कोन्छ्योककी यूहन्नाला नङ्गुप
ज्यल्का
दी थेपकी कोर्ला
दी यिकी ति यूहन्नाला छ्यरुप कोन्छ्योककी छ्याकला वोतुप ताम्ङेतिवा यिन। ती पेला ख्रीष्टियानतिवा छासे छेटाङ ताङ दुक्पाला ख्येल्नोक। च्यिलासिसिन तिवी येशू ख्रीष्टला रङगी चोवो यिन सिनी तेपा क्यानोक। दी ताम्ङे ति ती काले वोतुप पेला टिवु यिन। खक्छ्येवुला खोरो टिवु यिकी रोकुपतिवाला यूहन्नाकी रेवा ताङ ङाडेङ तेरुपला ताङ तिवाला दुक्पा ताङ छेटाङला तेपा रम्बु क्यानी दे गोकिवी सिनी सिक्या वे।
दी थेपला वोतुप माङ्शोक लोप्च्येनतिवा ताङ ठछ्येली हाक्कोवु ताम्ङेतिवा ति ततिवाला छ्या तेन वे। दुका त ति ती पेलाकी ख्रीष्टियानतिवी हाक्को थुप्किवी, यिने यम्बातिवाला ति हाक्कोवु कले गिनोक। दी थेपकी नाङ्ला कोन्छ्योककी छ्याकला वोतुप ताम्ङेतिवा रिम्बा क्यानी कुतुक कुतुक येलुङ येलुङ लोकुर ग्यप्नी वे। मी बङीकी दी थेपकी तेन्दोक कुतुक कुतुक वोतुप थोङ्गिवी, यिने खक्छ्येवु तेन्दोक ति ठछ्येली वे। ती ति कोन्छ्योककी चोवो येशू ख्रीष्ट नेसुर शैतान ताङ खोकी डतिवा तेरीला नरीकी थोक्ला ना तोङ्गिवी, तमा खोकी नम पेला ग्येला क्या नङ्गिवे, ती पेला खोला तेपा कितुपतिवाला छ्यक्तक ति देवाच्येन सम्बा ताङ जम्बुलिङ सम्बाकी मोलाम नङ्गिवी।
मुला राङ वोतुप लोप्च्येनतिवा
यिकीकी कोर्ला १:१-८
थल्माकी छ्याकला वोतुप कोन्छ्योककी ताम्ङे ताङ चर्च दिनला यिकी १:९–३:२२
लज्युर दिनतिवा वोतुप बिटप ४:१–८:१
ग्येलिङ दिनतिवा ८:२–११:१९
डुक ताङ सेम्ज्येन ङ्यीतिवा १२:१–१३:१८
कोन्छ्योककी छ्याकला वोतुप ताम्ङे नम्बा कुतुकतिवा १४:१–१५:८
कोन्छ्योककी पर्च्याकी कोरा दिन १६:१-२१
बेबिलोनला तेन तङ्गुप, सेम्ज्येन फम्बुप, लुङ्तेम्बा मेटेङ्बु ताङ शैतान १७:१–२०:१०
तिङ्मी ठिम २०:११-१५
देवाच्येन सम्बा, जम्बुलिङ सम्बा ताङ यरूशलेम सम्बा २१:१–२२:५
सिन्दा क्यावु २२:६-२१
1
1 दी थेप नाङ्ला वोतुप ताम्ङेतिवा ति येशू ख्रीष्टकी हाक्को च्यितुप ताम्ङे यिन। कोन्छ्योककी खोला शब्ज्यी कितुपतिवाला दी जम्बुलिङला ङमु राङ च्युङ्गुप ताम्ङेतिवी कोर्ला हाक्को ज्यितुपला खोरे सेवु येशू ख्रीष्टला दी ताम्ङे ति सुङ्गुप यिन। तमा येशूकी देवाच्येनकी लेन क्योलुप थु च्यिक यूहन्नाकी चाला ताङ्नी ती तेरी ताम्ङेतिवा यूहन्नाला ठछ्येली हाक्को च्यिसुङ। 2 तमा यूहन्नाकी खोरो थोङ्गुप कोन्छ्योककी सुङ ताङ येशू ख्रीष्टकी पङ्बु नङ्गुप ताम्ङेतिवा तेरी शेसुङ। 3 मीतिवाला दी थेपकी नाङ्ला वोतुप कोन्छ्योककी लुङ्तेम्बाकी सुङतिवा रानी तेरुप मी ताङ दी सुङतिवा ङ्येन्दुप मीतिवा ताङ ती सुङला सिक्यावु दोके क्यानी मिजी क्योङ्गुप मीतिवाला मोलाम थोपुप यिनो। च्यिलासिसिन दी थेप नाङ्ला वोतुप ताम्ङेकी तुजे ति ङमु राङ छेकिवी।
चर्च दिनकी मीतिवाला यूहन्नाकी टसी देलेक
4 एशिया लुङ्बाकी चर्च दिन्करला वोतुप तेपा कितुप मीतिवाला ङ यूहन्नाकी छ्योक नेमा टसी देलेक! थल्माला ज्यु वोतुप ताङ तसाम साङ ज्यु वोतुप ताङ तिङ्ला फेपुप चोवो कोन्छ्योक नेमा ख्यिराङला कटिन ताङ लोदिमु वुङ्शिता। खोकी ग्येल्ठिककी दोङ्ला वोतुप थु दिन्कर नेसुर साङ कटिन ताङ लोदिमु वुङ्शिता। 5 तमा पङ्बु टेङ्बु वोतुप ताङ तेरी सिनाङ थल्माला शेप ने ङोसु लङ्गुप जम्बुलिङकी ग्येल्वी खकी ग्येल्वु येशू ख्रीष्ट नेसुर कटिन ताङ लोदिमु वुङ्शिता।
