21
Jesús ma, ni kenda ya nuu uja tee ka ndikin ya ma
1 Nuu ni jinu sukan ma, Jesús ma, ni kenda ya in‑ka jichi nuu ka iyo tee ka ndikin ya ma yu'u mar nani Tiberias ma. Te sa'a ni kenda ya:
2 Ka iyo tutu Simón Pedro ma, Tomás tee ni ka yo xnani i Kuati ma, Natanael tee ñuu Caná ja iyo i ñuu Galilea ma, sa'ya tee kúu Zebedeo ma, ji'in uu‑ka tee ka ndikin ya ma.
3 Te Simón Pedro ma, jiña'a de:
―Kí'in sa jin tava sa tiaka ―kúu de jiña'a de.
Te ni ka ndakone'e tee ka iyo ji'in de ma:
―Saña tna, suni jin koo tna o ―ka kuu de ka jiña'a de.
Te kuan koo de, te ni ka ka koo de nuu barcu de ma, kovaa jakuaa yukan ñatuu kuiti na tiaka ni ka tava de.
4 Nuu jâ ve ndii ma, Jesús ma, ni kenda ya yu'u ndute ma, kovaa tee ka ndikin ya ma, masu nde ka ndakuni de ya ja maa ya kúu.
5 Jesús ma, ni jikan‑tnu'u ya:
―Ndijin, ¿ñatuu kuiti na tiaka ka tava ni? ―kúu ya jiña'a ya.
Te ni ka ndakone'e de:
―Ñatuu kuiti ―ka kuu de ka jiña'a de.
6 Jesús ma, jiña'a ya:
―Jin skee ni ñunu ni a xiñi barcu a ichi kua'a a, te jin tava kua'a ni tiaka ―kúu ya jiña'a ya.
Te sukan ni ka sa'a de. Sani te ñatuu ka kundee‑ka de jin ndatava de ñunu de ma, vaa kua'a xeen tiaka ni jaku'un.
7 Sani te in tee ni yo ndikin ya ma, tee ni yo kutoo xeen Jesús ma, jiña'a de Pedro ma:
―¡Iya Tátnuni ma kúu ya! ―kúu de jiña'a de.
Yika ni jiniso'o Simón Pedro ma ja maa Iya Tátnuni ma kúu ya, te ni ndinuu kunu de su'nu de ma, vaa iyo vichi de nkuu, sani te ni kêe de nuu ndute ma.
8 Te jaku‑ka tee ka ndikin ya ma, ni ka ndenda koo de yu'u ndute ma ji'in barcu de ma ka ñu'u ka ñu'u‑nka de ñunu de ma, vaa ñu'u chitu kuiti tiaka, te visi cientu‑ka metro sana jin nde koo de yu'u ndute ma.
9 Te nuu ni ka nde koo de nuu ñu'ú ma, te ni ka jini de ja jâ ni tna'a ñu'u, te yoxtnee in tiaka ji'in xtatila.
10 Jesús ma, jiña'a ya:
―Ki xsia'a ni jaku tiaka yika ni ka tava ni a ―kúu ya jiña'a ya.
11 Simón Pedro ma, ni kaa de nuu barcu de ma, te ni tnii de ñunu ñu'u tiaka na'nu ma, te ni ñu'u de onde yu'u mar ma. Te cientu uu xiko uxi uni (153) ti kúu. Te visi kua'a xeen ti kúu, kovaa ñatuu ni te'nde ñunu ma.
12 Jesús ma, jiña'a ya:
―Ne'e koo ni, te jín kasi ini o ―kúu ya jiña'a ya.
Ni‑in tee ka ndikin ya ma, ñatuu ka kusaa ini de ja jin kakan‑tnu'u de na in kúu ya, vaa jâ ka jini de ja maa Iya Tátnuni ma kúu ya.
13 Sani te Jesús ma, ni jan tu'va ya, te ni tnii ya xtatila ma, te ni wa'a ya de, te suni sukan ni tnii ya tiaka ma, te ni wa'a ya de.
14 Cha'a kúu ja ku‑uni jichi ja ni kenda ya nuu tee ka ndikin ya ma, ja ni ndateku ya ma.
Jesús ma, ni ndatnu'u ya ji'in Simón Pedro ma
15 Nuu ni jinu ni ka jasi ini de ma, Jesús ma, ni jikan‑tnu'u ya Simón Pedro ma:
―Simón sa'ya Juan, ¿kútoo xeen‑ka ña'a ni sana tna'a cha'a? ―kúu ya jiña'a ya.
