7
चेङ्गा ताङ मेचेङ्गाकी कोर्ला येशूकी सुङ्गुप
(मत्ती १५:१-९)
1 ती पेला फरिसीतिवा ताङ यरूशलेम ने वावु यहूदी छ्योकी गेकेनतिवा ललाइ येशूकी चाला जोम्नोक। 2 तमा तिवी येशूकी लोमातिवा ललाइकी यहूदी लुक्सु मातेन्नी लाक्पा माटुवा क्यानी लाक्पा मेचेङ्गा थ्वोनी समा सोवु ति थोङ्सुङ। 3 फरिसीतिवा ताङ तेरी यहूदीतिवी ताङ्बो ङोकी लुक्सु र्हुङ्नी खोप्रे लाक्पा माटुवा क्यानी समा मसानोक। 4 येलुङ हाट ने लोक्नी वासिमा खोप्रे जु माटुवा क्यानी समा मसानोक। तिवी यम्बा लुक्सुतिवा साङ बङी नोक, ती ति कइ ताङ लोटा ताङ काँसाकी तिप्लीतिवा माटुवा क्यानी मोथोक्नोक।
5 तेसुर फरिसीतिवा ताङ यहूदी छ्योकी गेकेनतिवी येशूला टिसुङ, “ख्योरे लोमातिवी च्यिला ताङ्बो ङोकी लुक्सु मातेन्नी लाक्पा मेचेङ्गा थ्वोनी समा सोवुजा?” 6 खोकी तिवाला सुङ्सुङ,
“ख्यिराङ खोनक्पुतिवी कोर्ला कोन्छ्योककी लुङ्तेम्बा यशैयाकी दुक सिनी ल्यामो क्यानी टि वे,
‘मीतिवी ङला खला तिराङ ताङ्देन किवी,
यिने तिवी सेमला ति ङला ङ्याम मिकिनोक।
7 तिवी ङला तेर्मेला सोवा देकिवी,
च्यिलासिसिन तिवी मी जोवु येन्देनला ङे क दोके क्यानी मीतिवाला लोप्किनोक।’
8 ख्यिराङ कोन्छ्योककी क ति क्युर्नी मीतिवी लुक्सु तेन्गिनोक।”
9 लोङ खोकी तिवाला सुङ्सुङ, “ख्यिराङ ख्यिरा लुक्सु तेन्दुपला कोन्छ्योककी क ति जोल्हमु क्यानी क्युर्नी ज्योकिनोक। 10 तोङ्ला मोशाकी ‘ख्योरो पपाआमाला ताङ्देन की।’ सिनी सिक्या वे। तमा ‘सी पपा याङ्ना आमाला मारे तोङ्गिवे, तीला से गोकिवी।’ सिनी सिक्या वे। 11 यिने ख्यिरा याङ मीतिवाला दुक सिनी लोप्किनोक, दोजो मी ललाइकी खोरो पपा याङ्ना आमाला ‘ङे ख्यिराङला कि गोवु शब्ज्यी ति कुर्बान यिन।’ सिनी सिक्यासिन ती मी तीकी खोरो पपा याङ्ना आमाला शब्ज्यी कि मोगोवी सिनी ख्यिरा सिवी। (ती कुर्बानकी तेन्दोक ति कोन्छ्योकला पुलुप बुल्वा यिन।) 12 ख्यिरा दुक सिनी मीतिवाला खोरो पपा याङ्ना आमाला काङ साङ शब्ज्यी कि मिज्यिनोक। 13 तुक क्यानी ख्यिरा जोवु लुक्सु तेन्दुपला कोन्छ्योककी सुङला ति तेर्मेला जोसुङ। ख्यिरा तुका लाका यम्बा साङ बङी क्या वे।”
14 तमा येशूकी येलुङ मी माङ्छ्योकला खोरो चाला कताङ्नी सुङ्सुङ, “ख्यिराङ तेरीकी ङे ताम्ङे ङ्येन्नी हाक्कोवा किसा। 15 पाङ नेसुर मीकी नाङ्ला शुकुप काङगी साङ मीला मेचेङ्गा मोजोवी, यिने मीकी नाङ नेसुर पाङ्ला थेन्दुप तीकी मीला मेचेङ्गा जेवी। 16 सी ति ङ्येन्दुप नाम्ज्योक नोके, तीकी ङ्येन्शी!”
