1 येशूकी ती येन्‍देनतिवा नङ सिन्‍सिमा गालील नेसुर यर्दन चङ्‍बी फर्केन वोतुप यहूदिया लुङ्‍बा नेवा फेप्‍सुङ। 2 ते मी माङ्‍छ्‍योक खोकी तिङ्‍ला तिङ्‍यासुङ। तमा खोकी तिवी पर्ला वोतुप नेर्पुतिवाला टेक च्‍यिसुङ।

3 ते ललाइ फरिसीतिवा खोकी चाला वानी खोला खोक्‍पा ल्‍हापला “काङ तेन्‍दोक वोसिनाङ ख्‍योवी खोरो पेर्मीला डेलुप ति कोन्‍छ्‍योककी ठिमला गिवी ताङ मेङ्‍गिवी?” सिनी टिसुङ। 4 तमा येशूकी सुङ्‍सुङ, “थल्‍माला स ताङ नाम ज्‍येङ्‍गुप कोन्‍छ्‍योककी मीतिवाला ख्‍योक्‍पेजा ताङ पुम्‍पेजा जो नाङ्‍सुङ, 5 तमा खोकी ‘ख्‍योक्‍पेजा ति खोरो पपाआमा ताङ मुला कुतुक थेन्‍नी खोरो पेर्मी ताङ मुला थिन्‍नी च्‍यिक राङ च्‍युङ्‍गिवी।’ सिनी सुङ्‍गुप ति ख्‍यिरा मारा?*१९:५ उत्‍पत्ति २:२४ 6 ती तप्‍की त तिवा ङ्‍यी मिन, च्‍यिक राङ यिन। कोन्‍छ्‍योककी च्‍यिक राङ जो नङ्‍गुप तीला मीकी डेलुप मेङ्‍गिवी।” 7 तमा लोङ फरिसीतिवी खोला दुक सिनी टिसुङ, “तुकै यिन्‍सिन च्‍यिला मोशाकी ठिमला खोरो पेर्मीला टलुप यिकी टि बिन्‍नी टल्‍सिन गिवी सिनी सिक्‍यावु यिनाङ?” 8 तमा येशूकी तिवाला सुङ्‍सुङ, “ती ति ख्‍यिरा सेम क्‍योङ्‍बु वोतुप तप्‍की पेर्मी टल्‍सिन गिवी सिनी मोशाकी सिक्‍यावु यिन, यिने थल्‍माला कोन्‍छ्‍योककी नोवा ति तुकै मे। 9 ङ ख्‍यिराङला सिरिन, चुका मी तीकी खोरो पेर्मी ति शम्‍डेन माक्‍यावु यिन्‍सिनाङ तीला क्‍युर ज्‍याक्‍नी यम्‍बा पुम्‍पेजाला जेन्‍दी किवे, तीकी शम्‍डेन क्‍यावु राङ यिन।”

10 तमा खोकी लोमातिवी खोला, “ख्‍योवा ताङ पेर्मीकी तम्‍जी ति तुकै वुङ्‍गुप यिन्‍सिन जेन्‍दी माक्‍यावु राङ मङ ल्‍यामु यिन।” सिनी सिक्‍यासुङ 11 तमा येशूकी तिवाला सुङ्‍सुङ, “तेरी मीतिवी दी ताम्‍ङे ति ङ्‍येन मुथुपी, यिने सुला कोन्‍छ्‍योककी दुकै कितुप नोवा नाङ्‍वे, तीकी तिराङ ती ताम्‍ङे ङ्‍येन्‍गिवी। 12 च्‍यिलासिसिन ललाइ ति केयिन राङ रप्‍छ्‍ये गिवी, ललाइ ति मी जोवु रप्‍छ्‍ये गिवी। ललाइ ति कोन्‍छ्‍योककी ग्‍येल्‍खापकी थोक्‍ला खोरुङ राङ रप्‍छ्‍ये गिवी। सी दी ताम्‍ङेला ङ्‍येन थुप्‍किवे, तीकी ङ्‍येन्‍शी।”

13 ती पेला मी ललाइकी खोप्‍रे आङा टिक्‍पेतिवी खला येशूकी छ्‍याक ज्‍याक्‍नी मोपोर क्‍या नाङ सिनी तिवाला खोकी चाला टिनी लेसुङ। यिने लोमातिवी आङातिवाला टिनी वुङ्‍गुप मीतिवाला वोरु तेन्‍सुङ। 14 तमा येशूकी लोमातिवाला सुङ्‍सुङ, “आङा टिक्‍पेतिवाला ङे चाला वुङ च्‍यी, तिवाला माग्‍येक। च्‍यिलासिसिन कोन्‍छ्‍योककी ग्‍येल्‍खाप ति दी आङा टिक्‍पेतिवा दोके खोरुङला मो बेपुप मीतिवी ति यिन।” 15 तमा खोकी आङा टिक्‍पेतिवी खला छ्‍याक ज्‍याक्‍नी मोलाम नङ्‍सिमा खो तेसुर फेप्‍सुङ।

