1 ङ्‍यिम्‍ज्‍यिक येशू गनेसरेत सिरुप चोकी गारीला लानी ज्‍युनोक। ती पेला मी मङ्‍मु खोकी गारी गुरीला सुर्तुम ग्‍यकिन वानी कोन्‍छ्‍योककी सुङ ङ्‍येनिन नोक। 2 खोकी ल्‍हासालेन्‍सिन चोकी गारीला टु ङ्‍यी चोके नोक, तमा ङ्‍या जिम्‍बुपतिवा टी फिला देनी खोप्‍रे जाल टुयी नोक। 3 खो ते वोतुप टु ङ्‍यीकी पर्ला सिमोनकी टुला जेनी तीला टु ति चोकी गारी नेमा चेयी फेचेक क्‍योल सिनी सुङ्‍सुङ। तमा खो ति टुला राङ ज्‍युनी मी मङ्‍मुला सुङ लाप नाङ्‍सुङ।

4 सुङ लाप नाङ्‍सिमा येशूकी सिमोनला सुङ्‍सुङ, “फेचेक तिङ्‍मु वोतुप दासाला क्यल्‍नी ङ्‍या जिम्‍बुपला जाल ग्‍योप।” 5 तमा सिमोनकी सिक्‍यासुङ, “गेकेन, ङ्‍यिरे नुप सिर चो टेमु क्‍यासिनाङ ङ्‍या च्‍यिक साङ जिम माथुप। यिने गेकेनकी दुक सुङ्‍गुप तप्‍की ङ जाल ग्‍यकिन।” 6 तिवी खोकी सुङ्‍गुप दोके क्‍यासिमा ङ्‍या बङी ख्‍येल्‍नी जाल ति रलुप छाल्‍सुङ। 7 तमा तिवी यम्‍बा टुला वोतुप पिर्मातिवाला साङ वानी दाल्‍जा किटे कि सिनी लाक्‍पी लातुक क्‍यासुङ। तमा तिवा वानी दाल्‍जा क्‍यासिमा टु ङ्‍यिकरकी नाङ्‍ला ङ्‍या क्‍येङ्‍नी टुतिवा नुम्‍बुप छाल्‍सुङ। 8 दी थोङ्‍सिमा सिमोन पत्रुसकी येशूकी दोङ्‍ला पुमुङ चुनी सिक्‍यासुङ, “ओ चोवो, ङे नेसुर फेप। ङ मी दिक्‍छेन यिन।” 9 च्‍यिलासिसिन तिवी जिम्‍बुप ङ्‍या बङी वोतुप थोङ्‍नी पत्रुस ताङ तीकी मुला वोतुपतिवा तेरी हलेवा क्‍यासुङ। 10 तमा सिमोन ताङ मुला लाका कितुप जब्‍दियाकी पुज्‍युङ याकूब ताङ यूहन्‍ना साङ हलेवा क्‍यासुङ। येशूकी सिमोनला सुङ्‍सुङ, “ज्‍यिवा माकी। तफेन्‍ला ख्‍युरुङ ङ्‍या जिम्‍बुप मिन, मीतिवा जिम्‍बुप डितो।” 11 तमा तिवी खोप्‍रे टुतिवा ति चे गारीला क्‍यल ज्‍याक्‍सिमा तिवी मुला वोतुप तेरी क्‍युर ज्‍याक्‍नी खोकी तिङ्‍ला तिङ्‍यासुङ।

12 थेङ्‍मा यी येशू ग्‍येसा यीला ज्‍यु वोतुप पेला ते जे ग्‍यपुप मी यी नोक। तीकी खोला थोङ्‍नी खोकी दोङ्‍ला खवुतुङ्‍मा देनी, “ओ चोवो, चोवोकी नो वोसिन ङला टेक ज्‍यि थुप्‍किवी।” सिनी गोङ्‍बा शुसुङ। 13 तमा येशूकी खोरो छ्‍याक क्‍याङ्‍नी तीला रेक्नी, “ङला नो वे, ख्‍युरुङ टेक्‍शी।” सिनी सुङ्‍सुङ। तमा शार्क्येक जे ग्‍यपुप नेजु ति ती मी नेसुर थेन्‍नी गाल। 14 येशूकी तीला सुङ्‍सुङ, “दी ताम्‍ङे ति सुला साङ मासिर, यिने ख्‍युरुङ गल्‍नी कोङ्‍यारला ख्‍योरो जु छ्‍या तेन्‍नी ख्‍युरुङ टेक गलुपकी कोर्ला मोशाकी क बिन्‍दुप दोके बुल्‍वा पुल्‍नी ख्‍युरुङ टेकुप पङ्‍बु बिन।” 15 यिन्‍सिनाङ येशूकी क्‍यावु हलेवु लाका ति दासा तेरीला टाम्‍सुङ। तुक क्‍यानी मी मङ्‍मु खोकी सुङ साङ ङ्‍येन्‍दुप ताङ दाक दाक्‍पी नेजु साङ टेकुपला खोकी चाला जोम्‍गिनोक। 16 यिने येशू ति मी सु साङ मेदेवु दासाला फेप्‍नी मोपोर क्‍या नङ्‍गिनोक।

