1 ती ज्‍युक्‍ला येशू गालील ग्‍येम्‍छोकी फर्केन फेप्‍सुङ। ती ग्‍येम्‍छोला ति तिबेरियास ग्‍येम्‍छो साङ सिनोक। 2 ते मी माङ्‍छ्‍योककी खोकी तिङ्‍ला तिङ्‍यासुङ, च्‍यिलासिसिन खोकी नेर्पुतिवाला टेक च्‍यितुप हलेवु ततिवा तिवी थोङ्‍नोक। 3 तमा येशू खोकी लोमातिवी मुला येर पम्‍दोकला जेनी ते राङ ज्‍युसुङ। 4 ती पेला यहूदीतिवी थरुप तुछ्‍येन वुङ्‍ला के नोक।

5 येशूकी मी माङ्‍छ्‍योक खोकी चिप्‍ला वुङ्‍यिन कितुप थोङ्‍नी खोरो लोमा फिलिपला “दाक्‍पु दी मीतिवा तेरीला तेरुपला कनी नेसुर शुब्‍ज्‍याङ ङ्‍योप्‍जा?” सिनी टि नाङ्‍सुङ। 6 खोकी फिलिपला सेम ल्‍हापला तिराङ तुक सुङ्‍नोक, च्‍यिलासिसिन खोकी काङ कितुप छल वे, ती ति वुतुङ के खोला राङ छ्‍या नोक। 7 तमा फिलिपकी “दिवा तेरीला चे चेयी राङ स ज्‍यितुपला साङ ङुलकी डप्‍बु सयी ङ्‍यीकी*६:७ ङुलकी डप्‍बु च्‍यिक ति मी मिरा च्‍यिककी ङ्‍यिम्‍ज्‍ियक लाका क्‍यावु ल यिन। शुब्‍ज्‍याङ ङ्‍योसिनाङ मलङ्‍गिवी।” सिनी खोला सिक्‍यासुङ। 8 ती पेला येशूकी लोमातिवी पर्ला सिमोन पत्रुसकी नुप अन्‍द्रियास तीकी येशूला दुक सिक्‍यासुङ, 9 “दे पेजा यीकी लोला जौकी शुब्‍ज्‍याङ ङ चोके ताङ ङ्‍या ङ्‍यी चोके वे, यिने दोजोयीकी याङ दोजो मी मङ्‍मुला कङगी लङ्‍गुप्‍जा?” सिनी सिक्‍यासुङ। 10 तमा येशूकी “मीतिवाला दे च्‍यी।” सिनी लोमातिवाला सुङ्‍सुङ। ते च बङी वोतुप दिङ्‍मा नोक, तमा मीतिवा तेरी ती दिङ्‍माला देसुङ। ते तो मिसिन ख्‍योक्‍पेजा मिरा तोङ्‍डा ङ नोक। 11 तमा येशूकी ती शुब्‍ज्‍याङ ति लानी कोन्‍छ्‍योकला थुचिछे पुल्‍सिमा ते देतुप मीतिवा तेरीला गोनी तेर च्‍यिसुङ। तुक राङ क्‍यानी ङ्‍या साङ तिवा तेरीला डाता सेक गोनी तेर च्‍यिसुङ। 12 मीतिवी डाता सेक सो सिन्‍सिमा येशूकी लोमातिवाला “ल्‍हकुप पुर्मातिवा तेरी रु, तिवा च्‍यिक साङ माक्‍युर।” सिनी सुङ्‍सुङ। 13 तमा तिवी जौकी शुब्‍ज्‍याङ ङ नेमा मीतिवी सोसिमा ल्‍हकुप पुर्मातिवा रुसुङ, तमा ती पुर्मातिवा ति तोलुम च्‍यिङ्‍ङी नाङ्‍ला क्‍येङ्‍सुङ। 14 खोकी क्‍या नङ्‍गुप हलेवु लाका थोङ्‍नी मीतिवी “खो याङ वुतुङ के जम्‍बुलिङला फेप्‍किवी सिनी सिक्‍यावु कोन्‍छ्‍योककी लुङ्‍तेम्‍बा यिनोक।” सिनी सिक्‍यासुङ। 15 तमा येशूकी मीतिवी खोरुङला उर्च्युम ग्‍यप्‍नी टि गल्‍नी ग्‍येल्‍वु जोप छोलिन नोक सिरुप हाक्‍कोनी खो खरक्‍पा सोक सिरा तेसुर थेन्‍नी च्‍यिक राङ पम्‍दोक नेवा लोक्‍नी फेप्‍सुङ।

