1 “ङे ख्‍यिराङला दी ताम्‍ङे सिक्‍यावु ति ख्‍यिरा ङला तेपा क्‍यावु ति येर मर मोडोशी सिनी यिन। 2 मीतिवी ख्‍यिराङला यहूदी छ्‍योखाङ नेमा तेन तोङ्‍गितो। वुतुङ के तुजे यी गितो, ती तुजेला ख्‍यिराङला सेतुपतिवी तुकै कितुप ति कोन्‍छ्‍योकला शब्‍ज्‍यी कितुप लाका यिन सिनी नासाम तोङ्‍गिवी। 3 तिवी तुक क्‍यावु ति तिवी ङे पपाला साङ ङो माशे वे, ङला साङ ङो मेशेवु तप्‍की यिन। 4 ङे ख्‍यिराङला दी ताम्‍ङे सिक्‍यावु ति ज्‍युक्‍ला ती तेरी च्‍युङ्‍गुप पेला ङे ख्‍यिराङला सिक्‍यावु ताम्‍ङे ति ख्‍यिरा नासाम शर्शी सिनी यिन। ङे दी ताम्‍ङे गोमाला ख्‍यिराङला सिमाक्‍यावु ति ङ ख्‍यिरा मुला राङ वोतुप तप्‍की यिन।”

5 “त याङ ङ ङला तोङ्‍गुप तीकी ते डोयी वे। यिन्‍सिनाङ ख्‍यिरा पर्ला सी साङ ङला कनी डिवी सिनी मिटिनोक। 6 बोरु ङे ख्‍यिराङला सिक्‍यावु ताम्‍ङेतिवा थोसिमा ख्‍यिरा सेमला छासे सेम्‍दुक लानी वे। 7 यिने ङ ख्‍यिराङला टेङ्‍बो सिरिन, ङ डोप ति ख्‍यिरा थोक्‍ला ल्‍यामु यिन। ङ मागल्‍सिन टोङ्‍गु तेरुप थु चाङ्‍मा ति ख्‍यिरा ते मेफेवी। यिने ङ गल्‍सिन टोङ्‍गु तेरुप थु चाङ्‍मा ति ख्‍यिरा पर्ला तोङ्‍यिनो। 8 खो फेप्‍सिमा दिक्‍पा ताङ कोन्‍छ्‍योककी टेङ्‍बु ताङ कोन्‍छ्‍योककी ठिमकी कोर्ला हाक्‍माकोवुतिवाला खोकी हाक्‍को ज्‍यिकिवी। 9 दिक्‍पाकी कोर्ला ति ङला तेपा मिकिवु ति दिक्‍पा यिन सिनी खोकी हाक्‍को ज्‍यिकिवी। 10 टेङ्‍बुकी कोर्ला ति ङ ङे पपी ते डोयी, तुक क्‍यानी ख्‍यिरा ङला येलुङ मोथोङ्‍दो सिनी खोकी हाक्‍को ज्‍यिकिवी। 11 कोन्‍छ्‍योककी ठिमकी कोर्ला ति दी जम्‍बुलिङला ओङ्‍ज्‍येन कितुप शैतानला कोन्‍छ्‍योक नेमा पर्च्या ङ्‍येसुङ सिनी हाक्‍को ज्‍यिकिवी।

12 ङे ख्‍यिराङला सि गोवु ताम्‍ङे याङ तरोङ बङी वे, यिने तन्‍दा ति ख्‍यिरा ती ताम्‍ङे ति सेमला ज्‍योक मुथुपी। 13 यिने टेङ्‍बु वोतुप थु चाङ्‍मा फेप्‍सिमा खोकी ख्‍यिराङला कोन्‍छ्‍योककी टेङ्‍बुकी कोर्ला हाक्‍को ज्‍यिकितो, तमा ख्‍यिराङला ती टेङ्‍बुकी लाम नेवा टिकितो। खोकी खोरो ताम्‍ङे मुसुङ्‍गिवी, यिने कोन्‍छ्‍योक नेमा काङ थोवे, ती ताम्‍ङे तिराङ सुङ्‍गितो, तमा ज्‍युक्‍थमाला वुङ्‍गुप ताम्‍ङेतिवा साङ ख्‍यिराङला सुङ्‍गितो। 14 खोकी ङे सिक्‍यावु ति ङ्‍येन्‍नी ख्‍यिराङला हाक्‍को च्‍यितुप तप्‍की ङला मोवा वोतुप ति खोकी छ्‍या देन्‍गिवी। 15 पपी मुला वोतुप ति तेरी ङे ति यिन। तुक क्‍यानी ङे काङ सिक्‍यावे, खोकी थु चाङ्‍माकी ती थोनी ख्‍यिराङला सुङ्‍गिवी सिनी ङे सिक्‍यावु यिन। 16 त चेयी ज्‍युक्‍ला ख्‍यिरा ङला मोथोङ्‍तो, तमा येलुङ चेयी ज्‍युक्‍ला ख्‍यिरा ङला थोङ्‍गितो।”