17 ङ्‍यिम्‍ज्‍यिक येशूकी सुङ लाप नङ्‍यिन वोतुप पेला गालील ताङ यहूदियाकी तेरी युलतिवा ताङ यरूशलेम नेसुर वावु फरिसीतिवा ताङ यहूदी छ्‍योकी गेकेनतिवा खोकी चिप्‍ला राङ देनोक। चोवो कोन्‍छ्‍योककी ओङ ति खो मुला वोतुप तप्‍की खोकी नेर्पुतिवाला टेक च्‍यिसुङ। 18 ती पेला ललाइ मीतिवी लाक्‍पा काङ्‍बा शोरुप मी यीला सप्‍तेन ताङ डके खुर वानी तीला खाङ्‍बी नाङ्‍ला येशूकी दोङ्‍ला क्‍योलुप छाल्‍सुङ। 19 यिने मी बङी वोतुप तप्‍की तीला नाङ्‍ला क्‍योलुप लाम माङ्‍येनी तिवा ती खाङ्‍बी थोककी खला जेनी थोक लोक्‍नी तीला सप्‍तेन ताङ डके मी मङ्‍मुकी पर्ला येशूकी दोङ्‍ला पाप्‍सुङ। 20 तमा येशूकी तिवी तेपा थोङ्‍नी सुङ्‍सुङ, “ओ आङो, ख्‍योरो दिक्‍पा तासुङ।”

21 ती थोनी यहूदी छ्‍योकी गेकेनतिवा ताङ फरिसीतिवी च्‍यिककी च्‍यिकला सिक्‍यासुङ, “कोन्‍छ्‍योकला मारे तोङ्‍गुप ताम्‍ङे कितुप दी मी ति सु यिन? कोन्‍छ्‍योककी तिराङ मिसिन सी दिक्‍पा ता ज्‍यि थुप्‍किवी रो?” 22 येशूकी तिवी नासाम हाक्‍कोनी तिवाला टि नाङ्‍सुङ, “ख्‍यिरा सेमला च्‍यिला दुका नासाम तोङ्‍गिवी? 23 ‘ख्‍योरो दिक्‍पा तासुङ।’ सिरुप ताङ ‘लानी ग्‍युक।’ सिरुप नाङ ने चुका ताम्‍ङे ति मङ जोल्‍हमु यिन? 24 यिने ङ मी पुज्‍युङला दी जम्‍बुलिङला दिक्‍पा ता ज्‍यितुप ओङ वे सिरुप ति ख्‍यिरा हाक्‍कोकिवी।” तमा खोकी ती लाक्‍पा काङ्‍बा शोरुप मी तीला सुङ्‍सुङ, “ङ ख्‍युरुङला सिरिन, त लानी ख्‍योरो सप्‍तेन खुर्नी ख्‍योरो खाङ्‍बा ग्‍युक।” 25 तमा ती ति शार्क्येक मीतिवी दोङ्‍ला लानी खुरुङ ङ्‍यिलोकुप सप्‍तेन ति खुर्नी कोन्‍छ्‍योकला सोवा देकिन सिरा खोरो खाङ्‍बा गाल्‍सुङ। 26 दी थोङ्‍नी मीतिवा तेरी हलेवा क्‍यानी कोन्‍छ्‍योकला सोवा तेक्‍सुङ। तमा तिवा ज्‍यिवा लानी, “हारिङ दाक्‍पी चुक ताम्‍ङे मिच्‍यिक्‍पा यी थोङ्‍सुङ।” सिनी सिक्‍यासुङ।

