1 यहूदी थरुप तुछ्‍येनकी गोमी ङ्‍यिमा नोक। येशूकी खुरुङ दी जम्‍बुलिङ क्‍युर ज्‍याक्‍नी पपी चाला फेपुप तुजे लेपुप ति हाक्‍कोनी खोला तेपा कितुप जम्‍बुलिङला वोतुप खोरो मीतिवाला ङ्‍यिङ्‍ज्‍ये क्‍या नङ्‍गिनोक, तमा खो माटुङा सेक तिवाला मङ ङ्‍यिङ्‍ज्‍ये क्‍या नाङ्‍सुङ। 2 येशू खोरे लोमातिवी मुला गोमी सोल शेयी वोतुप पेला शैतानकी सिमोन इस्‍करियोतकी पुज्‍युङ यहूदाकी सेमला येशूला जिम तेरुप नासाम शर च्‍यिसुङ। 3 पपा कोन्‍छ्‍योककी जम्‍बुलिङकी तेरी ओङ्‍ज्‍येन खुरुङला नङ्‍गुप ताङ खुरुङ कोन्‍छ्‍योक नेमा वानी येलुङ कोन्‍छ्‍योककी चिप्‍ला राङ लोक्‍नी डोप ताम्‍ङे येशूकी हाक्‍कोसुङ। 4 तमा खो सोल शेवु दासा ने शेङ्‍नी खोरो फिला कोन्‍दुप नम्‍सा ति पिन ज्‍याक्‍नी खोकी केल्‍दाङला रुमाल यी टिल्‍सुङ। 5 तमा तोङ्‍मेन नाङ्‍ला छ्‍यु पुनी खोरो लोमातिवाला रे ताङ रे क्‍यानी तिवी काङ्‍बा टुनी खोकी केल्‍दाङ लोला टिलुप रुमाल थ्‍वोनी पिन बिन्‍सुङ। 6 तुक राङ क्‍यानी खो सिमोन पत्रुसकी चाला लेप्‍सिमा पत्रुसकी खोला “अम्‍माइ चोवो, चोवोकी ङे काङ्‍बा टुकिवी?” सिनी सिक्‍यासुङ। 7 तमा येशूकी तीला सुङ्‍सुङ, “ङे काङ कियी वे, ती ति ख्‍योरो तन्‍दा हाक्‍मोकोवी, यिने ज्‍युक्‍ला ति हाक्‍कोकिवी।” 8 येलुङ पत्रुसकी खोला “चोवोकी ङे काङ्‍बा नाम्‍साङ टुतुप मेवी।” सिनी सिक्‍यासुङ। तमा येशूकी तीला “दोजो ङे ख्‍योरो काङ्‍बा माटुसिन ख्‍युरुङ ङ ताङ मुला काङ तम्‍जी मेवी।” सिनी सुङ्‍सुङ। 9 तमा सिमोन पत्रुसकी खोला “ओ चोवो, तुकै यिन्‍सिन ङे काङ्‍बा तिराङ मिन, ङे लाक्‍पा ताङ गो साङ टुनी नाङ्‍नी।” सिनी सिक्‍यासुङ। 10 येशूकी तीला “सी जु टु वे, तीकी तेरी जु ति चेङ्‍गा च्‍युङ्‍नी वे। तुक क्‍यानी त याङ काङ्‍बा तिराङ मिसिन यम्‍बा टु मोगोवी। ख्‍यिराङ याङ चेङ्‍गा राङ वे, यिने ख्‍यिराङ तेरी चेङ्‍गा वोतुप ति मिन।” सिनी सुङ्‍सुङ। 11 येशूकी खोरुङला क्‍येन तेरुप ति सु यिन सिनी ङो शेनोक, ती तप्‍की खोकी तिवाला “ख्‍यिराङ तेरी चेङ्‍गा वोतुप ति मिन।” सिनी सुङ्‍गुप यिन।

