यूहन्‍नाकी टिवु लेन ल्‍यामु
दी थेपकी कोर्ला
दी थेप ति यूहन्‍नाकी टिवु कोन्‍छ्‍योककी लेन ल्‍यामु यिन। दी लेन ल्‍यामुला येशू नाम्‍साङ मिशिवु मिजी तेरुप सुङ यिन, खो मी जुजमला फेप्‍नी दाक्पी पर्ला ज्‍युसुङ, तमा खो दिक्‍पा ने थर्वा नङ्‍गुप कोन्‍छ्‍योककी थाक्‍छ्‍येतुप सेवु यिन सिनी टि वे। दी लेन ल्‍यामु रोकुपतिवी येशूला तुकै राङ तेपा किशी, ती तेपा नेसुर तिवाला नाम्‍साङ मिशिवु मिजी थोप्‍शी सिनी दी लेन ल्‍यामु टिवु यिन (२०:३१)।
कोन्‍छ्‍योककी सुङ ताङ येशू ति च्‍यिक्‍पा राङ यिन। दी लेन ल्‍यामुकी लोप्‍च्‍येन थल्‍माला खोकी क्‍या नङ्‍गुप हलेवु लाकातिवी कोर्ला सिवी। ती ताम्‍ङेकी येशू कोन्‍छ्‍योककी सेवु राङ यिन, तमा थाक्‍छ्‍येतुप दिक्‍पा ने थर्वा नङ्‍गुप यिन सिरुप ति ठछ्‍येली हाक्‍कोकिवी। खोकी क्‍या नङ्‍गुप हलेवु लाकातिवा खोकी नङ्‍गुप टोङ्‍गुतिवा नेसुर हाक्‍कोकिवी। लोप्‍च्‍येन तङ्‍बुला ल्‍हासिन चुक क्‍यानी ललाइ मीतिवा येशूला तेपा क्‍यानी खोकी लोमा च्‍युङ्‍सुङ, तमा यम्‍बातिवी खोकी तेन्‍दोकला लानी खोला तेपा माक्‍या सिरुप कोर्ला सिक्‍या वे। लोप्‍च्‍येन च्‍युक्‍सुम नेज्‍युनी च्‍युप्‍दिन सेक येशूकी खोरुङला डतिवी जिम्‍बुप नुपला लोमातिवी मुला डिक्‍जोम क्‍या नङ्‍गुप ताङ ग्‍यङ्‍शिङला कल्‍नी टुङ्‍गुप सिनाङ गोमाला खोकी लोमातिवाला ङाडेङ तेरुप सुङ नङ्‍गुप कोर्ला टि वे। तमा तिङ्‍मी लोप्‍च्‍येनतिवाला ति येशूला डतिवी जिम्‍बुप ताङ खोला खोक्‍पा ल्‍हावु ताङ खो ग्‍यङ्‍शिङला कल्‍नी टुङ्‍सिमा येलुङ टुङ्‍गुप ने ङोसु लावु ज्‍युक्‍ला खो खोरे लोमातिवी चाला छ्‍यरुप कोर्ला सिक्‍या वे।
नाम्‍साङ मिशिवु मिजी थोपुप कटिन ति येशू ख्रीष्‍ट नेसुर गिवी। ती कटिन ति येशूला लाम टेङ्‍बु ताङ मिजी नङ्‍गुप यिन सिनी तेपा कितुपतिवाला थोप्‍किवी। दी लेन ल्‍यामुला ताम्‍ङे हलेवु ति कोन्‍छ्‍योककी थु चाङ्‍माकी कोर्ला हाक्‍को ज्‍यितुपला छ्‍यु, शुब्‍ज्‍याङ, वोसिर, गोठाला ताङ लुक, गुन्‍डुम दोङ्‍बु ताङ तीकी डेलुकी पे नेसुर ताम्‍ङे ङ्‍याम्छ्‍युङला डिकुप पेतिवा सिक्‍या वे।
मुला राङ वोतुप लोप्‍च्‍येनतिवा
थल्‍माकी कोर्ला १:१-१८
बप्‍तिस्‍मा तेरुप यूहन्‍ना ताङ येशूकी लोमा १:१९-५१
येशूकी कनी साङ सुङ ख्‍याप्‍टाक क्‍या नङ्‍गुप २:१–१२:५०
