1 तुक क्‍यानी त याङ येशू ख्रीष्‍टला तेपा कितुपतिवाला कोन्‍छ्‍योककी पर्च्या मोफोकिवी। 2 च्‍यिलासिसिन येशू ख्रीष्‍टला तेपा क्‍यासिमा मिजी सम्‍बा नङ्‍गुप कोन्‍छ्‍योककी थु चाङ्‍माकी ठिमकी ख्‍यिराङला दिक्‍पा ताङ शेपकी ठिम ने थर च्‍यिन वे। 3 मीतिवाला दिक्‍पा वोतुप तप्‍की मोशाकी ठिमकी काङ साङ कि मुथुप्‍नोक, यिने कोन्‍छ्‍योककी तिवी थोक्‍ला क्‍यासुङ। तीकी तेन्‍दोक ति खोकी च्‍यिक राङ वोतुप सेवु येशू ख्रीष्‍ट ति दिक्‍छेन दोके दी जम्‍बुलिङला ताङ्‍नी मीतिवी दिक्‍पी थोक्‍ला जिन्‍बा च्‍युङ्‍सुङ। तमा मीतिवी क्‍यावु दिक्‍पाकी छ्‍येर्पा ति खोकी खला ख्‍येल च्‍यिसुङ। 4 तुक क्‍यावु ति दिक्‍पाकी ओङला मिन, कोन्‍छ्‍योककी थु चाङ्‍माकी ओङला युकुप दाक्‍पी थोक्‍ला कोन्‍छ्‍योककी ठिमकी सिक्‍यावु दोके तेरी छे ज्‍यितुपला यिन।

5 दिक्‍पाकी ओङला युकुपतिवा ति दिक्‍पी नासाम तोङ्‍गिवी, यिने कोन्‍छ्‍योककी थु चाङ्‍माकी ओङला युकुपतिवा ति थु चाङ्‍माकी नासाम तोङ्‍गिवी। 6 दिक्‍पी नासाम ति शेप यिन, यिने कोन्‍छ्‍योककी थु चाङ्‍माकी नासाम ति मिजी ताङ लोदिमु यिन। 7 तमा दिक्‍पी नासाम ताङ्‍नी युकुप ति कोन्‍छ्‍योक ताङ मुला डला गलुप यिन, च्‍यिलासिसिन तुका मी ति कोन्‍छ्‍योककी नङ्‍गुप ठिमला सिक्‍यावु दोके युकुप साङ मुयुकिवी, कितुप साङ मुथुपी। 8 तुक क्‍यानी दिक्‍पी नासाम ताङ्‍नी युकुप मी तीकी कोन्‍छ्‍योकला गा लोङ मुथुपी। 9 यिने कोन्‍छ्‍योककी थु चाङ्‍मा ख्‍यिरा मिजीला वोसिन ख्‍यिराङ दिक्‍पाकी ओङला देतुप मिन, कोन्‍छ्‍योककी थु चाङ्‍माकी ओङला मिजी क्‍योङ्‍गुप यिन। तुक क्‍यानी सी मुला ख्रीष्‍टकी थु मेवे, ती ति ख्रीष्‍टकी मी मिन। 10 दोजो ख्‍यिरा मिजीला ख्रीष्‍ट येशू वोसिन ख्‍यिरा जु ति दिक्‍पा क्‍यावु तप्‍की शिसिनाङ कोन्‍छ्‍योककी थोङ्‍दाङला टेङ्‍बु वोतुप तप्‍की ख्‍यिरा सेम ति सेन्‍बु लुकिवी। 11 दोजो येशूला शेप ने ङोसु लोङ्‍गुप कोन्‍छ्‍योककी थु चाङ्‍मा ति ख्‍यिरा मिजीला ज्‍यु वोसुङ सिसिन, येशूला शेप ने ङोसु लोङ्‍गुप कोन्‍छ्‍योककी ख्‍यिरा मुला ज्‍यु वोतुप खोकी थु चाङ्‍मा नेमा ख्‍यिरा शेप जु साङ सेन्‍बु लोङ्‍गिवी।