27 ती ज्‍युक्‍ला येशू पाङ्‍ला फेप्‍सालेन्‍सिन लेवी सिरुप से दुतुप मी यी से दुतुप लेखुङला देन वोतुप थोङ्‍सुङ। तमा खोकी तीला सुङ्‍सुङ, “ङे तिङ्‍ला तिङ्‍यो।” 28 तमा लेवी ति लानी खोरो मुला वोतुप तेरी क्‍युर ज्‍याक्‍नी येशूकी तिङ्‍ला तिङ्‍यासुङ। 29 ती ज्‍युक्‍ला ती लेवी तीकी येशूकी थोक्‍ला खोरो खाङ्‍बाला डेन ग्‍येर्पु यी टडिक क्‍यासुङ। ते से दुतुपतिवा बङी ताङ मी यम्‍बातिवा तिवी मुला देनी डेन सयी नोक। 30 ती पेला फरिसीतिवा ताङ यहूदी छ्‍योकी गेकेनतिवी येशूकी लोमातिवाला मुक्‍तम देनिन सिरा “ख्‍यिराङ च्‍यिला से दुतुपतिवा ताङ दिक्‍छेनतिवी मुला देनी साप थुङ्‍गुप कियी वे?” सिनी सिक्‍यासुङ। 31 तमा येशूकी तिवाला सुङ्‍सुङ, “नेजु मेतुपतिवाला ति आम्‍ज्‍यी मोगोवी, यिने नेर्पुतिवाला ति गोकिवी। 32 ङ ति खुरुङ राङ मी टेङ्‍बु यिन सिरुपतिवी थोक्‍ला मिन, यिने खुरुङ राङ दिक्‍छेन यिन सिरुपतिवाला कताङ्‍नी दिक्‍पा ने सेम ग्‍युर ज्‍यितुपकी थोक्‍ला वावु यिन।”

33 ललाइ मीतिवी येशूला सिक्‍यासुङ, “यूहन्‍नाकी लोमातिवी नरी नरी ङ्‍युङ्‍ने र्‍हुङ्‍गुप ताङ मोपोर किनोक, तमा फरिसीतिवी लोमातिवी साङ तुकै राङ किनोक। यिने ख्‍योरो लोमातिवा ति नरी साप थुङ्‍गुप किनोक।” 34 येशूकी तिवाला सुङ्‍सुङ, “काङ ख्‍यिराङ माक्‍पा जेन्‍दीकी डेन्‍बुतिवी मुला वोता सेक तिवाला ङ्‍युङ्‍ने र्‍हुङ ज्‍यि थुप्‍किवी रो? 35 यिने दुका तुजे वुङ्‍गितो, चो पेला माक्‍पा तिवी पर नेसुर ठोनी डिवे, ती पेला तिवा ङ्‍युङ्‍ने र्‍हुङ्‍गिवी।”

36 येलुङ येशूकी तिवाला दी पे शेसुङ, “सी साङ मज्‍या सम्‍बा र्‍हल्‍नी मज्‍या ङ्‍यिङ्‍बाला ल्‍हेन्‍दा मग्‍यकिवी। तुक क्‍यासिन मज्या सम्‍बा साङ ना डिवी, तमा ती मज्या सम्‍बा नेमा र्‍हलुप ल्‍हेन्‍दा ति मज्‍या ङ्‍यिङ्‍बी मुला मिडिकिवी। 37 तमा सी साङ गुन्‍डुम छ्‍याङ सम्‍बा ति क्‍वा ग्‍यिवु ङ्‍यिङ्‍बी नाङ्‍ला मुलुकिवी। तुक क्‍यासिन गुन्‍डुम छ्‍याङ सम्‍बा तीकी क्‍वा ग्‍यिवु रल्‍नी गुन्‍डुम छ्‍याङ साङ पेकिवी, क्‍वा ग्‍यिवु साङ ना डिवी। 38 गुन्‍डुम छ्‍याङ सम्‍बा ति क्‍वा ग्‍यिवु सम्‍बी नाङ्‍ला राङ ज्‍योक गोकिवी। 39 सी साङ गुन्‍डुम छ्‍याङ ङ्‍यिङ्‍बा थुसिमा गुन्‍डुम छ्‍याङ सम्‍बा थुङ्‍गुप नो मिकिवी, तमा थुङ्‍गुप तीकी ‘ङ्‍यिङ्‍बा राङ ल्‍यामु वे।’ सिनी सिवी।”