18 इस्राएलकी मिरिकतिवाला नासाम तोङ। कोन्‍छ्‍योककी थोक्‍ला जिन्‍बा पुलुप श साप ति जिन्‍बा बुलुप मीतिवी मुला दला शुकुप यिन। 19 कुला पुलुप समातिवा काङ यिन रो? कुतिवा काङ यिन रो? 20 तिवा काङ साङ मिन। ङे सिक्‍यावु ताम्‍ङे ति काङ यिन सिसिन, कोन्‍छ्‍योकला ङो माशेवु मीतिवी कुला छ्‍यो तोङ्‍गुप ति कोन्‍छ्‍योकला मोवा क्‍यावु मिन, यिने र्‍हेन्‍डीला जिन्‍बा पुलुप यिन। तुक क्‍यानी ख्‍यिरा साङ र्‍हेन्‍डीला जिन्‍बा बुलुप मीतिवी दला शुकुप ति ङला गा मलङ्‍गिवी। 21 ख्‍यिराङ ति चोवोकी डेन साप पेला वानी चोवोकी कोरा नेमा थुङ्‍गुप ताङ येलुङ गल्‍नी र्‍हेन्‍डीला मोवा कितुपला र्‍हेन्‍डीकी कोरा नेमा थुङ्‍गुप मेङ्‍गिवी। तुक क्‍यानी चोवोकी डेन सोसिमा येलुङ गल्‍नी र्‍हेन्‍डीकी डेन साप साङ मेङ्‍गिवी। 22 काङ ख्‍यिराङ चोवो येशूला ङ्‍यिर्मु लोङ्‍गिवी? काङ खो दाक्‍पु सिनाङ ओङ छ्‍येवु मे रो?

23 मी ललाइकी “मीतिवी काङ क्‍यासिनाङ गिवी।” सिनी सिवी, यिने ती तेरी ताम्‍ङे ति ख्‍येप्‍साङ वोतुप ति मिन। तमा “मीतिवी काङ क्‍यासिनाङ गिवी।” सिनी सिवी, यिने तेरी ताम्‍ङे ति मी यम्‍बाला ख्‍येप्‍साङ मे। 24 सी साङ खोरो थोक्‍ला तिराङ ख्‍येप्‍साङ माछोल, यिने मी यम्‍बी थोक्‍ला साङ ख्‍येप्‍साङ वुङ्‍गुप लाका किशी। 25 श चोङ्‍गुप दासाला गल्‍नी श ङ्‍योप पेला ख्‍योरो सेम लोदिवुला ती श ति कुला पुलुप यिनाङ मिन सिनी काङ साङ माटिवा क्‍यानी ङ्‍योनी सोवा। तुक क्‍यासिन ख्‍योरो सेम ति लो दिकिवी। 26 च्‍यिलासिसिन “जम्‍बुलिङ ताङ जम्‍बुलिङला वोतुप तेरी च्‍यालकतिवा कोन्‍छ्‍योककी राङ जो नङ्‍गुप यिन।” सिनी कोन्‍छ्‍योककी सुङला टि वे।*१०:२६ भजन २४:१

27 दोजो कोन्‍छ्‍योकला ङो माशेवु मी मिरा च्‍यिककी ख्‍यिराङला डेनला कतोङ्‍गुप पेला ख्‍यिराङला डोप नो वोसिन तिवी बिन्‍दुप समा ति काङ साङ माटिवा क्‍यानी सो। तुक क्‍यासिन ख्‍योरो सेम ति लो दिकिवी। 28 यिने ललाइकी दी याङ कुला पुलुप समा यिन सिक्‍यासिन तुक सिरुप मी तीकी थोक्‍ला ताङ तीकी सेम ज्‍योकुपला ती पुलुप समा ति मासा। 29 ङे तुक सिक्‍यावु ति ख्‍योरो थोक्‍ला मिन, यिने ख्‍युरुङला दी ति कुला पुलुप समा यिन सिरुप मी तीकी सेम ज्‍योकुपला सिक्‍यावु यिन। तुक क्‍यासिन ङ ति मी यम्‍बी सेम ज्‍योकुपला च्‍यिला ङला गा लङ्‍गुप लाका कि मुथुपी? 30 दोजो ङे कोन्‍छ्‍योकला थुचिछे पुल्‍नी समा सोसिन ती समा सोवु तप्‍की मीतिवी ङला च्‍यिला मेलोक्‍पा जोप्‍जा?

31 तुक क्‍यानी ख्‍यिराङ सोसिनाङ थुसिनाङ काङ क्‍यासिनाङ ती तेरी कोन्‍छ्‍योककी मोवाकी थोक्‍ला किसा। 32 यिने यहूदीतिवाला ताङ ग्रीककी मीतिवाला ताङ कोन्‍छ्‍योकला तेपा कितुप चर्चकी मीतिवा सुला साङ दुक्‍पा ख्‍येलुप लाका ति माकिसा। 33 तुक राङ क्‍यानी ङे साङ काङ क्‍यासिनाङ मी तेरीला सेम गा लोङ्‍गुप नो क्‍यायी। ङ ङरा थोक्‍ला तिराङ मिन, यिने मी तेरीला ल्‍यामु च्‍युङ्‍शी सिरुप नो कितिन। तुक क्‍यानी ती मीतिवा साङ दिक्‍पा ने थर्शी।