11
कोन्छ्योककी गिपाकी क्यावु तेपाकी कोर्ला
1 कोन्छ्योकला तेपा कितुप सिक्यावु ति दाक्पी रेवा क्यावु ताम्ङेला खोकी नङ्गिवी सिनी तेन्तेन कितुप ताङ माथोङ्गुप ताम्ङेला वे सिनी हाक्कोवा कितुप यिन। 2 दाक्पी हङ्गावातिवी साङ कोन्छ्योकला तेपा क्यावु तप्की खोकी तिवाला सेमला गाल।
3 तेपा नेसुर राङ दी जम्बुलिङ ति कोन्छ्योककी सुङगी ज्येवु यिन। तमा दाक्पी थोङ्गुप च्यालक ति मोथोङ्गुप च्यालक नेसुर च्युङ्गुप यिन सिरुप ति हाक्कोकिवी।
4 तेपा नेसुर राङ हाबिलकी कयिनकी सिनाङ मङ कोन्छ्योकला सेमला डोप जिन्बा पुल्सुङ। ती तेपा नेसुर राङ हाविल ति कोन्छ्योककी थोङ्दाङला टेङ्बु वे सिनी खोकी गा लासुङ। च्यिलासिसिन तीकी पुलुप जिन्बा खोला सेमला लासुङ। हाविल शिनी गल्सिनाङ तीकी तेपा नेसुर तरोङ साङ दाक्पुला येन्देन ङ्येकिवी।
5 तेपा नेसुर राङ हनोक माशी वोतुप पेला राङ देवाच्येनला तेक्नी गाल्सुङ। कोन्छ्योककी तीला तेक्नी फेपुप तप्की ती ति कनिवा साङ माङ्ये। च्यिलासिसिन खोकी तीला तेक्नी फेपुप सिनाङ गोमाला तीकी खोला सेमला डोप लाका क्यावु पङ्बु च्युङ्सुङ। 6 यिने कोन्छ्योकला तेपा माक्यासिन सी साङ खोला गा लोङ मुथुपी। सु खोकी चाला वुङ्गिवे, तीकी कोन्छ्योक ज्यु वोतुप ताङ खोला छोलुपतिवाला खोकी छ्यक्तक नङ्गिवी सिनी तेपा कि गोकिवी।
7 तेपा नेसुर राङ नोआकी ती पेला सेक नाम्साङ माथोङ्गुप शोतोक ग्येर्पु ग्यकुपकी कोर्ला कोन्छ्योककी तीला सुङ्गुप ति ङ्येन्नी खोला मोवा कियी सिरा टु ग्येर्पु च्यिक जोनी खोरो मिछाङतिवाला र्होक्सुङ। तीकी तुका तेपा क्यानी जम्बुलिङकी मीतिवाला क्येन वोतुप ति छ्या तेन्सुङ। तमा खुरुङ ति तेपा क्यानी कोन्छ्योककी थोङ्दाङला टेङ्बु वोतुप च्युङ्सुङ। ती मोलाम ति कोन्छ्योकला तेपा कितुप मी तेरीला थोप्किवी।
8 तेपा नेसुर राङ अब्राहामला कोन्छ्योककी कताङ नङ्गुप पेला तीकी खोकी सुङला ङ्येन्नी खुरुङ कनी डोयी वे सिरुप ति छ्या मेसिनाङ खोकी ग्युक सिनी सुङ्गुप दासाला गाल्सुङ। ती दासा ति कोन्छ्योककी ज्युक्ला तीला तेरिन सिनी थाक्छ्येतुप दासा यिन। 9 तेपा नेसुर राङ अब्राहाम छ्यिग्यपकी मी दोके कोन्छ्योककी थाक्छ्येन नङ्गुप लुङ्बाला गल्नी कुर ग्यप्नी देसुङ। तुक राङ क्यानी कोन्छ्योककी अब्राहामला दोके ती दासा ति तेरिन सिनी इसहाक ताङ याकूबला थाक्छ्येन नङ्गुप तप्की तिवा साङ ते मुला राङ देसुङ। 10 च्यिलासिसिन अब्राहामकी नरी लुवु खासा वोतुप ग्येसाकी थोक्ला रेवा क्यानी गु देनोक। ती ग्येसाकी थोक्ला नासाम तोङ्गुप ताङ जो नङ्गुप ति कोन्छ्योक राङ यिन।
11 तेपा नेसुर राङ अब्राहामकी कोन्छ्योककी थाक्छ्येन नङ्गुप ति तेरी क्या नङ्गिवी सिनी लो तेन्दुप तप्की तीकी पेर्मी सारा मिजी गानी आङा मुच्युङ्गुप वोसिनाङ आङा च्युङ्सुङ। 12 तुक क्यानी शेप दोके वोतुप मिरा च्यिक नेसुर गिपातिवा नामगी कर्मा दोके मङ्मु ताङ ग्येम्छो गारीकी पेमा दोके ङो मुथुपुप क्यानी छासे फेल्सुङ।