17 तेसुर येशू मी मङ्मुला क्युन ज्याक्नी खाङ्बा यी नाङ्ला फेप्सिमा खोकी लोमातिवी ती पेकी कोर्ला खोला टिसुङ। 18 तमा खोकी तिवाला सुङ्सुङ, “काङ ख्यिराङ तरोङ साङ हाक्मोकोवी? काङ पाङ नेसुर ख नेमा मी खोकला डोप समी मीला मेचेङ्गा मोजोवी सिरुप ति ख्यिराङला छ्या मे? 19 ती याङ मी सेमला मिन, यिने खोकला लेप्नी तेसुर पाङ्ला थेन डिवी।” (येशूकी दुक सुङ्गुप ति साप समा तेरी चेङ्गा यिन सिनी सुङ्गुप यिन।) 20 लोङ खोकी तिवाला सुङ्सुङ, “काङ मी सेमगी नाङ नेमा पाङ्ला थेन्दुप तीकी मीला मेचेङ्गा जेवी। 21 मी सेमगी नाङ नेमा थेन्दुप सेम नक्पुतिवा ति दिवा राङ यिन। छ्येवु छ्येमु कितुप, कुन कितुप, मी सेतुप, शम्डेन कितुप, 22 देर्पा कितुप, सेम दुक्टा कितुप, क्येन्दुप, सेम नोजु कितुप, ठतोक कितुप, मारे तोङ्गुप, ङराङ यिन सिरुप ताङ अम्बारङ्शिङ कितुप यिन। 23 दी तेरी मेलोक्पातिवा सेमगी नाङ नेमा थेन्नी मीला मेचेङ्गा जेवी।”
सिरिया लुङ्बाकी फोनिके नेसुर वावु पुम्पेजा यीकी तेपा
(मत्ती १५:२१-२८)
24 तेसुर येशू टुरोसकी लुङ्बा नेवा फेप्सुङ। तमा खो खाङ्बा यी नाङ्ला शुनी सी साङ हाक्मोकोशी सिनी ते ज्युवु नो क्यासुङ, यिने खो यिप्नी ज्यु माथुप। 25 ती पेला डेकी कुलुप पुमकी आमा यीकी येशूकी कोर्ला थोनी ते वानी खोकी शापला शावा क्यासुङ। 26 ती पुम्पेजा ति ग्रीककी मी यिनोक, तमा सिरिया लुङ्बाकी फोनिकेला क्येनोक। तीकी येशूला खोरो पुम नेसुर डे थेन नाङ सिनी गोङ्बा शुसुङ। 27 येशूकी तीला सुङ्सुङ, “गोमाला पेजातिवाला डाता सेक स च्यि गोकिवी। पेजातिवी शुब्ज्याङ लानी कीतिवाला तेरुप ल्यामु मिन।” 28 तमा तीकी खोला सिक्यासुङ, “लसे, चोवो। यिने कीतिवी साङ च्योक्ची ख नेमा लुम्बुप पुर्मातिवा सेवी।” 29 तमा खोकी सुङ्सुङ, “ख्योरो दुक सिक्यावु तप्की त ख्युरुङ ख्योरो खाङ्बा ग्युक। ख्योरो पुमकी नाङ नेसुर डे ति थेन्नी गाल।” 30 ती पुम्पेजा ति खोरो खाङ्बा गल्नी ल्हासालेन्सिन तीकी पुम ति ठीकी खला देनी वोतुप थोङ्सुङ, तमा डे ति थेन्नी गल सिन्नोक।
वोन्बा ताङ कुवा वोतुप मी यीला येशूकी टेक च्यितुप
31 येलुङ येशू टुरोस नेसुर सीदोनला फेप्नी तेसुर गालील ग्येम्छो नेसुर क्यानी डेकापोलिस ग्येसाला फेप्सुङ। 32 ती पेला मीतिवी वोन्बा ताङ कुवा वोतुप मी यी येशूकी चाला टि वानी दीकी गोला छ्याक ज्याक नाङ सिनी गोङ्बा शुसुङ। 33 तमा येशूकी ती मीला तिराङ मी मङ्मी पर नेसुर फेचेक टि फेप्नी खोरे लाक्पी थेप्तोक ति तीकी नाम्ज्योक नाङ्ला च्यिसुङ। ती ज्युक्ला खोकी ती लाक्पी थेप्तोकला च्येमाक कुनी ती मीकी च्येलाकला रेक्सुङ, 34 तमा देवाच्येन ने ल्हयिन सिरा ङ्येन्बी सोक ताङ्नी तीला “इफ्फाता!” सिनी सुङ्सुङ। (तीकी तेन्दोक ति “पेशी!” सिक्यावु यिन।) 35 खोकी तुक सुङ्लुङ्मे शार्क्येक ती मी तीकी नाम्ज्योक ति पेनी थोवु गाल, च्येलाक साङ गुल्नी ताम्ङे ल्यामु लप थुपुप गल्सुङ। 36 तमा येशूकी मीतिवाला दी ताम्ङे ति सुला साङ मालाप सिनी क छ्येम्बु नाङ्सुङ। यिने खोकी चो क नङ्सिनाङ मीतिवी खोकी कोर्ला मङ ताम्ङे टाम्सुङ। 37 तमा ती ताम्ङे थोवु मीतिवा छासे हलेवा क्यानी, “खोकी तेरी लाका ल्यामु क्यासुङ। खोकी वोन्बाला साङ थोवु ताङ कुवाला साङ ताम्ङे ल्यामु लप थुपुप जोसुङ।” सिनी सिक्यासुङ।