1 दाक्‍पु तेपा रम्‍बु वोतुपतिवी तेपा रम्‍बु मेतुपतिवी नोरुप लाका क्‍यासिनाङ तिवाला हम क्‍यानी दे गोकिवी। दाक्‍पु तिराङ गा कितुप लाका माकी। 2 दाक्‍पु तेरीकी मी यम्‍बातिवी तेपा रम्‍बु जोपला ल्‍यामु क्‍यानी तिवाला गा लङ्‍गुप लाका कितुप। 3 च्‍यिलासिसिन ख्रीष्‍टकी साङ खोरुङ तिराङ गा माक्‍या। ती तप्‍की कोन्‍छ्‍योककी सुङला दुक सिनी टि वे, “चोवोकी तेन्‍दोकला लानी बिन्‍दुप क्‍येन ति तन्‍दा ङला फोक्‍सुङ।”*१५:३ भजन ६९:९ 4 तुक क्‍यानी तोङ्‍ला कोन्‍छ्‍योककी सुङला टिवु ताम्‍ङेतिवा दाक्‍पी थोक्‍ला येन्‍देन तेरुप च्‍युङ वे। ती सुङगी नाङ्‍ला वोतुप हम क्‍यानी देतुप ताङ टोङ्‍गु नेसुर दाक्‍पुला रेवा ङ्‍येकिवी। 5 ती दाक्‍पुला हम क्‍यानी दे थुपुप ताङ टोङ्‍गु नङ्‍गुप कोन्‍छ्‍योककी ख्‍यिराङ तेरीला येशू ख्रीष्‍टकी क्‍यावु दोके च्‍यिककी च्‍यिकला सेम थिन्‍नी मिजी क्‍योङ्‍गुपला दाल्‍जा किटे किशी। 6 तमा ख्‍यिराङ तेरी सेम च्‍यिक्‍पा राङ च्‍युङ्‍गुप ताङ ख च्‍यिक क्‍यानी दाक्‍पी चोवो येशू ख्रीष्‍टकी पपा कोन्‍छ्‍योकला सोवा देक थुप्‍शी।

7 तुक क्‍यानी येशू ख्रीष्‍टकी कोन्‍छ्‍योकला मोवा कितुप थोक्‍ला ख्‍यिराङला सेमला लावु दोके ख्‍यिरा साङ च्‍यिककी च्‍यिकला सेमला लङ गोकिवी। 8 ङ ख्‍यिराङला सिरिन, येशू ख्रीष्‍टकी कोन्‍छ्‍योक टेङ्‍बु वोतुप छ्‍या देन्‍दुपला लावा दोके क्‍यानी दी जम्‍बुलिङला फेप्‍नी च्‍येतुप लुक्‍सु क्‍यावु यहूदीतिवाला शब्‍ज्‍यी क्‍यासुङ। तुक क्‍यासिमा कोन्‍छ्‍योककी दाक्‍पी पगावा हङ्‍गावाला थाक्‍छ्‍येन नङ्‍गुप पङ्‍बु ति छ्‍या तेन्‍सुङ। 9 तमा यहूदी मिन्‍दुप मिरिक यम्‍बाकी मीतिवी खोकी नङ्‍गुप च्‍यम्‍बाकी थोक्‍ला खोला मोवा क्‍यासुङ। ती तप्‍की कोन्‍छ्‍योककी सुङला दुक सिनी टि वे,

10 येलुङ दुक सिनी साङ टि वे,

11 तमा येलुङ,

12 येलुङ कोन्‍छ्‍योककी लुङ्‍तेम्‍बा यशैयाकी दुक सिनी टि वे,

13 ख्‍यिराङला रेवा नङ्‍गुप कोन्‍छ्‍योककी ख्‍यिरा क्‍यावु तेपाकी थोक्‍ला गा ताङ लोदिमु तेरी नङ्‍शी। तमा ख्‍यिराङ खोकी थु चाङ्‍माकी ओङला मङ मङ रेवा क्‍यानी दे थुप्‍शी।

