1 ङ ख्‍यिरा चिप्‍ला वोतुप पेला ज्‍यिवा क्‍यानी ताम्‍ङे कि मुथुपी, यिने थाक्‍रिङ्‍बु वोतुप पेला ति ख्‍यिरा थोक्‍ला ङाडेङ क्‍यानी ताम्‍ङे किवी सिनी ख्‍यिरा ङला सिवी। ङ पावल ति ख्रीष्‍टकी दोके कुसु ज्‍यम्‍बु ताङ च्‍यम्‍बा क्‍यानी ख्‍यिराङला ठाकुरे सिरिन। 2 ङ ख्‍यिरा ते वुङ्‍गुप पेला ङ्‍यिराङ ति जम्‍बुलिङकी मीतिवी दोके किताङ नालु किनोक सिनी सिरुप मीतिवाला छासे ङाडेङ क्‍यानी ताम्‍ङे किवी। ती पेला ख्‍यिराङला साङ तिवाला दोके क्‍यानी ङाडेङ क्‍यानी सि मोगोशिता। 3 ङ्‍यिराङ दी जम्‍बुलिङला देकिवी, यिने जम्‍बुलिङकी मीतिवी दोके खोरो तेन्‍दोकला लङ्‍गुप मीतिवी मुला थमु मग्‍यकिवी। 4 ङ्‍यिरा थमु ग्‍यकुप लक्‍च्‍येतिवा ति दी जम्‍बुलिङकी दोके मिन, यिने कोन्‍छ्‍योककी ङार यिन। तीकी कोन्‍छ्‍योककी तेन्‍दोकला लङ्‍गुप दुक्‍टाकी ओङ्‍ज्‍येनतिवा तेरी ना तोङ्‍गिवी, तमा तेन्‍दोक मेतुप खाँदा लोङ्‍गुप ताम्‍ङेतिवा साङ ना तोङ्‍गिवी। 5 तमा ङ्‍यिराङ कोन्‍छ्‍योककी रिक्‍पाकी तेन्‍दोकला लङ्‍गुप ङ राङ यिन सिरुप ताम्‍ङेतिवा तेरी ना तोङ्‍गिवी। तमा ती तेरी नोवातिवाला खोकी ओङला ज्‍याक्‍नी ख्रीष्‍टकी कला ङ्‍येन्‍दुप जेवी। 6 ख्‍यिरा ख्रीष्‍टकी कतिवा तेरी ङ्‍येन्‍दुप छे सिन्‍सिमा खोकी कला मेङ्‍येन्‍दुपतिवा तेरीला ङ्‍यिराङ ठिम कितुपला टडिक क्‍यानी देतिनो।

7 ख्‍यिराङ मीला ल्‍हाप पेला फिला तिराङ ल्‍हेवी। दोजो ललाइकी ङ ख्रीष्‍टकी मी यिन सिवी सिसिन, तीकी ख्रीष्‍टकी मी यिन्‍दुप दोके ङ्‍यिराङ साङ ख्रीष्‍टकी मी राङ यिन सिनी नासाम तोङ्‍शी। 8 च्‍यिलासिसिन चोवो येशूकी ङ्‍यिराङला चो ओङ्‍ज्‍येन नङ वे, तीकी कोर्ला ङे ल्‍हक्‍पा तेके क्‍यासिनाङ ङ तीकी थोक्‍ला ङोछा मिकी। ती ओङ्‍ज्‍येन ति ख्‍यिराङला ना तोङ्‍गुपला मिन, ख्‍यिरा तेपा रम्‍बु जोपला नङ्‍गुप यिन। 9 ङे ख्‍यिराङला टिनी तङ्‍गुप दी यिकीतिवा ति ख्‍यिराङला ज्‍यिवा कुतुपला टिवु यिन सिनी नो माकी। 