17 ललाइ ललाइ लोमातिवा खोप्‍राङ नाङ्‍ला “खोकी दाक्‍पुला ‘चेयी ज्‍युक्‍ला ख्‍यिरा ङला मोथोङ्‍तो, तमा येलुङ चेयी ज्‍युक्‍ला ख्‍यिरा ङला थोङ्‍गितो।’ सिनी सुङ्‍गुप ताङ येलुङ खोकी ‘ती ति ङ पपी चाला डोयी वोतुप तप्‍की यिन।’ सिनी सुङ्‍गुप ति काङ यिनाङ? 18 खोकी ‘चेयी ज्‍युक्‍ला’ सिनी सुङ्‍गुप तेन्‍दोक ति काङ यिनाङ? खोकी काङ सुङ्‍गुप यिन सिनी ङि्‍यरा हाक्‍माको।” सिनी सिक्‍यासुङ। 19 येशूकी लोमातिवी खोला टिवा टेप नो क्‍यावु ति हाक्‍कोनी खोकी तिवाला सुङ्‍सुङ, “ ‘चेयी ज्‍युक्‍ला ख्‍यिरा ङला मोथोङ्‍तो, तमा येलुङ चेयी ज्‍युक्‍ला ख्‍यिरा ङला थोङ्‍गितो।’ सिनी ङे सिक्‍यावु ताम्‍ङेकी कोर्ला ख्‍यिरा पर्ला केवुल क्‍यावु यिन? 20 वुतुङ के ङ ख्‍यिराङला सिरिन, ख्‍यिराङ ङोप ताङ ङुप्‍राङ कितो, यिने जम्‍बुलिङकी मीतिवा ति गा कितो। ख्‍यिराङला छासे पप लानी सेम्‍दुक लङ्‍गितो, यिने ख्‍यिरा सेम्‍दुक ति गाला ग्‍युर्कितो। 21 पुम्‍पेजाला आङा क्‍येप पेला लेप्‍सिमा छेटाङ वुङ्‍गुप तप्‍की तीला छासे पप किवी। यिने आङा क्‍येसिमा तीकी ती छेटाङ ति टोक ज्‍येकिवी, च्‍यिलासिसिन आङा क्‍येवु तप्‍की तीकी सेमला छासे गा लङ्‍गिवी। 22 ख्‍यिराङला साङ दी दोके राङ च्‍युङ्‍गिवी। तन्‍दा ख्‍यिरा सेमला सेम्‍दुक किवी, यिने ङ ख्‍यिराङला येलुङ ठेतुप पेला ख्‍यिरा सेम ति छासे गा लङ्‍गितो। तमा ती गा ति सी साङ ख्‍यिराङ नेसुर ठोक मुथुप्‍तो। 23 ती तुजेला ख्‍यिरा ङला काङ ताम्‍ङे साङ मिटितो। ङ ख्‍यिराङला टेङ्‍बो सिरिन, ख्‍यिरा ङे मिङला ङे पपाला काङ लाङ्‍सिनाङ खोकी ख्‍यिराङला नङ्‍गितो। 24 त सेक ख्‍यिरा ङे मिङला काङ साङ मालाङ वे। त लोङ, तमा ख्‍यिराङला थोप्‍कितो। तमा ख्‍यिराङला लोदिमु तेरी च्‍युङ्‍गितो।”

25 “त सेक ती ताम्‍ङेतिवा ङे ख्‍यिराङला पे नेसुर सिक्‍यायी। यिने तुजे यी वुङ्‍यिन वे, ती तुजेला ङ येलुङ पे नेसुर मिसिर, यिने पपी कोर्ला ल्‍यामो हाक्‍कोवा क्‍यानी ख्‍यिराङला सिरिनो। 26 ती तुजेला ख्‍यिरा ङे मिङला पपाला लोङ्‍गितो, ती ति ङे ख्‍यिरा थोक्‍ला पपाला लोङ्‍गिवी सिरुप ताम्‍ङे मिन। 27 पपी राङ ख्‍यिराङला ङ्‍यिङ्‍ज्‍ये क्‍या नङ्‍गिवी, च्‍यिलासिसिन ख्‍यिरा ङला ङ्‍यिङ्‍ज्‍ये क्‍यासुङ, तमा ङ पपा नेमा वावु यिन सिनी ख्‍यिरा तेपा क्‍यावु तप्‍की यिन। 28 ङ पपा नेमा दी जम्‍बुलिङला वायिन, त ङ जम्‍बुलिङ क्‍युर ज्‍याक्‍नी पपी ते लोक्‍नी डोयी वोतो।” 29 येशूकी तुक सुङ्‍सिमा लोमातिवी खोला सिक्‍यासुङ, “त याङ गेकेनकी पे नेसुर मासुङ्‍नी ङ्‍यिराङला ल्‍यामो हाक्‍कोवा क्‍यानी सुङ्‍गिनोक। 30 गेकेनला तेरी ताम्‍ङे छ्‍या वोतुप ताङ गेकेनला काङ टिवा टि मोगोनोक सिरुप ति तके ङ्‍यिरा हाक्‍कोसुङ। ती तप्‍की गेकेन याङ कोन्‍छ्‍योक नेमा फेपुप यिनोक सिनी ङि्‍यरा तेपा क्‍यायिन।” 31 तमा येशूकी लोमातिवाला सुङ्‍सुङ, “त के ख्‍यिराङ ङला तेपा किनोक! 32 यिने तुजे यी गिवी, ती तुजे ति वानिङ सिन वे। ती तुजेला ख्‍यिरा तेरी थरा थुरा गल्‍नी दाक दाक्‍पी खाङ्‍बाला डितो, तमा ख्‍यिरा ङला च्‍यिक राङ क्‍युन ज्‍योकितो। यिने ङ च्‍यिक राङ मे, च्‍यिलासिसिन पपा ङे मुला ज्‍यु वे। 33 ङे दी ताम्‍ङे ख्‍यिराङला सिक्‍यावु ति ख्‍यिराङ ङे मुला लुनी ख्‍यिरा सेमला लोदिमु ङ्‍येशी सिनी यिन। जम्‍बुलिङला ख्‍यिराङला छेटाङ ख्‍येल्‍गितो, यिने ख्‍यिराङ ङाडेङ की। च्‍यिलासिसिन जम्‍बुलिङकी ओङ्‍ज्‍येन खला ङे ग्‍येल्‍निङ सिन वे।”