16 ती गोमु नाम ल्‍होसिमा येशूकी लोमातिवा मर ग्‍येम्‍छो गारीला गल्‍नी 17 टुला जेनी ग्‍येम्‍छो फर्केन कफर्नहुम ग्‍येसा नेवा डोप गाल्‍सुङ। यिने नक्‍तोमी गल्‍सिमा साङ येशू तिवी चाला माफेप्‍नोक। 18 ती पेला राङ छासे लुङ ग्‍यप्‍नी ग्‍येम्‍छोकी बालाप कशेन ल्‍हानोक। 19 ते नेसुर लोमातिवा टु ग्‍यप्‍नी किलोमिटर ङ टुक चोयी डोसालेन्‍सिन येशू ग्‍येम्‍छो ख नेसुर युनी टी चाला फेपुप तिवी थोङ्‍सुङ। ती थोङ्‍सिमा तिवा पर्नी छासे ज्‍यिवा क्‍यासुङ। 20 यिने येशूकी तिवाला “ङ राङ यिन, ज्‍यिवा माकी।” सिनी सुङ्‍सुङ। 21 तमा लोमातिवा गा क्यानी येशूला टी नाङ्‍ला गासो शुसुङ, तमा टु ति तिवा डोप नो क्‍यावु दासाला शार्क्येक लेप्‍सुङ।

22 ती सला तीला ग्‍येम्‍छो छुर्केन वोतुप मीतिवी ते टु ति च्‍यिक तिराङ नोक, तमा येशू ति लोमातिवी मुला ती टुला जेनी माफेप्‍नी खोकी लोमातिवा तिराङ गलुप यिन सिरुप ति छ्‍या नोक। 23 तमा तिबेरियास नेसुर वावु यम्‍बा टुतिवा ति गोमाला चोवोकी कोन्‍छ्‍योकला थुचिछे पुल्‍नी मी माङ्‍छ्‍योकला शुब्‍ज्‍याङ नङ्‍गुप दासाकी चाला राङ लेप्‍नोक। 24 तमा तिवी ते येशू साङ ज्‍यु मेतुप ताङ लोमातिवा साङ मेतुप थोङ्‍नी टुतिवाला जेनी येशूला छोलुपला कफर्नहुम ग्‍येसा नेवा गाल्‍सुङ।

25 तिवा ग्‍येम्‍छोकी फर्केन लेप्‍सिमा येशूला ठेसुङ। तमा खोला ठेसिमा तिवी “गेकेन, गेकेन दे नम फेवु?” सिनी टिसुङ। 26 तमा येशूकी तिवाला सुङ्‍सुङ, “वुतुङ के ङ ख्‍यिराङला सिरिन, ख्‍यिरा ङला छलुप ति ङे क्‍यावु हलेवु ततिवा थोङ्‍गुप तप्‍की मिन, यिने ख्‍यिरा डाता सेक शुब्‍ज्‍याङ सोवु तप्‍की यिन। 27 ख्‍यिराङ रुल्‍नी डोप समी थोक्‍ला लाका माकी, बोरु नाम्‍साङ मिशिवु मिजी तेरुप समी थोक्‍ला लाका की। ती मिजी ति ङ मी पुज्‍युङकी ख्‍यिराङला तेर्किवी, च्‍यिलासिसिन पपा कोन्‍छ्‍योककी ती मिजी तेरुप ओङ ति ङला नाङ्‍सुङ।” 28 तमा तिवी खोला “कोन्‍छ्‍योककी नो क्‍यावु लाकातिवा कितुपला ङ्‍यिरा काङ कि गोकिवी?” सिनी टिसुङ। 