3
मोशाकी ठिम याङ्ना तेपा
1 ओ गलातीकी मी अम्बारङ्शिङतिवा, ख्यिराङला सी लुसुङ? येशू ख्रीष्ट ग्यङ्शिङला कलुप ति ख्यिरा मिककी राङ थोङ्गुप मिन? 2 ङ ख्यिराङला ताम्ङे यी टेयिन। ती ति काङ यिन सिसिन, ख्यिरा कोन्छ्योककी थु चाङ्मा ति मोशाकी ठिमकी लाका क्यानी थोपुप यिन की, कोन्छ्योककी सुङला तेपा क्यानी थोपुप यिन? 3 च्यिला ख्यिराङ दुका अम्बारङ्शिङ कितुप नोकिवी? ख्यिरा गोमाला खोकी थु चाङ्मा नेसुर मिजी सम्बा थोपुप गो चुसुङ, यिने तन्दा रङगी लाका ल्यामु क्यानी ती मिजी थोपुप छोलिन वे। 4 काङ गोमाला ख्यिरा छेटाङ दुङल खुरुप ति तेर्मे गल रो? वुतुङ के तेर्मेला गाल्सुङ रो? 5 दी ख्यिरा मिजीला वोतुप खोकी थु चाङ्माकी लाका ताङ हलेवु लाका ति ख्यिरा मोशाकी ठिमला तेन्नी थोपुप यिन की, येशू ख्रीष्टकी लेन ल्यामुला थोनी तेपा क्यानी थोपुप यिन?
6 अब्राहामकी मिजीला ल्हो, तीकी कोन्छ्योकला तेपा क्यावु तप्की तीला खोकी टेङ्बु वोतुप मी यिन सिनी सेमला लावु यिन।*३:६ उत्पत्ति १५:६ 7 तुक क्यानी सी खोला तेपा किवे, तिवा तेरी अब्राहामकी गिपातिवा यिन सिनी हाक्को गोकिवी। 8 खोकी सुङला खोरे राङ यहूदी मिन्दुप मिरिक यम्बाकी मीतिवाला तिवी क्यावु तेपा नेसुर टेङ्बु च्युङ्गुप ति गोमाला के हाक्कोसिमा “ख्युरुङ नेसुर राङ तेरी गिपातिवाला मोलाम थोप्किवी।” सिनी अब्राहामला गोमाला के सुङ्नी वे।*३:८ उत्पत्ति १२:३ 9 तुक क्यानी खोकी अब्राहामला मोलाम नङ्गुप दोके तेपा कितुपतिवा तेरीला साङ अब्राहाम ताङ मुला राङ मोलाम नङ्गिवी।
10 तमा मोशाकी ठिमला तिराङ तेन्नी टेङ्बु च्युङ्गुप छोलुपतिवा तेरीला पर्च्या फोकिवी। च्यिलासिसिन कोन्छ्योककी सुङला दुक सिनी टि वे, “मोशाकी ठिमला वोतुप क तेरीला नरी मेङ्येन्दुप मीतिवाला पर्च्या फोकिवी।”*३:१० व्यवस्था २७:२६ 11 दी तेरी ल्हानी काङ हाक्कोकिवी सिसिन, कोन्छ्योककी थोङ्दाङला मीतिवा सु साङ ठिमला तेन्नी टेङ्बु च्युङ मुथुपी, च्यिलासिसिन “टेङ्बु ति तेपा क्यानी तिराङ च्युङ थुप्किवी।” सिनी सुङला टि वे।*३:११ हबकूक २:४ 12 यिने मोशाकी ठिम तेन्दुप ति तेपा कितुप नेसुर वुङ्गुप मिन। बोरु कोन्छ्योककी सुङला दुक सुङ्नी वे, “मोशाकी ठिमला वोतुप क तेरी तेन्दुप मीतिवा टेङ्बु च्युङ थुप्किवी।”*३:१२ लेवी १८:५ 13 ख्रीष्टकी ग्यङ्शिङला कल्नी दाक्पी थोक्ला पर्च्या खुर्नी दाक्पुला मोशाकी ठिम तेरी मातेन्नी वुङ्गुप पर्च्या ने र्होक्सुङ। च्यिलासिसिन ग्यङ्शिङला कलुप ति तेरी पर्च्या फोकुप यिन सिनी सुङला टि वे।*३:१३ व्यवस्था २१:२३ 14 ख्रीष्टकी तुक क्यावु तेन्दोक ति अब्राहामला बिन्दुप मोलाम ति यहूदी मिन्दुप मिरिक यम्बाकी मीतिवाला ङ्ये थुप्शी, तमा दाक्पुला ति तेपा क्यासिमा कोन्छ्योककी थाक्छ्येन नङ्गुप थु चाङ्मा ङ्ये थुप्शी सिनी यिन।
मोशाकी ठिम ताङ थाक्छ्येतुप ताम्ङे
