7
Kadu ma Israyil nöꞌdö 144,000
1 Nggeege afeꞌde nasala aꞌa kadhangga ka egïïsö kaꞌdïngnge koꞌdo ka naꞌdugugini ma ꞌbüdhülü ada egïïsö miini, kakara a tanya ma ꞌbüdhülü na egïïsö no, amang ka tanya tafa tïïsö ka ꞌbüdhülü nja to alla naafa. 2 Nafada nasala tadhangga könö öꞌdö koꞌdo ndama fïïnï ma ndanaaya, hitimi ya Masala tammo efe ka ꞌdï mo ungngo iini. Ümmünü kadhangga na egïïsö no koꞌdꞌdo na ana türü ma tagaꞌda ꞌbüdhülü nja to no. 3 Iki eene, “Aaga fa tagaꞌda ꞌbüdhülü nja to nja naafa, ara ungngo kabünnü hitimi ka kasaga tanno Masala tammo aja ka nadhugudha.” 4 Nïkïrï aꞌa ka aföönyö aꞌda kadu na kabünnü hitimi kene ka nadhugudha no köꞌdö na alif a kadu ka ïïdümmü a kadu keera kafünü egïïsö (144,000) ndama siliga ma Israyil nyeꞌdꞌde kungngo.
5 Na alif kadaꞌbaaga kafünü eera (12,000) ndama siliga tiya Yahüüsa
na alif kadaꞌbaaga kafünü eera (12,000) ndama siliga tiya Röbin
na alif kadaꞌbaaga kafünü eera (12,000) ndama siliga tiya Jad.
6 Na alif kadaꞌbaaga kafünü eera (12,000) ndama siliga tiya Ashiir
na alif kadaꞌbaaga kafünü eera (12,000) ndama siliga tiya Naftali
na alif kadaꞌbaaga kafünü eera (12,000) ndama siliga tiya Manasi.
7 Na alif kadaꞌbaaga kafünü eera (12,000) ndama siliga tiya Shamön
na alif kadaꞌbaaga kafünü eera (12,000) ndama siliga tiya Lawi
na alif kadaꞌbaaga kafünü eera (12,000) ndama siliga tiya Yasakir.
8 Na alif kadaꞌbaaga kafünü eera (12,000) ndama siliga tiya Zabaloon
na alif kadaꞌbaaga kafünü eera (12,000) ndama siliga tiya Yüüsïf
na alif kadaꞌbaaga kafünü eera (12,000) ndama siliga tiya Binyamiin.
Kadu na dhabbu no
9 Nïkïrï aꞌa ka tasala kadu kadhabbu taalo ömöꞌdï ma tambaanya tinni eege ndama naanya nja kadu ꞌdo nja tumma ka tambananjaana kuꞌbu, kaꞌdïngnge ana köꞌdö kidha ma kööyö nja kidha ma dhünggü, kümmü enꞌdi ya kaꞌbassa ya ka oona, kümmü iisine ma naafa ma tamuru. 10 Kiidhe koꞌdꞌdo kiki,
“Toolona kungngo a Masala tammo aja
ma emmi ka kööyö mo
nja dhünggü afeꞌde.”
11 A kadhangga nyeꞌdꞌde takakuꞌdu kööyö koꞌdo nja kadïïfï nja eema tiya efe ka ꞌdï ya egïïsö ya. Küürü ka kööyö kidha ana dhugudha kümmü Masala, 12 kiki aꞌda,
“Amiin, tafünügü koꞌdo nja tïndhïgï koꞌdo nja tussu eema
nja tamana taꞌdiila nja tïndhïgï koꞌdo
nja türü nja tambaanya ka na Masala tammo aja turi taꞌbilli.
Amiin.”
13 Ömöꞌdï könö ana ka kadïïfï iki aꞌa, “Kadu öjö eege kungngo kümmü enꞌdi ya ꞌbassa ya ka oona, eege köꞌdö ndama kiga?”
14 Nïkïrï aꞌa ka tiki iini, “Ömöꞌdï eede, nussu oꞌo.”
Iki aꞌa aꞌda, “Kadu no eege kungngo koolonadene ka dhügürü tiya dhiiri ya, eege kamiini, 7.14 Danial 12.1; Matta 24.21 kagunu enꞌdi yeene ana erïïdö ma dhünggü anangnga eege kada kaꞌbassa. 7.14 Asaiya 1.18
15 Yungngo eene ka tanna kidha ma kööyö tanno Masala
kalinggo ada oono uuru ana ooso kungngo ka la tiya oono,
nja ömöꞌdï tiya emmi ka kööyö ya
ara taküdhü eege ka oona ka fangga tammo iini.
16 Taalo ïïre ara tagu eege,
a tenege ka tagu eege afeꞌde,
taalo ndanaaya ara taguꞌdu eege,
a taguꞌdaana taalo kara tala eege ka oona. 7.16 Asaiya 49.10
17 Kudumma dhünggü ya ka söödö ma kööyö ya ara tadasaana afa kene
uurugu eege ka nduguli ma ꞌbïïdï ma tefe ka ꞌdï. 7.17 Tüüsü ma Nakaaru 23.1–2; Yühanna 6.35; Yühanna 7.37–38; Yühanna 10.11–14
A Masala tayugu ꞌbïïdï ma ïïye eene ka ïïye.” 7.17 Asaiya 25.8