13 ती तेरी मीतिवा कोन्छ्योककी थाक्छ्येन नङ्गुप ति माङ्येवाला राङ तेपा क्यानी शिसुङ। यिन्सिनाङ तिवी कोन्छ्योककी थाक्छ्येन नङ्गुप ति ङ्यिम्ज्यिक ङ्येकिवी सिनी तेपा क्यानी तिवी सेमला गा लासुङ। तमा दी जम्बुलिङला दाक्पु ति छ्यिग्यपकी मी ताङ मिमेलुङ्दुङ दोके यिनोक सिरुप ति पङ्बु बिन्सुङ। 14 खोप्राङला छ्यिग्यपकी मी यिन सिनी सिरुप मीतिवा खोप्रे लुङ्बा च्यिक वे, ती लुङ्बाला देतुप ङ्येकिवी सिनी लाम ल्हानी देतुप ति हाक्कोकिवी। 15 तिवी खोप्राङ थेन्नी वावु लुङ्बाकी थोक्ला नासाम तङ्गुप यिन्सियाङ तिवा लोङ गल्नी ती लुङ्बाला राङ दे थुपुप्जा। 16 बोरु तिवी याङ ती सिनाङ मङ ल्यामु वोतुप देवाच्येनकी ग्येल्खापकी कोर्ला छासे नो क्यासुङ। तुक क्यानी कोन्छ्योककी तिवाला “ङ तिवी कोन्छ्योक यिन।” सिनी सुङ्गुपला ङोछा मिकिवी। वुतुङ के खोकी तिवी थोक्ला ग्येसा च्यिक टडिक क्यानी ज्याङ नङ्नी वे।
17 तेपा नेसुर राङ अब्राहामला कोन्छ्योककी खोक्पा ल्हाप पेला खोरो पुज्युङ इसहाक ति जिन्बा ताङ्सुङ। ती इसहाक ति कोन्छ्योककी अब्राहामला थाक्छ्येतुप नेसुर नङ्गुप च्यिक राङ वोतुप पुज्युङ यिन्सिनाङ तीकी कोन्छ्योककी थोक्ला सेनी जिन्बा तोङ्गुपला टडिक क्यासुङ। 18 कोन्छ्योककी गोमाला अब्राहामला, “इसहाक नेसुर राङ ख्योरो गिपातिवा फेल्गितो।”*११:१८ उत्पत्ति २१:१२ सिनी थाक्छ्येन नाङ्सुङ। 19 इसहाक शिसिनाङ कोन्छ्योककी तीला सेन्बु लोङ थुप्किवी सिरुप ति अब्राहामला तेपा नोक। तमा वुतुङ के इसहाकला शेप ने सेन्बु लङ्गुप दोके येलुङ ङ्येसुङ।
20 तेपा नेसुर राङ इसहाककी खोरो पुज्युङ याकूब ताङ एसावला ज्युक्थमाला वुङ्गुप ताम्ङेकी थोक्ला मोलाम बिन्सुङ।
21 तेपा नेसुर राङ याकूबकी खुरुङ शेप पेला योसेफकी पुज्युङतिवा रे रेला मोलाम ग्यप्सुङ। तमा तीकी खोरो पेर्का चुनी राङ कोन्छ्योकला सोवा तेक्सुङ।*११:२१ उत्पत्ति ४७:३१ 22 तेपा नेसुर राङ योसेफकी खुरुङ शितुछ्येप पेला ङ्यिम्ज्यिक कोन्छ्योककी इस्राएल मीतिवाला मिश्र लुङ्बा नेसुर तेन्नी टि डोप कोर्ला ताम्ङे क्यासुङ। तमा खोरो रुच्ये ति चुक कि गोकिवी सिरुप कोर्ला साङ क बिन्सुङ।
23 तेपा नेसुर राङ मोशाकी पपाआमातिवी मोशा क्येप पेला ती ति ल सुम सेक बानी ज्याक्सुङ। च्यिलासिसिन तिवी मोशा ति छासे ल्यामु वोतुप थोङ्सुङ, तमा ग्येल्वी बिन्दुप कला साङ तिवा ज्यिवा माक्या। 24 तेपा नेसुर राङ मोशा नाज्युङ गल्सिमा तीकी खुरुङला ग्येल्वु फारोकी पुमकी पुज्युङ यिन सिनी मीतिवी सिक्यावु ति तीकी गा माक्या। 25 बोरु दिक्पा क्यानी चेयी पर सेक तिराङ किर्मु कितुप सिनाङ कोन्छ्योककी पेतुप मीतिवी मुला दुक्पा खुरुप राङ मङ ल्यामु यिन सिनी नोक्यासुङ। 26 तीकी मिश्रला वोतुप नोर ताङ टोङ्बा सिनाङ ख्रीष्टकी थोक्ला मारे गल्नी देतुप ति छासे गोङ नावु यिन सिनी नो क्यानोक। च्यिलासिसिन तीकी कोन्छ्योककी नङ्गुप छ्यक्तककी थोक्ला लाम ल्हानी देसुङ। 27 तेपा नेसुर राङ मोशाकी मिश्रकी ग्येल्वु ङि्यर्मु लानी वोसिनाङ ज्यिवा माक्यानी ती लुङ्बा क्युर ज्याक्नी गाल्नोक। तमा तीकी मोथोङ्गुप कोन्छ्योकला साङ थोङ्गुप दोके हम क्यानी देसुङ। 28 तेपा नेसुर राङ मोशाकी इस्राएलकी मीतिवाला खाङ्बी गे लो लोला लुक रुककी ठक ति कुनी थरुप तुछ्येन तेन गोकिवी सिनी क बिन्सुङ। तुक क्यासिन गोमाला क्येवु पुज्युङ छ्येतिवा सेतुपला वुङ्गुप तीकी इस्राएलकी मीतिवी नाङ ने गोमाला क्येवु पुज्युङ छ्येतिवाला काङ साङ कि मुथुप्नोक।
