5
Sorne nja dhünggü
1 Nïkïrï aꞌa ka tasala sorne ka nïïsö ma kuri, tanno ömöꞌdï ya emmi ka kööyö ya ikirinja ka teene miini nja ꞌdugeere miini, kabünnü nahitimi kide ana hitimi na ïïdümmü kafünü eera no. 2 Nasala tadhangga ana türü eema koꞌdꞌdo iki, “Mada iꞌi yungngo ama taꞌbuna nahitimi kuꞌbu afaꞌda sorne?” 5.2 Danial 12.4 3 Taalo ömöꞌdï ka ꞌdotomboꞌdo nja ꞌbüdhülü nja ꞌbüdhülü ka tümꞌbü atambaanya tafaꞌda sorne assa ka nïïmö tiya inggide ya. 4 Natafara ꞌdo kudumma ömöꞌdï ka titaalo adunadene ma tama tafaꞌda sorne ïïrï nïïmö ya inggide ya assa kide. 5 Ïkïrï tadïïfï könö ka tiki aꞌa, “Fa tafara, assa tagaamu ma siliga ma Yahüüsa, a ꞌbereere a ma Dawud iꞌi akiiꞌbaana ana türü, aꞌbunaana nahitimi na ïïdümmü kafünü eera no afaꞌda sorne.” 5.5 Takwiin 49.9; Asaiya 11.1, 10
6 Nïkïrï aꞌa ka tassa ka dhünggü 5.6 Asaiya 53.7; Yühanna 1.29 kafeene afa miini ka tendhe aꞌdïngnge ka söödö ma kööyö nja eema tiya efe ka ꞌdï ya egïïsö ya nja kadïïfï. Nja dhünggü ya ana ïïdö ka ïïdümmü kafünü eera nja ïïye ka ïïdümmü kafünü eera no, eege ka nagoronggore na Masala na ïïdümmü kafünü eera no, kagürünüdene ka ꞌbüdhülü ka oona nyeꞌdꞌde. 7 Ïkïrï dhünggü ka ööꞌdö aꞌduga sorne ka nïïsö ma kuri tanno ömöꞌdï tiya emmi ka kööyö ya. 8 Kini ka ꞌduga sorne ya, ïkïrï eema ya egïïsö ya efe ka ꞌdï ya nja kadïïfï no kukumu kadu kafünü egïïsö no ka tüürü ka dhünggü kidha a nagüüge, kisirinꞌdi ungngo eene ka iisine eege ïnꞌdïlï, a naadho ma dahaba kadigine a kondho, teema nja Masala na kadu tanno insili no eege kamiini. 9 Katagüüwe tüüsü ma issi mo 5.9 Tüüsü ma Nakaaru 33.3; Asaiya 42.9–10 kiki,
“Oꞌo nama taꞌduga sorne
nafaꞌda nahitimi miini
kudumma üüdü ka takatendhe
na oꞌo taana kadu a Masala ana erïïdö tiya üüdü
ndama kadu kasiliga nja tumma ka tambananjaana kuꞌbu nja kadu nja naanya ꞌdo.
10 Nanangnga eege kada tauugaara nja kaꞌboge na Masala, 5.10 Töꞌdö kürö 19.6; Danial 7.22, 27
kada naguugaara ma ꞌbüdhülü.”
11 Nassa co afeꞌde naföönyö tumma ma kadhangga dhabbu. Kakuꞌdu kööyö ka oona nja eema tiya efe ka ꞌdï nja kadïïfï. Eege na alif kafünü kide ana alif kadaꞌbaaga. 5.11 Danial 7.10 12 Kalneege koꞌdꞌdo kiki,
“Dhünggü ya atendhe ya
iꞌi yungngo ama taꞌduga türü nja eema dhabbu nja taꞌdara nja türü
nja tïndhïgï koꞌdo nja tafünügü koꞌdo.”
13 Naföönyö aꞌa eema tiya ka ꞌdotomboꞌdo ya nja tiya ka ꞌbüdhülü nja tiya ka ꞌbüdhülü ka tümꞌbü ya nja tiya ka to ya nja ꞌbuugu ka oona nyeꞌdꞌde iki,
“Ömöꞌdï tiya emmi ka kööyö ya nja dhünggü,
kada kanangnga taꞌdiila a Masala
nja tïndhïgï koꞌdo nja tafünügü koꞌdo nja türü turi taꞌbilli.”
14 Eema ya efe ka ꞌdï ya egïïsö ya tiki, “Amiin,” a kadïïfï tüürü kuꞌbu a nagüüge kafara kini.