12 खोकी तिवी काङ्‍बा टुन सिन्‍सिमा येलुङ खो खोरे नम्‍सा नुम्‍नी गोमाला ज्‍युवु दासाला राङ ज्‍युसुङ। तमा तिवाला “ङे मलोक क्‍यावु ति काङ यिन सिनी ख्‍यिराङला छ्‍या वे? 13 ख्‍यिराङ ङला गेकेन याङ्‍ना चोवो सिनी सिवी, ती ति टेके यिन, च्‍यिलासिसिन ङ वुतुङ के ख्‍यिरा सिक्‍यावु दोके राङ यिन। 14 ङ ख्‍यिरा चोवो ताङ गेकेन यिन्‍सिनाङ ख्‍यिरा काङ्‍बा टुयी। तुक क्‍यानी ख्‍यिरा साङ च्‍यिककी च्‍यिकला काङ्‍बा टु गोकिवी। 15 ङे ख्‍यिराङला दी नमुना छ्‍या तेन्‍दुप तेन्‍दोक ति ङे ख्‍यिरा थोक्‍ला काङ क्‍या वे, ख्‍यिरा साङ तुक राङ किशी सिनी यिन। 16 ङ ख्‍यिराङला टेङ्‍बो सिरिन, लावा खोरो ज्‍यिन्‍दाक सिनाङ छ्‍ये मेवी, तमा लेन क्‍योलुप मी ति तीला तोङ्‍गुप ति सिनाङ छ्‍ये मेवी। 17 ख्‍यिरा दी ताम्‍ङे हाक्‍कोनी ती दोके क्‍यासुङ सिसिन ख्‍यिराङला मोलाम थोप्‍किवी।

18 ङे ख्‍यिराङ तेरीकी कोर्ला सिक्‍यावु मिन, ङे पेतुप मीतिवा चुका पारकी यिन सिनी ङ ङो शेकिवी। यिने ‘ङ ताङ मुला देनी शुब्‍ज्‍याङ साप तीकी राङ ङला क्‍येन तेर्किवी।’ सिनी टिवु कोन्‍छ्‍योककी सुङ ति तेरी छेकिवी। 19 ती ताम्‍ङे च्‍युङ्‍गुप सिनाङ गोमाला के ङे ख्‍यिराङला सिक्‍यावु ति ती ताम्‍ङे च्‍यङ्‍गुप पेला ख्‍यिरा ङ ति कोन्‍छ्‍योक नेमा वावु यिनोक सिनी तेपा कि ज्‍यितुपला यिन। 20 वुतुङ के ङ ख्‍यिराङला सिरिन, सी ङे तङ्‍गुप तीला खोरो सेमला लिङ्‍गिवे, तीकी ङला सेमला लिङ्‍गुप यिन। तमा सी ङला खोरो सेमला लिङ्‍गिवे, तीकी ङला तोङ्‍गुप कोन्‍छ्‍योकला सेमला लिङ्‍गुप यिन।”

21 येशूकी तुक सुङ्‍सिमा खोला छासे सेम्‍दुक लानोक। तमा खोकी खोरो लोमातिवाला दुक सिनी सुङ्‍सुङ, “वुतुङ के ङ ख्‍यिराङला सिरिन, ख्‍यिरा पर्ला मिरा च्‍यिककी ङला जिम तेर्किवी।” 22 खोकी ती ताम्‍ङे ति सी कोर्ला सुङ्‍गुप यिन सिरुप ति हाक्‍माकोनी खोकी लोमातिवा च्‍यिककी च्‍यिकला ल्‍हटी चेसुङ। 23 तमा लोमातिवी पर्ला येशूकी मङ ङ्‍यिङ्‍ज्‍ये क्‍यावु ती लोमा ति खोकी छेकोकला ङ्‍यिम्‍बुर क्‍यानी देसुङ। 24 ती पेला सिमोन पत्रुसकी ती लोमा तीला खोकी तुक सुङ्‍गुप ति सी थोक्‍ला यिन खोला टि सिनी लाक्‍पी छ्‍याक्‍के क्‍यासुङ। 25 तमा तीकी येशूकी छेकोकला मङ ङ्‍यिम्‍बुर क्‍यानी, “ओ चोवो, चोवोला जिम तेरुप ति सु यिनाङ?” सिनी खोला टिसुङ। 26 तमा येशूकी “सुला ङे शुब्‍ज्‍याङ कोरी नाङ्‍ला पानी तेर्किवे, ती राङ यिन।” सिनी तीला सुङ्‍सुङ। ती ज्‍युक्‍ला खोकी शुब्‍ज्‍याङ च्‍याक्‍नी कोरी नाङ्‍ला पानी सिमोन इस्‍करियोतकी पुज्‍युङ यहूदाला नाङ्‍सुङ। 27 ती शुब्‍ज्‍याङ लालुङ्‍मे यहूदाकी सेमला शैतान शुसुङ। तमा येशूकी तीला “ख्‍योरो काङ कितुप छल वे, ती ति शार्क्येक की।” सिनी सुङ्‍सुङ। 28 यिने येशूकी तीला च्‍यिला तुकै सुङ्‍गुप यिन सिरुप ति ते देनी समा सापतिवा सी साङ हाक्‍माको। 29 तमा ललाइकी यहूदाकी लोला लोमातिवी टङ्‍गी छयी ज्‍यकुप तप्‍की येशूकी तीला “तुछ्‍येनकी थोक्‍ला तिवाला गोवु च्‍यालक ङ्‍योप याङ्‍ना पेराङ्‍बुतिवाला काङ रे च्‍यिक रे बिन।” सिनी सुङ्‍गुप यिन्‍दे सिनी नो क्‍यानोक। 30 तमा यहूदाकी शुब्‍ज्‍याङ लालुङ्‍मे शार्क्येक पाङ्‍ला थेन गाल्‍सुङ। ती पेला नाम ल्‍होनिङ सिन्‍नोक।