येशूकी यरूशलेम गारी गुरीला ख्‍योवु तिङ्‍मी ङ्‍यिमातिवा १३:१–१९:४२
येशू टुङ्‍गुप ने ङोसु लावु ताङ लोमातिवी चाला छ्‍यरुप २०:१-३१
खो येलुङ गालीलला छ्‍यरुप २१:१-२५
1
कोन्‍छ्‍योककी सुङ मी जुजमला फेवु
थल्‍माला जम्‍बुलिङ ज्‍येङ्‍गुप सिनाङ गोमाला कोन्‍छ्‍योककी सुङ नोक, ती सुङ ति कोन्‍छ्‍योककी मुला नोक। तमा ती सुङ ति वुतुङ के कोन्‍छ्‍योक राङ यिनोक। ती सुङ ति थल्‍मा नेज्‍यु कोन्‍छ्‍योककी मुला नोक। तमा ती सुङ नेसुर राङ कोन्‍छ्‍योककी तेरी जम्‍बुलिङ ज्‍ये नाङ्‍सुङ, ज्‍येवु ति च्‍यिक साङ खोकी मिसिन माजोवु यिन। खोरे ज्‍ये नङ्‍गुपतिवा तेरीकी ती सुङ नेसुर मिजी थोप्‍सुङ, ती मिजी ति मीतिवी वोसिर यिनोक। ती वोसिर ति नक्‍तोमी वुङ्‍ला ग्‍यकिनोक, यिने ती नक्‍तोमीकी ती वोसिरला हाक्‍को माथुप।
तमा कोन्‍छ्‍योककी तङ्‍गुप मी मिरा च्‍यिक नोक, तीकी मिङ ति यूहन्‍ना यिनोक। तीकी ती वोसिरकी कोर्ला पङ्‍बु तेरुप ताङ ती पङ्‍बु नेसुर तेरी मीतिवी ती वोसिरला तेपा किशी सिनी वावु यिन। ती ति खुरुङ राङ वोसिर मिन, यिने ती वोसिरकी कोर्ला पङ्‍बु तेरुपला तिराङ वावु यिन। तमा मीतिवा तेरीला ठछ्‍येली तेरुप ती वोसिर टेङ्‍बु ति जम्‍बुलिङला फेपिन नोक। 10 खो ति जम्‍बुलिङला राङ ज्‍युनोक, तमा दी जम्‍बुलिङ ति खोकी राङ ज्‍ये नाङ्‍सुङ, यिन्‍सिनाङ जम्‍बुलिङकी मीतिवी खोला ङो माशेनोक। 11 खो खोरे लुङ्‍बाला फेप्‍सुङ, यिने खोरे मीतिवी राङ खोला सेमला माला। 12 यिने सु सुकी खोला खोरो सेमला लानी खोला तेपा क्‍यावे, खोकी तिवाला कोन्‍छ्‍योककी पुज्‍युङपुम च्‍युङ्‍गुप ओङ्‍ज्‍येन नाङ्‍सुङ। 13 तमा तिवा ति मीकी ठक याङ्‍ना सेम नोजु याङ्‍ना मीकी नोवा नेसुर क्‍येवु मिन, यिने कोन्‍छ्‍योककी नोवा नेमा क्‍येवु यिन।
14 तमा ती सुङ ति मी जुजमला दाक्‍पी पर्ला ज्‍युसुङ। खोकी मोवा ङ्‍यिरा थोङ्‍सुङ, तमा ती मोवा ति कोन्‍छ्‍योककी च्‍यिक राङ वोतुप खोकी सेवुकी मोवा यिनोक। खो ति छासे कटिन ताङ टेङ्‍बुकी क्‍येङ नोक। 15 यूहन्‍नाकी खोकी कोर्ला थोर ग्‍यप्‍नी दुक सिनी मीतिवाला पङ्‍बु बिन्‍सुङ, “दी मी तीकी कोर्ला ‘ङ सिनाङ ज्‍युक्‍ला मिरा च्‍यिक फेप्‍कितो, खो ति ङ सिनाङ चोछ्‍ये वे, च्‍यिलासिसिन खो ति ङ क्‍येप सिनाङ गोमाला के ज्‍युनोक।’ सिनी ङे सिक्‍यावु ति खो राङ यिन।” 