29 तमा खोकी तिवाला “कोन्‍छ्‍योककी तङ्‍गुप तीला तेपा कितुप ति कोन्‍छ्‍योककी लाका यिन।” सिनी सुङ्‍सुङ। 30 येलुङ तिवी खोला सिक्‍यासुङ, “ख्‍योरे ङ्‍यिराङला चुका त छ्‍या तेन्‍नी ङ्‍यिरा ती त ल्‍हानी ख्‍युरुङला तेपा कि ज्‍यिकिवी? ख्‍योरे काङ लाका किवी? 31 कोन्‍छ्‍योककी सुङगी नाङ्‍ला ‘खोकी देवाच्‍येन नेमा शुब्‍ज्‍याङ पप च्‍यिनी तिवाला स च्‍यिसुङ।’ सिनी टिवु दोके ङ्‍यिरा पगावा हङ्‍गावी याङ दासा पाङ्‍थेरीला मन्‍न सोसुङ।” 32 तमा येशूकी सुङ्‍सुङ, “ङ ख्‍यिराङला टेङ्‍बु सिरिन, देवाच्‍येन नेमा शुब्‍ज्‍याङ तेरुप ति मोशा मिन, यिने देवाच्‍येन नेमा ख्‍यिराङला शुब्‍ज्‍याङ टेङ्‍बु नङ्‍गुप ति ङे पपा यिन। 33 कोन्‍छ्‍योककी शुब्‍ज्‍याङ ति देवाच्‍येन नेमा वानी जम्‍बुलिङकी मीतिवाला नाम्‍साङ मिशिवु मिजी नङ्‍गुप ती यिन।” 34 तमा तिवी खोला “चोवो, दी शुब्‍ज्‍याङ ति ङ्‍यिराङला नरी नङ्‍नी।” सिनी सिक्‍यासुङ। 35 यिने येशूकी तिवाला सुङ्‍सुङ, “नाम्‍साङ मिशिवु मिजी तेरुप शुब्‍ज्‍याङ ति ङ राङ यिन। ङे ते वुङ्‍गुपतिवा नाम्‍साङ ल्‍होवा मलङ्‍गिवी, तमा ङला तेपा कितुपतिवा नाम्‍साङ कोम्‍बा मलङ्‍गिवी। 36 यिने ङे ख्‍यिराङला सिक्‍यावु दोके ख्‍यिरा ङला थोङ्‍सिनाङ ङला तेपा माक्‍या। 37 ङे पपी ङला चेक तेन नङ्‍गुप मीतिवा तेरी ङे ते वुङ्‍गिवी, तमा ङे ते वुङ्‍गुपतिवाला ङ नाम्‍साङ लोक्‍नी मोतोङ। 38 च्‍यिलासिसिन ङ ति ङे नोवा छे ज्‍यितुपला देवाच्‍येन नेमा वावु मिन, यिने ङला तोङ्‍गुप कोन्‍छ्‍योककी नोवा छे ज्‍यितुपला वावु यिन। 39 ङला तोङ्‍गुप खोकी नोवा ति खोकी ङला चेक तेन नङ्‍गुपतिवा सु साङ मोतोर्शी, यिने जम्‍बुलिङकी तिङ्‍मी तुजेला तिवा तेरी सेन्‍बु लङ ज्‍यितुपला यिन। 40 तमा खोकी पुज्‍युङला ल्‍हानी तीला तेपा कितुपतिवा तेरीकी नाम्‍साङ मिशिवु मिजी थोपुप ति ङे पपी नोवा यिन। तमा जम्‍बुलिङकी तिङ्‍मी तुजेला ङ तिवा तेरीला सेन्‍बु लङ ज्‍यितिन।”

