मत्तीकी टिवु लेन ल्यामु
दी थेपकी कोर्ला
दी थेप ति मत्तीकी टिवु कोन्छ्योककी लेन ल्यामु यिन। दी लेन ल्यामुला कोन्छ्योककी गोमा नेज्युनी थाक्छ्येन नङ्गुप दिक्पा ने थर ज्यितुप ति येशू राङ यिन सिक्या वे। तोङ्ला कोन्छ्योककी खोरे ज्यिक्तेम्बा यहूदीतिवाला दिक्पा ने थरुप मिरा च्यिक तोङ्गुप थाक्छ्येन नाङ्नोक। ती थाक्छ्येतुप ति खोकी येशू ख्रीष्ट जम्बुलिङला तङ्नी तेरी क्या नाङ्सुङ। दी लेन ल्यामु ति येशू ख्रीष्ट यहूदी गिपा नेमा क्येवु यिन, तमा तीकी तेन्दोक ति यहूदी गिपाकी थोक्ला तिराङ मिन, तेरी जम्बुलिङकी थोक्ला यिन।
दी मत्तीकी टिवु लेन ल्यामु ति रिम्बा क्यानी डिङ ज्याक्नी वे। दी लेन ल्यामुला येशू क्येवु पे नेज्युनी खो टुङ्गुप ताङ खो येलुङ ङोसु लावु कोर्ला सिक्या वे। दीला खो क्येवु, खोकी बप्तिस्मा लावु, खो शैतानकी खोक्पा ल्हापला ख्येलुप, गालील नेवा ख्याप्टाक क्या नङ्गुप, येन्देन नङ्गुप ताङ नेर्पुतिवाला टेक च्यितुप कोर्ला सिक्या वे। तमा खो यरूशलेम फेपुप, खो ते तिङ्मी दिन्जा सेक ज्युवु, ग्यङ्शिङला टुङ्गुप ताङ येलुङ ङोसु लावु कोर्ला सिक्या वे।
दी लेन ल्यामुकी येशू कोन्छ्योककी ठिम ताङ खोकी ग्येल्खापकी छ्याकला वोतुप ताम्ङे हाक्कोवु ताङ ओङ्ज्येन थोपुप ग्येकेन छ्ये यिन सिक्या वे। खोकी माङ्शोक येन्देनतिवा दीकी कोर्ला राङ वे।
१) पम्दोककी टोङ्गु- दी टोङ्गुकी नाङ्ला मीतिवाला गोवु च्योलामतिवा ताङ खक्छ्येवु ओङ्ज्येनकी कोर्ला टिनी वे। (लोप्च्येन ५-७)
२) लोमा च्यिङ्ङीतिवाला सुङ ख्याप्टाक कितुप क नङ्गुप (लोप्च्येन १०)
३) कोन्छ्योककी ग्येल्खापकी पेतिवा (लोप्च्येन १३)
४) लोमाकी तेन्दोक (लोप्च्येन १८)
५) तसामकी कल्वा ताङ ख्रीष्ट थेङ्मा ङ्यिवाला फेपुप कोर्ला (लोप्च्येन २४-२५)
मुला राङ वोतुप लोप्च्येनतिवा
येशू ख्रीष्टकी हङ्गावा ताङ खो क्येवु १:१–२:२३
बप्तिस्मा तेरुप यूहन्नाकी ख्याप्टाक क्यावु ३:१-१२
येशूकी बप्तिस्मा लावु ताङ शैतानकी खोला खोक्पा ल्हावु ३:१३–४:११
येशूकी गालीलला ख्याप्टाक क्या नङ्गुप ४:१२–१८:३५
येशू गालील नेज्यु यरूशलेम सेक फेपुप १९:१–२०:३४
यरूशलेमला खोकी तिङ्मी दिन्जा २१:१–२७:६६
येशू टुङ्गुप ने ङोसु लावु ताङ लोमातिवी पर्ला छ्यरुप २८:१-२०
1
येशू ख्रीष्टकी पगावा हङ्गावातिवा
(लूका ३:२३-३८)
1 येशू ख्रीष्ट ति अब्राहाम ताङ ग्येल्वु दाऊदकी गिपा यिन। दिवा ति अब्राहाम ताङ ग्येल्वु दाऊदकी गिपा येशू ख्रीष्टकी पगावा हङ्गावातिवा यिन।
2 अब्राहामकी पुज्युङ ति इसहाक,
इसहाककी पुज्युङ ति याकूब,
याकूबकी पुज्युङतिवा ति यहूदा ताङ तीकी उज्युनुपतिवा नोक।
3 यहूदाकी पुज्युङतिवा ति फारेस ताङ जाहेर नोक,
तिवी आमा ति तामार नोक।
फारेसकी पुज्युङ ति हेस्रोन,
हेस्रोनकी पुज्युङ ति आराम नोक।
4 आरामकी पुज्युङ ति अम्मीनादाब,
अम्मीनादाबकी पुज्युङ ति नहशोन,
नहशोनकी पुज्युङ ति सल्मोन,
5 सल्मोन ताङ राहाबकी पुज्युङ ति बोअज नोक।
बोअज ताङ रुथकी पुज्युङ ति ओबेद नोक।
ओबेदकी पुज्युङ ति यिशै,
6 यिशैकी पुज्युङ ति ग्येल्वु दाऊद नोक।
दाऊदकी पुज्युङ ति सोलोमन नोक।
सोलोमनकी आमा ति गोमाला उरियाहकी पेर्मी यिनोक।