12 तुक क्‍यानी अच्‍युनुपतिवा, कोन्‍छ्‍योककी थु चाङ्‍माकी दाक्‍पुला सुङ्‍गुप दोके क्‍यानी दाक्‍पी मिजी क्‍योङ गोकिवी, दिक्‍पाकी ओङला सेम नोजु क्‍यानी मिजी क्‍योङ्‍गुप मेवी। 13 दोजो ख्‍यिराङ दिक्‍पाकी ओङला सेम नोजु क्‍यानी राङ मिजी क्‍योङ्‍गिवी सिसिन शिवी, यिने कोन्‍छ्‍योककी थु चाङ्‍माकी ओङ नेसुर ख्‍यिरा दिक्‍पाकी ओङला मिजी क्‍योङ्‍गुप क्‍युर्सुङ सिसिन ख्‍यिराङ सेन्‍बु लुकिवी। 14 च्‍यिलासिसिन सु कोन्‍छ्‍योककी थु चाङ्‍माकी सिक्‍यावु दोके मिजी क्‍योङ्‍गिवे, तिवा तेरी कोन्‍छ्‍योककी पेजातिवा यिन। 15 त याङ ख्‍यिराङ ज्‍यिवा लङ्‍गुप दिक्‍पाकी ओङला मिन, कोन्‍छ्‍योककी थु चाङ्‍माकी ओङ थोपुप तप्‍की ख्‍यिराङ कोन्‍छ्‍योककी पेजातिवा यिन। तुक क्‍यानी दाक्‍पी कोन्‍छ्‍योकला “पपा” सिनी सि थुप्‍किवी। 16 तमा कोन्‍छ्‍योककी थु चाङ्‍माकी दाक्‍पी सेम ताङ मुला राङ दाक्‍पु ति कोन्‍छ्‍योककी पेजातिवा यिन सिरुप ति पङ्‍बु नङ्‍गिवी। 17 दाक्‍पु कोन्‍छ्‍योककी पेजातिवा यिन सिसिन ख्रीष्‍टकी मुला राङ कोन्‍छ्‍योककी ग्‍येल्‍खापकी अंश थोप छ्‍योवु यिन। दोजो दाक्‍पु ख्रीष्‍टकी मुला राङ कोन्‍छ्‍योककी मोवा थोप्‍नी वोसिन खोकी मुला राङ दुक्‍पा साङ खुर गोकिवी।

18 तसाम पेला दी मिजीला दाक्‍पुला वुङ्‍गुप दुक्‍पा ताङ ज्‍युक्‍ला दाक्‍पुला ङ्‍येतुप कोन्‍छ्‍योककी मोवा ति डिक्‍नी ल्‍हासिन ती दुक्‍पा ति काङ साङ मिन सिनी नासाम शर्किवी। 19 कोन्‍छ्‍योककी ज्‍ये नङ्‍गुपतिवा तेरीकी खोकी पेजातिवा वुङ्‍गुप ति ल्‍हापला छासे रेवा क्‍यानी गुनी देन वे। 20 च्‍यिलासिसिन खोकी ज्‍ये नङ्‍गुपतिवा तेरी फेन मोथोवु गल वे, ती ति खुरुङ राङ तुकै गलुप मिन, खोकी नोवाकी राङ जो नङ्‍गुप यिन। यिने तिवाला रेवा ति वे। 21 ती रेवा ति खोकी ज्‍ये नङ्‍गुपतिवा तेरी ना डोप ने र्‍होक्‍नी तिवा खोकी पेजातिवाला नङ्‍गुप मोवा वोतुप रङ्‍ज्‍येन थोपुप रेवा यिन। 22 तसाम सेक खोकी ज्‍ये नङ्‍गुप तेरीला छासे दुक्‍पा वोतुप तप्‍की आङा क्‍येप सुक ग्‍यपुप दोके छेटाङला ख्‍येल वे सिरुप ति दाक्‍पुला छ्‍या वे। 23 तिवा तिराङ मिन, खोकी थु चाङ्‍मा नेसुर गोमाला गरुप डेलु यिन्दुप दाक्‍पु साङ खोकी पेजातिवा च्‍युङ्‍गुपला ताङ खोकी दाक्‍पी मिजी ति तेरी थर्वा नङ्‍शी सिनी दुक्‍पा वोसिनाङ रेवा क्‍यानी गुनी देन वे। 24 च्‍यिलासिसिन दाक्‍पी ती रेवा क्‍यावु तप्‍की खोकी दाक्‍पुला थर्वा नाङ वे। ती रेवा ति दाक्‍पी मिककी थोङ्‍गुप रेवा मिन। च्‍यिलासिसिन सी साङ थोङ्‍गुप च्‍यालकला रेवा मिकिवी। 25 यिने दाक्‍पु मिककी मोथोङ्‍गुप च्‍यालकला रेवा किवी सिसिन ती रेवा क्‍यावु ति माथोपा सेक हम क्‍यानी गुनी दे गोकिवी।

26 तुक राङ क्‍यानी कोन्‍छ्‍योककी थु चाङ्‍माकी साङ दाक्‍पु काङ साङ कि मुथुपुप पेला दाक्‍पुला दाल्‍जा क्‍या नङ्‍गिवी, च्‍यिलासिसिन दाक्‍पी चुक सिनी मोपोर कि गोकिवी दाक्‍पुला हाक्‍मोकोवी, यिने कोन्‍छ्‍योककी थु चाङ्‍माकी राङ दाक्‍पी छापला ङ्‍येन्‍बी सोक ताङ्‍नी मीकी कि मुथुपुप ताम्‍ङेला मोपोर क्‍या नङ्‍गिवी। 27 तमा तेरी मीतिवी सेमगी ताम्‍ङे ल्‍यामु हाक्‍कोवु कोन्‍छ्‍योककी राङ खोकी थु चाङ्‍माकी नोवा काङ यिन सिरुप ति हाक्‍कोकिवी, च्‍यिलासिसिन कोन्‍छ्‍योककी नोवाला वोतुप दोके थु चाङ्‍माकी खोला तेपा कितुप मीतिवी छापला मोपोर क्‍या नङ्‍गिवी।