31 यहूदा पाङ्‍ला थेन गल्‍सिमा येशूकी सुङ्‍सुङ, “त याङ मीतिवी ङ मी पुज्‍युङला मोवा वोतुप थोङ्‍गितो, तमा मी पुज्‍युङ नेमा कोन्छ्‍योक छासे मोवा वोतुप ति थोङ्‍गितो। 32 दोजो कोन्‍छ्‍योक छासे मोवा वोतुप ति मी पुज्‍युङ नेमा छ्‍या तेन्‍सुङ सिसिन कोन्‍छ्‍योककी साङ मी पुज्‍युङला मोवा वोतुप ति छ्‍या देन्‍गिवी। ती ति खोकी ङमु राङ क्‍या नङ्‍गिवी। 33 ङे ङ्‍यिङ्‍ज्‍येवु आङातिवा, ङ चेयी पर सेक तिराङ ख्‍यिरा मुला लुकितो। ती ज्‍युक्‍ला ख्‍यिरा ङला छोल्‍गिवी, तमा ङे गोमाला यहूदी गोमा कितुपतिवाला सिक्‍यावु दोके तन्‍दा ख्‍यिराङला सिरिन, ‘ङ कनी डिवे, ते ख्‍यिराङ वुङ मुथुप्‍तो।’ 34 ङ ख्‍यिराङला क सम्‍बा यी तेरिन, ख्‍यिराङ च्‍यिककी च्‍यिकला ङ्‍यिङ्‍ज्‍ये की। ङे ख्‍यिराङला ङ्‍यिङ्‍ज्‍ये क्‍यावु दोके ख्‍यिरा साङ च्‍यिककी च्‍यिकला ङ्‍यिङ्‍ज्‍ये की। 35 दोजो ख्‍यिराङ च्‍यिककी च्‍यिकला ङ्‍यिङ्‍ज्‍ये क्‍यासिन ती ल्‍हानी ख्‍यिराङ ङे लोमा यिन सिरुप ति मीतिवी हाक्‍कोकिवी।”

36 तमा सिमोन पत्रुसकी येशूला “ओ चोवो, चोवो कनी फेप्‍किवी?” सिनी टिसुङ। तमा येशूकी तीला “ङ कनी डिवे, ते ख्‍युरुङ तन्‍दा वुङ मुथुप्‍तो, यिने ज्‍युक्‍ला ति ङला तिङ्‍योकितो।” सिनी सुङ्‍सुङ। 37 येलुङ पत्रुसकी खोला “चोवो, ङ च्‍यिला तन्‍दा राङ तिङ्‍योक मुथुपी? ङ याङ चोवोकी थोक्‍ला शि राङ गोसिनाङ शेयिन।” सिनी सिक्‍यासुङ। 38 तमा येशूकी तीला “वुतुङ के ख्‍युरुङ ङे थोक्‍ला शिराङ गोसिनाङ शिवी? ङ ख्युरुङला टेङ्‍बो सिरिन, ख्‍योरो हारिङ च्‍यवु कुकुरी देन्‍दुप सिनाङ गोमाला थेङ्‍मा सुम ङला ङो मेशेवी सिवी।” सिनी सुङ्‍सुङ।