1 येलुङ येशू यहूदी छ्‍योखाङला फेपुप पेला ते लाक्‍पा च्‍यिक कम्‍बु ठोक गलुप मी यी नोक। 2 ते वोतुप मीतिवा ललाइकी खोला क्‍येन तेरुप नोनी ङासोप ङ्‍यिमाला खोकी ती मी तीला टेक ज्‍यिकिते यिन्‍दे सिनी चिवा क्यानी देसुङ। 3 येशूकी ती लाक्‍पा कम्‍बु ठोक गलुप मी तीला “मी तेरीकी दोङ्‍ला लो।” सिनी सुङ्‍सुङ। 4 तमा खोकी तिवाला “ङासोप ङ्‍यिमाला लाका ल्‍यामु कितुप टेके यिनाङ की, मेलोक्‍पा कितुप टेके यिन? तमा मिजी थर ज्‍यितुप टेके यिनाङ की, सेतुप टेके यिन?” सिनी टिसुङ। यिने तिवा खरक्‍पा सोके देसुङ। 5 येशू ङ्‍यिर्मु लानी तिवा तेरीला ल्‍हासुङ। तमा तिवी सेम क्‍योङ्‍बु वोतुप थोङ्‍नी छासे सेम्‍दुक लानी ती लाक्‍पा कम्‍बु ठोक गलुप मीला “ख्‍योरे लाक्‍पा क्‍योङ।” सिनी सुङ्‍सुङ। तमा तीकी लाक्‍पा क्‍याङ्‍सुङ, क्‍याङ्‍सिमा तीकी लाक्‍पा टेक्‍सुङ। 6 ती ज्‍युक्‍ला फरिसीतिवा पाङ्‍ला गल्‍नी हेरोदी छ्‍योक्‍पाकी मीतिवी मुला येशूला चुक क्‍यानी सेतुप सिनी खोप्‍राङ पर्ला केवुल क्‍यासुङ।

7 तेसुर येशू खोरे लोमातिवी मुला ग्‍येम्‍छो गारीला फेप्‍सालेन्‍सिन गालील लुङ्‍बा नेसुर मी माङ्‍छ्‍योक खोकी तिङ्‍ला तिङ्‍यासुङ। 8 ती पेला यहूदिया ताङ यरूशलेम ताङ इदुमिआ ताङ यर्दनकी फर्केन नेसुर ताङ टुरोस ताङ सीदोनकी गारी गुरी नेमा साङ मी माङ्‍छ्‍योक येशूकी क्‍यावु हलेवु लाकाकी कोर्ला थोनी खोकी चाला लेसुङ। 9 मी माङ्‍छ्‍योककी खोरुङला मेटेप्‍शी सिनी येशूकी लोमातिवाला खोरो थोक्‍ला टु च्‍यिक टडिक कि सिनी सुङ्‍सुङ। 10 च्‍यिलासिसिन खोकी मी मङ्मुला टेक च्‍यितुप तप्‍की नेर्पुतिवा तेरी खोला रेक्‍शी सिनी खोकी चाला सुर्तुम ग्‍यकिन नोक। 11 तमा डेतिवी येशूला चो पेला थोङ्‍गिवे, ती पेला राङ तिवा खोकी चाला खवुतुङ्‍मा देनी, “ख्‍युरुङ कोन्‍छ्‍योककी सेवु यिन।” सिनी चार ग्‍यप्‍सुङ। 12 यिने खोकी तिवाला खोरुङ सु यिन सिरुप ति मासिर सिनी क छ्‍येम्‍बु नाङ्‍सुङ।

13 ती ज्‍युक्‍ला येशू रीला फेप्‍नी खोकी नोवाला वोतुपतिवाला खोकी चाला कताङ्‍सुङ, तमा तिवा खोकी चाला वासुङ। 14 खोकी तिवी नाङ ने मिरा च्‍यिङ्‍ङी पेनी तिवाला लोमा छ्‍ये सिनी चिसुङ। 15 खोकी दुक क्‍यावु तेन्‍दोक ति तिवा खोकी मुला देतुप ताङ खोकी तिवाला ख्‍याप्‍टाक कितुप तोङ्‍गुप ताङ तिवाला डेतिवा थेन्‍दुप ओङ तेरुपला यिन। 16 खोकी चिवु मिरा च्‍यिङ्‍ङी नाङ्‍ला च्‍यिक ति सिमोन यिन। तीला ति खोकी पत्रुस सिनी मिङ तासुङ। 17 तमा जब्‍दियाकी पुज्‍युङ याकूब ताङ तीकी नुप यूहन्‍ना यिन। तिवाला ति खोकी बोअनर्गेश सिनी मिङ तासुङ। बोअनर्गेशकी तेन्‍दोक ति ‘डुककी पुज्‍युङतिवा’ यिन। 18 तमा अन्‍द्रियास ताङ फिलिप ताङ बारथोलोमाइ ताङ मत्ती ताङ थोमा ताङ अल्‍फयसकी पुज्‍युङ याकूब ताङ थेदियस ताङ कनानकी मी सिमोन ताङ 19 यहूदा इस्‍करियोत यिन। ती यहूदा इस्‍करियोत ति येशूला जिम्‍नी तेरुप मी यिन।