41 येशूकी “ङ देवाच्‍येन नेमा पाम वावु शुब्‍ज्‍याङ यिन।” सिनी सुङ्‍सिमा यहूदीतिवा मुक्‍तम देन्‍दुप छाल्‍सुङ। 42 तमा तिवी “दी याङ योसेफकी पुज्‍युङ येशू मिन रो? दीकी पपाआमा याङ दाक्‍पी ङो मेशेवी रो? च्‍यिला दीकी ‘ङ देवाच्‍येन नेमा पाम वावु यिन।’ सिनी सिक्‍यावु यिनाङ?” सिनी सिक्‍यासुङ। 43 तमा येशूकी तिवाला सुङ्‍सुङ, “ख्‍यिरा पर्ला मुक्‍तम मादेन, 44 ङला तोङ्‍गुप पपी मीतिवाला ङे ते वुङ्‍गुप सेम माबिन्‍सुङ सिसिन सु साङ ङे ते वुङ मुथुपी, तमा ङे ते वुङ्‍गुपतिवाला ङ जम्‍बुलिङकी तिङ्‍मी तुजेला सेन्‍बु लोङ्‍यिन। 45 ‘तेरी मीतिवी कोन्‍छ्‍योककी सुङ नेमा लोप्‍किवी।’ सिनी कोन्‍छ्‍योककी लुङ्‍तेम्‍बातिवी टि वे। सी पपी सुङ ङ्‍येन्‍नी खोकी सुङ्‍गुप सुङ लोप्‍किवे, तिवा तेरी ङे ते वुङ्‍गिवी। 46 सी साङ पपाला माथोङ वे, यिने कोन्‍छ्‍योक नेमा वावु तीकी तिराङ पपाला थोङ वे। 47 वुतुङ के ङ ख्‍यिराङला सिरिन, सी ङला तेपा किवे, तीला नाम्‍साङ मिशिवु मिजी थोप्‍किवी। 48 तमा नाम्‍साङ मिशिवु मिजी तेरुप शुब्‍ज्‍याङ ति ङ राङ यिन। 49 ख्‍यिरा हङ्‍गावातिवी दासा पाङ्‍थेरीला मन्‍न सोसिनाङ तिवा शिसुङ। 50 यिने देवाच्‍येन नेमा वावु शुब्‍ज्‍याङ ति दुकै यिन, सी दीला सेवे, तिवा नाम्‍साङ मिशिवी। 51 ङ ति देवाच्‍येन नेमा पाम वोवु सेन्‍बु वोतुप शुब्‍ज्‍याङ यिन। सी दी शुब्‍ज्‍याङ सेवे, तिवा नाम्‍साङ मिशिवी। ती शुब्‍ज्‍याङ ति ङे जु यिन, तमा ती जुकी जम्‍बुलिङकी मीतिवा तेरीला मिजी तेर्किवी।”

52 खोकी तुक सुङ्‍सिमा यहूदीतिवी “दी मी तीकी चुक क्‍यानी खोरो जु दाक्‍पुला स ज्‍यि थुप्‍किवी ताङ?” सिनी खोप्‍राङ पर्ला ताम्‍ङे क्‍यासुङ। 53 तमा येशूकी तिवाला सुङ्‍सुङ, “ङ ख्‍यिराङला टेङ्‍बो सिरिन, ख्‍यिरा ङ मी पुज्‍युङकी जु मासोसिन ताङ ङ मी पुज्‍युङकी ठक माथुसिन ख्‍यिराङला नाम्‍साङ मिशिवु मिजी मोथोपिवी। 54 ङे जु साप ताङ ङे ठक थुङ्‍गुपतिवाला ति नाम्‍साङ मिशिवु मिजी थोप्‍किवी, तमा जम्‍बुलिङकी तिङ्‍मी तुजेला तिवाला ङ शेप ने सेन्‍बु लोङ्‍यिन। 55 च्‍यिलासिसिन ङे जु ति वुतुङ्‍की साप समा यिन, तमा ङे ठक ति वुतुङ्‍की थुङ्‍गुप ति यिन। 56 ङे जु साप ताङ ङे ठक थुङ्‍गुप तीकी ङे मुला देकिवी, तमा ङ साङ तीकी मुला देतिन। 57 ङोसु ज्‍यु वोतुप ङे पपी ङला ताङ्‍सुङ, तमा ङ खो नेसुर मिजी क्‍योङ्‍गिवी। ती दोके ङला साप तीकी साङ ङ नेसुर मिजी क्‍योङ्‍गिवी। 58 ती ति देवाच्‍येन नेमा पाम वावु शुब्‍ज्‍याङ यिन। ती ति ख्‍यिरा हङ्‍गावातिवी सोसिनाङ शेप समा दोके मिन। दी शुब्‍ज्‍याङ सापतिवाला ति नाम्‍साङ मिशिवी।” 59 दी ताम्‍ङेतिवा ति येशूकी कफर्नहुमला वोतुप यहूदी छ्‍योखाङ नाङ्‍ला येन्‍देन नङ्‍गुप पेला सुङ्‍गुप यिन।

