15
Kadhangga na ïïdümmü kafünü eera no nja namaara ka ïïdümmü kafünü eera
1 Nïkïrï aꞌa ka tasala nïïmö keefe ka ꞌdotomboꞌdo adhabbu kaꞌdiila, kadhangga ka ïïdümmü kafünü eera kümmü namaara no ïïdümmü kafünü eera no, eege kungngo keere a Masala ka tatïïmö tagorooꞌbo noono iini. 2 Nasala aꞌa ꞌbuugu kafeene nja to tammo insili afa gasasa mo katonggoonyo ana ïssï, nasala kadu no kiiꞌbi nïïmö ma toroko nja koronggore tiya iini ana tamana ma eere tiya iini. Kaꞌdïngnge ana koꞌdo ka tinggini ma gasasa mo, kümmü erempeera na Masala ka anangnga eene ka nïïsö no. 3 Küüwe tüüsü ma Müüsa tasaga ya Masala, 15.3 Serïye ya eera ya 32.4 nja tüüsü ma dhünggü kiki,
“Ka Masala Uugaara ma ana türü mo,
kadhabbu linggo nüüdü keefe,
nafïïnï nüüdü ka dhidho ka dhorro,
Uugaara ma nagürüünü nyeꞌdꞌde.
4 Ka Uugaara, mada iꞌi yungngo taalo ara tariꞌba oꞌo, afünügü eere yüüdü koꞌdo?
Oꞌo na insili unggodho oꞌo. 15.4 Armiya 10.6–7
Ara kadu nyeꞌdꞌde sa kööꞌdö küürü küdü kidha
kudumma linggo üüdü a dhidho, a kadu tadïnö kide nyeꞌdꞌde.” 15.4 Tüüsü ma Nakaaru 86.9–10
5 Nïkïrï aꞌa ka tassa co nasala la ma Masala nja fangga ma tumma ma Masala ka tatanfaꞌda ka ꞌdotomboꞌdo. 6 A kadhangga töꞌdö kürö ndama la ma Masala ka ïïdümmü kafünü eera, maara ma ïïdümmü mafünü eera mungngo eene, kümmü enꞌdi ya insili ya alimaana ya ka oona kimiꞌdi naaro ana jönnö ma dahaba. 7 Könö ka eema tiya efe ka ꞌdï ya egïïsö ya tanangnga naadho ma dahaba ka ïïdümmü kafünü eera a kadhangga tanno ïïdümmü kafünü eera no kadigine a tagorooꞌbo ma Masala, tammo efe ka ꞌdï turi taꞌbilli mo. 8 La ma Masala tadigine ana ndhïïgö ma tïdhïndhï nja türü tanno Masala, taalo ömöꞌdï ma tambaanya co la ma Masala, ara maara ma ïïdümmü mafünü eera ma kadhangga tanno ïïdümmü kafünü eera no kööꞌdö iini no ka titaalo.