Pedro ma, ni ndakone'e de:
―Saa vi, Señor, maa ni jini ja kútoo xeen ña'a sa ―kúu de jiña'a de.
Jesús ma, jiña'a ya:
―Ko koto va'a ni ñayii ka kuu lelu sa a ―kúu ya jiña'a ya.
16 Ni ndakan‑tnu'u tuku ya de ja ku‑uu jichi:
―Simón sa'ya Juan, ¿kútoo ña'a ni? ―kúu ya jiña'a ya.
Pedro ma, ni ndakone'e de:
―Saa vi, Señor, jâ jini maa ni ja kútoo ña'a sa ―kúu de jiña'a de.
Jesús ma, jiña'a ya:
―Ko koto va'a ni ñayii ka kuu ndikachi sa a ―kúu ya jiña'a ya.
17 Ja ku‑uni jichi ni jikan‑tnu'u ya de:
―Simón sa'ya Juan, ¿kútoo ña'a ni? ―kúu ya jiña'a ya.
Pedro ma, ni kuxii ini de, vaa ja ku‑uni jichi kúu ja ni jikan‑tnu'u ya de nú kútoo de ya, te ni ndakone'e de:
―Señor, maa ni jini ndaka, te jini ni ja kútoo ña'a sa ―kúu de jiña'a de.
Jesús ma, jiña'a ya:
―Ko koto va'a ni ñayii ka kuu ndikachi sa a.
18 Ja ndaa ja ndaa ká'an sa, nuu ni iyo jaa‑ka ni ma, ni yo nukone'nu maa ni sa'ma ni ma, sukan‑va'a ki'in ni ndenu kúni ni ma. Kovaa nuna kuu nija'nu ni, skuili ni nda'a ni a, te in‑ka ñayii ndaku'ni chii ni a, te jin xsia'a ña'a i nuu ñatuu kúni ni ja ki'in ni ma ―kúu ya jiña'a ya.
19 Ja ni ka'an ya sukan ma, Jesús ma, yikuu ya káxtnu'u ya naxe jin sa'a ñayii ma Pedro ma kivi kûu de ma, te ja sukan ndo'o de ma, te koo jayiñu'u nuu Su'si ma. Sani te jiña'a ya:
―¡Kondikin ña'a ni! ―kúu ya jiña'a ya.
Ni jiña'a Jesús ma nuu Pedro ma ja má ko ndi ini de sukan ndo'o in‑ka ñayii ma
20 Ja ni konenuu Pedro ma, ni jini de ja ndandikin in‑ka tee ka ndikin ya ma, tee ni yo kutoo xeen Jesús ma. Te tee yukan chi maa tee ni iyo xiñi Jesús ma kivi ni ka kuxini ya ji'in ndaka de ma kúu de, te maa de kúu tee ni jikan‑tnu'u sa'a: “Señor, ¿na in kúu tee ke'en‑su'va ña'a ma?”
21 Nuu ni jini Pedro ma de, ni jikan‑tnu'u de Jesús ma:
―Señor, te tee ya'a, ¿naxe ko kuu de? ―kúu de jiña'a de.
22 Jesús ma, ni ndakone'e ya:
―Nú kúni sa ja koteku de onde kivi ndii sa ma, te ndijin, ¿naku ndí ini ni? Ndijin, kondikin ña'a ni ―kúu ya jiña'a ya.
23 Chukan kúu ja ni jitenuu tnu'u ma ne'un ndaka ñayii ka ndikin ya ma ja tee yukan tee ni yo ndikin ya ma, masu kûu de. Kovaa Jesús ma, masu ni ka'an ya ja masu kûu de. Ja ni ka'an ya ma kúu: “Nú kúni sa ja koteku de onde kivi ndii sa ma, má ko ndi ini ni.”
24 Te tee ya'a kúu maa tee ni yo ndikin ya ma, te ndáka'an de sukan ni kuu ma, te ni tee de sa'a, te ka jini o ja tnu'u ndáka'an de ya chi tnu'u ndaa tnu'u ndija kúu.
25 Kua'a‑ka ja ni sa'a Jesús ma. Nute ni ka tee sa ndaka sukan ni sa'a Jesús ma chi jani ini sa ja masu kanda ni‑ka'nu ñuu ñayivi a jin ku'un libru jin kuva'a ma.
Te sukan kó kuu.