10 मी ललाइकी याङ ङ्‍यिराङला “ख्‍यिराङ यिकीतिवा टिकुप पेला ति च्‍युरुवु ताङ छासे रम्‍बु किवी, यिने ङ्‍यिरा चिप्‍ला वोतुप पेला ति रम्‍बु मेतुप ताङ तेन्‍दोक मेतुप ताम्‍ङे तिराङ किवी।” सिनी सिवी। 11 तुक सिरुप मीतिवी दी ताम्‍ङे ति हाक्‍कोशी। ङ्‍यिराङ ख्‍यिरा मुला मेतुप पेला दी यिकी नाङ्‍ला काङ सिक्‍यावे, ङ्‍यिराङ ख्‍यिरा मुला वोतुप पेला काङ क्‍यावे, ती ति च्‍यिक्‍पा राङ यिन।

12 ङ्‍यिराङ खुरुङ तिराङ ङराङ यिन सिनी नासाम तोङ्‍गुप ललाइ मीतिवी मुला च्‍यिक्‍पा राङ च्‍युङ्‍गुप ताङ तिवी मुला डिक्‍नी माल्‍हावी। तिवा खोप्‍रे नासामला तिराङ मी यम्‍बाला ठिम कितुप ताङ मी यम्‍बाला डिक्‍नी ल्‍हेवी सिसिन, तिवा छासे अम्‍बारङ्‍शिङ च्‍युङ्‍गिवी। 13 यिने ङ्‍यिराङ याङ ङ्‍यिरा सि गोवु ताम्‍ङेला मिसिन पङगी ताम्‍ङेला तेके मिकिवी। कोन्‍छ्‍योककी ङ्‍यिराङला चो सेक ओङ्‍ज्‍येन नङ वे, ती ताम्‍ङेला तिराङ तेके किवी। ङ्‍यिरा ख्‍यिराङला कोन्‍छ्‍योककी सुङ ख्‍याप्‍टाक क्‍यावु लाका साङ ती ओङ्‍ज्‍येनला राङ क्‍यावु यिन। 14 ङ्‍यिराङ ख्‍यिरा ते वुङ्‍गुप ति ती ओङ्‍ज्‍येनला वोतुप दोके यिन, ङ्‍यिरा राङ तेके क्‍यावु ति मिन। च्‍यिलासिसिन ख्रीष्‍टकी लेन ल्‍यामु ख्‍याप्‍टाक कितुपला गोमाला ख्‍यिरा ते वुङ्‍गुप ति ङ्‍यिराङ राङ यिन। 15 ङ्‍यिराङ ती ओङ्‍ज्‍येनला वोतुप सिनाङ ताम्‍ङे ल्‍हक्‍पा जोनी मी यम्‍बी क्‍यावु लाकाला तेके मिकी, यिने ख्‍यिराङ मङ मङ तेपा कियी गल्‍नी ङ्‍यिरा कोन्‍छ्‍योककी सुङ ख्‍याप्‍टाक कितुप लाका साङ ख्‍यिरा नाङ्‍ला मङ ल्‍हक्‍पा फर्नी डिवी सिरुप ति ङ्‍यिरा रेवा यिन। 16 तुक क्‍यानी ङ्‍यिराङ फर्नी गल्‍नी सी साङ कोन्‍छ्‍योककी सुङ ख्‍याप्‍टाक माक्यावु दासा यम्‍बातिवाला गल्‍नी सुङ ख्‍याप्‍टाक किवी। ङ्‍यिराङ मी यम्‍बी क्‍यावु लाकाला तेके कितुप गा मालङ्‍गिवी। 17 कोन्‍छ्‍योककी सुङला दुक सिनी टि वे, “तेके कितुपतिवा कोन्‍छ्‍योककी कोर्ला राङ तेके किशी।”*१०:१७ यर्मिया ९:२४ 18 सी साङ खुरुङ ति ङराङ यिन सिनी छ्‍ये मोडोवी, यिने चोवोकी ल्‍यामु यिन सिनी चिवु मी तिराङ मी ल्‍यामु च्‍युङ्‍गिवी।