28 कोन्‍छ्‍योकला ङ्‍यिङ्‍ज्‍ये कितुपतिवा ताङ खोकी नोवा नेसुर पेतुप मीतिवाला ख्‍येल वुङ्‍गुप छेटाङ दुङल ताङ लोदिमु काङ वोसिनाङ खोकी ती तेरी मुला राङ ल्‍यामु जो नङ्‍गिवी सिरुप ति दाक्‍पुला छ्‍या वे। 29 खोकी जम्‍बुलिङ ज्‍येङ्‍गुप सिनाङ गोमाला के खोरे ङो शेवु मीतिवाला पेनी खोरे पुज्‍युङकी जुजम दोके च्‍युङ्‍गुपला जो नाङ्‍सुङ। तुक क्‍यानी ती पुज्‍युङ ति नुपतिवी नाङ्‍ला तेरी सिनाङ छ्‍ये च्‍युङ्‍गुप यिन। 30 सु सुला खोकी गोमाला के पेन नङ वे, पेन नङ्‍गुपतिवाला खोकी कताङ नाङ्‍सुङ। तमा कतङ्‍गुपतिवाला खोकी थोङ्‍दाङला टेङ्‍बु जो नाङ्‍सुङ। तमा टेङ्‍बु जो नङ्‍गुपतिवाला खोकी मोवा साङ नाङ्‍सुङ।

31 दी ताम्‍ङेतिवा ति नासाम तङ्‍सिन दाक्‍पु काङ सि थुप्‍किवी? दोजो कोन्‍छ्‍योक दाक्‍पी छ्‍योला ज्‍यु वोसिन सु दाक्‍पी तेन्‍दोकला लङ थुप्‍किवी? 32 दाक्‍पी दिक्‍पी थोक्‍ला कोन्‍छ्‍योककी खोरे सेवु साङ र्‍होक माज्‍याक्‍नी दाक्‍पुला नाङ्‍सुङ सिसिन, खोकी सेवुकी मुला राङ यम्‍बा साङ तेरी कटिन नेसुर दाक्‍पुला मानङ्‍गिवी रो? 33 खोकी पेन नङ्‍गुप मीतिवाला सी साङ क्‍येन ग्‍यक मुथुपी। तिवाला टेङ्‍बु सिनी चेप ति कोन्‍छ्‍योक राङ यिन। 34 तुक क्‍यानी सी तिवाला क्‍येन तेर्किवी? येशू ख्रीष्‍ट ति मीतिवी दिक्‍पी थोक्‍ला टुङ्‍सिमा ङोसु लानी तन्‍दा कोन्‍छ्‍योककी छ्‍याक यावी थाकाला ज्‍युनी दाक्‍पी छापला मोपोर कियी वे। 35 ती तप्‍की सी दाक्‍पुला येशू ख्रीष्‍टकी ङ्‍यिङ्‌ज्‍ये नेसुर क्‍येङ्‍सु जो थुप्‍किवी रो? दुक्‍पाला ख्‍येल्‍सिनाङ, दुङलला ख्‍येल्‍सिनाङ, छेटाङला ख्‍येल्‍सिनाङ, ल्‍होरेला गल्‍सिनाङ, पेर्तुङ्‍बा थेन्‍सिनाङ, दुक्‍टा ताङ खुर्पाकी कङगी साङ दाक्‍पुला ख्रीष्‍ट नेसुर क्‍येङ्‍सु जो मुथुपी। 36 ती तप्‍की कोन्‍छ्‍योककी सुङला दुक सिनी टि वे,

37 तुकै यिन्‍सिनाङ ङ्‍यिराङला ङ्‍यिङ्‌ज्‍ये क्‍या नङ्‍गुप ख्रीष्‍ट येशू नेसुर दाक्‍पु ति तिवा तेरीकी खला मङ ग्‍येल वे। 38 तमा दाक्‍पुला छासे तेन्‍तेन वे। दाक्‍पु शेप यिन्‍सिनाङ मिजी यिन्‍सिनाङ, याङ्‍ना देवाच्‍येनकी लेन क्‍योलुप थुतिवा यिन्‍सिनाङ दी जम्‍बुलिङला ओङ्‍ज्‍येन कितुपतिवा यिन्‍सिनाङ, याङ्‍ना तसाम पेलाकी ताम्‍ङे यिन्‍सिनाङ ज्‍युक्‍थमाला वुङ्‍गुप ताम्‍ङे यिन्‍सिनाङ दी जम्‍बुलिङकी ङार यिन्‍सिनाङ, 39 याङ्‍ना स ताङ नामला वोतुप ओङ यिन्‍सिनाङ कोन्‍छ्‍योककी ज्‍ये नङ्‍गुप जम्‍बुलिङला वोतुप तेरी च्‍यालकतिवा काङगी साङ ङ्‍यिराङला ख्रीष्‍ट येशूला वोतुप कोन्‍छ्‍योककी ङ्‍यिङ्‍ज्‍ये नेसुर क्‍येङ्‍सु तोङ मुथुपी।