1 येशूकी खोरो लोमातिवाला सुङ्‍सुङ, “मीतिवाला दिक्‍पा कि ज्‍यितुप ताम्‍ङेतिवा ति वुतुङ के ख्‍येल्‍गिवी, यिने तुक कि ज्‍यितुप मीला याङ मोताप शुकिवी। 2 दी छ्‍युङातिवी पर्ला मिरा च्‍यिकला दिक्‍पा कि ज्‍यितुप सिनाङ बोरु तीकी ज्‍यिङ्‍बी लोला लाकुर ग्‍येर्पु रानी ग्‍येम्‍छो नाङ्‍ला क्‍युरुप ति तीकी थोक्‍ला ल्‍यामु गिवी। 3 तुक क्‍यानी ख्‍यिराङ च्‍याङ्‍से देता। दोजो ख्‍योरो अच्‍युनुपतिवी दिक्‍पा क्‍यासुङ सिसिन तीला वोरु तेन, तमा तीकी दिक्‍पा ने सेम ग्‍युर्सुङ सिसिन तीला माफ बिन। 4 तीकी ख्‍योरो तेन्‍दोकला ङ्‍यिमाला थेङ्‍मा दिन्‍कर दिक्‍पा क्‍यानी थेङ्‍मा दिन्‍कर ख्‍योरो चाला वानी, ‘ङ दिक्‍पा ने सेम ग्‍युरिन।’ सिक्‍यासिन तीला माफ बिन।”

5 तमा लोमा च्‍यिङ्‍ङीतिवी येशूला सिक्‍यासुङ, “ङ्‍यिरा तेपा ति फेल च्‍यी।” 6 तमा खोकी तिवाला सुङ्‍सुङ, “ख्‍यिराङला राय डुमा चोयी तेपा वोतुप यिन्‍सिन दी किम्‍बुकी दोङ्‍बु तीला ‘पिनी ग्‍येम्‍छो नाङ्‍ला चु।’ सिक्‍यासिन तुकै राङ च्‍युङ्‍गिवी।”

7 “ख्‍यिरा पर्ला ललाइकी ति शिङ मोतुप याङ्‍ना लुक चोप लावा यी वोज्‍यिवी। ती लावा ति पाङ नेसुर खाङ्‍बा लोक्‍नी वुङ्‍गुप पेला तीला ‘ङमु वानी सापला दे।’ सिनी सिरुप मी वे रो? 8 बोरु तीला ‘ङे समा टडिक की। तमा ङ साप ताङ थुङ्‍गुप पेला ख्‍युरुङ ङला शब्‍ज्‍यी की, तमा तिराङ ख्‍युरुङ सो।’ सिनी मिसिवी रो? 9 खोरो योक कुतुप लाका तेरी ती लावाकी क्‍यावु तप्‍की तीला थुचिछे सिवी रो? 10 तुक राङ क्‍यानी ख्‍यिराङ साङ योक कुतुप लाका तेरी क्‍यानी सिन्‍सिमा, ‘ङ्‍यिराङ याङ फेन मोथोवु लावा यिन, ङ्‍यिरा याङ कि गोवु लाका क्‍यावु तिराङ यिन।’ सिनी सी।”

11 तमा येशू यरूशलेम फेपिन कितुप पेला सामरिया ताङ गालील लुङ्‍बाकी सन्‍छम नेवा क्‍यानी फेप्‍सुङ। 12 खो युल यीला शुक्‍सालेन्‍सिन ते जे ग्‍यपुप मी मिरा च्‍यिथम्‍बाला ठेसुङ। तिवी थाक्‍रिङ्‍बु नेसुर लानी 13 थोर ग्‍यप्‍नी दुक सिक्‍यासुङ, “ओ गेकेन येशू, ङ्‍यिराङला च्‍यम्‍बा नङ्‍डे की।” 14 तिवाला थोङ्‍सिमा खोकी सुङ्‍सुङ, “ख्‍यिराङ गल्‍नी कोङ्‍यारतिवाला ख्‍यिरा जु छ्‍या तेन।” तमा तिवा लामला डोयी कितुप पेला राङ तिवी नेजु ति टेक्‍सुङ। 15 तमा तिवी पर्ला मिरा च्‍यिककी खोरुङ टेकुप ति थोङ्‍सिमा थोर ग्‍यप्‍नी कोन्‍छ्‍योकला सोवा देकिन सिरा लोक्‍नी वासुङ। 16 तमा तीकी येशूकी शापला शावा क्‍यानी खोला थुचिछे पुल्‍सुङ। ती मी ति सामरी मी यिनोक। 17 येशूकी तीला सुङ्‍सुङ, “मिरा च्‍यिथम्‍बा टेकुप मिन? यम्‍बा मिरा गु ति कनी वे? 18 काङ दी यम्‍बा लुङ्‌बाकी मी च्‍यिक मिसिन लोक्‍नी वानी कोन्‍छ्‍योकला सोवा देकुप ति यम्‍बा सु साङ मे?” 19 तमा खोकी तीला सुङ्‍सुङ, “त लानी ग्‍युक। ख्‍योरो तेपा क्‍यावु तप्‍की ख्‍युरुङ टेक्‍सुङ।”