येशू ख्रीष्टकी दाक्पुला ङ्यिङ्ज्ये क्या नङ्गुप ताङ खो ग्यङ्शिङला टुङ्नी खोकी ठक नेसुर दाक्पी दिक्पा ता च्यिसुङ। 6 तमा दाक्पुला खोकी ग्येल्खापकी मीतिवा जोनी पपा कोन्छ्योककी थोक्ला शब्ज्यी कितुप कोङ्यार जो नाङ्सुङ। खोला राङ नरीकी नरी मोवा ताङ ओङ्ज्येन वुङ्शी। आमिन।
7 ल्होसा, खो मुक्पी ख नेमा फेप्कितो।
खो फेवु ति मी तेरीकी मिककी थोङ्गितो।
खोला दुङ सुरुप मीतिवी साङ खो फेवु ति थोङ्गितो।
तमा जम्बुलिङला वोतुप तेरी मिरिककी मीतिवा खो फेपुप तप्की ङुप्राङ कितो।
तुकै राङ वुङ्शिता। आमिन।
8 “ङ ति अल्फा ताङ ओमेगा यिन।”* १:८ तीकी तेन्दोक ति जम्बुलिङकी थल्मा ताङ तिङ्मा ति ङ राङ यिन। सिनी तेरी सिनाङ चोछ्ये वोतुप चोवो कोन्छ्योककी सुङ्नी वे। खो हारिङ ज्यु वे, थल्माला साङ ज्यु वोतुप यिन, लोङ तिङ्ला साङ फेप्किवी।
यूहन्नाला येशूकी छ्यरुप
9 ङ यूहन्ना ति ख्यिराङ दोके येशू ख्रीष्टला तेपा कितुप अच्यु यिन। ङ साङ ख्यिरा मुला राङ खोकी ग्येल्खापला दे छ्योवु च्युङ्गुपला छेटाङ दुङल खुरुप ताङ हम क्यानी देनी वे। ङे कोन्छ्योककी सुङ ख्याप्टाक क्यावु ताङ येशू ख्रीष्टकी थोक्ला पङ्बु बिन्दुप तप्की छ्येर्पा बिन्नी ग्येम्छो पर्ला वोतुप पत्मोस सिरुप ग्येम्छो परकी स कम्बुला† १:९ तीकी तेन्दोक ति टापू यिन। वोतुप पेला 10 ते चोवोकी ङ्यिमाला कोन्छ्योककी थु चाङ्मा ङला फेप्नी ङ खोकी ओङला वोतुप पेला कशेन क्यानी ग्येलिङ पुवु दोके वोरु ग्येर्पु ग्यप्सुङ। तमा ङे तिङ्ला दुक सिरुप वोरु यी थोसुङ। 11 “ख्योरो काङ थोङ्गुप ति थेप च्यिककी नाङ्ला टिनी एफिसस ताङ स्मुर्ना ताङ पर्गामम ताङ थिआटीरा ताङ सार्डिस ताङ फिलाडेल्फिया ताङ लाउडिकिया चर्च दिन्करला तोङ।”
12 ङला तुक सिनी ताम्ङे लपुप तीला ल्हाप सिनी ङे तिङ्ला ग्युर्नी ल्हासालेन्सिन शाप च्यिक राङ वोतुप सेरकी मेलाङ दिन चोके नोक। 13 तमा ती सेरकी मेलाङ पर्ला मी सेवु दोके शाप सेक नम्सा नुम्नी छेकोक लोला सेरकी करा च्यिवु मी मिरा च्यिक वोतुप ति ङे थोङ्सुङ। 14 खोकी गो ताङ र्ह ति वोमा ताङ ख दोके कर्मु नोक, खोकी मिक ति मे मेलाप दोके नोक। 15 तमा खोकी शापतिवा ति काँसा शितुप दोके वो ग्यकुप ताङ खोकी वोरु ति शोतोक ग्यपुप दोके ग्येर्पु नोक। 16 तमा खोकी छ्याक यावाला कर्मा दिन चोके जिम्नी नोक। खोकी ख नेमा खुर्पा च्यिक थेन्नोक। ती खुर्पा ति ख ङ्यी वोतुप नोक। खोकी शाल ति ङ्यिमा शरुप दोके वो ग्यकुप नोक।
17 खोला थोङ्सिमा ङ ति शेप दोके गल्नी तला ग्यप्सुङ। तमा खोकी छ्याक यावा ति ङे खला ज्याक्नी दुक सिनी सुङ्सुङ, “ज्यिवा माकी। थल्मा नेज्युनी वोतुप ति ङ राङ यिन, तिङ्ला सेक नरी लुवु साङ ङ राङ यिन। 18 तमा ङोसु वोतुप ति ङ राङ यिन। ल्होसा, ङ शिनी साङ नरीकी थोक्ला सेन्बु लानी वे। सुला छ्येर्पा बिन्नी ङ्येलाला तोङ गोकिवे, ती ओङ्ज्येन ति ङला वे। 19 तुक क्यानी ख्योरो थोङ्गुप ताङ तन्दा च्युङ्गुप ताम्ङेतिवा ताङ ज्युक्ला काङ च्युङ्गिवी सिरुप ति तेरी थेप नाङ्ला टिसा। 20 दी ङे लाक्पा यावाला थोङ्गुप कर्मा दिनकी तेन्दोक ताङ ती शाप च्यिक राङ वोतुप सेरकी मेलाङ दिनकी छ्याकला वोतुप तेन्दोक ति ङ ख्युरुङला सिरिन, कर्मा दिन ति चर्च दिनकी थोक्ला लेन क्योलुप देवाच्येनकी थुतिवा यिन। तमा मेलाङ दिन ति चर्च दिनतिवा यिन।”