14 ङे अच्‍युनुपतिवा, ख्‍यिराङ रङला राङ मी यम्‍बाला ल्‍यामु कितुप ताङ गोवु तेरी येन्‍देन वोतुप ताङ च्‍यिककी च्‍यिकला टोङ्‍गु तेर थुपुप गल वे सिरुप ति ङला तेन्‍तेन वे। 15 यिने ङ ख्‍यिराङला छासे ङाडेङ क्‍यानी माङ्‍शोक ताम्‍ङेतिवा येलुङ नासाम शर ज्‍यितुपला दी यिकी टिवु यिनो। 16 कोन्‍छ्‍योककी ङला नङ्‍गुप कटिनकी जोसालेन्‍सिन ङ ति येशू ख्रीष्‍टकी थोक्‍ला शब्‍ज्‍यी बुलुप मी च्‍युङ्‍नी यहूदी मिन्‍दुप मिरिक यम्‍बाकी मीतिवाला लेन ल्‍यामु ख्‍याप्‍टाक कितुप कोङ्‍यारकी लाकातिवा कितुपला पेन नङ्‍गुप यिन। तुक क्‍यानी यहूदी मिन्‍दुप मिरिक यम्‍बाकी मीतिवा साङ खोकी थु चाङ्‍माकी ओङला टेङ्‍बु च्‍युङ्‍नी खोला गा लङ्‍गुप बुल्‍वा च्‍युङ थुप्‍शी। 17 ती तप्‍की ङ ति येशू ख्रीष्‍टकी ओङला देनी कोन्‍छ्‍योकला शब्‍ज्‍यी बुलुप लाका कितुपला छासे तेके कितिन। 18 येशू ख्रीष्‍टकी ङे मिजी नेमा यहूदी मिन्‍दुप मिरिक यम्‍बाकी मीतिवाला खला ङ्‍येमु जोपला काङ क्‍या नाङ्‍वे, ती तिराङ मिसिन यम्‍बा काङ साङ ताम्‍ङे लपुप ङाडेङ मिकी। ती लाका ति ङे ख्‍याप्‍टाक क्‍यावु सुङ ताङ ङे क्‍यावु लाका ताङ, 19 ततिवा ताङ हलेवु लाकाकी ओङ ताङ, कोन्‍छ्‍योककी थु चाङ्‍माकी ओङ नेसुर क्‍यावु यिन। तुक क्‍यानी येशू ख्रीष्‍टकी लेन ल्‍यामु ति यरूशलेम नेज्‍युनी इल्‍लुरिकन सेक तेरी दासाला ङे ख्‍याप्‍टाक क्‍यायी। 20 मी यम्‍बी कोन्‍छ्‍योककी लेन ल्‍यामु ख्‍याप्‍टाक क्‍यावु दासाला येलुङ ख्‍याप्‍टाक कितुपला ङे नो माक्‍या, यिने सी साङ कोन्‍छ्‍योककी लेन ल्‍यामु ख्‍याप्‍टाक माक्‍यावु दासाला तिराङ ख्‍याप्‍टाक कितुप ति ङे नोवा वे। 21 तीकी कोर्ला कोन्‍छ्‍योककी सुङला दुक सिनी टि वे,

22 तुक क्‍यानी ङ ख्‍यिरा ते वुङ्‍गुपला थेङ्‍मा बङी क्‍येक्नी वे। 23 त याङ दी दासाला कोन्‍छ्‍योककी थोक्‍ला ङे कि गोवु लाका काङ साङ मेतुप ताङ लो अला गोमा नेज्‍युनी ङ ख्‍यिरा ते वुङ्‍गुप नो वोतुप तप्‍की 24 ङ स्‍पेनला डोप पेला ख्‍यिराङला साङ ठेनी ख्‍यिरा मुला चेयी पर सेक लोदिमु कितुप नो क्‍यायी। तमा ङ स्‍पेनला डोप पेला ख्‍यिरा ङला दाल्‍जा किवी सिरुप ति ङला रेवा वे। 25 यिने त याङ ङ कोन्‍छ्‍योकला तेपा कितुप अच्‍युनुपतिवाला दाल्‍जा किटे कितुपला यरूशलेमला डोयी वे। 26 च्‍यिलासिसिन यरूशलेमला वोतुप तेपा कितुप मी पेराङ्‍बुतिवी थोक्‍ला माकेडोनिया ताङ अखैयाकी तेपा कितुप मीतिवी गा ताङ क्‍यानी टङ्‍गा चेयी दुम्‍नी कल ताङ वे। 27 ती टङ्‍गा ति तिवी सेम्‍बा सेमगी दुम्‍नी ज्‍याक्‍नोक। वुतुङ के तिवी तुका पेराङ्‍बुतिवाला दाल्‍जा किटे कि गोकिवी। च्‍यिलासिसिन दोजो यहूदी मिन्‍दुप मिरिक यम्‍बाकी मीतिवा कोन्‍छ्‍योककी थु चाङ्‍माकी मोलाम थोपुप यिन्‍सिन तिवाला थोपुप मोलाम नेसुर यरूशलेमला वोतुप तेपा कितुप मीतिवी कतुकारला दाल्‍जा किटे कि गोकिवी। 28 तुक क्‍यानी मकेडोनिया ताङ अखैयाकी तेपा कितुप मीतिवी कल तङ्‍गुप टङ्‍गा ति यरूशलेमला चेक तेसिमा ङ ति स्‍पेनला डिवी। ती पेला ङ ख्‍यिरा ते साङ वुङ्‍गुप्‍नो। 29 ङ ख्‍यिरा ते वुङ्‍गुप पेला ख्रीष्‍ट नेसुर वुङ्‍गुप मोलाम बङी खुर्नी वुङ्‍गुप्‍नो।

30 अच्‍युनुपतिवा, दाक्‍पी चोवो येशू ख्रीष्‍ट ताङ कोन्‍छ्‍योककी थु चाङ्‍माकी ङ्‍यिङ्‍ज्‍ये नेसुर ङे थोक्‍ला कोन्‍छ्‍योकला छासे क्‍यानी मोपोर की सिनी ङ ख्‍यिराङला ठाकुरे सिनी गोङ्‍बा शोयी। 31 ङ यहूदियाला वोतुप तेपा मिकिवु मीतिवी लक नेसुर थर थुप्‍शी, तमा यरूशलेमला वोतुप कोन्‍छ्‍योकला तेपा कितुप मीतिवी थोक्‍ला ङे शब्‍ज्‍यी क्‍यावु ति मीतिवी सेमला डोशी। 32 तमा कोन्‍छ्‍योककी नोवा वोसिन ङ ख्‍यिरा ते वासिमा ख्‍यिरा मुला सेम गा क्‍यानी च्‍यिककी च्‍यिकला टोङ्‍गु तेर थुप्‍शी सिनी मोपोर क्‍या नाङ। 33 सेमला लोदिमु नङ्‍गुप कोन्‍छ्‍योक ति ख्‍यिराङ तेरीकी मुला नरी ज्‍युशी। आमिन।