20 थेङ्‍मा यी फरिसीतिवी येशूला कोन्‍छ्‍योककी ग्‍येल्‍खाप नम गिवी सिनी टिसिमा खोकी तिवाला दुक सुङ्‍सुङ, “कोन्‍छ्‍योककी ग्‍येल्‍खाप ति ख्‍यिरा मिककी थोङ्‍गुप दोके क्‍यानी मेङ्‍गिवी, 21 तमा ‘ल्हो ताङ, ती ति दे वे।’ याङ्‍ना ‘ती ति ते वे।’ सि मुथुपी, च्‍यिलासिसिन कोन्‍छ्‍योककी ग्‍येल्‍खाप ति ख्‍यिरा पर्ला राङ वे।”

22 ती ज्‍युक्‍ला येशूकी लोमातिवाला सुङ्‍सुङ, “तुका तुजे यी गिवी, ती पेला ख्‍यिरा ङ मी पुज्‍युङकी तुजेला ङ्‍यिमा च्‍यिक यिन्‍सिनाङ ल्‍हाप नो किवी, यिने ल्‍हाप मेङ्‍येवी। 23 मीतिवी ख्‍यिराङला ‘ल्‍होसा, खो याङ ते वे।’ याङ्‍ना ‘खो याङ दे वे।’ सिवी। यिने ख्‍यिराङ तिवी तिङ्‍ला माडो। 24 चिलाम नामगी पटी यी थाका नेसुर यम्‍बा थाका सेक ग्‍यप्‍नी तेरी ठछ्‍येली डोप दोके ङ मी पुज्‍युङ साङ खोरो तुजेला तुकै राङ क्‍यानी छ्‍या देनिन। 25 यिने दुकै च्‍युङ्‍गुप सिनाङ गोमाला ङे छेटाङ मङ्‍मु खुर गोकिवी, तमा दी गिपाकी मीतिवी ङे तेन्‍दोकला लङ्‍गिवी।

26 नोआकी ङोला चुकै च्‍युङ वे, ङ मी पुज्‍युङकी तुजेला साङ तुकै राङ च्‍युङ्‍गितो। 27 नोआ टी नाङ्‍ला माशुवा सेक्‍ला मीतिवा साप ताङ थुङ्‍गुप ताङ जेन्‍दी कियी नोक। ती पेला राङ छ्‍यर्वा ग्‍येर्पु ग्‍यप्‍नी तिवा तेरीला ना ताङ्‍सुङ। 28 लोतकी ङोला साङ तुकै राङ च्‍युङ्‍सुङ। मीतिवा साप ताङ थुङ्‍गुप ताङ ङ्‍योप्‍चे ग्‍यकुप ताङ सप्‍ले देपुप ताङ खाङ्‍बा जोयी नोक। 29 तमा लोत सदोम नेसुर थेन्‍दुप छेर्मु देवाच्‍येन नेमा मे ताङ तुसोक ग्‍यप्‍नी तेरीला ना ताङ्‍सुङ। 30 ङ मी पुज्‍युङ वुङ्‍गुप पेला साङ तुकै राङ डितो। 31 ती छेर्मु खाङ्‍बी खाते खला वोतुप मी तीकी खाङ्‍बी नाङ्‍ला खोरो च्‍यालकतिवा वोसिनाङ तिवा थेन्‍दुपला मर मपप्‍शी। तुक राङ क्‍यानी शिङ खला वोतुपतिवा खाङ्‍बा लोक्‍नी मोडोशी। 32 लोतकी पेर्मीला नासाम तोङ। 33 सी खोरो मिजी र्‍होकुप छोल्‍गिवे, ती ति तोर्किवी। तमा सी खोरो मिजी तोर ज्‍यिकिवे, ती ति र्‍होकिवी। 34 ङ ख्‍यिराङला सिरिन, ती नुपला मिरा ङ्‍यी ङ्‍यिलोकुप दासा च्‍यिकला मुला राङ ङ्‍यिलोक्‍नी वोतुप पेला मिरा च्‍यिक ति टिनी डिवी, मिरा च्‍यिक ति क्‍युर्नी ज्‍योकिवी। 35 येलुङ पुम्‍पेजा मिरा ङ्‍यी मुला राङ फे तकिन वोतुप पेला मिरा च्‍यिक ति टिनी डिवी, मिरा च्‍यिक ति क्‍युर्नी ज्‍योकिवी। 36 तुक राङ क्‍यानी मिरा ङ्‍यी शिङ खला वोतुप पेला मिरा च्‍यिक ति टिनी डिवी, मिरा च्‍यिक ति क्‍युर्नी ज्‍योकिवी।” 37 तमा लोमातिवी येशूला “चोवो, ती ति कनी च्‍युङ्‍गिवी?” सिनी टिसुङ। खोकी तिवाला सुङ्‍सुङ, “कनी शेप सेम्‍ज्‍येन नोके, ते राङ गिक्‍तातिवा जोम्‍गिवी।”