16 थेङ्‍मा यी मी मिरा च्‍यिक येशूकी चाला वानी खोला “ओ गेकेन, नाम्‍साङ मिशिवु मिजी ङ्‍येतुपला ङे काङ लाका टेङ्‍बु कि गोकिवी?” सिनी टिसुङ। 17 तमा येशूकी तीला “ख्‍युरुङ च्‍यिला ङला लाका टेङ्‍बुकी कोर्ला टिवी? टेङ्‍बु ति कोन्‍छ्‍योक च्‍यिक राङ यिन। ख्‍युरुङला नाम्‍साङ मिशिवु मिजी ङ्‍येतुप नो वोसिन कोन्‍छ्‍योककी मोशा नेमा नङ्‍गुप कतिवाला ङ्‍येन।” सिनी सुङ्‍सुङ। 18 तमा तीकी येशूला “चुका कतिवा?” सिनी टिसुङ। तमा येशूकी तीला “मी मासे, शम्‍डेन माकी, कुन माकी, पङ्‍बु जिनोक माजो, 19 ख्‍योरो पपाआमाला ताङ्‍देन की, तमा खोरो युल्‍वातिवाला रङला दोके ङ्‍यिङ्‍ज्‍ये की।” सिनी सुङ्‍सुङ। 20 खोकी तुक सुङ्‍सिमा ती ख्‍योक्‍पेजा नाज्‍युङ तीकी येशूला “दिवा याङ तेरी ङे ङ्‍येन वे। तरोङ साङ ङे ङ्‍येन गोवु ति काङ वे?” सिनी सिक्‍यासुङ। 21 तमा येशूकी तीला सुङ्‍सुङ, “ख्‍युरुङ कोन्‍छ्‍योककी नोवा दोके तेरी कितुप मी च्‍युङ्‍गुप नो वोसिन ख्‍योरो लोला वोतुप नोर टोङ्‍बातिवा चोनी पेराङ्‍बुतिवाला बिन। तुक क्‍यासिन ख्‍युरुङला देवाच्‍येनकी टोङ्‍बा थोप्‍किवी। तमा ती ज्‍युक्‍ला ख्‍युरुङ ङे तिङ्‍ला तिङ्‍यो।” 22 ती ताम्‍ङे थोसिमा ती मी ति सेम्‍दुक लानी गाल्‍सुङ, च्‍यिलासिसिन तीकी मुला नोर टोङ्‍बा बङी नोक।

23 तमा येशूकी लोमातिवाला सुङ्‍सुङ, “वुतुङ के ङ ख्‍यिराङला सिरिन, मी छ्‍युक्‍पुतिवाला याङ कोन्‍छ्‍योककी ग्‍येल्‍खापला शुकुप ति छासे कले गिवी। 24 येलुङ ङ ख्‍यिराङला सिरिन, मी छ्‍युक्‍पुतिवा कोन्‍छ्‍योककी ग्‍येल्‍खापला शुकुप सिनाङ सेम्‍ज्‍येन वोङ्‍मु ति खपकी मिरु नाङ्‍ला शुकुप ति मङ जोल्‍हमु गिवी।” 25 ती थोसिमा लोमातिवा छासे हलेवा लानी, “तुकै यिन्‍सिन चुका मी ति कोन्‍छ्‍योककी थर्वा ङ्‍ये थुप्‍किवी?” सिनी सिक्‍यासुङ। 26 तमा येशूकी तिवी थाकाला ल्‍हानी दुक सुङ्‍सुङ, “मीतिवी ति कि मुथुपी, यिने कोन्‍छ्‍योककी तेरी कि थुप्‍किवी।”

27 तमा पत्रुसकी खोला “ल्‍हो ताङ, चोवोकी तिङ्‍ला तिङ्‍योकुपला ङ्‍यिरा तेरी क्‍युर्नी ज्‍याकिन। त कोन्‍छ्‍योक नेमा ङ्‍यिराङला काङ ङ्‍येकिवी?” सिनी सिक्‍यासुङ। 28 तमा येशूकी तिवाला “वुतुङ के ङ ख्‍यिराङला सिरिन, दी जम्‍बुलिङ तेरी सम्‍बा फोनी ङ मी पुज्‍युङ खोरो मोवा वोतुप ग्‍येल्‍ठिकला देनी ग्‍येला कितुप पेला ख्‍यिराङ ङे तिङ्‍ला तिङ्‍योकुपतिवा साङ ग्‍येल्‍ठिक च्‍यिङ्‍ङीला देनी इस्राएलकी मिरिक च्‍यिङ्‍ङीकी खला ठिम कितो। 29 तमा सी ङे थोक्‍ला खोरो खाङ्‍बा ताङ अच्‍युनुप ताङ अज्‍यीनुम ताङ पपाआमा ताङ पुज्‍युङपुम ताङ शिङ क्‍युर ज्‍याक्‍नी ङे तिङ्‍ला तिङ्‍योकिवे, तीला तीकी क्‍युर्नी ज्‍यकुप सिनाङ दोम्‍बा सयी मङ ल्‍हक्‍पा थोप्‍किवी, तमा नाम्‍साङ मिशिवु मिजी थोप्‍किवी। 30 यिने गोमाला वोतुपतिवा बङी तिङ्‍ला गिवी, तिङ्‍ला वोतुपतिवा बङी गोमाला गिवी।” सिनी सुङ्‍सुङ।