16 खोकी छाछिङी नेमा दाक्‍पुला नरीकी नरी कटिन मङ्‍मु थोप्‍नी वे। 17 कोन्‍छ्‍योककी ठिम ति मोशा नेमा राङ ङ्‍येतुप यिन, यिने कटिन ताङ टेङ्‍बु ति येशू ख्रीष्‍ट नेमा वावु यिन। 18 सी साङ नाम्‍साङ कोन्‍छ्‍योकला माथोङ वे। यिने पपा कोन्‍छ्‍योककी मुला च्‍यिक राङ वोतुप खोकी सेवुकी कोन्‍छ्‍योक सु यिन सिरुप ति दाक्‍पुला छ्‍या तेन्‍सुङ।
बप्‍तिस्‍मा तेरुप यूहन्‍नाकी पङ्‍बु बिन्‍दुप
(मत्ती ३:१-१२; मर्कूस १:१-८; लूका ३:१-१८)
19 यहूदीतिवी यरूशलेम नेसुर कोङ्‍यार छ्‍येतिवा ताङ लेवीतिवाला यूहन्‍नाकी चाला ताङ्‍नी तीला “ख्‍युरुङ सु यिन?” सिनी टि च्‍यिसुङ। 20 तमा यूहन्‍नाकी ताम्‍ङे माबावा क्‍यानी, “ङ ति ख्रीष्‍ट* १:२० ख्रीष्‍ट ति हिब्रू ताम्‍ङेला मसीह यिन। मिन।” सिनी टेङ्‍बो सिक्‍यासुङ। 21 तमा तिवी तीला “तुकै यिन्‍सिन ख्‍युरुङ सु यिन? ख्‍युरुङ एलिया यिन?” सिनी टिसुङ। तीकी “मिन।” सिनी सिक्‍यासुङ। येलुङ तिवी “ख्‍युरुङ कोन्‍छ्‍योककी लुङ्‍तेम्‍बा यिन?” सिनी टिसुङ। तमा तीकी “मिन।” सिनी सिक्‍यासुङ। 22 तमा येलुङ तिवी तीला “तुकै यिन्‍सिन ख्‍युरुङ सु यिन ङ्‍यिराङला सी। ङ्‍यिराङला टि तोङ्‍गुपतिवाला ङि्‍यरा टिलेन तेर गोकिवी। ख्‍युरुङ खुरुङला सु यिन सिनी सिवी?” सिनी टिसुङ। 23 तमा यूहन्‍नाकी कोन्‍छ्‍योककी लुङ्‍तेम्‍बा यशैयाकी सिक्‍यावु दोके “ङ ति दासा पाङ्‍थेरीला ‘चोवो फेवुकी थोक्‍ला लाम थेकाङ जो।’ सिनी थोर ग्‍यकुप वोरु यिन।” सिनी सिक्‍यासुङ।
24 यूहन्‍नाला ताम्‍ङे टेपला फरिसीतिवी तङ्‍गुपतिवी पर्ला ललाइकी येलुङ यूहन्‍नाला 25 “दोजो ख्‍युरुङ ख्रीष्‍ट साङ मिन, एलिया साङ मिन, कोन्‍छ्‍योककी लुङ्‍तेम्‍बा साङ मिन्‍सिन ख्‍योरो च्‍यिला मीतिवाला बप्‍तिस्‍मा बिन्‍दुप यिन?” सिनी टिसुङ। 26 तमा यूहन्‍नाकी “ङ याङ छ्‍यु थ्‍वोनी बप्‍तिस्‍मा तेरुप यिन। यिने ख्‍यिरा पर्ला मी मिरा च्‍यिक टङी लानी वे, खो सु यिन सिनी ख्‍यिरा ङो राङ मेशेवी। 27 खो ङे ज्‍युक्‍ला फेपुप यिन, यिन्‍सिनाङ ङ याङ खोकी शप्‍चेकी र्‍हाम्‍डोक डोलुप साङ पोमु मे।” सिनी सिक्‍यासुङ। 28 दी तेरी ताम्‍ङे ति यूहन्‍नाकी बप्‍तिस्‍मा बिन्‍दुप यर्दन चङ्‍बी फर्केन बेथानियाला च्‍युङ्‍गुप यिन।
कोन्‍छ्‍योककी लुक रुक येशू