60 ती ताम्‍ङे थोनी येशूकी लोमातिवी पर्ला बङीकी “दी सुङ याङ छासे कले नोक, सी हाक्‍को थुपुप्‍जा?” सिनी सिक्‍यासुङ। 61 येशूकी तिवा मुक्‍तम देन्‍दुप हाक्‍कोनी तिवाला सुङ्‍सुङ, “दी ताम्‍ङेकी ख्‍यिराङला ग्‍येकिवी? 62 तुकै यिन्‍सिन ङ मी पुज्‍युङ ति गोमाला खुरुङ वोतुप ते राङ तेक्‍नी डोप थोङ्‍सिन ख्‍यिराङ काङ किवी? 63 नाम्‍साङ मिशिवु मिजी नङ्‍गुप ति कोन्‍छ्‍योककी थु चाङ्‍मा यिन, तमा जु ति काङ साङ फेन मोथोवी। ङे ख्‍यिराङला सिक्‍यावु दी ताम्‍ङे ति कोन्‍छ्‍योककी थु चाङ्‍मा ताङ नाम्‍साङ मिशिवु मिजीकी कोर्ला यिन। 64 यिने ख्‍यिरा पर्ला मी ललाइ ति ङला तेपा राङ मिकिवी।” तमा गोमाला नेज्‍युन खोरुङला तेपा मिकिवुतिवा सु सु यिन, तमा क्‍येन तेरुपतिवा सु सु यिन सिनी खोला छ्‍या नोक। 65 येशूकी येलुङ दुक सुङ्‍सुङ, “तुक क्‍यानी ङे पपी सेम माबिन्‍सुङ सिसिन सु साङ ङे ते वुङ मुथुपी सिनी ङे ख्‍यिराङला सिक्‍यावु यिन।”

66 खोकी तुक सुङ्‍गुप तप्‍की खोकी लोमातिवा बङीकी खोला क्‍युर ज्‍याक्‍नी ती पेला नेज्‍युन खोला तिङ माङ्‍या। 67 तमा येशूकी खोरो लोमा मिरा च्‍यिङ्‍ङीतिवाला “ख्‍यिरा साङ ङला क्‍युर ज्‍याक्‍नी डोप नो वे?” सिनी टि नाङ्‍सुङ। 68 खोकी तुक सुङ्‍सिमा सिमोन पत्रुस तीकी “ओ चोवो, चोवोकी मुला याङ नाम्‍साङ मिशिवु मिजी तेरुप सुङ वे। तुक क्‍यानी ङ्‍यिराङ सी चाला डोप्‍जा? 69 चोवो याङ कोन्‍छ्‍योककी चाङ्‍मा वोतुप मी यिन सिनी ङ्‍यिरा तेपा क्‍यानी हाक्‍को वे।” सिनी सिक्‍यासुङ। 70 तमा येशूकी तिवाला “काङ ङे ख्‍यिराङ मिरा च्‍यिङ्‍ङीतिवाला राङ पेतुप मिन रो? यिन्‍सिनाङ ख्‍यिरा पर्ला मिरा च्‍यिक ति शैतान यिन।” सिनी सुङ्‍सुङ। 71 खोकी दुक सुङ्‍गुप ति सिमोन इस्‍करियोतकी पुज्‍युङ यहूदाकी कोर्ला सुङ्‍गुप यिन, ती ति खोकी लोमा मिरा च्‍यिङ्‍ङी नङगी ति यिन्‍सिनाङ ज्‍युक्‍ला येशूला जिम तेरुप मी यिनोक।