1 येशू ति दिक्‍पा ने थर ज्‍यितुप ख्रीष्‍ट राङ यिन सिनी तेपा कितुपतिवा तेरी कोन्‍छ्‍योककी पुज्‍युङपुम यिन। सी पपाला ङ्‍यिङ्‍ज्‍ये किवे, तीकी खोकी पुज्‍युङला साङ ङ्‍यिङ्‍ज्‍ये किवी। 2 दाक्‍पु कोन्‍छ्‍योकला ङ्‍यिङ्‍ज्‍ये कितुप ताङ खोकी कला ङ्‍येन्‍गिवी सिसिन ती नेसुर कोन्‍छ्‍योककी गिपाला दाक्‍पी ङ्‍यिङ्‍ज्‍ये किवी सिरुप ति हाक्‍कोकिवी। 3 कोन्‍छ्‍योककी कला ङ्‍येन्‍दुप ति दाक्‍पी खोला ङ्‍यिङ्‍ज्‍ये क्‍यावु यिन। खोकी कतिवा ङ्‍येन्‍दुप ति कले मे। 4 च्‍यिलासिसिन कोन्‍छ्‍योककी पुज्‍युङपुमतिवा तेरीकी जम्‍बुलिङकी खला ग्‍येल्‍गिवी, जम्‍बुलिङकी खला ग्‍येलुप ति दाक्‍पी कोन्‍छ्‍योकला तेपा क्‍यानी यिन। 5 जम्‍बुलिङला ग्‍येलुप ति सु यिन सिसिन, येशू ति कोन्‍छ्‍योककी सेवु यिन सिनी तेपा कितुप तिराङ जम्‍बुलिङला ग्‍येलुप यिन।

6 ती येशू ति छ्‍यु ताङ ठक नेमा फेवु यिन।*५:६ तीकी तेन्‍दोक ति खोकी बप्‍तिस्‍मा लासुङ, ग्‍यङ्‍शिङला टुङ्‍नी मी दिक्‍पी थोक्‍ला ठक तेन्‍दुप यिन सिनी सिक्‍यावु यिन। छ्‍यु तिराङ मिन, छ्‍यु ताङ ठक नेसुर फेवु यिन। पङ्‍बु तेरुप ति कोन्‍छ्‍योककी थु चाङ्‍मा यिन, च्‍यिलासिसिन कोन्‍छ्‍योककी थु चाङ्‍मा ति टेङ्‍बु वे। 7 पङ्‍बु तेरुप ति सुम चोके वे। 8 तीकी तेन्‍दोक ति थु चाङ्‍मा ताङ छ्‍यु ताङ ठक यिन। दिवा सुम ति च्‍यिक्‍पा राङ यिन। 9 दोजो दाक्‍पु मी पङ्‍बु बिन्‍दुप ताम्‍ङेला साङ सेमला लिङ्‍गिवी सिसिन, कोन्‍छ्‍योककी पङ्‍बु याङ छासे चोछ्‍ये वे। च्‍यिलासिसिन ती पङ्‍बु ति कोन्‍छ्‍योक नेमा वोवु यिन। ती ति खोकी सेवु येशूकी कोर्ला नङ्‍गुप यिन। 10 सी कोन्‍छ्‍योककी सेवुला तेपा किवे, तीकी सेमला ति पङ्‍बु ज्‍यकुप गिवी। यिने कोन्‍छ्‍योककी सेवुला तेपा मिकिवु तीकी खोला मेटेङ्‍बु जोवु गिवी। च्‍यिलासिसिन कोन्‍छ्‍योककी खोरे सेवुकी कोर्ला पङ्‍बु नङ्‍गुप ताम्‍ङेला तीकी तेपा मिकिवी। 11 पङ्‍बु ति दी राङ यिन, कोन्‍छ्‍योककी दाक्‍पुला नाम्‍साङ मिशिवु मिजी नाङ्‍सुङ। ती मिजी ति खोकी सेवु येशूकी मुला वे। 12 सी ति खोकी सेवु येशू ताङ मुला तम्‍जी ल्‍यामु नोके, तीकी मुला मिजी साङ वे। तमा खोकी सेवु ताङ मुला तम्‍जी ल्‍यामु मेतुप तीकी मुला मिजी साङ मे।