15 अच्युनुपतिवा, ङे सिक्यावु ताम्ङे ति ख्यिरा हाक्कोशी सिनी ख्यिराङला मीतिवी पे नेसुर लापिन। थेङ्मा यी थाक्छ्येनी यिकीला सही क्यासिमा तीला सी साङ मिन सिनी सि मुथुपी, तमा ताम्ङे ल्हक्पा ज्याक्नी टिक साङ मुथुपी। 16 कोन्छ्योककी अब्राहाम ताङ तीकी गिपाला थाक्छ्येन नङ्गुप पेला “ख्योरो गिपातिवाला” सिनी मी बङीला मासुङ, यिने “ख्योरो गिपा च्यिक राङला” सिनी सुङ्नी वे। ती च्यिक राङ वोतुप गिपा ति ख्रीष्ट यिन।*३:१६ उत्पत्ति १२:७ 17 ङे सिक्यावु ताम्ङे ति काङ यिन सिसिन, कोन्छ्योककी थेङ्मा यी अब्राहाम ताङ मुला थाक्छ्येन नङ्गुप ताम्ङेला लो सयी ज्यी ताङ खल सुम ज्युक्ला जोवु मोशाकी टिवु ठिमकी क्युर्नी मोज्योकिवी। 18 च्यिलासिसिन कोन्छ्योक नेसुर मोलाम थोपुप गिपा च्युङ्गुप ति मोशाकी ठिम नेसुर वावु यिन्सिन, खोकी थाक्छ्येन नङ्गुप ति काङगी तेन्दोक राङ मेवी, यिने खोकी थाक्छ्येन नङ्गुप नेसुर अब्राहामला गिपा च्युङ्गुप मोलाम नाङ्सुङ।
19 तुकै यिन्सिन दी मोशाकी ठिम ति च्यिला बिन्दुप यिनाङ? ती ति कोन्छ्योककी थाक्छ्येन नङ्गुप गिपा वुङ्दा सेक दिक्पा छ्या देन्दुपला जो नङ्गुप यिन। ती मोशाकी ठिम ति देवाच्येनकी लेन क्योलुप थुतिवा नेसुर खोकी मोशाला नङ्गुप यिन। तमा ती ति मोशाकी मीतिवाला बिन्दुप यिन। 20 यिने खोकी अब्राहामला थाक्छ्येन नङ्गुप ति मी यम्बी लक नेसुर मिन्दाला खोकी राङ नाङ्सुङ।
21 तुकै यिन्सिन काङ मोशाकी ठिम ति कोन्छ्योककी थाक्छ्येन नङ्गुप ताम्ङेला मिडिकिवी? तुकै मिन। मोशाकी ठिमकी दाक्पुला मिजी सम्बा तेर थुपुप यिन्सिन दाक्पु ति मोशाकी ठिमला देनी राङ टेङ्बु च्युङ थुपुप ति यिन्जा। 22 यिने कोन्छ्योककी सुङला “जम्बुलिङकी मीतिवा तेरी दिक्पी ओङला वे।” सिनी वे। तुक क्यानी येशू ख्रीष्टला तेपा कितुप मीतिवाला तिराङ खोकी थाक्छ्येवु ताम्ङे ति थोप्किवी।
23 येशू ख्रीष्ट फेप्सिमा खोला तेपा माक्यावा सेक दाक्पु ति मोशाकी ठिमकी ओङला ज्याक्नी वे। 24 तुक क्यानी मोशाकी ठिम ति दाक्पु येशूला तेपा क्यानी टेङ्बु माच्युङा सेक दाक्पुला गोमा कितुप गेकेन दोके यिन। 25 यिने त दाक्पी येशूला तेपा क्यावु तप्की दाक्पुला गेकेन दोके गोमा कितुप मोशाकी ठिम ति मोगोवी।
दाक्पु कोन्छ्योककी पेजातिवा
26 तमा ख्रीष्ट येशूला तेपा क्यावु तप्की ख्यिराङ तेरी कोन्छ्योककी पेजातिवा यिन। 27 च्यिलासिसिन ख्यिराङ तेरी येशूकी मुला बप्तिस्मा लानी खो मुला राङ सेम च्यिक्पा राङ च्युङ्नी वे। 28 तुक क्यानी कोन्छ्योककी थोङ्दाङला ख्यिरा नाङ्ला काङ ख्ये मे, यहूदी साङ मिन, ग्रीककी मी साङ मिन। योक्पु साङ मिन, ज्यिन्दाक साङ मिन। पुम्पेजा साङ मिन, ख्योक्पेजा साङ मिन। येशू ख्रीष्टला तेपा क्यासिमा ख्यिराङ तेरी च्यिक्पा राङ यिन। 29 ख्यिराङ ख्रीष्टकी ति यिन्सिन अब्राहामकी गिपा यिन, तमा कोन्छ्योककी थाक्छ्येन नङ्गुप अंश थोप छ्योवु पुज्युङ यिन।