29 तेपा नेसुर राङ ग्येम्छो परकी स कम्बुला युवु दोके क्यानी इस्राएलकी मीतिवा ग्येम्छो मर्वु शानी गाल्सुङ। यिने मिश्रीतिवा ती ग्येम्छो शकुप छोलुप पेला तेरी ग्येम्छोला नुम्नी शिसुङ। 30 तेपा नेसुर राङ इस्राएलकी मीतिवा ङ्यिमा दिन सेक यरीहो ग्येसाकी गारी गुरीला वोतुप च्यारी ग्येर्पु तीकी फिला कोरा ग्यप्सिमा ती च्यारी ति राम्सुङ। 31 तेपा नेसुर राङ राहाब छ्येमु तीकी यरीहोला च च्येतुपला वावु मीतिवाला ल्यामु क्यानी गासो शुवु तप्की कोन्छ्योककी सुङला मेङ्येन्दुप ती ग्येसाकी मीतिवा तेरी सेसिनाङ तीला ति मासे।
32 त दी सिनाङ ल्हक्पा याङ ङ काङ सिरुप? च्यिलासिसिन गिदोन ताङ बाराक ताङ शिमशोन ताङ यिप्ता ताङ दाऊद ताङ शमूएल ताङ कोन्छ्योककी लुङ्तेम्बातिवी कोर्ला सिरुपला ङे मुला तुजे मे। 33 तेपा नेसुर राङ तिवी लुङ्बा यम्बा ताङ मुला मक ग्यप्नी ग्येल्सुङ, ठिम टेङ्बु क्यानी ग्येला क्यासुङ, कोन्छ्योककी थाक्छ्येन नङ्गुप साङ थोप्सुङ, तिवी सेङ्गीकी ख साङ उप्सुङ, 34 बरुप मेतिवा साङ नाल्सुङ, खुर्पाकी ख नेसुर साङ थार्सुङ, ङ्येर्मे वोसिनाङ ग्यामु गाल्सुङ, मक ग्यकुपला साङ छासे ङार छ्येवु च्युङ्सुङ, तमा छ्यिग्यप लुङ्बी मक्मीतिवाला साङ तिवी शर्नी ताङ्सुङ। 35 तुक राङ क्यानी तेपा नेसुर राङ ललाइ पुम्पेजातिवी खोप्रे शेप मिछाङतिवा शेप ने सेन्बु लावु थोङ्सुङ। यिने यम्बा ललाइकी शिसिमा मङ मिजी ल्यामु थोप्शी सिनी चोन्खाङला शोरुप ने थेन्दुप साङ माङ्येन्नी चो पाङ्शर तङ्सिनाङ छेटाङ खुर्सुङ। 36 तमा यम्बा ललाइला ति मीतिवी मर्च्या कितुप ताङ तल्ज्येक थ्वोनी दुसुङ। तमा यम्बा ललाइला ति च्याटोक ग्यप्नी चोन्खाङला उप्सुङ। 37 तमा यम्बा ललाइला ति दो पोप्नी सेसुङ, ललाइला सोक्ली थ्वोनी टेनी फेका ङ्यी जोनोक। तुक राङ क्यानी ललाइला ति खुर्पा थ्वोनी सेसुङ, ललाइ ति पेराङ्बु गल्नी दुक्पा खुरिन ताङ पाङ्शर तोङ्गुप ताङ लुक ताङ रे क्वा कोन्नी फार ताङ छुर युनी दे गोसुङ। 38 दी जम्बुलिङ मेलोक्पा ति ती मीतिवी थोक्ला दे छ्योवु मिन्दुक। तमा तिवा दासा पाङ्थेरी ताङ टक ताङ फुक ताङ से वोक्ला वोतुप मुक्तुमतिवी नाङ्ला यिप्नी युक गोसुङ।
39 तिवा तेरीकी कोन्छ्योकला तेपा क्यावु तप्की खोकी तिवाला गा क्यासुङ। यिन्सिनाङ खोकी थाक्छ्येन नङ्गुप ति तिवाला माथोप, 40 च्यिलासिसिन खोकी दाक्पी थोक्ला ती सिनाङ खक्छ्येवु ताम्ङे ल्यामु यी टडिक क्यानी वे। खोकी नोवा ति काङ यिन सिसिन तिवा साङ दाक्पी मुला राङ तेरी दिक्पा ने थर्नी खोकी चिप्ला डोप ङ्येशी सिरुप यिन।