13 दी यिकी ति ख्‍यिराङ कोन्‍छ्‍योककी सेवु येशूला तेपा कितुपतिवाला नाम्‍साङ मिशिवु मिजी थोप्‍शी सिनी हाक्‍को ज्‍यितुपला ङे टिवु यिनो। 14 दाक्‍पी कोन्‍छ्‍योकला रेवा क्‍यावु ति काङ यिन सिसिन, खोकी नोवाला काङ लङ्‍सिनाङ खोकी दाक्‍पुला नङ्‍गिवी सिरुप ति दाक्‍पुला तेन्‍तेन वे। 15 तुक क्‍यानी दाक्‍पी मोपोर क्‍यानी काङ लङ्‍सिनाङ कोन्‍छ्‍योककी सेन्‍गिवी सिरुप ति दाक्‍पुला छ्‍या वोतुप तप्‍की दाक्‍पी खोला काङ लाङ्‍वे, ती ति ङ्‍येनिङ वे सिनी तेन्‍तेन गिवी।

16 सी साङ यम्‍बा नुपकी दिक्‍पा कितुप थोङ्‍सुङ, यिने ती दिक्‍पा ति ङ्‍येलाला क्‍योलुप दिक्‍पा मिन्‍सिन, तीकी तिवी थोक्‍ला कोन्‍छ्‍योकला मोपोर कि गोकिवी। तीकी क्‍यावु दिक्‍पा ति ङ्‍येलाला क्‍योलुप दोके मेसिन कोन्‍छ्‍योककी तीला मिजी नङ्‍गिवी। यिने ङ्‍येलाला क्‍योलुप दिक्‍पा साङ वे। तीकी थोक्‍ला ति ङ सुला साङ गोङ्‍बा शु सिनी मिसिर। 17 टेङ्‍बु मेतुपतिवा तेरी दिक्‍पा यिन। यिने ललाइ दिक्‍पा साङ गिवी, तीकी ङ्‍येलाला मोक्‍योल्‍वी। 18 कोन्‍छ्‍योककी पुज्‍युङपुमतिवा सी साङ दिक्‍पा क्‍या क्‍यावा मेदेवी। तिवाला खोकी सेवुकी राङ नरी र्‍होकिवी। तमा दुक्‍टाकी साङ तिवाला ना तोङ मुथुपी। 19 दाक्‍पु ति कोन्‍छ्‍योककी पुज्‍युङपुमतिवा यिन सिनी दाक्‍पुला छ्‍या वे। यिने दी जम्‍बुलिङ ति तेरी दुक्‍टाकी ओङला शोर्नी वे। 20 दाक्‍पुला छ्‍या वोतुप ति काङ यिन सिसिन, कोन्‍छ्‍योककी सेवु दी जम्‍बुलिङला फेप्‍नी दाक्‍पी खोला ङो शेवु रिक्‍पा नङ्‍सुङ। तुक क्‍यानी खो टेङ्‍बु यिन सिरुप ति दाक्‍पी हाक्‍कोकिवी। तमा खो ताङ मुला दाक्‍पी तम्‍जी ल्‍यामु वे, खोकी सेवु येशू ख्रीष्‍टकी मुला साङ तम्‍जी ल्‍यामु वोतुप हाक्‍कोकिवी। ती येशू ख्रीष्‍ट ति टेङ्‍बु वोतुप कोन्‍छ्‍योक यिन। खोकी दाक्‍पुला नाम्‍साङ मिशिवु मिजी नङ्‍गिवी।

21 ङे आङातिवा, ख्‍यिराङ दाक दाक्‍पुला कुतिवा नेसुर र्‍होक्‍नी देता।