29 ती सला तीला यूहन्‍नाकी येशू खोरो चाला फेपिन कितुप थोङ्‍नी, “ल्‍हो ताङ, जम्‍बुलिङ तेरीकी मीतिवाला दिक्‍पा ने थर ज्‍यितुप कोन्‍छ्‍योककी लुक रुक! 30 गोमाला ङे, ‘ङ सिनाङ ज्‍युक्‍ला मी मिरा च्‍यिक फेप्‍किवी। खो ङ सिनाङ छ्‍ये वे, च्‍यिलासिसिन खो ङ क्‍येवु सिनाङ गोमाला के ज्‍यु वोतुप यिन।’ सिनी सिक्‍यावु ति खो राङ यिन। 31 खो सु यिन सिनी ङे साङ ङो माशे, यिने ङ छ्‍यु थ्‍वोनी मीतिवाला बप्‍तिस्‍मा तेरुप ति इस्राएलकी मीतिवाला खो सु यिन सिनी ङो शे ज्‍यितुपला यिन।” सिनी सिक्‍यासुङ। 32 येलुङ यूहन्‍नाकी दुक सिनी पङ्‍बु बिन्‍सुङ, “देवाच्‍येन नेमा कोन्‍छ्‍योककी थु चाङ्‍मा ति गम्‍देर दोके क्‍यानी पाप्‍नी खोकी खला ज्‍यु वोतुप ति ङे थोङ्‍सुङ। 33 ङे साङ खोला ङो माशे, यिने छ्‍यु थ्‍वोनी बप्‍तिस्‍मा तेरुपला ङला तङ्‍गुप तीकी ‘चुका मी तीकी खला कोन्‍छ्‍योककी थु चाङ्‍मा पाप्‍नी ज्‍यु वोतुप ख्‍योरो थोङ्‍गिवे, ती ति कोन्‍छ्‍योककी थु चाङ्‍मा नेमा बप्‍तिस्‍मा नङ्‍गुप मी यिन सिनी ख्‍योरो हाक्‍कोकितो।’ सिनी ङला सुङ्‍सुङ। 34 ती ताम्‍ङे ति ङे थोङ्‍सुङ, तुक क्‍यानी खो ति कोन्‍छ्‍योककी सेवु यिन सिनी ङे पङ्‍बु बिनिन।”
येशूकी लोमा तङ्‍बुतिवा
35 ती सला तीला येलुङ यूहन्‍ना ति खोरो लोमा मिरा ङ्‍यीकी मुला लानी देन वोतुप पेला 36 येशू तिवी चा नेसुर फेपिन कितुप थोङ्‍नी तीकी “ल्‍हो ताङ, कोन्‍छ्‍योककी लुक रुक ति दी राङ यिन!” सिनी सिक्‍यासुङ। 37 यूहन्‍नाकी तुक सिक्‍यासिमा तीकी मुला वोतुप खोरो लोमा मिरा ङ्‍यी येशूकी तिङ्‍ला तिङ्‍यासुङ। 38 ती थोङ्‍सिमा येशू तिवी थाकाला ग्‍युर्नी, “ख्‍यिराङ काङ छोल्‍गिवी?” सिनी टिन नाङ्‍सुङ। तमा तिवी खोला “रब्‍बी, कनी ज्‍युकिवी?” सिनी सिक्‍यासुङ। (दी रब्‍बी सिक्‍यावु तेन्‍दोक ति गेकेन यिन।) 39 खोकी तिवाला “ख्‍यिराङ शोक, तमा ख्‍यिरा थोङ्‍गिवी।” सिनी सुङ्‍सुङ। तमा तिवा खोकी मुला राङ गल्‍नी खो ज्‍युवु दासा ति ल्‍हानी ती छेर्मु ते राङ शासा देसुङ। ती पेला ति गोमी छ्‍युजी ज्‍यी चोयी गाल्‍नोक। 40 यूहन्‍नाकी ताम्‍ङे थोनी येशूकी तिङ्‍ला तिङ्‍योकुप मिरा ङ्‍यीकी पर्ला मिरा च्‍यिक ति सिमोन पत्रुसकी नुप अन्‍द्रियास नोक। 41 तीकी येशूला ठेसिमा तेरी सिनाङ गोमाला खोरो उज्‍यु सिमोनकी चाला गल्‍नी, “ङ्‍यिरा याङ मसीहला ठेसुङ।” सिनी सिक्‍यासुङ। (ती मसीह सिक्‍यावु तेन्‍दोक ति ख्रीष्‍ट यिन।) 