7 सोलोमनकी पुज्युङ ति रहबाम,
रहबामकी पुज्युङ ति अबिया,
अबियाकी पुज्युङ ति आसा,
8 आसाकी पुज्युङ ति यहोशापात,
यहोशापातकी पुज्युङ ति यहोराम,
यहोरामकी पुज्युङ ति उज्जियाह,
9 उज्जियाहकी पुज्युङ ति योताम,
योतामकी पुज्युङ ति आहाज,
आहाजकी पुज्युङ ति हिजकिया,
10 हिजकियाकी पुज्युङ ति मनश्शे,
मनश्शेकी पुज्युङ ति अमोन,
अमोनकी पुज्युङ ति योशियाह नोक।
11 योशियाहकी पुज्युङतिवा ति यकोनियास ताङ तीकी नुपतिवा नोक।
तिवा ति यहूदीतिवाला जिम्नी बेबिलोनला टि गल्सिमा क्येवु यिन।
12 बेबिलोनला जिम्नी टि गलुप ज्युक्ला यकोनियासकी पुज्युङ ति शालतिएल,
शालतिएलकी पुज्युङ ति यरुबाबेल,
13 यरुबाबेलकी पुज्युङ ति अबिउद,
अबिउदकी पुज्युङ ति एल्याकीम,
एल्याकीमकी पुज्युङ ति आजोर,
14 आजोरकी पुज्युङ ति सादोक,
सादोककी पुज्युङ ति आखिम,
आखिमकी पुज्युङ ति एलिउद,
15 एलिउदकी पुज्युङ ति एलाजार,
एलाजारकी पुज्युङ ति मत्तान,
मत्तानकी पुज्युङ ति याकूब,
16 याकूबकी पुज्युङ ति योसेफ नोक।
योसेफकी पेर्मी ति मरियम नोक।
तमा ती मरियम नेमा येशू क्येवु यिन।
ती येशूला ख्रीष्ट सिनी सिवी।
17 तुक क्यानी अब्राहामकी पुस्तातिवा ति अब्राहामकी ङो नेज्युन दाऊद सेक पुस्ता च्युप्ज्यी, दाऊदकी ङो नेज्युन बेबिलोनला जिम्नी टि गलुप पेला सेक पुस्ता च्युप्ज्यी ताङ बेबिलोनला जिम्नी टि गलुप पे नेज्युन ख्रीष्ट* १:१७ ख्रीष्ट ति हिब्रू ताम्ङेला मसीह यिन। सेक पुस्ता च्युप्ज्यी च्युङ्गुप नोक।
येशू ख्रीष्टकी क्येताङ
(लूका २:१-७)
18 येशू ख्रीष्ट ति दुक क्यानी क्येवु यिन। खोकी आमा मरियमला योसेफकी लाङ्नी जेन्दी कितुपला थाक्छ्येनोक। यिने तिवी जेन्दी कितुप सिनाङ गोमाला के मरियम ति कोन्छ्योककी थु चाङ्मा नेमा राङ जु च्येन्दी गलुप हाक्कोनोक। 19 यिने मरियमला लोङ्गुप योसेफ ति सेम टेङ्बु वोतुप मी यिन्दुप तप्की तीकी मरियमला मी मिङ्गाला ङोछा लोङ्गुप नो माक्यानी छ्याकला तीला क्युर्नी ज्योकुप नो क्यानोक। 20 तुका नासाम तोङ्यिन वोतुप पेला योसेफकी मिलामला देवाच्येनकी लेन क्योलुप थु यी थोङ्सुङ। तमा तीकी योसेफला दुक सिक्यासुङ, “ओ, दाऊदकी गिपा योसेफ, ख्युरुङ मरियम ताङ मुला जेन्दी कितुपला ज्यिवा माकी। च्यिलासिसिन तीकी खोकला वोतुप आङा ति कोन्छ्योककी थु चाङ्मा नेमा च्युङ्गुप यिन। 21 मरियमला पुज्युङ यी क्येकितो, ख्योरो तीकी मिङ ति येशू सिनी तोसा। च्यिलासिसिन खोकी खोरो मीतिवाला दिक्पा ने थर ज्यिकितो।” 22 दी तेरी ताम्ङे च्युङ्गुप ति चोवो कोन्छ्योककी खोरे लुङ्तेम्बातिवा नेसुर दुक सुङ्गुप सुङ ति छेवुला यिन,
23 “ल्होसा, जेन्दी माक्यावु पुम्पेजा यीला पुज्युङ यी क्येकितो,
तमा मीतिवी खोला इम्मानुएल सिनी सिवितो।”
दी इम्मानुएलकी तेन्दोक ति ‘कोन्छ्योक दाक्पी मुला ज्यु वे।’ सिक्यावु यिन।* १:२३ यशैया ७:१४
24 योसेफ ङ्यी छेसिमा देवाच्येनकी लेन क्योलुप थुकी तीला सिक्यावु दोके मरियम ति खोरो पेर्मीला टि वासुङ। 25 यिने मरियमला पुज्युङ माक्येवा सेक योसेफ तीकी मुला ङ्यिमालोक, तमा पुज्युङ क्येसिमा योसेफकी ती पुज्युङकी मिङ ति येशू सिनी तासुङ।