9
Masala nja kadu ma Israyil
1 Ara aꞌa tadirina tumma aaga dhorro ana eere ma Almasiihi taalo aꞌa nakorokoro eedi yeede ussu aꞌa a Koronggore tiya Insili ya. 2 Namüürü aꞌa ꞌdo, tinꞌdi kungngo eede ka eedi taalo kaadha. 3 Nagala aꞌa ka tasaasa ka eyi tiya eede aꞌda a linggi tagu na aꞌa takaadha ka fïïnï tiya Almasiihi kudumma siliga ma aꞌa nja nagöre tanno neede. 4 Eege ka laala tiya Israyil na Masala ka tümmü eege kada laala tiya oono no, nja tïdhïndhï nja timiꞌdi tumma nja serïye nja tümmü Masala nja tïndhïgï. 5 Kafaafa kungngo eene, Almasiihi öꞌdö ka tuuꞌda, iꞌi yungngo a Masala ma eema nyeꞌdꞌde. Masala mafünügü nja koꞌdo taꞌbilli. Amiin.
6 Taalo aꞌa niki aꞌda, tumma na Masala ka tamiꞌdaana no kaama. Taalo kadaada ma Israyil ka Israyil nyeꞌdꞌde. 7 Taalo laala ya Abrahiim ka laala tiya Abrahiim nyeꞌdꞌde. Masala miki Abrahiim, “Ara laala tanna küdü ana Ishak.” 9.7 Takwiin 21.12 8 Taalo laala ma tuuꞌda ya, laala ma Masala, lakiini laala ma timiꞌdi tumma eege kungngo a Masala ka tümmü eege kada laala tiya Abrahiim. 9 A timiꞌdi tumma kiki kungngo, “Ara aꞌa töꞌdö a ꞌbuugu kafiigi kungngo a Sara teene ꞌbiiꞌbala.” 9.9 Takwiin 18.10, 14 10 Taalo sugi ma tumma eege kungngo, lakiini Rifiga magüröönö nja ömöꞌdï unggodho, pupa yaaja Ishak. 11 A kene ka tüfürü tageenedene, taalo küünï eema ya aꞌdiila ya nja tiya atoroko ya, amang ka tumma tanno Masala ka tagesse no tütü ka ööye miini, 12 taalo a tumma alinggo, lakiini kudumma tümmüneene tanno iini. Miki Masala a Rifiga, “Ara ꞌbiiꞌbala ya idhilli ya tüünï tadasaga ada ya dhabbu ya.” 9.12 Takwiin 25.23 13 Afa ma tiya sorne ka tiki aꞌda, “Nasaasa aꞌa Yaguub nanu ka Iiso.” 9.13 Malaki 1.2–3
14 Ara angnga tiki nya? Masala müünï ada kadu könö kuꞌbu? Kaw. 15 Kudumma Masala ka tiki a Müüsa,
“Ara aꞌa tana ꞌbangnga ma ömöꞌdï tiya eede ka asaasa kana ꞌbangnga miini ya,
nana muuyu ma ömöꞌdï tiya eede kana muuyu miini ya.” 9.15 Töꞌdö kürö 33.19
16 Lakiini taalo tumma ma eedi tiya ömöꞌdï nja nïïmö tiya iini ka asaasa ya, lakiini ꞌbangnga ma Masala unggodho oogo. 17 Kudumma sorne ka tiki a Faröön, “Naꞌdiniga aꞌa oꞌo koꞌdo amang ka türü tanno eede tussu adene küdü amang ka eere tiya eede tafara ka ꞌbuugu ka oona ïnꞌdïlï kungngo.” 9.17 Töꞌdö kürö 9.16 18 Oogo mana ꞌbangnga ma ömöꞌdï tiya oono ka asaasa ya, manangnga nanggeedi na kadu töccö ka takïdhö.
19 Ara aaga tiki aꞌa aꞌda, “Minna agu Masala mümmü angnga ana eedi? Mada iꞌi yungngo ara tambaanya türü noono?” 20 Oꞌo na mada napadaga tumma a Masala? Nïïmö ya arüꞌbü adene ya ara tiki ömöꞌdï tiya arüꞌbü iꞌi ya, “Minna agu oꞌo natarüꞌbü aꞌa kungngo?” 9.20 Asaiya 29.16; 45.9 21 Ömöꞌdï ya arüꞌbü tamꞌbala ya ꞌdee, taalo üünï ma eyi tiya iini? Arüꞌbü nïïmö ya aꞌdiila arüꞌbü ya toroko ya. 22 Iꞌi yungngo a Masala ka tagüünï, oogo masaasa tala tagorooꞌbo noono nja türü tanno oono, ma idhi oona kuꞌbu tafifinni ana eema ma tagorooꞌbo ma tara taama. 23 Oogo afeꞌde masaasa tala tüüsü ma tïdhïndhï noono na dhabbu no, na küünïnja kaja ka oona kada nïïmö ma ꞌbangnga tammo oono angnga yoono ka tindinaana angnga kuꞌbu ma tïdhïndhï tanno oono no. 24 Oogo magümmünü angnga afeꞌde aꞌda taalo angnga ka Yahüüdü angnga ka kajeene afeꞌde. 25 Afa moono ka tiki ka sorne ma Hawsha,
“Ara aꞌa tümmünü kadu no taalo ka kadu tanno eede no kada kadu tanno eede no,
eede ka titaalo nasaasa oogo mo ara aꞌa tümmü oogo kada tammo eede ka asaasa oogo mo.
26 ꞌBuugu yeene kara tiki eene kide aꞌda,
‘Taalo aaga ka kadu tanno eede,
ara aaga tana eere aꞌda laala ya Masala tammo efe ka ꞌdï mo.’ ”
27 Asaiya tageema tumma ma kadu ma Israyil,
“Sa aaga tagöje nja ndamugu ma to
ara türeene miini toolonadene.
28 Kudumma Uugaara mara tapusu kadu na ka ꞌbüdhülü no.” 9.28 Asaiya 10.22–23
29 Asaiya ageema iki,
“Üürü taalo Uugaara ma nasigira mafa ka laala ya,
ara angnga ta kafeene nja Sadöma angnga ta kafeene nja Amuura.” 9.29 Asaiya 1.9
Israyil nja Almasiihi
30 Ara angnga tiki nya? Kajeene na taalo kasi ka taꞌdiila keere no, kaduna taꞌdiila lakiini a tamma ka Masala. 31 Lakiini Israyil no ïïsö ka serïye keere no, ka taꞌdiila no taalo kambaanya tala serïye ya aꞌdiila ya koona. 32 Amana? Kudumma eene ka tagalinggo nggeege aꞌda taalo tamma kene ka eedi, lakiini afeene afa linggo ma serïye, kïkïrï ka seene ka mïsï tammo kara ka fïïnï mo. 33 Afa ma sorne ka tiki,
“Aꞌa nungngo nara tanangnga mïsï ma taseene ka Sahyüün ka kadu ka fïïnï
nja mïsï ma taꞌdïnggö,
ömöꞌdï ya amma kini ya taalo ara tana modolo.” 9.33 Asaiya 8.14; 28.16