42 तमा तीकी खोरो उज्‍यु सिमोनला येशूकी चाला टिनी वासुङ। सिमोनला थोङ्‍नी येशूकी तीला “ख्‍युरुङ ति योआनेसकी पुज्‍युङ सिमोन यिन, यिने त याङ ख्‍युरुङला केफास सिनी मिङ ज्‍योकितो।” सिनी सुङ्‍सुङ। (केफासकी ग्रीक ताम्‍ङे ति पत्रुस यिन।) १:४२ केफास (आराम ताम्‍ङे) ताङ पत्रुस (ग्रीक ताम्‍ङे) तेन्‍दोक ति ‘दो रम्‍बु’ यिन।
येशूकी फिलिप ताङ नथानेलला कतङ्‍गुप
43 ती सला तीला येशू गालील लुङ्‍बाला फेपुप सिनी तेन्‍तेन क्‍यासुङ। ती पेला खोकी फिलिप सिरुप मी यीला ठेनी तीला “ङे तिङ्‍ला तिङ्‍यो।” सिनी सुङ्‍सुङ। 44 ती फिलिप ति अन्‍द्रियास ताङ पत्रुसकी युल बेथसेदा ग्‍येसाकी मी यिनोक। 45 तमा फिलिप तीकी नथानेलला ठेनी, “मोशाकी कोन्‍छ्‍योककी सुङला टिवु ताङ कोन्‍छ्‍योककी लुङ्‍तेम्‍बातिवी टिवु ती मी तीला ङ्‍यिरा ठेसुङ। खो याङ नासरत नेसुर फेवु योसेफकी पुज्‍युङ येशू के यिनोक।” सिनी सिक्‍यासुङ। 46 तमा ती थोनी नथानेलकी फिलिपला “नासरत नेसुर काङ ल्‍यामु वुङ थुप्‍किवी रो?” सिनी सिक्‍यासुङ। यिने फिलिपकी “वानी ल्हो ताङ।” सिनी सिक्‍यासुङ।
47 तमा नाथनेल ति खोरो चाला वुङ्‍यिन कितुप थोङ्‍नी येशूकी तीला “ल्‍हो ताङ, ती ति वुतुङ के टेङ्‍बु वोतुप इस्राएलकी मी यिनोक। तीकी मुला काङ साङ जिनोक मे।” सिनी सुङ्‍सुङ। 48 तमा नथानेलकी येशूला “गेकेनकी ङला चुक क्‍यानी ङो शेसुङ?” सिनी टिसुङ। तमा येशूकी तीला “फिलिपकी ख्‍युरुङला कतोङ्‍गुप सिनाङ गोमाला के ङे ख्‍युरुङला अन्‍जीरकी दोङ्‍बी वोक्‍ला वोतुप थोङ्‍सुङ।” सिनी सुङ्‍सुङ। 49 तमा नथानेलकी येशूला “रब्‍बी, रब्‍बी याङ कोन्‍छ्‍योककी सेवु के यिन, तमा इस्राएलकी ग्‍येल्‍वु के यिनोक।” सिनी सिक्‍यासुङ। 50 तमा येशूकी तीला सुङ्‍सुङ, “काङ ङे ख्‍युरुङला अन्‍जीरकी दोङ्‍बी वोक्‍ला वोतुप थोङ्‍सुङ सिनी सिक्‍यावु तप्‍की ख्‍योरो ङला तेपा क्‍यावु यिन? ख्‍योरो दी सिनाङ मङ हलेवु लाकातिवा थोङ्‍गितो।” 51 तमा येशूकी तीला “वुतुङ के ङ ख्‍युरुङला टेङ्‍बो सिरिन, ख्‍योरो देवाच्‍येन सेङ्‍गुप ताङ देवाच्‍येनकी लेन क्‍योलुप थुतिवा ङ मी पुज्‍युङकी खला येर जेकुप ताङ मर पपुप थोङ्‍गितो।” सिनी सुङ्‍सुङ।

*1:20 १:२० ख्रीष्‍ट ति हिब्रू ताम्‍ङेला मसीह यिन।

1:42 १:४२ केफास (आराम ताम्‍ङे) ताङ पत्रुस (ग्रीक ताम्‍ङे) तेन्‍दोक ति ‘दो रम्‍बु’ यिन।