20 तमा येशू खाङ्‍बा यीला फेप्‍सुङ, ते येलुङ मी मङ्‍मु जोम्‍बुप तप्‍की खो ताङ खोकी लोमातिवाला समा सलुङ साङ माच्‍युङ। 21 ती ताम्‍ङे थोनी खोकी मिछाङतिवा खोला टि डोपला लेसुङ, च्‍यिलासिसिन मीतिवी “खोकी सेम थिला मिन्‍दुक।” सिनी सिक्‍यानोक।

22 तमा यरूशलेम ने वावु यहूदी छ्‍योकी गेकेनतिवी “येशूला डेतिवी ग्‍येल्‍वु बालजिबुल ग्‍यम्‍नोक, तमा ती बालजिबुलकी ओङ नेसुर राङ तीकी डेतिवा देन्‍गिनोक।” सिनी सिक्‍यासुङ। 23 ती थोनी येशूकी तिवाला खोरो चाला कताङ्‍नी पे नेसुर दुक सुङ्‍सुङ, “चुक क्‍यानी शैतानकी शैतानला थेन थुप्‍किवी रो? 24 दोजो ग्‍येल्‍खाप च्‍यिककी नाङगी मीतिवा खोप्‍राङ पर्ला ख्‍ये पेसुङ सिसिन ती ग्‍येल्‍खाप ति लु मुथुपी। 25 येलुङ खाङ्‍बा च्‍यिककी नाङगी मीतिवा खोप्‍राङ पर्ला ख्‍ये पेसुङ सिसिन ती खाङ्‍बा ति लु मुथुपी। 26 तमा शैतान खुरुङ राङ ख्‍ये पेसुङ सिसिन ती ति लु मुथुप्‍नी ना डिवी। 27 गोमाला मी रम्‍बुला कोङ माकिन्‍दा सेक्‍ला सी साङ ती मीकी खाङ्‍बी नाङ्‍ला शुनी तीकी च्‍यालक कुन डो मुथुपी। तीला कोङ किन्‍सिमा तिराङ तीकी खाङ्‍बी च्‍यालक कुनी डो थुप्‍किवी। 28 ङ ख्‍यिराङला टेङ्‍बो सिरिन, मीतिवी क्‍यावु तेरी दिक्‍पातिवा ताङ मारे तोङ्‍गुप ताम्‍ङेतिवा ति माफ ङ्‍येकिवी, 29 यिने सी साङ कोन्‍छ्‍योककी थु चाङ्‍माला मारे ताङ्‍सिन तीला ति नाम्‍साङ माफ मेङ्‍येवी, तमा तीला नरी दिक्‍पाकी क्‍येन लुकिवी।” 30 येशूकी दी पे सुङ्‍गुप ति तिवी “खोला डेकी कुलुप यिन।” सिनी सिक्‍यावु तप्‍की यिन।

31 ती पेला येशूकी आमा ताङ नुपतिवा वानी पाङ्‍ला देनी मी च्‍यिक खोला कतोङ ताङ्‍सुङ। 32 तमा मी मङ्‍मु येशूकी गारी गुरीला देनी खोला दुक सिक्‍यासुङ, “ल्‍हो ताङ, गेकेनकी आमा ताङ नुपतिवा पाङ्‍ला गेकेनला ठेतुपला छोलिन नोक।” 33 तमा येशूकी तिवाला टिसुङ, “सु ङे आमा ताङ ङे नुपतिवा यिन?” 34 तमा खोकी खोरे गारी गुरीला देन वोतुपतिवाला ल्‍हानी सुङ्‍सुङ, “ल्‍हो ताङ, ङे आमा ताङ ङे नुपतिवा ति दिवा राङ यिन। 35 सी कोन्‍छ्‍योककी नोवा दोके किवे, तिवा राङ ङे नुप ताङ नुम ताङ आमा यिनो।”